“Ndi Nyina wa Jambo”: Bikira Mariya i Kibeho

Inyigisho yo ku wa 28 Ugushyingo 2019: Turahimbaza Bikira Mariya Umwamikazi wa Kibeho « Nyina wa Jambo »

Amasomo: 1º. Iz 7, 10-14; Zab 35 ( 34); Gal 4,3-7; Yoh 1,1-5.9-14

Ndi Nyina wa jambo

Bavandimwe Kristu Yezu akuzwe, ku itariki 29 Kamena 2001, nyuma y’imyaka igera kuri makumyabiri Bikira Mariya abonekeye i Kibeho, Umushumba wa Diyosezi ya Gikongoro, ahereye ku byagezweho mu bushakashatsi bwakozwe n’akanama kari gashinzwe gukurikirana iby’iryo bonekerwa yatangarije abantu bose icyemezo gikemura burundu iby’ibonekerwa ry’i Kibeho yemeza ko Bikira Mariya yahabonekeye koko.

Muri benshi bavugwa ko babonekewe i Kibeho hatangajwe ko abakwiye kwizerwa ari abakobwa batatu Bikira Mariya yihishuriye ko ari « Nyina wa Jambo ». Abo bakobwa ni Alufonsina Mumureke, Nataliya Mukamazimpaka na Mariya Klara Mukangango ; babonekewe mu myaka ibiri ya mbere, ni ukuvuga mbere y’uko umwaka w’1983 urangira.

Bavandimwe umunsi nk’uyu ni umwanya Kiliziya iba yongeye kuduha ngo twongere tugaruke ku butumwa Umubyeyi w’Imana Nyina wa Jambo I Kibeho yatuzaniye. Ubutumwa budukangura kandi bukadushishikariza gukomera ku Mwana we Yezu Kristu.

Ubwo butumwa bwa Bikira Mariya i Kibeho bukubiye mu ngingo zikurikira :

  • Abantu nibisubireho bidatinze, bagarukire Imana.
  • Abantu bagomba gusenga ubutarambirwa basabira isi kugira ngo ihinduke kuko imeze nabi cyane ikaba igiye kugwa mu rwobo.
  • Bikira Mariya afite agahinda kenshi kubera ukwemera guke n’ukutihana biranga abantu b’iki gihe. Kuko badohotse ku muco mwiza, bakishora mu ngeso mbi bishimisha mu kibi no guhora bica amategeko y’Imana.
  • Abantu nibashishoze cyane kuko ukwemera n’ubuhakanyi bizaza mu mayeri.
  • Abantu nibamenye agaciro k’ububabare n’umwanya wabwo mu kubaho k’umuntu no mu kubaho gikristu.
  • Abantu nibasenge ubutitsa basabira isi kandi nta buryarya kuko benshi batagisenga n’abasenga ntibabikore uko bikwiye. Bityo abasenga nibabitoze abandi kandi banabikore mu mwanya w’abatabikozwa.
  • Abantu nibubahe kandi biyambaze Umubyeyi Bikira
  • Abantu nibavuge ishapure y’ububabare burindwi bwa Bikira Mariya.
  • Bikira Mariya yifuje kubakirwa Ingoro y’urwibutso i Kibeho.
  • Abakristu nibasenge ubutitsa basabira Kiliziya kuko amakuba akomeye ayitegereje mu bihe biri imbere.

Kiliziya umubyeyi wacu ntihwema kwibutsa twe twese abana bayo ko ubutumwa bwa Bikira Mariya aho yagiye abonekera hose bugenewe buri muntu no mu bihe byose. Kuko Bikira Mariya atagenzwa no gutanga inyigisho nshya, ahubwo yaje kutwibutsa ku buryo bwumvikana ibyo twari twaribagiwe bityo akatuburira ngo tubashe kwisubiraho no kugarukira Imana.

Ubutumwa atubwira ni na bwa bundi bukubiye mu Nkuru Nziza twazaniwe n’Umwana We, Umwami n’Umukiza wacu Yezu Kristu nk’uko n’amasomo tuzirikana uyu munsi adufasha kuzirikana ku kwigira umuntu kwa Jambo w’Imana: Nuko Jambo yigira umuntu maze abana natwe. Uwo Jambo ni na We abahanuzi bo mu bihe bya kera bagiye bagarukaho nk’uko isomo rya mbere ryo mu Gitabo cya Izayi umuhanuzi cyabitubwiye: Dore ngaha Umwari asamye inda, akazabyara umuhungu, maze akazamwita Emanuweli.

