Catégories
Inyigisho

Umushumba mwiza yigurana intama ze

INYIGISHO YO KUWA MBERE W’ICYUMWERU CYA KANE CYA PASIKA TARIKI YA 08/05/2017

Amasomo: 10. Int 11, 1-18; 20. Yh 10,11-18

Bavandimwe, ejo twizihije icyumweru cy’umushumba mwiza tunazirikana  ku ihamagarwa ry’abiyegurira Imana. Koko rero, Kristu niwe mushumba utarumanza kandi ntatererane intama ze. Kristu kandi yemeye guhara ubugingo bwe kubera intama ze. Nguwo uwihutiye gusama ayacu agahara aye ubwo amagara yari  yatewe hejuru n’icyaha n’urupfu. Yaturinze gusandara ngo hato tutagwa mu mikaka y’ikirura  tukamirwa bunguri n’icyo gihanyaswa. Nguwo umushumba utari umucanshuro, nguwo nyir’intama, ushishikajwe n’ubuzima  bw’izo aragiye. Nta n’imwe atazi mu ntama ze. Ikigereranyo cy’umushumba n’intama Yezu akoresha kirumvikanisha ko twebwe abo yacunguye ari twe ntama ze. Hari abamumenye rugikubita  baramwemera, bemera kuba abe, ariko hari n’abandi ategereje yizeye ko bazava mu burara bakagaruka iwabo kuko Umubyeyi wabo akaba n’uwacu arategereje, ategereje ko bafata icyemezo kuko adakoresha agahato, ategereje ko batera intambwe, ngo abasanganire abahe ikaze iwe. Yezu ntiyabakuyeho amaboko, yizeye ko bazamugarukira kuko babaye nk’abamucikaho ariko we ntiyabaciye.  Abataramumenya ndetse n’abamwirengagiza nkana, nabo  yizeye ko bazagera ubwo bavuga bati ‘’ibi ntabyo’’ , uyu mwijima si uwo guturwamo nimucyo dusange   Urumuri. Bose ni abe n’ubwo bahugiye mu bindi cyangwa bataragira amahirwe yo kugezwaho Inkuru Nziza, nabo ni intama ze, ni abana b’Imana.  Yezu arivugira ati « Mfite n’izindi ntama zitari muri uru rugo, na zo ngomba kuzizana zikazumva ijwi ryanjye, maze hakaba igikumba kimwe n’umushumba umwe».

Bavandimwe, twebwe twese abamenye Kristu tukanamwemera, duhamagariwe gukomeza kugaragaza isura nziza y’Umushumba mwiza udutuyemo kuko atwohereza ngo aho turi tuhamubere. Duhamagariwe gukomeza ubutumwa bwa Kristu bwo kunga abantu n’Imana, no kunga abantu hagati yabo. Duhamagariwe kumurikira abakiri mu mwijima ngo nabo babone inzira y’umukiro. Kristu umushumba mwiza, aradutuma ngo dusange abataramumenya tubamenyeshe ko ari We Mukiza, tubamenyeshe ko niba batifuza kunyanyagiza no kunyanyagira bakwemera kurunda  hamwe na We, tubamenyeshe ko niba bifuza gutsinda urugamba rw’ubuzima bamuhamagara akaza iwabo akabana nabo, agaturana nabo. Icyo gihe ntibazaba bacyumva ko baturanye n’abanzi ahubwo bazasaabwa n’urukundo rubona buri wese nk’ikiremwa cy’Imana gikwiriye kubahwa. Umushumbwa mwiza yaratwitangiye, natwe aradusaba kwitangira abandi. Nibwo buryo bwiza bwo gukomeza umurimo yatangiye wo kumurikira  isi kugira ngo hatagira abakomeza kugenda mu mwijima bakaba bagwa mu menyo ya rubamba, iyo Sekibi ihora izerera ishaka uwo yanconcomera.

