Catégories
Inyigisho

Kwamamaza Ivanjili bisaba ubwigenge no guhuguka

Inyigisho yo ku wa gatatu w’icyumweru cya  XXVIII  Gisanzwe

Ku wa 18 Ukwakira 2017

Amasomo:

2Tim4, 9-17a, Z 144,10-13.17-18 Lk 10, 1-9

Uyu munsi turahimbaza Mutagatifu Luka umwanditsi w’Ivanjili. Yezu arohereza abigishwa mirongo irindwi na babiri mu butumwa. Arabaha impamvu, akababwira ibyo bitwararika, akababwira n’ibyo bavuga.
Imirima yeze ni myinshi
Umuryango w’Imana uhora ukeneye abakora ubutumwa. Buri gihe Yezu akeneye abo yohereza kwamamaza Ivanjili, byaba kuyibwira abatarayimenya, n’abayimenye bagikeneye gusobanukirwa n’ubwiza bw’Imana yemwe n’abaiyibagiwe. Umurimo w’abatwaye Ivanjili ugapimirwa ku mbuto z’aho banyura n’aho banyuze. Bakagomba kwitwararika kuko si ukwitemberera kuko harimo ingorane. Ibirura ni iby’ibihe byose. Intama gutumwa ku birura zikabibwira amahoro y’Imana ntibyoroshye. Ni amahirwe iyo ibyo birura bihindutse. Abatwaye Ivanjili ntibatumwe gukina umukino w’ibirura.

Catégories
Inyigisho

Umubibyi ubibana ubuntu

Amasomo yo ku wa gatandatu w’icyumweru cya XXIV

Ku wa 23 Nzeri 2017

1 Tim 6, 13-16 Z 99,2-5, Lk 8,4-15

Imbuto yatubibwemo

Umugani w’umubibyi tuwumvise kenshi kandi mu gice gikurikiyeho Nyagasani arwusobanura. Yezu aratwereka uko Ingoma y’ijuru itangira mu mitima y’abantu, yagabanijemo ibice bine agereranije n’aho imbuto yaguye : iruhande rw’inzira, mu rubuye, mu mahwa no mu gitaka cyiza. Uyu mugani uraduha igitekerezo gisanzwe ariko kijyaniranye n’inyigisho y’iyobokamana n’imyitwarire y’abantu.
Ubuhinzi cyane cyane ubw’ibinyampeke buramenyerewe mu gihugu Yezu yigishijemo, ku buryo amagambo yumvikana neza akanaryohera abamwumvaga.
Umubibyi ubiba arakora ibyo amenyereye ariko umuntu yagira ati « ntabwo azi kubiba » none se ko imbuto nyinshi ibyiciro 3 ari izaguye ahadakwiye. Aha bikaba biterwa n’uko aho abiba hateye ahubwo we akabibana ubuntu, ukwihangana n’amizero. Arabibana ubuntu n’ukwihangana kuko atinuba kubera imbuto zigwa ahadakwiye ntibimuce intege. Arabibana amizero kuko akomeza kubiba ku buntu kandi akabiba nyinshi atitaye kuzo yatakaje.

Yezu ubwe yasobanuye icyo uyu mugani uvuga. Yezu yavuye mu ijuru aza mu nsi kubiba Ijambo rye, kwamamaza Ingoma y’Imana itangirira mu mutima wa buri wese. Ijambo ry’Imana dukomeza kuribwirwa, kuko itarambirwa kutubwira. N‘ubwo imbuto yaguye ahantu hatatu hadakwiye ubanze kuri iki gihe cyacu aho hantu hadakwiye hariyongereye. Uretse Ijambo ritera imbuto twibukeko noneho hari abakiri iryo Jambo bakagaragara nk’abaricengewe ahubwo bakarwanya n’imbuto ryera mu muryango w’Imana ariwo Kiliziya. Ni benshi mu bakristu bakwiyerekana nk’abakiriye Ijambo ry’Imana ariko bagakora ibikorwa bisenya umuryango w’Imana, ntibishimire imbuto zera ku bikorwa bya bagenzi babo. Uretse rero no kuba imbuto zaguye ahadakwiye hiyongeraho guhinduka imungu zirya za zindi zeze ku mbuto zaguye ahantu heza. Bityo umubibyi akahahombera, uretse ko yihangana.

