Catégories
Inyigisho

Ubuhanga bw’iyi si ni iki?

KU WA 4 W’ICYA 22 GISANZWE A, 03/09/2020

Amasomo: 1 Kor 3, 18-23; Zab 24 (23), 1-2,3-4ab,5-6; Lk 5, 1-11

Ubuhanga bw’iyi si ni iki?

Twagize amahirwe yo kubaho muri iki kinyejana cya 21. Dusoma amateka y’isi tukishimira kumenya uko byose byagiye bitera imbere. Muri iyi myaka turimo, muri rusange abantu bishimiye ibintu byinshi byavumbuwe. Hakozwe amato manini ajya kure cyane. Hakozwe igare, ipikipiki n’imodoka. Byabaye igitangaza gukora indege rutemikirere. Umuntu yakandagiye ku kwezi mu birometero ibihumbi 384 uvuye ku isi. Ubu ikoranabuhanga rigeze kure cyane. Mu myaka itarambiranye, hari abantu biteguye kujya kuri Marisi mu bilometero birenga miliyoni 78 uvuye ku isi. Ariko se ubwo buhanga muntu ageraho n’ibyo byose, bimaze iki?

Pawulo intumwa aratubwira ko ibintu byose byo ku isi n’ubuhanga bwa muntu, ari ubusazi mu maso y’Imana. Ibyo bisobanuye ko, icyangombwa mu buzima ari ukumenya Imana. Iby’Imana kandi nk’uko twabihishuriwe bigora ubwenge bwa muntu. Ni ukubera icyaha cy’inkomoko. Icyo cyago gituma muntu ajya kure y’Imana. Ibyo Imana imubwira ntabyumva. Ashaka kwihimbira ibye. N’igihe Imana yigize umuntu muri Yezu Kirisitu, muntu yaramusuzuguye. Yanamwogeyeho uburimiro amwica urupfu rubi. Izuka rya Yezu ariko, ryamurikiye ab’umutima wiyoroshya. Mu by’ukuri, urupfu n’izuka bya Kirisitu, ni byo bituma muntu yibaza ibyo arimo. Benshi mu batagatifu tuzi, bakunze kwitegereza Yezu ku musaraba umutima wabo urashenguka kubera imirasire y’Urukundo rw’uwababambiwe. Basutse amarira bahitamo gukurikira Yezu. Ubu bari mu bwami bw’Ijuru iteka ryose. Abo batagatifu barwanye intambara ikomeye. Bamwe baratotejwe baricwa bapfa batyo nk’Umucunguzi wabo. Abandi bahungiye mu butayu ngo barebe ko uyu mubiri bawuhunza ibishuko byo mu isi. Nyamara iyo mu butayu, na ho bahasanze ubushukanyi bwa Sekibi. Izo ntwari ku rugamba n’abandi bose babatijwe bakagerageza gucubya amarari ya muntu n’ubwenge bucuramye bwe, baracurukutse maze uko baguye mu cyaha icyo ari cyo cyose bagapfukamira Yezu akabakiza.

Ishyano ryo rigwira abantu bose bafite ijosi rishingaraye imbere y’Imana. Bene abo bakerensa iby’Imana. Iby’ukwemera barabinnyega. Bibwira ko bazi ubwenge. Abandi bashaka kwigarurira ibihugu mu bubasha bw’intambara. Ni ba Baratifaranga. Imitungo bayigwizaho. Barangwa no gusuzugura abakene. Ni ba Gica bica ubabangamiye wese. Abo bapfukamirwa n’abo bahindura ingaruzwamuheto. Hari n’ubwo ababatijwe benshi birengagiza Roho bahawe maze ijambo ry’abagenga b’iyi si rigapfukirana Ijambo ry’Imana rigenewe kumurikira umuntu wese uje kuri iyi si. Umutego ukomeye w’abo banyesi, haba n’ubwo abayoboye Kiliziya bawugwamo. Icyo gihe babura imbaraga zo guhumuriza intama baragijwe. Ibyo si ibya none gusa. Ni ukuva kera. N’igihe Yezu yari mu butumwa kuri iyi si, ni benshi bakomeje guhitamo kugaragira Horodi n’Umwami w’abami. Abo bagenga ni bo rubanda yabonagamo amaboko.

