Inyigisho nshya itanganywe ububasha

Inyigisho yo ku wa kabiri w’icyumweru cya 1 gisanzwe mbangikane

Tariki ya 14 Mutarama 2020

Bavandimwe, Kristu Yezu akuzwe!

Tugeze ku munsi wa kabiri w’igihe gisanzwe cy’umwaka wa Lirutujiya. Ejo twumvise Yezu atangira ubutumwa bwe atangaza Ingoma y’Imana, aduhamagarira kwisubiraho kandi anatora abigishwa be ba mbere. Uyu munsi turamubona mu isengero ry’i Kafarinawumu agaragaza ububasha bwe mu nyigisho no mu gikorwa cyo gukiza umuntu wahanzweho na roho mbi.

  1. Ububasha bugaragarira mu nyigisho

Ngo hari ku munsi w’isabato. Yezu yinjiye mu isengero i Kafarinawumu, maze arahigishiriza. Abamwumvise batangariraga inyigisho ze “kuko yabigishaga nk’umuntu ufite ububasha, utameze nk’abigishamategeko babo” (Mk 1, 22).

Ni byo koko, reka abarushe ububasha! Abari basanzwe babigisha bashingira ku byo na bo bari barabwiwe n’abandi, cyane cyane ibyo babwiwe n’abarimu babigishije mu mashuri banyuzemo. Ariko Yezu we ntiyashingiraga inyigisho ze ku byo yavanye mu mashuri. We Jambo w’Imana yavugaga ijambo riturutse ku Mana. We Mwana w’Imana, yabagezagaho Inkuru nziza ivubuka mu mutima w’Imana Data. Yezu nk’Uwatumwe n’Imana, yagezaga ku bamuteze amatwi ugushaka kw’Imana yamutumye. Yezu ni Kristu Umukiza. Yuzuye ububasha bwa Roho Mutagatifu. Ni yo mpamvu inyigisho ye yabaga itanganywe ubuhanga n’ububasha.

  1. Ububasha bugaragarira mu bikorwa

Imbaraga z’Ijambo rya Yezu zahise zigaragarira mu gikorwa cyo gukiza umuntu wari warahanzweho na roho mbi. Twumvise ukuntu mu gihe yigishaga, roho mbi yateye hejuru iti “Uradushakaho iki, Yezu w’i Nazareti? Waje kuturimbura! Nzi uwo uri we: uri Intungane y’Imana” (Mk 1, 24).

Noneho Sekibi ari we Sekinyoma yavuga ukuri ye! Koko Yezu yazanywe no kurimbura Sekibi n’ingoma yayo! Koko Yezu ni Intungane y’Imana! Aho ageze, aka Sekibi kaba kashobotse! Aho Yezu ari, Sekibi irahungabana ikomongana. Aho Yezu ahingutse, Sekibi irahunga. Yezu yahise ayikangara mu magambo make cyane, ati: “Ceceka, kandi uve muri uwo muntu!” (Mk 1, 25). Sekibi yahise ibebera, isohoka bwangu muri uwo muntu ivuza induru. Icyo gikorwa cyatumye ababibonye bumirwa, maze barabazanya bati: “Ibi ni ibiki? Mbega inyigisho nshya itanganywe ububasha! Arategeka na roho mbi, zikamwumvira!” (Mk 1, 27).

  1. Iyi nyigisho nshya ni twe igenewe uyu munsi

Bavandimwe, iyi nyigisho nshya itanganywe ububasha ni twe igenewe uyu munsi. Ntiduhere mu gutangara gusa nk’aba bantu bari mu isengero i Kafarinawumu. Ahubwo nitwiyegurire Yezu nyir’ububasha kugira ngo twere mu buzima bwacu imbuto zikomoka ku bubasha bwe.

Bavandimwe, nidukunde kwigishwa na Yezu. Nitwakire inyigisho ze. Niduhe Ijambo rye icyicaro mu buzima bwacu no mu mitima yacu. Koko rero Ijambo rya Yezu ryuje ububasha, ukuri n’ubuntu kuko ari ijambo ry’Imana ubwayo. Ni Ijambo nyabuzima: Yezu aravuga, ibyo avuze bikaba. Ijambo rye rirema bundi bushya, rizura abapfuye, rigasubiza ubuzima. Ijambo rya NyagasaniYezu rikiza abarwayi n’abamugaye b’amoko yose. Rimurikira intambwe zacu. Ijambo rya Yezu rigera ku mutima, ryomora ibikomere, rirahumuriza, rirakomeza, rigatanga n’amahoro. Nituryakirane rero ukwemera, ukwizera n’urukundo, maze turebe ngo riradukorera ibitangaza!