Muvandimwe, nawe  urabe nk’umushumba mwiza, umenye abo ushinzwe nk’uko Imana ikuzi kandi igukunda, umenye abo Nyagasani yakuragije mu rugo rwawe, mu muryango remezo, mu makoraniro y’abasenga, mu bo mukorana, mu iyogezabutumwa. Urabe umushumba udakenesha, urabe umushumba udateranya izo aragiye ngo azishyamiranye. Tuzi ubwitange bw’abashumba : ntibakangwa n’izuba ry’igikatu, ntibaterwa ubwoba n’imvura n’imbeho,  ndetse n’iyo ijoro riguye ntibakura agatima ku bushyo bwabo. Ntacyo Kristu atakoze ngo atugarure mu rwuri tube ari we turangamira, tureke kumva amajwi y’abacanshuro baharanira gukenya izo baragiye aho kuzikenura.

Ubutumwa bwacu bakristu burabe ubwo kubungabunga ubwo bumwe no kuba urumuri, buri wese yere imbuto aho atewe, mu butumwa n’umuhamagaro wa buri wese maze ntihazabe hakivugwa Abayahudi n’abanyamahanga, abo usangira nabo n’abo uheeza ahubwo twese twiyumve nk’umuryango umwe w’abasangirangendo bagana uwabahanze, twishimire ko  Imana yahaye n’abanyamahanga kwisubiraho kugira ngo baronke ubugingo !

Padiri Bernard KANAYOGE

Montréal, Canada

Catégories
Inyigisho

Namwe murajye mwozanya ibirenge byanyu

Inyigisho yo ku wa kane mutagatifu Umwaka A, Ku wa 13 Mata 2017

Amasomo matagatifu:

ISOMO RYA MBERE: Iyim 12, 1-8. 11-14

ISOMO RYA KABIRI: 1 Kor11, 23-26

IVANJILI:  Yohani 13,1-15

Bavandimwe muri Kristu, dukomeje urugendo tuzirikana urukundo ruhebuje Kristu yadukunze akageza ubwo atwitangira ku musaraba kugira ngo adukize icyaha n’urupfu. Urukundo ruhebuje rwaranze Yezu yaruraze n’abamwemera bose, abamukurikiye n’abakomeje gukora ubutumwa yabashinze bwo kwamamaza Inkuru nziza ye y’umukiro.

Kuri uyu munsi w’uwa kane mutagatifu turabona Yezu  atanga umurage ku bo yatoye, akabiyegereza  by’umwamihariko kugira ngo bamwigireho byinshi bazashyira mu bikorwa ubwo azaba amaze gusubira mu ijuru. Abo ni Intumwa ze,abo yise  inshuti ze nk’uko tubisanga mu Ivanjili ya Yohani 15, 15: “Sinkibita abagaragu kuko umugaragu atazi ibyo shebuja akora ahubwo mbise inshuti.” Yezu rero yahaye umurage w’umwihariko inshuti ze. Ubwo basangiraga ku wa kane mutagatifu yabashinze imirimo ikomeye yo gukomeza ubutumwa yatangiye:

Catégories
Inyigisho

Roho w’Imana natuyobore

Inyigisho yo ku wa kane w’icyumweru cya 7 cya Pasika,  Ku ya 12 Gicurasi 2016

AMASOMO MATAGATIFU: Intu 22,30.23,6-11; Yh 17,20-26

Nyagasani Mana yacu turakwinginze: Roho wawe ku bubasha bwe nadusakazemo ingabire ze, maze ahe imitima yacu kukunogera kandi adutere gushishikarira gukora icyo ushaka”.

Bavandimwe iri sengesho ry’ikoraniro Kiliziya ivuga kuri uyu wa kane w’icyumweru cya karindwi cya Pasika, akaba kandi ari umunsi wa karindwi w’isengesho ry’iminsi icyenda ridutegurira kwakira ingabire za Roho Mutagatifu, riranatwereka neza igisobanuro nyacyo cy’isengesho rya gisaseritoti rya Yezu dusorejeho umutwe wa 17 w’ Ivanjili ya Yohani.