Uwo mwana wagombaga kuzavuka ni na We Pawulo mutagatifu yatubwiye mu isomo rya kabiri, mu ibaruwa yandikiye abanyagalati: igihe cyagenwe kigeze, Imana yohereje Umwana wayo, avuka ku mugore, kandi avuka agengwa n’amategeko, kugira ngo acungure abari bakigengwa n’amategeko, maze duhabwe kuba abana Imana yihitiyemo.

Bavandimwe, umunsi nk’uyu, ni umunsi tugomba kuzirika ku Mahoro, Urukundo n’Ineza twaronkewe n’Umukiza wacu Yezu Kristu ari nabyo Umubyeyi adahwema kutwibutsa ko nta handi twakura ibyishimo atari mu gukurikiza Inkuru Nziza twazaniwe na Kristu. Ibyo bigatuma natwe tubiharanira kuri twe ubwacu ndetse no kubavandimwe bacu, tubivomye ku isoko, Jambo wigize Umuntu.

Nibyo Yohani umwanditsi w’Ivanjili yatwibukije muri aya magambo meza atangiza inyandiko ye agira ati: “Mu ntangiriro ya byose Jambo yariho, kandi Jambo yabanaga n’Imana, kandi Jambo akaba Imana. Ubwe mu ntangiriro yabanaga n’Imana. Ni we ibintu byose bikesha kubaho, nta n’ikiremwa na kimwe cyabayeho bitamuturutseho.”

Nkuko nta kiremwa na kimwe cyabayeho bitamuturutseho, ni nako nta mahoro, nta Rukundo, nta hirwe na mba muntu ashobora kugeraho atabigabiwe na We, kuko hanze y’Imana nta buzima.

Yohani akomeza atubwira ko muntu mu buhumyi bwe yagiye yanga kwakira Urumuri rwamurasiyeho akihamira mu mwijima. Niyo mpamvu no kuri uyu munsi mu mpande zimwe na zimwe z’isi amahoro ari aya ntayo. Benshi baricana, baragambanirana, baracura imigambi y’ububisha, bari mu ngeso mbi n’ibindi bibi byinshi kuko Urumuri rwabarasiyeho ariko bagahitamo kwigumira mu mwijima. Ni agahoma munwa aho Umukiza aza ntitubimenye n’ababimenye bakanga kumwakira.

Bavandimwe, uyu munsi twongeye kwibutswa ko turi abana b’Imana, abavandimwe ba Yezu Kristu, bityo tugasabwa kubaho tudategekwa n’ibigenga isi ahubwo tugengwa na Kristu we Rumuri . Bikira Mariya na We adusuye i Kibeho yatubwiye ko ari Nyina wa Jambo, niba rero turi abavandimwe ba Yezu, Mariya ni Umubyeyi wacu, nakomeze atubyare, atwirerere maze dukure, dukomere, tubyirukane ubwenge, twuzuye ubwitonzi, dufite n’ubutoni ku Mana.

Kuri uyu munsi twizihiza Nyina wa Jambo wadusuye iwacu I Kibeho, dusabe Nyagasani abane natwe, atugire inama y’icyo tugomba gukora cyiza, maze twishimire kuba abana b’Imana koko, barumuna ba Yezu n’abana ba Mariya Nyina wa Jambo.

NYAGASANI YEZU NABANE NAMWE!

Padiri Emmanuel NSABANZIMA, CUR / Diyosezi BUTARE.

Ba “Herodi” b’ubu nta bubasha bafite bwo guhagarika Ingoma y’Imana

Inyigisho yo ku wa kane w’icyumweru cya 30 Gisanzwe, umwaka w’igiharwe

Ku wa 31 Ukwakira 2019

Amasomo: Ef 6, 10-20; Zab 144 (143), 1-2a, 1a.2bcd, 9-10; : Lk 13, 31-35

Uyu munsi n’ejo ndirukana roho mbi nkize n’abarwayi, maze ku munsi wa gatatu nzabe ndangije.

Bavandimwe Kristu Yezu akuzwe,

Amagambo twumva mu Nkuru Nziza ya none, Yezu Kristu aratwumvisha uburyo abe bari mu butumwa bagomba kwitwara imbere y’ababatera ubwoba. Pawulo Mutagatifu mu isomo rya none ati: “nimugire ubutwari muri Nyagasani, mugire imbaraga ze zizabashoboza byose. Nimwambare intwaro zikomoka ku Mana, kugira ngo mubashe guhangara imitego ya Sekibi. Erega abanzi turwana si abantu, ahubwo abo turwana ni Ibikomangoma n’Ibihangange, n’Abagenga b’iyi si y’umwijima, n’izindi roho mbi zo mu kirere.

