Natwe dukore kuri Yezu kugira ngo adukize

Inyigisho yo ku wa mbere, Icyumweru cya 5 Gisanzwe giharwe

Tariki ya 11/2/2019

Bavandimwe, Kristu Yezu akuzwe!

Uyu munsi turizihiza Bikira Mariya Umwamikazi w’i Lourdes. Ni n’umunsi ku isi hose twizihizaho Umunsi mpuzamahanga w’abarwayi, n’ubwo mu Rwanda twawizihije ejo ku cyumweru. Ivanjili ntagatifu iraduhamagarira kurangamira Yezu Kristu, ukunda kandi agakiza abarwayi. Iradusaba natwe aba-Kristu kumukurikiza twitangira abarwayi kandi tubamushyikiriza kugira ngo boronke umukiro umukomokaho.

  1. Yezu ni incuti y’abarwayi

Kimwe mu bintu tugomba kuzirikana iyo twizihiza Umunsi mpuzamahanga w’abarwayi ni ukuntu Yezu ari incuti y’abarwayi. Koko rero, Ivanjili Ntagatifu itwareka kenshi ukuntu Yezu akunda abarwayi, ukuntu abasura, abasanga cyangwa abantu bamuzanira abarwayi kugira ngo abakize. Nta murwayi wageze kuri Yezu maze akamusubiza inyuma; nta murwayi wahuye na Yezu maze agataha adakize indwara afite, yaba iy’umubiri cyangwa iya roho.

Ubutumwa bwa Nyagasani Yezu ni ubwo gukiza bene muntu. Yazengurukaga hose, yigisha Inkuru Nziza, yirukana roho mbi kandi akiza abarwayi (reba Mk 1, 39). Koko yazanywe no kugira ngo intama zigire ubugingo kandi zibugire busagambye (Yh 10, 10). Ibi ni byo tubona no mu Ivanjili y’uyu munsi. Turabona Yezu mu karere ka Genezareti, azenguruka hose, ari mu nsisiro, ari mu migi, akiza abarwayi.

  1. Turangamire ukwemera kwa bariya baturage b’i Genezareti

Ngo Yezu yabaye agishinga ibirenge i Genezareti, abahatuye bahita bamumenya. Buriya bari barumvise ko ari umuntu mwiza, utirengagiza abamusanze, uhumuriza ababaye, ugirira impuhwe abamugana, ugira neza aho anyuze hose, wumva kandi agatega amatwi abamutabaje, ubiba ubuzima aho anyuze hose, ukiza abarwayi. Ni yo mpamvu batangiye kumuzanira abarwayi mu ngobyi aho bumvaga yageze hose. Bemeraga ko afite ububasha bukomeye, kugeza n’aho bamusabaga ko abarwayi babo bakora ku ncunda z’umwambaro we. Kandi koko abamukozeho bose bagakira (Mk 6, 56).

  1. Natwe dushyire Yezu abarwayi bacu

Bavandimwe, dufite abarwayi benshi, iwacu no mu baturanyi, muri bene wacu no mu ncuti zacu. Harimo benshi bihebye kuko babuze kivuza. Hari abafite indwara bamaranye igihe kirekire, ndetse zimwe muganga yababwiye ko ari za twibanire. Yewe, harimo ndetse n’abatari bamenya neza indwara barwaye. Harimo benshi babuze kirwaza; barimo kuborera mu ngo kuko nta muntu wo kubitaho bafite. Nta cyo kurya no kunywa babona kubera ko amikoro ari ntayo.

Abo bose baradukeneye. Bakeneye kubona ababahumuriza n’ababafasha. Bakeneye urukundo rwacu. Bakeneye ubufasha bwacu. Twibatererana. Niba hari akambaro dufite, nitubambike. Tubasure. Tubarwaze. Dushyire hamwe imbaraga n’ubushobozi maze tubahe ubufasha bakeneye. Tubafashe kubona mituweli n’ubundi buryo bwo kwivuza.

