Catégories
Inyigisho

Igipimo cy’ubukristu bwacu n’imigenzereze yacu

Inyigisho yo ku wa gatanu w’icyumweru cya XVIII gisanzwe
Kuwa 11 Kanama 2017

Amasomo Ivug 4,32-40 Z 76,12-16.21 Mt 16,24-28

Nyuma yo gucyaha Petero uko twabibonaga ejo , kuko ibitekerezo bye bitari biturutse ku Mana Yezu aributsa abigishwa be n’abazamukurikira bose icyo kuba abe bisaba. Mu ivanjili ya none Yezu aradusaba ibintu bitatu byuzuzanya: Kwiyibagirwa, guheka umusaraba wacu, no kumukurikira.
Kwiyibagirwa: bivuze kureka imishinga yacu n’imibare yacu. Kuko hari ubwo ubukristu bwacu bwaba gukurikira ibyo twiyumvamo, inyungu zacu, ibidushimisha. Bishobora kuba kandi kwigana abandi, kubashimisha kubagusha neza mu rwego rw’imibanire myiza. Mbese tukubakira ku bandi cyangwa ku migambi n’imishinga yacu. Kwiyibagirwa Nyagasani atubwiye si ukwiyanga cyangwa kwiyibagirwa mu bumuntu bwacu, mu mibereho yacu ahubwo ni ukwibagirwa ibindi byose twakubakiraho ubukristu bwacu , uretse Kristu ubwe.
Guheka umusaraba wacu: kubaho uko isi ibishaka dukurikiye ibyifuzo byacu ni byo byoroshye kandi byadushimisha n’ubwo biduha ibyishimo by’igihe gito. Gukurikira Yezu ni ukwibabaza kuko tuba tugomba kureka ibyo byose. Bisaba kwitsinda. Uko kwitsinda bikaba guhozaho. Umusaraba bikavuga urwo rugamba turwana muri twe niyo mpamvu buri wese agira uwe musaraba ntawe uwutwaza undi. Yezu wenyine ni we ushobora kudufasha gutwara umusaraba wacu igihe tumurebeyeho.

Catégories
Inyigisho

Kumenya Imana ni urugendo

Inyigisho yo ku wa kane w’Icyumweru cya XVIII gisanzwe
Ku wa 10 Kanama 2017

Amasomo : Ibar  20,1-13 Z 111  Mt 16,13-23

Nteruye ngira nti kumenya Imana ni urugendo, ni uguhozaho umuntu agahora avugurura intambwe ze. Kumenya Imana si intsinzi y’umunsi umwe, ngo hanyuma umuntu abe yakwiyicarira nk’uwagashize cyane ko nk’uko Petero abitubwira mu ibaruwa ye umwanzi ntahuga (1Pet 5,8). Umwanzi ahora ashakisha cyane cyane abakwibwira ko bahamije intambwe n’ibirindiro mu Yezu Kristu maze bakirara bakadamarara.
Ishema ryacu ribe umusaraba wa Yezu
Ibi mbyendeye ku byabaye kuri Petero intumwa mu Ivanjili ya none. Amaze gutanga igisubizo cyiza abwirijwe n’Imana; igisubizo ubundi cyirukana amashitani, aguye mu mutego wa Sekibi mu kanya gato cyane. Mu by’ukuri amagambo ya Petero abwiye Yezu abanje kumwihugikana, si aye wenyine ayasangiye na bagenzi be. Kimwe na bagenzi be ariko cyane cyane Petero ntibihanganiye kumva icyabavana amata mu kanwa. Petero yari amaze kugabana umwanya w’ibanze muri Kiliziya ya Nyagasani; yahawe ububasha bukomeye. Bagenzi be nabo bari bizeye iyo myanya turibuka ko bene Zebedeyi baherekejwe na nyina bo bagiye kwibariza hakiri kare ngo hatazagira ubakorana (Mt 20,20-28)

Catégories
Inyigisho

Yezu Kristu wenyine ni we waduhishuriye Imana y’ukuri.