Ni byo koko uwemeye kuba Umuhamya n’umugaragu w’Inkuru Nziza ntabura ibicantege.

Mu ntego Papa wacu Fransisko yageneye uku kwezi kudasanzwe kw’Iyogezabutumwa turi gusoza, yibukije abakristu twese ko Batisimu twahawe yatugize Intumwa zo kwamamaza Inkuru Nziza. Nyamara hirya no hino ku isi twumva ko hari imyaka yeze yabuze abasaruzi kandi ababatijwe usanga ibitabo bya Kiliziya byuzuye.

Impamvu rero nta yindi ni uko abafarizayi na n’ubu barahari, kandi baza bihinduranyije maze bagatera ubwoba bavuga ko Herodi ashaka kwica buri wese ufite ishyaka ryo kwamamaza Inkuru Nziza, nuko n’uwabitekerezaga agahita abizinukwa.

Ni benshi bakangwa ni uko umwanya wabaye muke kandi babona uwo baha ibindi, ubuzima burahenze n’ibindi, akumva ko nafata umwanya wo kujya kwamamaza Ivanjili aba ataye umwanya, aba ahombye amafaranga kuko ngo igihe ni amafaranga ndetse hakaba n’ababigiramo abandi inama kugeza n’aho bababwira ko gusenga, gukorera Imana ari uguta igihe.

Ibyo byose by’ibicantege mu kwamamaza Inkuru Nziza, Yezu Kristu araduha igisubizo none; agira ati « Nimujye kubwira uwo muhari muti ‘Uyu munsi n’ejo ndirukana roho mbi nkize n’abarwayi, maze ku munsi wa gatatu nzabe ndangije. Ariko uyu munsi, ejo n’ejo bundi ngomba gukomeza urugendo rwanjye…”

Ngicyo igisubizo natwe tugomba gutanga imbere y’ibyo byose bigambiriye kuduca intege, ari ibigaragara n’ibitagaragara biyobya ubwenge bwacu, ugasanga bitesha benshi icyifuzo cyiza cyo kubera Kristu abahamya nk’uko twabyiyemeje muri Batisimu twahawe.

Dukomeze dusabire abo bose bafite umutima mwiza wo kwamamaza Inkuru Nziza, Nyagasani abakomereze umwete kugira ngo bazashobore gukomera ku munsi mubi, bazatsinde badacogoye.

 Nyagasani Yezu nabane namwe.

 Padiri Emmanuel Nsabanzima, Diyosezi Butare.

“Ntibyemewe ko umutunga”

Inyigisho yo ku wa gatandatu w’icyumweru cya 17 Gisanzwe, igiharwe C

Ku ya 03 kanama 2019

AMASOMO: Lev 25,1.8-17 ; Zab 67(66); Mt 14, 1-12

Bavandimwe, Kristu Yezu akuzwe!

Mu isomo ryo mu gitabo cy’Abalevi twumva none, turabwirwa uko abayahudi bizihizaga Umwaka wa Yubile. Ijambo ry’igihebureyi “Yubile” (Yobel), mbere na mbere risobanura ihembe ry’isekurume bakoreshaga bavuza impanda. Nuko bagatangaza batyo intangiriro y’Umwaka Mutagatifu wabaga buri mwaka wa 50.

Reka twigire kuri bariya ba israheli maze natwe turebe uko twagombye kwizihiza Yubile zacu:

Ihembe rivuga ku munsi w’imbabazi, umwaka wa Yubile rero ni umwaka w’imbabazi, uhamagarira kwinegura, kwisuzuma, kwirega, gusaba imbabazi no gutanga icyiru cy’ibitatunganyijwe, ikindi ni ugutanga imbabazi kuko gutanga biruta guhabwa. Umwaka wa Yubile ni Umwaka Mutagatifu, nkuko Data wo mu ijuru ari Intungane, natwe uduhamagarira guharanira ubutagatifu muri byose, igihe cyose n’aho turi hose. Ni umwaka wo guhimbaza ukubohorwa kw’abaturage bose, tukibohora kandi tukabohora abandi, nta mfungwa ku mutima, nta mucakara, twese tuba abana b’Imana bigenga, ubwo bwigenge ntibutugira ibyigenge cyangwa ibyigomeke ahubwo buduha guhitamo ikiri icyiza no kuzinukwa ikibi.