Hariho abantu bake bumvise inyigisho ya Yezu bahitamo kumukurikira. Twumvise mu Ivanjili uko Petero na Bene Zebedeyi basize byose bagakurikira Yezu. Ubwo ni bwo bwenge. Uri kumwe na Yezu aba afite byose. Nyuma y’agahe gato amara hano ku isi, yinjira mu ihirwe rishoraho. Ubwo ni bwo bwenge bukomoka ku Mana. Uwishimiye iby’isi akirengagiza iby’ijuru, uwo nguwo yarazingamye. Ntiyigeze akura mu gihagararo UmuremyI yari amutegerejeho. Yahisemo kugaburirwa ibindi bidatera imbaraga roho ye.

Dusabirane twese gukomera ku buhanga nyakuri Uwatubambiwe yatumenyesheje. Iby’isi tubishake kugira ngo bitubesheho hano ku isi. Tumenye ariko ko byose nta kavuro igihe cyose tutazi aho tugana n’uwo dukorera.

Yezu Kirisitu asingizwe. Umubyeyi Bikira Mariya aduhakirwe. Abatagatifu, Gerigori wa 1, Mansuwi, Bazilisa na Sandaliyo, badusabire kuri Data Ushoborabyose.

Padiri Cyprien Bizimana

Catégories
Inyigisho

Ibitambambuga

KU WA 3 W’ICYA 22 GISANZWE A, 02/09/2020

Amasomo: 1 Kor 3, 1-9a; Zab 33 (32), 12-13, 14-15, 20-21; Lk 4, 38-44

Ibitambambuga muri Kirisitu

Igihe Pawulo yandikiye Kiliziya y’i Korenti bwa mbere, yaduhishuriye uko aba-Kirisitu bari bifashe. Uko byumvikana bari batarakomera. Pawulo agamije kubacyaha kugira ngo bace akenge mu bya Yezu Kirisitu.

Pawulo yari yaratangije iryo koraniro i Korenti maze nyuma ye haza uwitwa Apolo akomeza kubigisha Inkuru Nziza. Ariko nyamara byaje kugaragara ko i Korenti abemeye Kirisitu bari bakifitemo amatwara atagize aho ahuriye na We. None se abantu basakuzaga bamwe muri bo bavuga ko bikundira Pawulo abndi ngo Apolo! Wagira ngo kuri bamwe Pawulo ni we Kirisitu ku bandi Apolo akaba ari we We! Bari bataramenya ko muri Kiliziya Kirisitu ari we mukuru. Ntibari bazi ko ari we uha bose gutera imbere mu by’Imana yewe no mu by’isi. Uko tumusanga ni ko atwongerera urukundo rw’Imana, ni ko aduha kwitwara neza no kumenya gukoresha neza ibyo ku isi. Buri wese rero yagombaga kuba yariyumvishije ko ashakisha uko ashyikirana na Yezu ku giti cye kugira ngo amucengeze mu musokoro amabanga y’Ingoma y’Imana. Abatangiza amakoraniro, ababasimbura n’abandi bose bitangiramo ubutumwa, nta n’umwe ugomba kurangamirwa nk’aho ari we Yezu Kirisitu.

Pawulo intumwa agendeye kuri ayo matwara y’amarangamutima gusa, yemeje ko abo Banyakorenti bari bakiri ibitambambuga muri Kirisitu. Ni ukuvuga ko bari bataramenya Kirisitu uwo ari we. Igitambambuga cyose kiba kitaramenya gutandukanya akaro n’akatsi. Hari n’ibindi bimenyetso byagaragazaga ubutambambuga bwabo. Ngo bari bakigengwa na kamere yabo gusa. Bari bakiri impinja mu bukirisitu ku buryo Pawulo avuga ko yabatungishije amata gusa. Ntiyashoboraga kubagaburira ibyo kurya bikomeye. Umuntu utarabasha kwakira inyigisho nyinshi zikomeye mu by’ukwemera, aba akiri uw’iyi si. N’iyo akirangwa n’ishyari n’amakimbirane, aba akiri igitambambuga muri Kirisitu.

