Catégories
Inyigisho

Uwo turi kumwe

KU WA MBERE MUTAGATIFU, 6/4/2020

Iz 42, 1-7; Zab 27 (26), 1-3. 13-14; Yh 12, 1-11

Bavandimwe, Yezu akuzwe! Twatangiye icyumweru gitagatifu, aho turi kuzirikana ku bubabare n’urupfu n’Izuka bya Kristu. Ni ko gasongero k’iyobera ry’ugucungurwa kwacu.

Catégories
Igihe cy'Igisibo Inyigisho

Turi mu iremwa rishya

Inyigisho ku wa mbere w’icyumweru cya IV cy’Igisibo, ku wa 23 werurwe 2020.

Bavandimwe, Yezu Kristu akuzwe!

Amasomo matagatifu y’uyu munsi aratwereka iremwa rishya. Turi mu iremwa rishya. Umuhanuzi Izayi aratwereka iremwa ry’isi nshya n’ijuru rishya. Naho Ivanjili iratwereka iryo remwa rishya mu isubizubuzima ry’umwana w’umutware. Bavandimwe, ibihe turimo by’iyibasirwa ry’icyorezo cya Coronavirus ntitugomba kubibona nk’icyorezo gusa cyangwa ibihano, kimwe n’uko hari abashaka kubigereranya nk’aho Imana ari yo yabiteye kugira ngo ihane abantu. Oya rwose. Nta kibi kiva ku Mana ahubwo Sekibi iradutwara, ikatugerageza, ikatwigarurira, ikatuganza maze ikadusangiza ku bibi byayo kugira ngo itwereke ko idufiteho ububasha ndetse ngo itume dushidikanya ku bubasha bw’Imana.

Catégories
Inyigisho

Mu kwemera, Imana iratwihishurira ikanatwigaragariza

INYIGISHO YO KUWA GATANDATU W’ICYUMWERU CYA GATANDATU GISANZWE  TARIKI YA 23 GASHYANTARE, 2019. DUHIMBAZA MUTAGATIFU POLIKARUPE WAHOWE IMANA.

AMASOMO: 1. Heb11,1-7

  1. Mk9,2-13

Bavandimwe, mu isomo rya mbere ry’uyu munsi dusangamo ko ukwemera ari ishingiro ry’ibyo twizera, kukaba n’icyemezo cy’ibitagaragara. Ariko ibi bitagaragara ntibikitwihishe, si urujijo kuko twabihishuriwe muri Kristu. Ukwemera gutuma dushimwa n’Imana, tukayitura amaturo n’igitambo kiyinogeye. Ukwemera gutuma tudacika intege maze tukizera ibyo Imana itubwira kandi idusezeranya.

Bavandimwe, mu kwemera Imana iratwihishurira ikatwigaragariza. Ni mu kwemera intumwa Petero, Yakobo na Yohani zatereranye na Yezu umusozi. Yezu ubwe, yazihisemo muri bacumi na babiri, abagirira icyizere. Ese twe Yezu aratubona akatugirira icyo cyizere gituma ashobora kuduhishurira ibyo abandi badafitanye ubumwe na we badashobora kumenya?

Ukuzamuka umusozi kwa Yezu n’intumwa ze, Petero, Yakobo na Yohani, kutwereka ko uwemeye kuba umwihariko wa Yezu amuba hafi, akamushoboza ibyo adashoboye, ibimurushya, ibyamuca intege, ibimugora cyangwa n’ibyo ashoboye ariko ageraho yiyushye akuya. Ubusanzwe, guterera umusozi biragora, bisaba imbaraga n’umuhate, bitera umuntu kwiyuha akuya. Urebye nabi arananirwa, akaruha, akazimira. Uyu musozi kandi ushushanya ibidushikamiye, ibitugora nk’uburwayi, ubukene, intege nke, ibyago, ibyaha, Shitani,…. Ntawaterera ibi ngo abirenge atari kumwe na Yezu.