Abo bose bakeneye cyane cyane guhura na Yezu Kristu, We ncuti y’abarwayi, We Muganga usumba abaganga bose, We Nyir’impuhwe na Nyir’ineza. Nka bariya baturage b’i Genezareti, tubatware mu ngobyi y’isengesho, tubegereze Yezu Kristu kugira ngo na bo bumve ikinyotera cy’impuhwe ze. Tubashyire Ijambo ry’Imana n’Ukaristiya Ntagatifu. Tubategurire no guhabwa andi masakramentu akiza kandi akomeza abarwayi: Isakramentu rya Penentesiya n’Isakramentu ry’Ugusigwa kw’abarwayi.

Mu butumwa Nyirubutungane Papa Fransisko yageneye uyu munsi, atwibutsa ijambo rya Nyagasani Yezu rigira riti “Mwahawe ku buntu, nimutange ku buntu” (Mt 10, 8). Twitangire abarwayi, tubaha icyo tubarusha mu rukundo ruzira ubugugu cyangwa gukurikirana amaronko.

  1. Natwe dukeneye gukora kuri Yezu

Bavandimwe, buri muntu ni umurwayi, haba kuri roho cyangwa ku mubiri. Nta muntu muri twe udakeneye kubona Yezu, guhura na We no gukizwa na We. Natwe tumusange tumwizeye kandi tumukunze. Umukiro atuzaniye ntuducike. Dutinyuke tumukoreho.

Ivanjili yatubwiye ko abakoraga ku gishura cy’umwambaro we bakiraga bose. Ni nka wa mugore wari umaranye indwara yo kuva amaraso imyaka cumi n’ibiri yose Umwanditsi Mariko na we atubwira. Yapfuye gusa gukora ku gishura cya Yezu, maze isoko y’amaraso irakama, akira ubwo (Mk 5, 25-34).

Natwe dufite amahirwe yo gukora kuri Yezu. Tumukoreho mu Ijambo rye. Tumukoreho muri Ukaristiya Ntagatifu. Tumukoreho no mu yandi masakramentu. Tumukoreho no mu rukundo dukunda buri wese mu baciye bugufi. Tumukoreho maze turebe ngo aradukorera ibitangaza! Tumukoreho maze twirebere ngo aradukiza! Dupfa gusa kwemera.

Bikira Mariya Umwamikazi w’i Lourdes duhimbaza uyu munsi, nadufashe, adusabire kugira umutima wo gukunda abarwayi no kubitaho. Naduhe kandi ubutwari bwo gusanga Yezu Kristu no kumutura uburwayi bwacu; We nyaguharirwa ikuzo, ubu n’iteka ryose. Amina.

Yateguwe na Padiri Balthazar NTIVUGURUZWA

Kabgayi

Ushoborabyose yadukoreye ibitangaza

Umunsi mukuru wa Bikira Mariya Umwamikazi w’i Kibeho

Tariki ya 28 Ugushyingo 2018

Bavandimwe, uyu munsi kuri iyi tariki ya 28 Ugushyingo, muri Kiliziya yacu yo mu Rwanda turizihiza Bikira Mariya, Umwamikazi w’i Kibeho. Turazirikana igihe Bikira Mariya yaje hano iwacu i Rwanda kudusura. Turibuka ko kuva ku itariki ya 28 Ugushyingo 1981 kugeza tariki ya 28 Ugushyingo 1989 yabonekeye abakobwa batatu bari abanyeshuri i Kibeho, maze akatwihishura ko ari “Nyina wa Jambo”. Uyu munsi nutubere umwanya wo gushimira Nyagasani no gusingiza uwo Umubyeyi udukunda byahebuje.

