Catégories
Inyigisho

“Ntibyemewe ko umutunga”

Inyigisho yo ku wa gatandatu w’icyumweru cya 17 Gisanzwe, igiharwe C

Ku ya 03 kanama 2019

AMASOMO: Lev 25,1.8-17 ; Zab 67(66); Mt 14, 1-12

Bavandimwe, Kristu Yezu akuzwe!

Mu isomo ryo mu gitabo cy’Abalevi twumva none, turabwirwa uko abayahudi bizihizaga Umwaka wa Yubile. Ijambo ry’igihebureyi “Yubile” (Yobel), mbere na mbere risobanura ihembe ry’isekurume bakoreshaga bavuza impanda. Nuko bagatangaza batyo intangiriro y’Umwaka Mutagatifu wabaga buri mwaka wa 50.

Reka twigire kuri bariya ba israheli maze natwe turebe uko twagombye kwizihiza Yubile zacu:

Ihembe rivuga ku munsi w’imbabazi, umwaka wa Yubile rero ni umwaka w’imbabazi, uhamagarira kwinegura, kwisuzuma, kwirega, gusaba imbabazi no gutanga icyiru cy’ibitatunganyijwe, ikindi ni ugutanga imbabazi kuko gutanga biruta guhabwa. Umwaka wa Yubile ni Umwaka Mutagatifu, nkuko Data wo mu ijuru ari Intungane, natwe uduhamagarira guharanira ubutagatifu muri byose, igihe cyose n’aho turi hose. Ni umwaka wo guhimbaza ukubohorwa kw’abaturage bose, tukibohora kandi tukabohora abandi, nta mfungwa ku mutima, nta mucakara, twese tuba abana b’Imana bigenga, ubwo bwigenge ntibutugira ibyigenge cyangwa ibyigomeke ahubwo buduha guhitamo ikiri icyiza no kuzinukwa ikibi.

Mu mwaka wa Yubile , buri wese yagombye gusanga umuryango we. Mbere na mbere ni umuryango avukamo hagakurikiraho Kiliziya n’ahandi hose umuntu aba. Abana b’ibirara bakisubiraho bagasubira kwa se mu muryango, imiryango yasenyutse igasabirwa kwisanasana no kwiyunga, abahukanye bagacyurwa mu ngo zabo, abatumvikana bagasabwa kwiyunga, uwataye iwabo agasubira mu muryango, abakristu baguye cyangwa bifungiye amasakramentu bakegerwa maze bagasanga umuryango wabo Kiliziya. Muri Yubile, nta kwigunga, nta kuba nyamwigendaho, nta kuba umusuhuke. Mu mwaka wa Yubile umuntu asubira mu isambu ye, amasambu yakodeshejwe yagombye kugarukira nyirayo, ibyo byakorwaga ari ukugira ngo abakire batigarurira amasambu yose, naho abandi ntibagire icyo basigarana, nta kuvanwa mu byawe.

Niba hari aho biri, umuntu yaratwaye ikintu cy’undi, niba hari uwahuguje mugenzi we, yubile cyari igihe cyiza cyo gusubiza iby’abandi. Muri uwo mwaka se birindaga iki? “Muzirinde kubiba imirima yanyu, muzirinde kuyisaruramo ibyimejeje cyangwa gusoroma imbuto zo ku mizabibu itariciwe” kuko bigenewe kuramira abashonji no gutunga inyoni zirya kandi zitarima. Uwo mwaka batungwaga n’ibizimeza mu mirima kugira ngo berekane ko Imana ikungahaza inshuti yayo isinziriye kandi ko ubuvandimwe buruta byose. Ubwo buvandimwe bugomba kugaragara hose kugeza no mu bucuruzi. “Uzirinde kumwungukaho, ntimuzahendane muri abavandimwe, kugura umurima ni nko kugura incuro uzasarura uwo murima. Ntihakagire umuntu wungukira kuri mugenzi we”.

Gukora ibyo byose byagombaga guturuka ku gitinyiro babaga bafitiye Uhoraho:”Muzatinye Imana yanyu”. Si ukugirira Imana ubwoba kuko idukangaranya cyangwa se kuko idutera ubwoba, si uko idutitiza tugahinda umushyitsi, ahubwo ni igitinyiro cyiza, kirimo urukundo n’icyubahiro. Tugaragaza ko dutinya Imana iyo twubahiriza amategeko yayo, tugafata umuco Yezu yadutoje, ibyo bituma tugira amahoro kandi ayo mahoro akagera ku bandi anyuze muri twe. Tukubaha Imana, tukubaha abayo n’ibyayo.