Mu mwaka wa Yubile , buri wese yagombye gusanga umuryango we. Mbere na mbere ni umuryango avukamo hagakurikiraho Kiliziya n’ahandi hose umuntu aba. Abana b’ibirara bakisubiraho bagasubira kwa se mu muryango, imiryango yasenyutse igasabirwa kwisanasana no kwiyunga, abahukanye bagacyurwa mu ngo zabo, abatumvikana bagasabwa kwiyunga, uwataye iwabo agasubira mu muryango, abakristu baguye cyangwa bifungiye amasakramentu bakegerwa maze bagasanga umuryango wabo Kiliziya. Muri Yubile, nta kwigunga, nta kuba nyamwigendaho, nta kuba umusuhuke. Mu mwaka wa Yubile umuntu asubira mu isambu ye, amasambu yakodeshejwe yagombye kugarukira nyirayo, ibyo byakorwaga ari ukugira ngo abakire batigarurira amasambu yose, naho abandi ntibagire icyo basigarana, nta kuvanwa mu byawe.

Niba hari aho biri, umuntu yaratwaye ikintu cy’undi, niba hari uwahuguje mugenzi we, yubile cyari igihe cyiza cyo gusubiza iby’abandi. Muri uwo mwaka se birindaga iki? “Muzirinde kubiba imirima yanyu, muzirinde kuyisaruramo ibyimejeje cyangwa gusoroma imbuto zo ku mizabibu itariciwe” kuko bigenewe kuramira abashonji no gutunga inyoni zirya kandi zitarima. Uwo mwaka batungwaga n’ibizimeza mu mirima kugira ngo berekane ko Imana ikungahaza inshuti yayo isinziriye kandi ko ubuvandimwe buruta byose. Ubwo buvandimwe bugomba kugaragara hose kugeza no mu bucuruzi. “Uzirinde kumwungukaho, ntimuzahendane muri abavandimwe, kugura umurima ni nko kugura incuro uzasarura uwo murima. Ntihakagire umuntu wungukira kuri mugenzi we”.

Gukora ibyo byose byagombaga guturuka ku gitinyiro babaga bafitiye Uhoraho:”Muzatinye Imana yanyu”. Si ukugirira Imana ubwoba kuko idukangaranya cyangwa se kuko idutera ubwoba, si uko idutitiza tugahinda umushyitsi, ahubwo ni igitinyiro cyiza, kirimo urukundo n’icyubahiro. Tugaragaza ko dutinya Imana iyo twubahiriza amategeko yayo, tugafata umuco Yezu yadutoje, ibyo bituma tugira amahoro kandi ayo mahoro akagera ku bandi anyuze muri twe. Tukubaha Imana, tukubaha abayo n’ibyayo.

Mu kuzirikana kuri iyi nyigisho duhabwa n’uburyo abayahudi bizihizaga Yubile, bidufasha kandi guharanira ukuri no kukunambaho nka Yohani Batista twumvise mu Ivanjili ya none. Yabaye umugabo wo guhamya ukuri kugeza abihowe, acibwa umutwe azira gucyaha icyaha no kucyamagana k’umugaragaro. Natwe nibwo butumwa duhamagarirwa muri iki gihe cya none kuko hari benshi bahisemo kwigira intumwa za sekinyoma. Ugasanga cyo kimwe na Herodi hari abitwaza ububasha bafite bakamena amaraso y’inzirakarengane. Abandi bakitwara nk’uriya mugore wananiwe kumva inama nziza agirwa na Yohani ngo yisubireho, yumve ukuri kumwerekeyeho yisubireho ahubwo agahitamo kwica amatwi no guhindura ikibazo abamubwira gukemura ikibazo afite, kugeza ubwo ahigiye kumwicisha. Ntitwakwibagirwa kandi n’abandi batamenya gushungura ngo barebe ikiza mubyo babwira nk’uriya mukobwa ugirwa inama mbi kandi akayikurikiza buhumyi.

Bavandimwe, abo bose tubasabire natwe tutiyibagiwe kandi dusabe Nyagasani Imana, aduhe ubutwari butuma duharanira ukuri no kukwamamaza uko byaba biri kose. Dusabirane kandi guhora tumugarukira uko bwije nuko bukeye. Nk’uko umwaka wa Yubile twumvise wabihamagariraga abaturage bose, natwe biratureba none.

Nyagasani Yezu nabane namwe!