  1. Ushoborabyose yadukoreye ibitangaza; Izina rye ni ritagatifu

Bikira Mariya duhimbaza uyu munsi yatwigishije gushimira Imana no kuyisingiza mu ndirimbo nziza ya Magnificat (Lk 1, 45-56). Ivanjili ya Luka itwereka ukuntu nyuma yo gutorwa n’Imana no kwakira ubutumwa bwo kutubyarira Umukiza, Bikira Mariya yaririmbye ibitangaza n’impuhwe Nyagasani yamugiriye amutorera kuba umubyeyi w’Umucunguzi wacu, Yezu Kristu, Umwana w’Imana. Yasingije Imana agira ati “Ushobora byose yankoreye ibitangaza; Izina rye ni ritagatifu”.

Bavandimwe, natwe uyu munsi, hamwe n’abahuriye i Kibeho bose, niduhanike ibisingizo byacu maze turirimbe Magnificat yacu. Dushyire hamwe, duhuze amajwi. Dushire ubute, dushimire Imana kandi tuyisingize kubera ubuntu, impuhwe n’urukundo yatugaragarije. Koko nka Bikira Mariya, umutima wacu nusingize Nyagasani kandi uhimbazwe n’Imana Umukiza wacu. Yaratwibutse, maze atwoherereza Bikira Mariya, Nyina wa Jambo, ngo aze kudusura. Yarebye umutima wacu unangiye n’ukuntu twarimo gutana tugana inzira y’ikibi n’urupfu, maze atuma Umwari wa Siyoni kudushyikiriza Inkuru Nziza y’impuhwe ze, iduhamagarira kwisubiraho no guhinduka. Hamwe n’Umubyeyi wacu Bikira Mariya, uyu munsi turirimbe tuti “Ushoborabyose yadukoreye ibitangaza, Izina rye ni ritagatifu!”

  1. Dushimire Bikira Mariya

Mu gushimira Imana, ntitwibagirwe gushimira na Bikira Mariya. Koko rero, kuva akivuka, kuva yavuga “fiat” igihe Imana imutumyeho Malayika Gaburiheli kumugezaho ubutumwa bwo kuzabyara Jambo wayo, kuva yakwakira ugushaka kwayo, akayemerera kuyibera “umuja”, Bikira Mariya ntiyigeze na rimwe abusanya n’ugushaka kwa Nyagasani. Yego ye ni “Yego” idasubira, itisubiraho, idasubira inyuma. Muri “Yego” ye, Bikira Mariya yihaye wese Nyagasani kugira ngo yegukire koko gukora ugushaka kwe. Tumushimire kandi tumwigireho ubwo budahemuka ku isezerano yagiriye Uhoraho.

Turamushimira ko yemeye kudusura, maze nk’uko yasuye mubyara we Elizabeti Mutagatifu, natwe akadushyikiriza Yezu Kristu, Umukiza wacu. Twe yaratudabagije; Bikira Mariya yamaranye na Elizabeti nk’amezi atatu (Lk 1, 56), ariko twe twamaranye imyaka umunani yose! Uyu munsi, nka Elizabeti, natwe turangurure ijwi, dusingize Nyina wa Jambo, tugira tuti “Wahebuje abagore bose umugisha n’Umwana wabyaye arasingizwa. Tubikesha iki kugira ngo Nyina w’Umutegetsi wacu atugenderere?”

Turashimira Bikira Mariya, kuko igihe adusuye, yatwibukije ijambo yabwiye abahereza bo mu bukwe bw’i Kana, igihe yagize ati “Icyo ababwira cyose mugikore” (Yh 2, 5). Yasohoje neza ubutumwa yahawe na Nyir’ijuru bwo kutugezaho impuruza yo kwisubiraho.

  1. Mbese tugeze he twakira ubwo butumwa yatugejejeho kandi tubushyira mu buzima bwacu?

Bavandimwe, uyu munsi ni umwanya Nyagasani aduhaye wo kongera kuzirikana ubutumwa bwa Bikira Mariya, Umwamikazi w’i Kibeho. Ni ubutumwa bukubiyemo kwisubiraho bidatinze, gusenga ubutarambirwa kandi nta buryarya, kumenya agaciro k’ububabare mu buzima bwacu bwa gikristu, gukunda kuvuga ishapule, cyane cyane iy’ububabare no gushishoza tukamenya gutahura imitego ya Sekibi n’ubuhakanyi idushoramo.