Kuwa gatatu w’icyumweru cya XV gisanzwe

19/07/2017

Amasomo : Iyim 3,1-6.9-12  Z 102,1-7  Mt 11, 25-27

Muri Ivanjili ya none Yezu arongera kuduhamiriza ko ariwe nyira itugeza ku Mana. Gusa ubwirasi n’ubwibone bwa muntu bukaba bwamujyana mu mwijima. Abo Yezu yita abanyabwenge n’abahanga b’iyi isi ni abizera ubwenge bwabo badashaka kwemera ibyo Kristu yaduhishuriye adutangariza Inkuru Nziza. Abumva ko ubwenge bwabo bubaha ibisubizo by’ibibazo byose.Bukabereka byose ibiboneka n#ibitaboneka.
Kwemera ibisumbye ibyo tubonesha amaso tubikesha ukwemera bisaba ukwicisha bugufi. Bisaba kwemera ko ubushobozi bwa muntu ari buke maze ibimusumba akabishaka mu Mana yo yatwiyeretse muri Yezu Kristu. Wongeye kutubwira ko tudashobora kumenya Imana tutamunyuzeho.

Imyemerere gakondo itujyana mu mwijima

Nta kuvanga ngo twibwira ko imyemerere gakondo yacu yari kutugeza ku Mana nyakuri ni ukwihenda cyane cyangwa kwirengagiza ukuri. Ni imyemerere yashyigikiraga ubusumbane, igatesha agaciro umuntu. Harimo kwitiranya Imana n’ibiremwa byayo.Ni imyemerere yari ikirebera mu cyezezi ihunyeza nta mucyo utamanzuye. Ni byo tugomba kubaha abakurambere bacu ariko ntitubabeshyere ibyo batigeze, batari kuzapfa banagezeho iyo tutamenya Ivanjili. Kubahimbira imyemerere batigeze ngo dukunde twigumire mu mwijima w’ibibi ni ukwanga gufungura amaso ngo utabona. Imana y’urukundo ni iyo Yezu Kristu yaduhishuriye. Itubwira ko umuntu wese aremye mu ishusho y’Imana kandi afite agaciro gakomeye (Lk 15,1-7). Ubundi bwenge n’ubushakashatsi burimo no kwikuza bitubuza kumenya Imana.
Iby’imihango gakondo bifite umwanya n’agaciro kabyo ariko kubizamura ku rwego rw’iby’Imana y’ukuri twabwiwe na Yezu Kristu ni ukwibeshyera ukabeshya n’abandi no gushaka guhera mu mwijima.

Catégories
Inyigisho

“Igipimisho muzageresha, ni cyo namwe muzagererwamo”

Ku wa mbere w’icyumweru cya 12

Amasomo: Intg 12,1-9 Z 32 Mt 7,1-5

Mu nyigisho yatangiwe ku musozi, uyu munsi turumva Yezu Kristu adushishikariza kudacira abandi imanza. Ni kenshi dushobora kugwa mu gishuko cyo kunenga no kunegura abandi imyitwarire, ibitekerezo cyangwa ibyifuzo byabo.
Tuzi neza ko ubushobozi bwacu bugira aho bugarukira. Buri wese akagira uko abona ibintu bitewe n’impamvu nyinshi: aho akomoka, aho aba, amateka ye, ibyo yize, imyaka ye, ibyo akora n’ibindi. Ibi bitwereka ko tunyuranye.
Ikindi kandi nta muntu wagombye kumvako ari kamara, ngo yibwire ko ariwe utuma izuba rirasa rikarenga cyangwa isi izenguruka. Iyo umuntu ari mu bintu runaka, mu itsinda cyangwa mu ikipe hari ubwo yibwira ko ari we w’ingenzi. Nyamara iyo arwaye cyangwa akagira impamvu ituma ataboneka igihe kirekire, aragaruka agasanga ntacyapfuye, ubuzima bwarakomeje ndetse ahubwo byarakozwe neza kurusha igihe yari ahari.
Akenshi burya igishuko cyo gucira abandi imanza kiza iyo twaryohewe n’ibiganiro tukibwira ko nidusesengura neza iby’abandi ibyacu birashimwa.
Kumva ko tutari kamara, kwemera ko natwe dufite inenge zacu, ko ubushobozi bw’umuntu muri rusange bugira aho bugarukira bituma twikuca mu byo tuvuga, tukirinda gucira imanza no kunegura abandi.