Ese aho natwe ntitukiri ibitambambuga muri Kirisitu? Iyi nyigisho ishingiye ku ijambo ry’Imana twumvise nidufashe guhuguka. Buri wese ahore yisuzuma yikonozemo amatwara yose yatuma Sekibi imuha urw’amenyo. Koko rero hari henshi mu ngo, mu Miryangoremezo, mu turere, mu masantarali no mu maparuwasi usanga abakirisitu batumvikana. Uhereye ku bayobozi n’abandi bafatanya ugasanga bifitemo amacakubiri no kudashyira hamwe. Ugasanga aho kumva ibyo Yezu abigisha mu Ivanjili barakurikira iby’isi gusa. Urwo runturuntu dushobora kurusanga hose. Mu bato no mu bakuru, muri Kiliziya no muri Leta cyane cyane, mu bakennye no mu bakire, mu bize no mu batarize, muri Afurika n’i Burayi no ku isi hose. Ikibazo kiba hose. Cyakora na none, nta bapfira gushira. Hose ushobora kuhasanga abantu borohera Roho w’Imana bakarangwa n’ineza n’ikinyabupfura. Hari abo uzasanga abarangwa n’urwango, ruswa n’ubusambanyi. Bashobora kuba ari bo benshi, Imana ni yo ibizi. Ariko hose ntihazabura bake barangwa n’ineza, bagirira neza abakene n’abatishoboye. Akenshi bene abo ntibagira ibikabyo mu mibereho yabo. Iyo bicengejemo urukundo rwa Kirisitu, barangwa no kwiyoroshya cyane no gushyira mu gaciro. Bene abo, isi irabakeneye cyane mu gihe abirata n’abanyabikabyo bagira nabi bikururira umuvumo wo kwangwa na benshi.

Tugenze, dute? Turebere kuri Yezu Kirisitu. Dusenge cyane turonke imbaraga zo kwanga ikibi. Kandi twakire umugisha Yezu yahaye Kiliziya n’ububasha bwo gukiza roho z’abantu. Duhore twishimira kwakira uwo mugisha Kiliziya idusenderezamo ku bwa Kirisitu. Bamwe muri twe bahawe isakaramentu ry’ubusaseridoti, tubasabire birinde kubaho nk’ibitambambuga. Ni bwo bazagira imbaraga zo kuvana benshi mu manga.

Yezu Kirisitu asingizwe. Umubyeyi Bikira Mariya aduhakirwe. Abatagatifu duhimbaza, Adelina, Konkorudi, Zeno, Antoni, Tewodota n’umuhire Ingrid, badusabire kuri Data Ushoborabyose.  

Padiri Cyprien Bizimana

Catégories
Inyigisho

Roho mbi ziramenengana

KU WA 2 W’ICYA 22 GISANZWE A, 01/09/2020

Amasomo: 1 Kor 2, 10b-16; Zab 145 (144), 8-9, 10-11, 12-13ab, 13cd-14; Lk 4, 31-37

Roho mbi ziramenengana

Amasomo matagatifu y’uyu munsi aratugaragariza ko dutsinda ikibi, icyaha n’icyitwa roho mbi cyose, iyo tuyobowe na Roho Mutagatifu.

Catégories
Inyigisho

Gushaka no kudashaka

KU WA 5 W’ICYA 19 GISANZWE A, 14/08/2020

Amasomo: Ezk 16, 1-15.60.63; Ind.: Iz 12, 2, 4bcde-5a, 5bc-6; Mt 19, 3-12

Ikiruta ni ukudashaka?

Dushatse ukuzirikana kwa none twakuganisha ku rukundo ruranga umugabo n’umugore. Imana ubwayo yakunze kurutangaho ikigereranyo. Mu bihe turimo, urwo rukundo rusa n’ururi mu mazi abira. Aho si yo mpamvu bamwe bahitamo kudashaka?