Bavandimwe, nidutuze Yezu iwacu. Uwatuje Yezu iwe, Sekibi ntiyongera kumugiraho ububasha ukundi. Muvandimwe, waba ufite ubwoba bwo guterwa na Sekibi? Tuza Yezu iwawe. Urashaka gutsinda Sekibi n’ibyo igushukisha byose? Emera Yezu akuyobore. Waba warigaruriwe na yo cyangwa waremeye ko iza kwarika iwawe? Ambaza Yezu aze ayirimbure. Haba hari umuntu urimo kugushuka ashaka kukujyana kwa Sekibi? Gira ubutwari bwo kumwangira, maze wisangire Yezu ugusanganiza impuhwe n’ubutungane. Hora wambaza izina rya Yezu, maze wirebere ngo Sekibi irakugendera kure!

  1. Dusabe

Nyagasani, icyampa ngo nguture ubuzima bwanjye bwose n’ibyo ntunze byose! Icyampa ngo nkwemerere ungireho ububasha, unyiyobore, untegeke, ungenge! Mbega ukuntu nta kintu na kimwe cyankura umutima! Mbega ukuntu nagira amahoro asesuye! Mbega ukuntu nabaho mu butungane! Mbega ukuntu nagira ubuzima busagambye!

Harirwa ikuzo n’ibisingizo, ubu n’iteka ryose. Amina.

Padiri Balthazar NTIVUGURUZWA

 

 

Bimwe mu biranga uwemeye kuba uwa Kristu koko

Inyigisho yo ku wa mbere w’Icyumweru cya 15 gisanzwe giharwe

Tariki ya 15/7/2019

Bavandimwe, tumaze iminsi tuzirikana umutwe wa 10 w’Ivanjili ya Matayo, aho Matayo atubwira uko Nyagasani Yezu yatoye ba Cumi na babiri, uko yabohereje mu butumwa, n’inama zinyuranye yabagiriye, cyane cyane izijyanye n’uko bazitwara imbere y’ibitotezo n’imisaraba bazahura na yo mu butumwa.

Ivanjili y’uyu munsi ni nk’umusozo w’uyu mutwe. Yezu arongera kugira Intumwa ze ndetse natwe twese abamukuriye izindi nama zigaragaza uwemeye kuba uwe koko kandi zigomba kumuherekeza mu butumwa.

1.Uwa Kristu yemere kwakira ingorane n’imisaraba ahura na yo

Yezu ati “ Ntimugire ngo nazanywe no gukwiza amahoro ku isi; sinaje gukwiza amahoro, ahubwo nazanye inkota” (Mt 10, 34). Twakumva dute iri jambo rikomeye, risa nk’aho rivuguruza uko twemera Yezu nk’Umwami w’amahoro? Yezu arashaka kuburira intumwa ze ndetse n’abazamukurikira bose, aberurira ko kwemera kuba uwe, kumukurikira no kumubera umuhamya, bitadatana no guhura n’imisaraba, gutotezwa, kuburagizwa no kubuzwa amahwemo uzira ko wamwemeye. Koko rero, guhitamo inzira y’Ukuri ni uguhangana n’inzira y’ikinyoma. Guhitamo ibikorwa by’urumuri ni ukwemera gutotezwa n’umutware w’umwijima, ari we Sekibi. Koko nta mugaragu usumba Sebuja. Uko Yezu Kristu yatotejwe na benewabo, ni nako ingorane n’imisaraba by’umukurikira bishobora guterwa n’abantu bo mu “rugo” rwe. Uwemeye kuba uwe rero, niyemere no gutwara imisaraba ahura na yo kubera Kristu, maze amukurikire: “Udatwara umusaraba we ngo ankurikire, ntakwiriye kuba uwanjye” (Mt 10, 38). Muvandimwe, wakira ute imisaraba uhura na yo mu bukristu bwawe?

