Catégories
Inyigisho

Igirayo, ndi umunyabyaha!

Inyigisho yo ku cyumweru cya 5 gisanzwe, Umwaka C. Ku ya  7 Gashyantare 2016.

Amasomo .Iz 6,1-8; 1Kor15,1-11; Lk 5,1-11

Bavandimwe, Kristu Yezu wapfuye, akazukira kudukiza nakuzwe mu buzima bwacu bwose! Kuri iki cyumweru cya gatanu gisanzwe, amasomo matagatifu aratwibutsa umuhamagaro wacu.

 Imana iraduhamagara twese.  Ese Iduhamagara tumeze dute? Tuyisubizi iki? Iduhamagarira iki?Imana iraduhamagara. Mu isomo rya mbere  twumvise itorwa rya Izayi, umuhanuzi. Iryo torwa riratwumvisha neza uko Imana iduhamagara iteye: ni Nyirubutagatifu. Uwo ihamagara ni umuntu w’iminwa yanduye, agatura mu muryango wahumanye. Imana rero iduhamagarira ubutagatifu bwayo. Ntawayegera itamuhamagaye kandi uwo ihamagaye iramusukura,  ikamukiza ibyaha nk’uko yahumanuye umuhanuzi Izayi.

Isomo rya kabiri ritwibutsa ko twahamagawe muri Yezu Kristu. Ko uwakiriye umuhamagaro wa Nyirubutagatifu ahora yibuka Yezu. Kwibuka Yezu ni ukwibuka urupfu rwe n’izuka rye ryadukijije. Hanyuma ibyo yibuka akaba ari na byo ahamya: turamamaza urupfu rwawe Nyagasani, tugahamya n’izuka ryawe kugeza igihe uzagarukira mu ikuzo. Mu Isezerano rya Kera ni Imana yahamagaye Izayi, mu Isezerano rishya ni Yezu uhamagara. Nk’uko yahamagaye Petero, Andreya, Yakobo na Yohani, Pawulo n’abandi benshi natwe araduhamagara. Yaduhamagaye twiga Gatigisimu, adutora tubatizwa, dukomezwa, dushyingirwa, tuba abasaserdoti cyangwa twiyegurira Imana. Aduhamagara buri gihe cyane cyane mu ikoraniro ryo ku cyumweru, ku munsi wa Nyagasani. Azakomeza kandi aduhamagarire kuzicarana nawe Ijabiro mu Bwami bwe.

Catégories
Inyigisho

Nyagasani nguyu araje, tumwakire atuyobore inzira y’amahoro n’impuhwe

Inyigisho yo ku wa kane, 24 Ukuboza 2015; Adiventi

Amasomo matagatifu: 2 Sam7,1-5.8b-12.14a.16,Lk1,67-79

Bavandimwe, kuri uyu wa kane w’icyumweru cya kane cya Adiventi turasingiza Imana hamwe na Zakariya, tuyisingiriza ineza n’impuhwe zayo arizo zatumye Zuba rirashe aza kudusura: koko Imana yacu igira impuhwe zihebuje ari na zo zatumye Zuba rirashe amanuka mu ijuru aje kudusura akamurikira abari batuye mu mwijima no mugicuku cy’urupfu kugira ngo atuyobore mu nzira y’amahoro.

Uyu Zakariya yasingizaga Imana kubera Ivuka ry’umuhungu we Yohani, integuza ya Yezu agira ati:”nihasingizwe Nyagasani Imana ya Israheli kuko yasuye umuryango we kandi akawukiza”. Hanyuma akabona kurangamira ibizaza. Byose bishingiye ku byishimo n’amizero y’igikorwa cy’umukiro Imana yasezeraniye Abayisraheli cyuzurizwa mu maza y’Imana ubwayo yigira umuntu kandi agomba gutegurwa n’umuhungu wa Zakariya(Yohani). Koko Zakariya afite impamvu yo kwishima! Natwe abategereje bya hafi Ivuka ry’Umucunguzi natwigishe gutegereza twishimye.

Tuzi neza ko Zakariya yari yahanwe n’Imana kubera ugushidikanya kwe maze aba ikiragi. Ariko kubera ko iby’Imana yamubwiye byujujwe abyirebera n’amaso ye- ijambo ry’Imana rikaba ryujujwe – aramamaza ibyo yagombaga kuvuga mu mutima we noneho akarangurura ati:”nihasingizwe Nyagasani Imana ya Israheli….”. Iyaba natwe byadufashaga: twebwe tubona rimwe na rimwe byose bitubereye urujijo cyangwa umwijima cyangwa tukabibonana ugushidikanya n’ukwiheba. Kugira iyi ndoro ndengakamere ya Zakariya aririmbana iki gisingizo, byatuma tubaho mu mizero yuje ibyishimo.

Bavandimwe Nyagasani nguyu araje , umubyeyi w’integuza(Zakariya) we arabizi kandi arahimbawe, azi ko ugiye kuza ari Umucunguzi, ari Rumuri, Zuba rirashe. Ni urumuri ruboneshereza abatuye mu mwijima no mu gicuku cy’urupfu. Nyamara abo si abandi, si ab’Ikantarange! Ni twebwe. Ah! Iyaba twari tuzi ko Rumuri aje kumurikira ubuzima bwacu, kumurikira intambwe zacu ngo atuyobore inzira y’amahoro! Iyaba twari tumwemereye ngo atuyobore mu nzira ze zuzuye amizero.