Isomo rya mbere twavanye mu gitabo cy’umuhanuzi Ezekiyeli, riradufasha kumva ukuntu Imana yitaye kuri Isiraheli. Iryo hanga rigereranywa n’akana k’agakobwa katawe kakivuka. Kagaragarijwe urukundo n’Uhoraho. Ni we wakavanye mu maraso kigaraguragamo. Yakitayeho arakarera. Kamaze gupfundura amabere kageze mu gihe cyo kubengukwa, yagasezeranyije urukundo rushyitse. Nyuma kitamuyemo umugore ubereye uwamwihebeye. Nyamara ngo ntibyateye kabiri, uwo mugore ukunzwe yarahomoye asambana na benshi. Ibyo bisobanuye ko Isiraheli yirengagije Isezerano ry’Uhoraho ikigarurirwa n’ibigirwamana by’amahanga. Uhoraho ntiyacitse intege yakomeje guhamagara uwo yakunze amugirira imbabazi, urwo yamukunze rwongera kubungwabungwa.

Urwo rukundo rw’Uhoraho, ni urugero rudahinyuka no mu mibanire y’umugore n’umugabo bahujwe n’isezerano ryo kuzabana iteka badahemukirana. Mu Bayahudi ba kera, uwo mubano ntiwatunganaga akenshi igihe kirekire. Ndetse hariho uburyo bwo gusenda umugore ku mpamvu ibonetse yose. Yezu Kirisitu ashaka kuvugurura iyo myumvire. Nta mpamvu yo kugira ngo abantu birohe mu busambanyi. Yabisobanuye neza: umuntu wese uretse uwo bashakanye akajya ku wundi, yaba umugore yaba umugabo, aba asambanye. Cyakora iyo umugabo n’umugore  batandukanye bari basanzwe babana bitemewe n’amategeko, byo nta kosa rindi. Kubana bitemewe n’amategeko, ni icyaha. Nta we ukwiye kwitwaza impamvu ibonetse yose yitwikiye umuco wateye bamwe bita gukocora, guterura, kwishyingira…

Yezu agamije kwigisha abantu bose urukundo Imana se yakunze Isiraheli, rwa rundi ruhoraho, rwihangana, rudahemuka kandi rubabarira. Ni urwo rutuma umugabo abana n’umugore basezeranye kugeza ku rupfu. Abigishwa ba Yezu bumva ko ikiruta ari ukudashaka. Nta gushidikanya ko babonaga ibyo kubana iteka mu budahemuka bishoborwa na mbarwa. Nyamara ukurikije inyigisho ya Yezu, nta muntu muzima wakwiye gutinya urwo rukundo rudahemuka. Erega nta we urwikanira. Ni imbaraga z’Imana zikomeza umuntu wese muzima. Cyakora buri wese ashobora guhitamo kwibera ikiremba kubera ingoma y’Imana. Bityo abaho adashate kandi akabishobozwa ku bw’ingabire ya Yezu Kirisitu. Uwavutse ari ikiremba we ntashaka kandi nta n’ikibazo kindi bimutera. Umuziro ni ukugirwa ikiremba n’ubugome bw’abantu. Mu bihugu byibwira ko byateye imbere haboneka n’abantu batari bake bashaka kwiberaho nta nshingano n’imwe y’urugo ibareba. Ibyo ntibikabe iwacu. Ni ububwa buterwa n’uburere butitaweho cyane mu mico imwe n’imwe igenda yaduka. Urukundo Imana yadushyizemo ikarutwereka, umugabo n’umugore bararusangira rukera imbuto nyinshi. Abihayimana bigomwa urw’abashakanye, na bo bakitangira Ingoma y’Imana kuko ni yo tuzishimamo iteka.

Yezu asingizwe. Umubyeyi Bikira Mariya aduhakirwe. Abatagatifu, Magisimiliyani Mariya Kolbe, Arnoldi na Evrardi, badusabire kuri Data Ushoborabyose.  

Amina.

Padiri Cyprien Bizimana