  1. Uwa Kristu ntamurutisha isano y’amaraso

Mu isengesho ryo gukunda tugira tuti “Nyagasani ndagukunda rwose kuko ntawe muhwanyije ubwiza; uhebuza byose gukundwa …”. Uwemeye kuba uwa Kristu agomba no kumenya ko Yezu ahebuza bose gukundwa, kuko nta we bahwanyije ubwiza. Uwumvise ibyo neza, yumva neza n’ukuntu urukundo tugomba kugirira Kristu rusumba urw’umwana akunda umubyeyi we: “Ukunda se cyangwa nyina kunduta ntakwiriye kuba uwanjye” (Mt 10, 37a). Yumva neza kandi ukuntu urwo rukundo runasumba urw’umubyeyi akunda umwana we: “Ukunda umuhungu we cyangwa umukobwa we kunduta, ntakwiriye kuba uwanjye” (Mt 10, 37b). Yezu Kristu ni we urukundo rwose rugomba guturukaho kandi rukaganaho, kugira ngo tubashe gukunda abandi mu rukundo tumukunda, ari ababyeyi bacu, abana bacu, abavandimwe ndetse n’abantu bose. Muvandimwe, wemera ko nta we uhwanyije ubwiza naYezu, ko ahebuza bose gukundwa?

  1. Uwa Kristu yemera guhara ubugingo bwe ari we agirira

Uwemeye kuba uwa Kristu agomba kumukunda kuruta yewe n’ubugingo bwe. Ni bwo azaronka ingororano y’ubugingo buhoraho iteka: “Uwihambira ku bugingo bwe azabubura, naho uzahara ubugingo bwe ari jye agirira azabuhorana” (Mt 10, 39). Ibyo bigomba kugera no ku kumupfira. Koko rero, Yezu Kristu yaragize ati “Nta wagira urukundo ruruta urw’umuntu uhara amagara ye kubera incuti ze” (Yh 15, 13). Uwemeye kuba uwa Kristu koko, agomba kwitegura guhara amagara ye kubera urukundo amukunda. Ni urukundo rugera ku ndunduro y’ubuzima, nk’uko Yezu Kristu yabiduhayemo urugero, adukunda byimazeyo, adukunda kugera ku ndunduro, maze nk’Umushumba mwiza agatanga ubugingo bwe ari twe agirira, yemera kudupfira, apfiriye ku giti cy’umusaraba. Muvandimwe, ese koko ukunda Yezu Kristu kurusha uko ukunda ubugingo bwawe? Mbese wakwemera no kumupfira bibaye ngombwa?

  1. Uwa Kristu amenya kwakira abavandimwe be neza

Yezu Kristu asoza izi nama yizeza intumwa ze ko zitazabura uzazakira. Aranasezeranya ingororano ihebuje uzi kwakira neza abaje bamugana nk’intumwa n’abigishwa ba Kristu. Kwakira kandi ntibisaba ibintu by’ikirenga; n’uruho rw’amazi rukwiye ingororano yarwo. Ingororano isumba izindi ni ukwakira Imana ubwayo mu bavandimwe tuba twakiriye. Yezu ati “Ubakiriye neza, ni jye aba yakiriye, n’unyakiriye aba yakiriye Uwantumye” (Mt 10, 40). Nitwibuke uko Abrahamu yakiriye abashyitsi bari bamusanze maze muri bo akakira Uhoraho; nuko agahabwa ingororano y’isezerano ryo kuzabyara umwana w’umuhungu (reba Intang 18, 1-10). Muvandimwe, ujya umenya kwakira abagusanze? Ubakira ute? Ni uruhe ruhare rwawe mu gufasha abogezabutumwa ba Kristu?

Dusabe Nyagasani Yezu Kristu aduhe imbaraga zo kumukunda kuruta byose na bose, zo kumukurikira tutijana no kumubera abahamya dushize amanga, hose n’igihe cyose. Naharirwe ikuzo ubu n’iteka ryose. Amina.

Yateguwe na Padiri Balthazar Ntivuguruzwa

Kabgayi

Gukunda Yezu nka Mariya w’i Betaniya

Inyigisho yo ku wa Mbere Mutagatifu

Tariki ya 15/4/2019

Bavandimwe, Kristu Yezu akuzwe!

Ejo twatangiye Icyumweru Gitagatifu. Mu kuzirikana Ivanjili liturujiya itugezaho kuri uyu wa Mbere Mutagatifu, ndifuza ko turangamira urukundo Mariya w’i Betaniya yagaragarije Nyagasani Yezu muri kiriya gikorwa cyo gusiga “amavuta y’umubavu w’ukuri kandi uhenda cyane” ibirenge bye, hanyuma akabihanaguza umusatsi we. Iki ni igikorwa cy’urukundo twagombye kwigira kuri Mariya, urukundo twebwe abakristu duhamagarirwa kugirira Yezu Kristu mu buzima bwacu bwa buri munsi. Ndifuza ko tuzirikana muri make ibiranga uru rukundo. komeza… “Gukunda Yezu nka Mariya w’i Betaniya”

commodo lectus luctus et, sed Praesent facilisis justo vel, diam