Catégories
Inyigisho

Kubaha itegeko ry’Imana ni byo bitanga ubuzima

INYIGISHO YO KU CYUMWERU CYA GATATU CY’IGISIBO 2018; UMWAKA B

AMASOMO: Iyim 20,1-17

                    1Kor 1,22-25

                    Yh 2,13-25

Bavandimwe, ubu tugeze hagati urugendo twatangiye rw’Igisibo hamwe na Nyagasani Yezu Kristu, ubu tugeze ku cyumweru cya gatatu cy’Igisibo.

Iyo Imana itubwira amategeko yayo si uko iba ishaka kudukandamiza ahubwo ni ukugira ngo tugire ubuzima buzima, bufite icyerekezo n’umurongo. Itegeko Imana iheraho kugira ngo tugire ubuzima muri yo ni itegeko ryo kuyubaha. Kuyikunda yonyine nta yindi tuyibangikanya nayo. Kubangikanya Imana n’izindi twiremeye (ibigirwa mana) ni icyaha gikomeye. Imana Rurema ishaka ko abantu bose bayikunda, bakayubaha kandi bakayumvira n’umutima wabo wose. Iyo umuntu atubashye Imana n’umutima we wose, agasigara ari kure yayo arabihanirwa, iyo atabonye igihano vuba, igihano kiza mu gihe kizaza ndetse no kugeza ku buzukuru; kugeza ku gisekuru cya gatatu (Soma Iyim 20,5). Igihano gikomeye cyane ni uko kuba kure y’Imana cyangwa kuba mu buzima butagira Imana ni ukuba mu rupfu.

Iyo tuvuze tuti: ‘Urajye usenga Imana imwe gusa uzabe ariyo ukunda gusa‘, ni ukuvuga ko  ari yo ikwiye Ubwami, Ubusha n’Ikuzo uko ibihe bihora bisimburana iteka. Si byiza rero ko turahiza izina ryayo mu bintu by’amanjwe. Imana ni Umubyeyi, ni Umwigisha, ni  Umugenga wa byose.  Itegeko rya gatatu ridusaba kubaha umunsi w’Imana. Umunsi w’Uhoraho ni umunsi ukwiye kubahwa, nyamara ikibabaje ni uko usanga muri ibi bihe turimo abenshi batakiwuha agaciro.

Aya mategeko 3 ya mbere yerekeye Imana, mu gihe andi asigaye yerekeza ku bantu. Ariko nyamara wareba ugasanga n’aya uko ari atatu yaratunaniye. Abantu biremeye izindi mana: amafranga, shuguri (busness), ibintu, kwibera mu maraha,….. akenshi abantu bafata gusenga nk’ikintu cyo gukora ubusa, imibiri yabo bayihindura ibikoresho by’urukozasoni, Imana ntihabwe umwanya w’ibanze mu buzima bwabo. Ibi byose ni byo umuryango w’abayisiraheli wabuzwaga cyane. Iyo batandukiraga bakikorera ibyo bashaka babonaga igihano cy’Imana.

Amategeko y’Imana atanga ubuzima. Iyo umuntu agororokeye Imana mu buzima bwe bwose Imana iramurinda. Iyo dusomye mu gitabo cy’Ivugururamategeko batubwira ko ‘igihe twumviye ijwi ry’Uhoraho Imana yacu, twihatira gukurikiza amategeko yose twashyikirijwe, Uhoraho Imana yacu azadusumbisha amahanga yose; kandi imigisha yose izatumanukiraho, iduhame, mu rugero tuzaba twumviye ijwi ry’Uhoraho Imana yacu’. (Soma Ivug 28,1-2).

Ni byiza ko tubaho twunze ubumwe nk’abana b’Imana; biduha kwera imbuto nyinshi kandi z’ingira kamaro. Biduha kugira ubuzima buhamye kandi burambye.

Ingoro y’Imana ni inzu yo gusengeramo

Bavandimwe, Ivanjili y’uyu munsi iratwinjiza mu ibanga rikomeye Nyagasani Yezu Kristu yaduhishuriye ubwo yari hano ku isi. Abigishwa be byose babisobanukiwe ubwo yari amaze kuzuka mu bapfuye. Igihe Yezu yirukanye abacururizaga mu Ngoro, abigishwa bahishuriwe ibyanditswe bitagatifu bigira biti: ‘Ishyaka mfitiye Ingoro yawe riramparanya’, ibi bikumvikanisha neza ko Yezu yari afitiye ishyaka Ingoro y’Imana kandi ibi birumvikana. Ni Ingoro Ye.

Yezu Kristu yahishuye hakiri kare ibanga ry’Umubiri We, wo Ngoro yuzuye. Umubiri wa Yezu Kristu ni We Ngoro yuzuye. Izuka rya Nyagasani rigaragaza ku buryo bwuzuye iyubakwa ry’Ingoro y’Imana mu bantu. Abigishwa ibi barabibwiwe kuva na mbere, ariko babisobanukiwe ubwo Nyagasani Yezu yari amaze kuzuka mu bapfuye.