Mu kuzirikana kuri iyi nyigisho duhabwa n’uburyo abayahudi bizihizaga Yubile, bidufasha kandi guharanira ukuri no kukunambaho nka Yohani Batista twumvise mu Ivanjili ya none. Yabaye umugabo wo guhamya ukuri kugeza abihowe, acibwa umutwe azira gucyaha icyaha no kucyamagana k’umugaragaro. Natwe nibwo butumwa duhamagarirwa muri iki gihe cya none kuko hari benshi bahisemo kwigira intumwa za sekinyoma. Ugasanga cyo kimwe na Herodi hari abitwaza ububasha bafite bakamena amaraso y’inzirakarengane. Abandi bakitwara nk’uriya mugore wananiwe kumva inama nziza agirwa na Yohani ngo yisubireho, yumve ukuri kumwerekeyeho yisubireho ahubwo agahitamo kwica amatwi no guhindura ikibazo abamubwira gukemura ikibazo afite, kugeza ubwo ahigiye kumwicisha. Ntitwakwibagirwa kandi n’abandi batamenya gushungura ngo barebe ikiza mubyo babwira nk’uriya mukobwa ugirwa inama mbi kandi akayikurikiza buhumyi.

Bavandimwe, abo bose tubasabire natwe tutiyibagiwe kandi dusabe Nyagasani Imana, aduhe ubutwari butuma duharanira ukuri no kukwamamaza uko byaba biri kose. Dusabirane kandi guhora tumugarukira uko bwije nuko bukeye. Nk’uko umwaka wa Yubile twumvise wabihamagariraga abaturage bose, natwe biratureba none.

Nyagasani Yezu nabane namwe!

Padri Emmanuel NSABANZIMA, GISAGARA/BUTARE/RWANDA.

 

 

Catégories
Inyigisho

“Uriya si umwana wa wa mubaji?”

Inyigisho yo ku wa gatanu w’icyumweru cya 17 Gisanzwe, igiharwe C

Ku ya 02 kanama 2019

AMASOMO: Lev 23,1.4-11.15-16.27.34b-37; Zab 81(80); Mt 13, 54-58

Bavandimwe, Kristu Yezu akuzwe!

Mu Ivanjili ya none turabwirwa Yezu ajya iwabo i Nazareti n’uko bamwakiriye. Burya akenshi abantu ibitworohera nibyo duha agaciro, maze aho kubona umuntu uko ari tukamurebera mu ndoredwamo y’uko twamubonye mu bihe byahise.  Nibyo byabaye kuri bariya banyanazareti, Yezu yasuye nk’umwana uje iwabo, akabigisha neza ndetse abenshi muri bo bagafashwa n’iyo nyigisho, maze aho kugirango batere intambwe bemere ngo bakire, bahitamo gutangira kumwibaza, bati buriya buhanga abukura he? Ese aho si ibyo yihangishijeho? Aho kugira ngo bamwumve mu butumwa bwiza yabamamazagamo bahishurirwe uwo ari we, bahereye mu gutangara no gupinga. Ni uko umukiro wabanyuze mu myanya y’intoki kandi wari wabizaniye.

Mu myumvire ya kiyahudi yo muri kiriya gihe cya Yezu, bibwiraga ko Mesiya/Umukiza wasezeranywe azakomoka mu muryango w’ibikomerezwa. Nta n’umwe watekerezaga ko i Nazareti hazakomoka Umukiza nk’uwo, nk’uko Natanayeli yabihamije agira ati hari ikintu cyiza cyaturuka i Nazareti (Yh1,46). Ni muri urwo rwego, inyigisho za Yezu zabatunguye, batangira kuvugaguzwa, basakabaka ko bazi inkomoko ye ndetse n’abavandimwe be; aha bishaka kuvuga babyara be n’abandi bene wabo mu miryango ko babazi kandi nta butyoza babaziho, ibyo bibabera intandaro yo kutemera; bityo Yezu ntiyaba akibakoreye ibitangaza nk’ibyo yakoreye ahandi hose yagiye anyura.