Muri iri sengesho hagiye harimo ingingo zikomeye kurusha izindi zumvikanisha neza akamaro ka Roho Mutagatifu mu buzima bw’umukristu n’ubwa Kiliziya. Ingingo ya mbere ni ukumenya: Yezu ati: “ubuzima bw’iteka ni uko bose bakumenya… Bakumenye wowe Mana Nyakuri n’uwo watumye… Nabamenyesheje izina ryawe kandi nzakomeza kuribamenyesha”. Kumenya Imana no kuyimenyesha abandi bikomoka ku mbaraga zihariye za Roho Mutagatifu. Ingingo ya kabiri ni uguha cyangwa gutanga: “abo wampaye bari abawe maze urabampa kandi ibyo wampaye nanjye narabibahaye”. Icyo dufite n’abo turi bo ni impano. Ni ingabire ya Roho mutagatifu. Ingingo ya gatatu ni ukurinda cyangwa kurindwa: «  ndagusabye ngo ubarinde ikibi ». Roho w’Imana ni we udufasha kwirinda ikibi no kukirinda abandi. Ingingo ya kane ni ukwitagatifuza no kwiyegurira: “Batagatifurize mu kuri… kandi ndakwiyeguriye ubwanjye kugira ngo na bo babe abakwiyeguriye mu kuri”.

Catégories
Inyigisho

Bikira Mariya abwirwa ko azabyara umwana w’Imana

Inyigisho yo ku munsi mukuru wa Bikira Mariya abwirwa ko azabyara Umwana w’Imana,

Ku ya 04 Mata 2016

Amasomo matagatifu: 10. Iz 7,10-14;8,10;    20. Heb 10,4-10;  30. Lk 1,26-38

Uyu munsi mukuru, banawita umunsi w’ukwigira umuntu kwa Jambo. Ni umunsi ukomeye muri Kiliziya, ubusanzwe wizihizwa tariki ya 25 Werurwe. Iyo hasigaye amezi icyenda ngo Noheli ibe, ukaba umunsi mukuru twibukaho igihe Bikira Mariya abwiwe na Malayika ko azabyara umwana w’Imana. Uyu munsi kandi urasanzwe kuva hambere muri Kiliziya. Iyo uhuriranye n’icyumweru, bawuhimbaza ku wundi munsi usanzwe w’imibyizi kubera ko udashobora gusubikwa. Uyu mwaka bwo ntabwo wahuriranye n’icyumweru ahubwo wahuriranye n’uwa gatanu Mutagatifu ari na cyo cyatumye Kiliziya iwushyira kuri iyi tariki ya 4 mata. Kuri uyu munsi turazirikana igisubizo cyuje ukwemera cya Bikira Mariya wagize ati : « Ndi umuja wa Nyagasani, byose bimbeho nk’uko ubivuze » (Lk 1,38), tunazirikana igisubizo yahawe na Malayika igihe amubajije ati : « Ibyo bizashoboka bite ? »

  1. Ibyo bizashoboka bite ?

«Dore ugiye gusama inda, ukazabyara umuhungu, maze ukazamwita izina rya Yezu. Azaba umuntu ukomeye kandi bazamwita mwene Nyir’ijuru. Nyagasani Imana azamwegurira ingoma ya se Dawudi; azategeka umuryango wa Yakobo ubuziraherezo, ingoma ye ntizashira». Nuko Mariya abwira Malayika, ati: «Ibyo bizashoboka bite, kandi nta mugabo mfite? » (Lk 1, 31-34). Umuntu yumvishije iki kibazo cya Bikira Mariya amatwi y’umubiri yagira ati: «yarashidikanyije». Oya, Mariya ntashidikanya ko ibyo Malayika Gabriyeli amubwiye bizabaho koko. Ahubwo arasobanuza kugira ngo ashobore kumenya neza ibyo Imana imushakaho. Mariya arabanza akumva, agatekereza, akabaza ati: «bizashoboka bite? ». Hanyuma agasobanukirwa maze akemera. Mariya si nyamujya iyo bigiye nka bamwe mu bantu b’iki gihe batazi umurongo w’ubuzima cyangwa bajya aho batateguye. Bamwe bagwa mu ruzi barwita ikiziba kubera ko batari bazi neza aho bagana.