Nyagasani arirukana abacururiza mu Ngoro, nantwe turasabwa kwirinda kugira Ingoro y’Imana inzu y’ubwambuzi n’iy’ubucuruzi: ubu bucuruzi umuntu yabuvuga ukwinshi; iyo urebye muri iki gihe usanga hari abantu binjira mu Kiliziya bameze nkaho batazi aho bagiye, ngaho kuza bakererewe, ngaho kwicara inyuma kure n’aho batumva neza (muri si nahakanye), ngaho telefoni ifunguye kandi irangaza abandi…..Ibi byose iyo ubigeretseho kurangazwa n’ibyasigaye imuhira, mu byo babamo, aho usanga umuntu ajya mu Kiliziya agasohoka nta kintu yumvise, cyangwa wamubaza akakubwira ko Padiri yigishije neza, ariko nta kintu na kimwe yasigaranye, ubona biteye ubwoba pe! Mbega ubucuruzi! Aho ntiwasanga nawe wabarirwa muri aba? Nyagasani Yazu yongeye kutwibutsa ko tugomba kubaha Inzu y’Imana, igihe cyose twinjiye muri Yo tujye tuyiha icyubahiro ikwiye. Dukwiye rwose kubaha Ingoro y’Imana ari we Yezu Kristu. Ni we Ngoro nzima y’Imana muri twe. Umunyuzeho, umwinjiriyeho nta kabuza amugeza ku Mana Data mu bumwe bwa Roho Mutagatifu.

Bavandimwe, mu gihe hari benshi batacyikoza mu Kiliziya, kubera ibibazo byabo bwite, bigira abihagije, nimureke twe tujya mu Ngoro y’Imana tuyihe icyubahiro ikwiye. Ibi bidufasha kujyana na Yezu neza muri iki gihe cy’Igisibo, bikazadufasha kuzukana na We, tugasangira ibyishimo by’Umutsindo we kuri Pasika. Tumusabe aduhe umutima uciye bugufi kandi uzi kumenya gukora igikwiye!

Nyagasani Yezu nabane namwe.

Mwayiteguriwe na Padiri NKURUNZIZA Thaddée,

Diyosezi ya Nyundo

Catégories
Inyigisho

Kumvira biruta igitambo icyo ari cyo cyose

Inyigisho yo ku wa mbere w’icyumweru cya 2 gisanwe, Umwaka B.

Ku wa 15 Mutarama 2018

AMASOMO: 1Sam 15, 16-23; Mk  2, 18-22

Bavandimwe, amasomo matagatifu y’uyu munsi aratwumvisha ukuntu Imana ikunda abantu itagiriye ibyaha byabo ahubwo igirira Impuhwe zayo.

Umwami Sawuli yahawe ububasha bwo kuyobora umuryango w’Imana, kandi yagombaga kuwuyobora mu budahemuka n’ubunyangamugayo imbere y’Imana. Yanze kumva no gukurikiza amategeko y’Imana, yanze kurangwa n’ubwitonzi n’umutima uciye bugufi, arangwa n’ijosi rirerire ayobora umuryango w’Imana mu kibi. Yashimishijwe no gutura Imana igitambo mu byahumanye, yirengagije ko Imana itabikunda.

Umuhanuzi Samweli agira inama umwami Sawuli, ariko agambiriye kumwereka icyaha cye. Natwe turasabwa kumenya guca bugufi imbere y’Imana kugira ngo twakire impuhwe z’Imana. Sawuli anyazwe ubutegetsi kubera kwanga kumva no kumva nabi. Ni byiza ko twemera guhara icyubahiro n’ubuhangange bwo kuri iyi si tukemera guca bugufi tukakira muri twe ugushaka kw’Imana. Amakuzo n’icyubahiro cy’akanya gato by’isi bitubuza kuramba mu mahoro y’Imana. Nkuko ubwami n’ububasha by’umwami Sawuli biva ku Mana, ni nako Yo ubwayo ibyisubiza kubera kudakoresha neza ububasha n’ubutumwa yahawe. Dusabe Imana gukomeza kutuba hafi mu butumwa yadushinze muri Kiliziya yayo.

Catégories
Inyigisho

Uhagaze neza mu by’Imana, Imana nayo iba mu bye

Inyigisho yo ku ya 05 Nyakanga 2017, kuwa gatatu w’icyumweru cya 13 gisanzwe, Umwaka A.

AMASOMO : Intg 21,3.8-21 ; Zab 34 (33),7-8.10-13; Mt 8,28-34.

         Imana ni Indahemuka kuko ikomera ku isezerano ryayo. Tumaze iminsi twumva uburyo Imana ubwayo ari yo yisangiye Abrahamu ikamusaba kwimuka mu gihugu yari atuyemo cy’Ubukarideya, ngo ajye mu gihugu cya Kanahani, igihugu gitemba amata n’ubuki. Abrahamu ntiyigeze ashidikanya, yabadukanye ukwemera, ukwizera n’urukundo byuzuye. Yagiranye n’Imana isezerano ryo kuzagira umuryango mugari, ariko Abrahamu agacibwa intege no kubona ageza mu zabukuru nta kana afite. Ibyo Abrahamu yabonaga byose n’ibyo yabwirwaga byose yabishimiraga Imana. Uyu munsi twumvise uburyo yakirana ubwuzu n’ibyishimo umwana Imana imuhaye, akamwita izina rya Izaki kandi yabwiwe n’Imana.