Bavandimwe, natwe mu buzima bwacu bwa buri munsi, ni kenshi iby’Imana bidutungura. Ikingenzi rero si ugupinga nka bariya banyanazareti, ahubwo ni uguca bugufi tukakira ugushaka kw’Imana nka Mariya, tukemera gusanisha ugushaka kwacu n’ukw’Imana aho gushaka gusanisha ukw’Imana n’ukwacu. Si twe tugomba guharanira ko icyo dushaka gikorwa ahubwo tugomba guharanira ko icyo Imana ishaka gikorwa munsi nk’uko gikorwa mu ijuru, nk’uko dukunda kubisubiramo mu isengesho rya Dawe uri mu ijuru.

Bariya banyanazareti, ntibashoboye kugera aho ngo bemere ko Imana yabikoze uko yabigennye kandi yabigennye uko ishaka ngo babyakire, baheze mu myumvire yabo maze ubujiji bwabo bubaheza mu bupinzi bushingiye ku ndakuzi, ngo Yezu ni  umwana wa wa mubaji. Ntibigeze batera intamwe nk’iya Petero ngo bamubonemo Kristu Umwana w’Imana ihoraho.

Kuri uyu munsi Nyagasani aduhaye umwanya wo kuzirikana kuri iri Jambo, natwe twikebuke turebe niba ntaho “ndakuzi” ijya itubuza kwakira ibyiza Imana yatugeneye kandi icisha mu bikoresho yishakiye uko yabigennye, abo ni abasaserdoti n’abandi bogezabutumwa idutumaho mu ntege nke zabo dusanzwe tubaziho byaba ari byo cyangwa ibyo tubakekaho.

Dusabe inema ya gufunguka amaso n’amatwi y’imitima yacu tubashe kwakira Imana uko ije idusanga, twoye kuyitiranya n’ibyo twamenye kera cyangwa dukeka ubu.

Abatagatifu duhimbaza uyu munsi: Euzebiyo, Yulitani Emari na Stefano, badusabire.

Nyagasani Yezu nabane namwe!

Padri Emmanuel NSABANZIMA, GISAGARA/BUTARE/RWANDA.

Catégories
Inyigisho

Ntawe utera igitambaro gishya ku mwenda ushaje

Inyigisho yo ku wa gatandatu, icyumweru cya 13 Gisanzwe, kuwa 06 Nyakanga 2019

Amasomo: Intg27, 1-5. 15.29; Zab 135 (134); Mt 9, 14-17

Bavandimwe Kristu Yezu akuzwe,

Dukunze kuvuga ko Imana yandika ibigororotse ku mirongo yari igoramye. Iyi nkuru y’uburyarya bwa Rebeka ugerageza uko ashoboye ngo atware umugisha wa Ezawu awuheshe Yakobo, nkuko tubyumva mu isomo rya mbere rya none, bitera benshi kwibaza niba biri mu mugambi w’Imana.

Nyamara iyo dusomye neza Bibiliya, dusangamo n’ibindi bice bitandukanye, bitwereka ukuntu Imana inyuza umugambi wayo mu nzira tubona zisa nk’izitanoze mu maso yacu, ikoresha inzira zisuzuguritse ariko umugambi wayo ukagerwaho. Ntibikwiye kudutungura rero ko Imana mu gukomeza isezerano ryayo, mu mugambi wo gukiza abantu yifashisha buriya buriganya bwa Rebeka ngo inzira yateganyije zubahirizwe; Abrahamu-Izaki-Yakobo n’abandi kugera kuri Yezu Kristu we gasongero kiyuzuzwa ry’umugambi w’Imana wo gukiza abantu.

Imana mu mugambi wayo ishobora kwifashisha icyo tubona ko ari kibi, ariko igamije kutugeza ku cyiza, kuko ifite ubwo bubasha n’ubushobozi. Ibi kandi byakagombye kutubera impamvu y’amizero ko ibibi bitandukanye tubona mu isi, bidashobora kuburizamo umugambi mwiza Imana idufitiye, kuko Imana ishobora kubyifashisha ikatugeza ku byiza yaduteganyirije.

Ikindi iyi nkuru itwumvisha neza uko Imana ari umutegetsi utwara ibye mu bugenga bwe bwihariye. Mu kuzuza umugambi wayo ihamagara uwo ishatse, maze uyemereye ikamushoboza ibyayo. Ntiyita ku gihagararo, amavuko, indoro cyangwa imvugo…. Kuko ikora uko ishatse mu bugenga bwayo. Kuba Ezawu yaravutse ari uwa mbere sibyo bimuhesha gutorwa n’Imana ngo akomeze isezerano kuko ku Mana uwo ari we wese yavukana imbuto! Dusabwa kubyakira kuko ariko kwinjira mu mugambi w’Imana, nubwo akenshi bitugora nka bariya twumvise mu Ivanjili ya none.

