Catégories
Inyigisho

“Nimwicishe bugufi”

Umunsi Mukuru wa Mutagatifu Mariko umwanditsi w’Ivanjili

Amasomo  1Pet 5,5b-14  Zab 88,2-17    Mk 16,15-20   

Petero Intumwa aradushishikariza ubufatanye no kwicisha bugufi. Kwicisha bugufi ni umugenzo ntasimburwa mu bukristu ndetse no mu mibereho y’abantu muri rusange. Ni akaga iyo mu muryango w’Imana, iyo mu bakristu habuze ukwicisha bugufi.

Ikinyuranyo cy’ukwicisha bugufi ni ubwibone n’agasuzuguro. Twese tugomba kumva ko turi abavandimwe. Tugomba guharanira ikuzo ry’Imana. Hari ubwo bamwe bumva barusha abandi agaciro ko begereye Imana ho gato gusumba abandi.

Kwicisha bugufi bituma twumva abandi, tukabatega amatwi. Kwicisha bugufi bituma twihanganira abandi, bikaturinda kwigira abacamanza n’abasesenguzi b’ibyaha by’abavandimwe bacu kandi bihabanye n’Ivanjili. Biduha guhora tuzirikana ko twese buri wese ku giti cye dutegereje umucamanza w’intabera, ko byose bitarangirira kuri iyi si.

Catégories
Inyigisho

Uwemera Kristu ntacirwa urubanza

Bafashijwe n’imbaraga za Roho Mutagatifu Abigishwa ba Yezu babamaje Inkuru Nziza mu ngorane nyinshi. N’ubwo batotezwaga bwose ntibacitse intege kuko bazirikanaga ijambo Yezu yababwiye ati “ Iminsi yose turi kumwe” (Mt 28,20). Nta gushidikanya ko imbaraga bazivanaga mu kumva ko bari kumwe na Kristu, kandi bikigaragariza mu bimenyetso n’ibitangaza binyuranye.

Ntibatinyaga ababatoteza n’ababakangisha kubagirira nabi babasaba guceceka. Ni mugihe kandi inyigisho zabo , Inkuru Nziza ya Yezu Kristu yari ibangamiye inyungu z’amatsinda anyuranye y’Abayahudi. Ibi byatumaga bakoresha ubushobzi bafite ngo bacecekeshe abigishwa ba Yezu.

Inyungu baharaniraga zari zarabahumye amaso ku buryo batari bakibona n’ibitangaza by’Imana. Niyo mpamvu batibajije ku kuntu Abigishwa bari basotse mu buroko. Umwijima barimo watumaga batanabona ibigaragarira amaso.

Yezu akabitwibutsa mu Ivanjili ko kumwemera ari ukurangwa n’ibikorwa by’ukuri. Ukora iby’ukuri akaba abikoreye Imana. Ibikorwa by’ukuri by’abemera Kristu bibangamirwa n’abakunda ibikorwa by’umwijima. Ibikorwa by’umwijima ni ibikorwa bya Sekibi. Abana b’urumuri barasabwa kwitwararika kuko abakozi ba Sekibi batakihishira. N’ubwo ibikorwa byabo ari iby’umwijima basigaye babikorera ahabona bakanabyamamaza, bagashakisha n’abandi benshi babibashyigikiramo. Umuntu yakwemeza ko kurwanya ibikorwa by’umwijima bigoye kuri iki gihe cyacu kuko ababikora batakigira isoni kandi bakagira n’amaboko.

Birasaba abana b’urumuri gushirika ubute bagakoresha ingabire bakura mu masakramentu bakiringira imbaraga za Roho Mutagatifu. Ntakabuza tuzatsinda.

Catégories
Inyigisho

Tugomba kongera kuvuka bundi bushya

Inyigisho yo ku wa kabiri w’icyumweru cya 2 cya Pasika, Ku wa 05 Mata 2016

Turakomeza kuzirikana amayobera makuru y’ukwemera kwacu Urupfu n‘Izuka bya Kristu. Aya mayobera n’iyo ibindi byose bishamikiyeho. Adufasha kumva icyo duhamagariwe mu muryango w’abana b’Imana.