Padri Emmanuel NSABANZIMA, GISAGARA/BUTARE/RWANDA.

 

 

“Uriya si umwana wa wa mubaji?”

Inyigisho yo ku wa gatanu w’icyumweru cya 17 Gisanzwe, igiharwe C

Ku ya 02 kanama 2019

AMASOMO: Lev 23,1.4-11.15-16.27.34b-37; Zab 81(80); Mt 13, 54-58

Bavandimwe, Kristu Yezu akuzwe!

Mu Ivanjili ya none turabwirwa Yezu ajya iwabo i Nazareti n’uko bamwakiriye. Burya akenshi abantu ibitworohera nibyo duha agaciro, maze aho kubona umuntu uko ari tukamurebera mu ndoredwamo y’uko twamubonye mu bihe byahise.  Nibyo byabaye kuri bariya banyanazareti, Yezu yasuye nk’umwana uje iwabo, akabigisha neza ndetse abenshi muri bo bagafashwa n’iyo nyigisho, maze aho kugirango batere intambwe bemere ngo bakire, bahitamo gutangira kumwibaza, bati buriya buhanga abukura he? Ese aho si ibyo yihangishijeho? Aho kugira ngo bamwumve mu butumwa bwiza yabamamazagamo bahishurirwe uwo ari we, bahereye mu gutangara no gupinga. Ni uko umukiro wabanyuze mu myanya y’intoki kandi wari wabizaniye.

Mu myumvire ya kiyahudi yo muri kiriya gihe cya Yezu, bibwiraga ko Mesiya/Umukiza wasezeranywe azakomoka mu muryango w’ibikomerezwa. Nta n’umwe watekerezaga ko i Nazareti hazakomoka Umukiza nk’uwo, nk’uko Natanayeli yabihamije agira ati hari ikintu cyiza cyaturuka i Nazareti (Yh1,46). Ni muri urwo rwego, inyigisho za Yezu zabatunguye, batangira kuvugaguzwa, basakabaka ko bazi inkomoko ye ndetse n’abavandimwe be; aha bishaka kuvuga babyara be n’abandi bene wabo mu miryango ko babazi kandi nta butyoza babaziho, ibyo bibabera intandaro yo kutemera; bityo Yezu ntiyaba akibakoreye ibitangaza nk’ibyo yakoreye ahandi hose yagiye anyura.

Bavandimwe, natwe mu buzima bwacu bwa buri munsi, ni kenshi iby’Imana bidutungura. Ikingenzi rero si ugupinga nka bariya banyanazareti, ahubwo ni uguca bugufi tukakira ugushaka kw’Imana nka Mariya, tukemera gusanisha ugushaka kwacu n’ukw’Imana aho gushaka gusanisha ukw’Imana n’ukwacu. Si twe tugomba guharanira ko icyo dushaka gikorwa ahubwo tugomba guharanira ko icyo Imana ishaka gikorwa munsi nk’uko gikorwa mu ijuru, nk’uko dukunda kubisubiramo mu isengesho rya Dawe uri mu ijuru.

Bariya banyanazareti, ntibashoboye kugera aho ngo bemere ko Imana yabikoze uko yabigennye kandi yabigennye uko ishaka ngo babyakire, baheze mu myumvire yabo maze ubujiji bwabo bubaheza mu bupinzi bushingiye ku ndakuzi, ngo Yezu ni  umwana wa wa mubaji. Ntibigeze batera intamwe nk’iya Petero ngo bamubonemo Kristu Umwana w’Imana ihoraho.

Kuri uyu munsi Nyagasani aduhaye umwanya wo kuzirikana kuri iri Jambo, natwe twikebuke turebe niba ntaho “ndakuzi” ijya itubuza kwakira ibyiza Imana yatugeneye kandi icisha mu bikoresho yishakiye uko yabigennye, abo ni abasaserdoti n’abandi bogezabutumwa idutumaho mu ntege nke zabo dusanzwe tubaziho byaba ari byo cyangwa ibyo tubakekaho.

Dusabe inema ya gufunguka amaso n’amatwi y’imitima yacu tubashe kwakira Imana uko ije idusanga, twoye kuyitiranya n’ibyo twamenye kera cyangwa dukeka ubu.

Abatagatifu duhimbaza uyu munsi: Euzebiyo, Yulitani Emari na Stefano, badusabire.

Nyagasani Yezu nabane namwe!

Padri Emmanuel NSABANZIMA, GISAGARA/BUTARE/RWANDA.

Curabitur pulvinar ante. commodo fringilla sed