Mu myumvire ya muntu kwakira ibishya biramugora, aba yifuza guhama mu byo asanganywe. Ibyo biterwa nuko akenshi ibishya bidusaba umuhate rimwe na rimwe tudasanganywe. Kubyakira rero, bigasaba kwitsinda no kurwanya ubunebwe.

Abigishwa ba Yohani bumvaga uburyo bwabo bwo gusiba kurya aribwo buboneye mu busabane n’Imana, ntibiyumvishe uburyo abigishwa ba Yezu bo badakurikira inzira nk’iyabo mu kubaha Imana basiba kurya.

Yezu mu kubasubiza ntabwo ahakana ko gusiba ari ngombwa, yewe nawe yagiye asiba kurya, ariko arerekana ko yazanye uburyo bushya bwo kubaha Imana budashingiye gusa kugusiba ahubwo bushingiye kuri We ubwe kuko ari We Nzira n’Ukuri n’Ubugingo. Ni uburyo bushya busaba n’inzira nshya.

Ubukristu ni inzira nshya y’ubuzima twazaniwe na Yezu Kristu. Yaje atuzaniye uburyo bushya bwo kumva Imana no kubana nayo, kandi azi neza ko bigoye gucengeza mu bantu ayo matwara mashya. Aratugira inama yo kurekura ibishaje tukakira ibishya: ‘ nta we utera igitambaro gishya kumwenda ushaje, kuko icyo kiremo cyakurura uwo mwenda, ukarushaho gucika.’ Hari ibyo dusabwa kurekura.

Iyo bitabaye ibyo, dushobora kwisanga mu mutego wo kwibwira ko dusenga Imana, nyamara twisengera ibyahise, twaraheze mu mateka nka cya kirondwe cyaheze ku ruhu kandi inka yarariwe kera!

Dusabirane ngo imyumvire yacu ibashe kwaguka yakire ibishya. Mu yandi magambo duhe Roho w’Imana ubwisanzure muri twe, adukoreremo kandi atwiyoborere; maze nk’umwanditsi wa Zaburi tugire tuti: “ Uhoraho menyesha inzira zawe, untoze kugenda mu tuyira twawe ” ( Zab 25,4).

Nyagasani Yezu nabane namwe!

Padri Emmanuel NSABANZIMA, GISAGARA/BUTARE/RWANDA.

 

Catégories
Inyigisho

Mbese aho sinamupfukiranye?

Inyigisho yo ku munsi mukuru wa Pentekositi, ku wa 09 kamena 2019

Amasomo: Intu 2, 1-11; Zab 104 (103); Rom 8, 8-17; Yh 14, 15-16.23b-26

“Twese turabumva bamamaza mu ndimi zacu bwite ibitangaza by’Imana”

Bavandimwe Kristu Yezu akuzwe, Nimugire Roho Mutagatifu,

Kuri uyu munsi turahimbaza umunsi mukuru ukomeye wa Pentekositi. Nk’uko byumvikana, ijambo Pentekositi si ikinyarwanda. Tugenekereje mu Kinyarwanda twaryita  “Mirongo itanu”. Uno munsi bawita Pentekositi kuko nyine uba nyuma y’iminsi mirongo itanu duhimbaje ibirori bya Pasika ya Nyagasani Yezu Kristu. Ni umunsi nk’abakristu duhimbaza Roho Mutagatifu amanukira ku Ntumwa aho zari ziteraniye i Yeruzalemu. Ni aho Yeruzaremu ibera umujyi w’Impano ya Roho Mutagatifu. Nk’uko Yezu Kristu yaharemeye Ukaristiya, akaba ari ho azukira, ni n’aho yasenderereje Roho Mutagatifu ku nyoko muntu, bihereye ku ntumwa ze yari yaritoreye, mbere yo gusubira mu ijuru akazisezeranya uwo Roho kandi akazishinga umurimo wo kumubera abahamya. Akababwira ko uhereye i Yeruzalemu ukagera ku mpera z’isi, bagomba kwigisha abantu bose ibyerekeye ukwisubiraho n’ibabarirwa ry’ibyaha mu izina rye, kuko nta rindi zina abantu bahawe ngo baronkeremo Umukiro usibye irya Yezu Kristu watsinze icyago n’urupfu. Guhimbaza Pentekositi kandi ni uguhimbaza Ivuka rya Kiliziya, umuryango mushya w’Imana.