Kugira ngo turonke ibyo twifuza dusabwa kwihangana mu kwemera. Abrahamu n’umugore we Sara barihanganye bategereza bihanganye ko ugushaka kw’Imana kubuzurizwaho. Imana yarabumvise maze irabasura kugira ngo isohoze umugambi n’isezerano ryayo maze ibaha umwana kandi bari bamukeneye. Umwana Izaki yavutse bamukeneye cyane maze isezerano ry’Imana riruzuzwa. Imana igenera umuntu wese umwanya umukwiye, yageneye Hagara n’umuhungu we umwanya ubakwiye, mu gihe uyu Hagara yari yihebye nta we umwitayeho, babonye ko Imana yumvise amaganya yabo, ntitererana abayo, abayikunda kandi nabo bayikundira. Imana yabahaye amazi baburaga, ibaha n’aho batura, ibatuza mu butayu bwa Parani bahagirira umugisha n’amahoro uko Uhoraho abyifuza.

Ikibi gihunga kandi kigatinya Imana. Ivanjili y’uyu munsi iratwereka, ikanatwumvisha ko n’ubwo shitani yakwigira nabi ite, ikangiza ubuzima bw’abana b’Imana, Yezu yayitsinze burundu. Mu buzima bwa muntu hari ubwo usanga yakora ibyo yishakiye, agaha sekibi, sekinyoma urwaho mu buzima bwe, akabaho nta we atinya cyangwa yubaha, bikagera aho n’abandi bantu bakamutinya, abandi bakamuhunga kubera ibikorwa bye bibi kandi bitaboneye. Umuntu nk’uyu ni uwo gusabirwa. Iyo Nyagasani Yezu ahuye n’umuntu nk’uyu, icyo akora ni ukumukiza akamwirukanamo roho mbi imurimo kabone n’ubwo yaboroga cyangwa ikihisha igira ngo batayibona. Nyamara Yezu we aba ayibona. Iramutinya!

Ni byiza ko mu buzima bwacu tugira aho duhurira na Nyagasani Yezu ngo adukize. Ese mu buzima bwawe hari aho waba warahuriye na Yezu? Waba waremeye gukizwa na We? Ese yaba yaragusize akikomereza cyangwa muracyari kumwe? Hari indwara nyinshi zinyuranye tugira, ariko tutiyiziho, n’umwanzi wacu ntatume tuzimenya. Ni byiza kwiyereka no gushaka guhura na Yezu We uzizi kuturusha, akadukiza. Guhura na Yezu bisaba guhaguruka, ugafata icyemezo, ugacika ku ngeso mbi zose kandi ugafata ingamba zo kutazasubira! Nyagasani yita kubamusanga kandi akabagirira Impuhwe.

Mwayiteguriwe na Padiri Thaddée NKURUNZIZA, Diyosezi ya Nyundo

Catégories
Inyigisho

Hahirwa abemera batabanje kwirebera

Inyigisho yo kucyumweru cya 2 cya Pasika, “Icyumweru cy’Impuhwe z’Imana” Umwaka A.

Ku ya 23 Mata 2017

AMASOMO: Intu 2,42-47; 1Pet 1,3-9; Yh 20,19-31

Bakristu bavandimwe nimugire Pasika nziza! None ni icyumweru cya kabiri cya Pasika. Ni icyumweru cyahariwe ku kuzirikana ku Mpuhwe z’Imana. Imana ni urukundo, yohereje Umwana wayo mu bantu ngo abitangire, abapfire maze bakire urupfu, icyaha na shitani yo soko y’ibibi byose.  Yezu mu rupfu rwe, yapfuye urw’abagome, apfa atagira kivurira, nta we umwitaho. Abigishwa bari bakwiriye imishwaro kubera gutinya Abayahudi, kugeza ubwo bagiye kwikingiranira mu Ngoro. Igihe Yezu azutse yabasanze aho bari bikingiranye.

Nimugire amahoro

Intego nyamukuru ya Yezu wazutse ni ugutanga amahoro. Arifuriza abahangayitse, aribo bigishwa be amahoro. Iyi ni impano iruta izindi zose zabaho mu buzima bwa muntu. Kugira amahoro! Amahoro meza kandi nyayo atangwa na Yezu. Amahoro atanga ni ihumure, umudendezo kandi ni nabyo abigishwa be bari bakeneye. Yezu aza mu buzima bwacu akaduha icyo dukeneye kandi icyo dukeneye kurusha ibindi ni amahoro ya Yezu. Uwakiriye amahoro asaabwa n’ibyishimo nk’ibyaranze Intumwa za Yezu ubwo zari zimaze kumwibonera kandi nta gushidikanya ko ari we.