Ibyo Nikodemu, umuhanga n’umwigisha muri Israheli adasobanukiwe ni benshi tutabisobanukiwe.

Kuvuka ku bw’amazi na Roho Mutagatifu ni byo bitugira abana b’Imana. Kuvuka byumvikane ko bivuze guhinduka tukemera Inkuru Nziza. N’ubundi nk’abantu turi ibiremwa by’Imana, abantu bose Imana irabakunda ariko muri iyi vanjili Yezu aradusaba gutera indi ntambwe ya kabiri. Intambwe ya mbere ni ukuvuka ku mubiri iya kabiri bikaba kuvuka ku mazi na Roho Mutagatifu ibimenyetso byo guhinduka kwacu.

Nikodemu azi byinshi kandi yabonye byinshi gusa iyintambwe ya kabiri ikeneye ukwemera kurusha ubumenyi. Kwemera ibyo Yezu atubwira kuko ni we wenyine uzi Imana kandi ushobora kuduhuza na yo. Ni we uzi ibyo mu ijuru. Ntibisaba ubuhanga bwo mu bitabo cyangwa amashuri menshi bisaba ukwemera.

Catégories
Inyigisho

Ngiki igihe gikwiye; nguyu umunsi w’uburokorwe!

Inyigisho yo ku wa Gatatu w’ivu, 10 Gashyantare 2016

Amasomo:  Yow 2, 12-18;  Zab 51(50), 3-4, 5-6ab, 12-13, 14.17;

2 Kor 5, 20-21; 6, 1-2; Mt 6, 1-6.6-18

Bavandimwe,

Inema n’amahoro bikomoka kuri Nyagasani Yezu Kristu bihorane namwe!

Uyu munsi turi ku wa Gatatu w’ivu. Uyu munsi twatangiye igihe gikomeye cy’ubuzima bwacu bwa gikristu; igihe cy’Igisibo. Dutangiye urugendo rw’iminsi mirongo ine ruzadufasha guherekeza Yezu Kristu uzamutse agana i Yeruzalemu aho agiye gusohoreza ubutumwa bwo kuducungura muri Pasika ye; ni ukuvuga mu ibabara, urupfu n’izuka bye.

Mu masomo ajyanye n’uyu munsi ndetse no mu muhango w’ivu dukorerwaho, Kiliziya iratwibutsa icyo duhamagariwe kugira ngo uru rugendo rwacu ruzagende neza.

  1. Ngiki igihe cyo kwisubiraho

Iki ni igihe gikwiye cyo kwakira impuruza twagejejweho cyane cyane n’isomo rya mbere ryo mu gitabo cy’Umuhanuzi Yoweli n’isomo rya kabiri ryo mu ibaruwa ya kabiri Pawulo intumwa yandikiye Abanyakorinti.

Aya masomo yombi yatugejejeho impuruza yo kugarukira Imana. Koko rero, igihe cy’Igisibo ni igihe gikwiye cyo kwigorora n’Imana no kuyigarukira n’umutima wacu wose; ni igihe cyo gushishimura imitima yacu, kugira ngo tubone kwakira imbabazi n’impuhwe z’Imana. Ni ukureka Imana ikatwigarurira, maze tugahinduka koko abatunganiye Imana.

Iki gihe rero ntikizatubere impfabusa; rwose nk’uko Pawulo mutagatifu yabitubwiye; ntidupfushe ubusa ubuntu Imana yatugaragarije muri Yezu Kristu. Ntidushyire ejo hazaza icyo dushoboye gukora uyu munsi. Biri n’amahire; iyi mpuruza tuyumvise mu Mwaka wahariwe Impuhwe z’Imana. Nimucyo rero dufungurire imitima yacu Nyagasani utwingingira kumugarukira kugira ngo atubuganizemo urukundo rwe rutagira urugero n’impuhwe ze z’igisagirane.

  1. Imigezo itatu izabidufashamo

Ivanjili uko yanditswe na Matayo yatwibukije imigenzo itatu izaduherekeza muri urwo rugendo rwo kwisubiraho.