Ngeze he nitabira iyo mpuruza y’Umubyeyi wacu? Aho sinibera mu ndiri ya Sekibi? Bite n’ubuzima bw’isengesho? Aho sinsenga bya nyirarureshwa cyangwa byo kurangiza umuhango gusa? Ese ndacyamenya aho ishapule yanjye iba? Aho ntiyatonze umurayi aho nayimanitse cyangwa ntiyacikagurikiye mu mufuka w’umwenda nambaye? Aho sinyinigiriza mu ijosi by’umurimbo cyangwa kugira ngo abantu bambone maze bibwire ko ndi umwana wa Bikira Mariya, kandi ari byahe byo kajya! Iyo mpuye n’imisaraba y’ubuzima, mbyifatamo nte? Ese inyegereza Nyagasani cyangwa intera kumutera umugongo? Nkora iki kugira ngo nuhire kandi ngaburire ukwemera kwanjye, ngo hato kudatwarwa n’imiyaga ya Sekibi icumba urwango kandi ihuhera ubuhakanamana?

  1. Dusabirane

Bavandimwe, kuri uyu munsi dusabirane. Dusabirane kuba indahemuka ku isezerano twagiranye n’Imana. Dukomere mu kwemera, ukwizera n’urukundo. Niturangamire Bikira Mariya, we Nyenyeri ituyobora mu nzira igana ijuru. Nk’uko kandi duhora tubimusaba mu isengesho ryiza rya “Ndakuramutsa Mariya”, nahore adusabira kuri ubu kugeza mu gihe tuzapfira. Amina.

Mugire mwese Umunsi mukuru mwiza wa Bikira Mariya, Umwamikazi w’i Kibeho.

Yateguwe na Padiri Balthazar NTIVUGURUZWA

Kabgayi

“Mugerageze kwinjira mu muryango ufunganye”

Ku wa gatatu w’icya XXX Gisanzwe, B, 31/10/2018

Amasomo: Ef 6, 1-9; Zab 145 (144), 10-14; Lk 13, 22-30

Bavandimwe,

Kristu Yezu akuzwe!

Mu Ivanjili y’uyu munsi umuntu arabaza Yezu niba abantu bakeye ari bo bazarokoka, ni ukuvuga niba ari bo bazinjira mu Ngoma y’ijuru. Mu gisubizo yamuhaye, ndetse akagiha n’abandi bose baba bafite ikibazo nk’icye, Yezu ntavuga ibijyanye n’umubare w’abazarokoka, ahubwo n’uburyo bwo kurokoka. Yagize ati: “Nimuharanire kwinjira mu muryango ufunganye” (Lk 13, 24). komeza… ““Mugerageze kwinjira mu muryango ufunganye””

Zimwe mu nama Yezu agira abo yohereza mu butumwa

Ku wa 3 w’icya 25 Gisanzwe, B, 26 Nzeri 2018

Bavandimwe, Yezu Kristu akuzwe!

1.Ivanjili y’uyu munsi iratugezaho uko Yezu yohereje ba Cumi na babiri mu butumwa n’inama yabahaye kugira ngo basohoze neza ubwo butumwa.

2.Tubanze twibuke uko Ivanjili ya Mariko itubwira uko Yezu yatoye ba Cumi na babiri: “Hanyuma Yezu azamuka umusozi, maze ahamagara abo yishakiye, baramusanga. Abashyiraho ari cumi na babiri, kugira ngo babane na we, kandi ngo abatume kwamamaza Inkuru Nziza, abaha n’ububasha bwo kwirukana roho mbi” (Mk 3, 13-15). Mutagatifu Luka we atubwira ko abo Cumi na babiri, Yezu yabatoye amaze ijoro ryose asenga, nuko abita intumwa (Lk 6, 12-13). komeza… “Zimwe mu nama Yezu agira abo yohereza mu butumwa”

neque. mattis nunc et, Praesent Aenean nec porta. tempus libero non elit.