Ugize amahirwe agaterana umusozi na Yezu aramwigaragariza. Uku kwigaragaza kwa Yezu bikabera uwo bari kumwe umutsindo ukomeye. Tutaratererana umusozi(na Yezu), ntitwamenya cyangwa ngo tubone ubwiza bwe! Ubwiza bwisumbuye kure ubwo dusanzwe tumuziho.

Uwakoranye uru rugendo na Yezu areka kwihugiraho. Ni yo mpamvu kumukurikira bisaba kwigomwa no kwitanga. Petero yanyuzwe n’uku kwigaragaza kwa Yezu. Maze asaba Yezu ati: “Tuhace ibiraro bitatu: kimwe cyawe(Yezu), ikindi cya Eliya n’icya Musa”. Koko rero, Yezu natwigaragariza, tuzareka kurondera akari akacu. Tuziyibagirwa duhange amaso Yezu n’abatagatifu(Musa, Elie,…) kubera ikuzo ry’Imana n’umukiro w’abavandimwe. Ibi bituma kandi umuntu anyurwa, akarangwa n’ibyishimo muri byose.

Bavandimwe, ukwigaragaza kwa Yezu si abakubonye baguhamya bonyine ahubwo hari n’ubuhamya bw’ijwi ry’ijuru. Kugira ngo natwe Yezu akomeze kutwigaragariza biradusaba gutega amatwi ijwi ry’ijuru n’ubwo kenshi na kenshi rivugwa n’abantu (Kiliziya, Papa, Abepiskopi, abasaserdoti, abihayimana, abakateshiste n’abalayiki bunze ubumwe na Kiliziya)  cyangwa se abigisha, abaherezabitambo n’abashumba: “ uyu ni umwana wanjye nkunda cyane nimumwumve”. Bavandimwe, ntimugatangazwe n’impamvu abantu bamwe na bamwe Imana ivuga ntibumve; ni uko Yezu aba atari yabigaragariza. Nitwemera ko Yezu atwigaragariza, tuzumva, tuzamwumva. Tureke atwigaragarize muri Kiliziya, mu muryango no mu muryangoremezo, mu mashuri no mu mavuriro, mbese aho dukorera umurimo wacu wa buri munsi. Ako kanya ntibagira undi wundi babona uretse Yezu wenyine. Ese natwe tuzagera igihe tuzareka gutwarwa n’iby’isi ( abantu n’ibintu), tubyitaruye, maze tubone Yezu wenyine? Reka dufatanye uru rugendo na Kristu na Kiliziya ye, umunsi tuzarangiza gutererana na we umusozi, azatwigaragariza tunyurwe kandi tuzishima.

Bikira Mariya utabara abakristu, udusabire! Polikarupe mutagatifu udusabire !

Padri Théoneste NZAYISENGA

Catégories
Inyigisho

Ukunda kwitabira ubutumire?

Ku wa 2 w’icya 31 Gisanzwe, B, 6/11/2018

Amasomo Matagatifu: 10.  Fil 2, 5-11; 20. Lk 14, 15-24

Bavandimwe, Ivanjili y’uyu munsi ihereye ku biganiro bya Yezu n’abamutumiye iradushishikariza kwitabira ubutorwe n’ubutumire bwacu tukiri hano ku isi kugira ngo tuzasangire na Nyagasani ku meza yo mu ijuru. Ubusanzwe, gusangira ni umuco mwiza mu muryango no mu buzima bw’abantu muri rusange. Abanyarwanda bati: “utakuririye(kurya) ntakuririra(kurira)”. Ivanjili itwereka ko na Yezu yabihaga agaciro muri rusange. Ariko agamije kwerekana ko isangira ryacu ku isi ari ishusho, umusogongero ugenura isangira ryo mu ijuru. Bityo, igitambo cy’Ukaristiya kikaba ishusho nyakuri y’iryo sangira.