Catégories
Inyigisho

Iyobera/ibanga rikuru ry’ukwemera ribyara ubumaritiri

Inyigisho yo ku wa mbere w’icyumweru cya XIX gisanzwe
Ku wa 14 Kanama 2017

Amasomo:  Ivug 10,12-22a   Z 147   Mt 17,22-27

Ku nshuro ya kabiri Yezu abwiye abigishwa be iby’urupfu rwe kuko ari ingingo ikomeye mu butumwa bwe. Aragera n’aho asobanura uko bizagenda. Ariko icy’ibanze ni uko ku munsi wa gatatu azazuka.
Ukwemera kwacu kubakiye ku rupfu n’izuka bya Kristu
Ubutumwa bwacu, ubutumwa bwa Kiliziya bwubakiye ku rupfu n’izuka rya Kristu. Pasika ya Nyagasani duhimbaza buri cyumweru. Ukwemera kwacu kubakiye ku rupfu n’izuka bya Kristu. Iyobera/ibanga rikuru ry’ukwemera nk’uko tubisubira iyo tugeze mu izingiro mu mutima wa misa. Niyo mpamvu abigishwa Yezu abibasobanuriye kenshi.
Abigishwa ntacyo biyumviramo, bibateye agahinda nk’aho ari ubwa mbere babyumvise. Iyo babonaga barambagira Galileya yose berekeza i Yeruzalemu abigishwa ntibashakaga kumva iby’urupfu ahaubwo bari bategereje iby’itangazwa ry’Ingoma y’Imana kandi bizeye kuyigiramo uruhare. Yezu wabonaga uko bitiranya ibintu yagiye abasobanurira kandi abibasubiriramo kenshi kugira ngo bitegure.
Kimwe n’abigishwa dushobora kugira igishuko cyo kuzimirira mu bindi. Tukajya muri rwinshi, tugahihibikana ku bitubeshaho muri ubu buzima. Ntitukibagirwe inkomoka yacu. Burya ku cyumweru tuba tugiye kunagura iryo banga rikuru ry’ukwemera ngo tutavaho turitwikiza ibindi. Ibanga Imana ifitanye na bene muntu kugira ngo bakire. Iyo iryo banga rikuru turyibagiwe cyangwa tukaritwikiza ibindi ukwemera kwacu kuracuya.

Catégories
Inyigisho

Udutuma yahawe ububasha bwose

Inyigisho yo ku cyumweru cya XIX gisanzwe

Ku wa 13 Kanama 2017

Amasomo   1 Bami 19, 19a.11-13a  Z 84,9-14 Rom 9,1-5 Mt 14,22-33

Bavandimwe Ivanjili twumva kuri iki cyumweru irongera kutwibutsa ubutmwa bwacu. Kutwibutsa ubutumwa bwa Kiliziya muri iyi si yuzuye ingorane n’ibigeregezo. Ubwato bwerekeza ku zindi nkombe burashushanza neza ubutumwa bwa Kiliziya. Burashushanya ubutumwa bw’ababatijwe. Nyuma yo guhaza imbaga y’abantu Yezu Kristu ntashatse ko abigishwa bigumira mu guhaga, bigumira mu byiza bakoze, mu kubyina ko batsinze inzara. Abategetse kujya mu bwato bakerekeza ku yindi nkombe
“Mwigira ubwoba”
Kwerekeza ku yindi nkombe bivuze kuva mu byo tumenyereye, mu bitworoheye, mu byacu, mu bacu mu nshuti zacu. Hanyuma tukerekeza ahandi. Tukajya mu bindi. Tukajya mu bantu bafite iyindi mico; bafite ibindi bitekerezo ngo nabo tubashyire Inkuru Nziza.
Imihindagurikire y’ibihe n’imyumvire y’abantu bishobora gutera impungenge Kiliziya. Tukaba twakwibaza niba no muri ibi byateye , ibi byadutse dushobora kwamamazamo Ivanjili. Bikagora kwibwira ko Yezu yabana n’abo bantu bafite indi mico tudaswanzwe tumenyereye. Tugashidikanya. Hakaba n’ubwo tugira ubwoba tukibwira ko ibyo byadutse byazamira ukwemera, bikakwanduza kukazimira.
Yezu arongera kutubwira kutagira ubwoba kuko igihe cyose turi kumwe ( Mt 28,20). Ubwoba butuma twikingirana tugahera ku nkombe imwe y’amateka. Tukaba twahugira mu gusingiza ibyo twakoze mu gihe cyashize kandi buri gihe Nyagasani adusaba kwerekeza mu mazi magari. Ubwoba butuma dutinya gukora ubutumwa bwacu, tugatinya kuvuga Yezu, tugahisha abo turibo, tugahisha ibyo dushinzwe. Tugakora ibyo ab’iy’isi bashima. Kugira ngo badushime, tubane neza. Ubwoba ni bwo butuma twisanisha n’isi cyane ngo itatuvumbura. Bityo tugashimishwa n’umutuzo duhabwa n’iby’isi n’ab’isi.