Mwahambanywe na Kristu kandi muzukana na we

Amasomo: Kol 2, 6-15; Zab 145 (144), 1-2. 8-9. 10-11; Lk 6, 12-19

Bavandimwe,

Kuva kera na kare Imana yari ifite umugambi wo gukiza abantu. Uwo mugambi wujujwe rero bidasubirwaho mu Mwana wayo Yezu Kristu waje kubana natwe, agatura rwagati muri twe, akababara, agapfa azira ibyaha byacu, nyamara akazuka mu bapfuye. Pawulo aratwereka ko uwo mukiro twawuronkeye mu rupfu n’Izuka bya Kristu. Mu gusohoza uwo mugambi we wo kudukiza, Yezu aratora intumwa ngo zibane na We maze zizamubere abahamya nk’uko twabyumvise mu Ivanjili. Zabuli iraririmba ko Uhoraho ari umunyampuhwe n’umunyaneza; agirira bose ibambe, maze imbabazi ze zigasakara ku biremwa bye byose. komeza… “Mwahambanywe na Kristu kandi muzukana na we”

Uwicisha bugufi ni we uzinjira mu Ngoma y’Ijuru

Ku wa kabiri w’icya XIX Gisanzwe C, 13 Kanama 2019

Abatagatifu Ponsiyani na Hipoliti

Amasomo: Ivug 31,1-8; Zaburi (Ivug 32, 3-4b.7.8.9.12); Mt 18, 1-5. 10-14

Bavandimwe,

“Nimwemere ko Imana yacu ari indahangarwa. Ni urutare, ibyo akora biba bitunganye rwose, uburyo bwe bwose buraboneye.” Amasomo twateguriwe kuri uyu munsi araduhamagarira kongera kuzirikana ku mugenzo mwiza wo kwicisha bugufi imbere y’ubuhangange bw’Imana.

Twumvise mu isomo rya mbere urugero rwa Musa. Uhoraho ubwe yari yaramwibwiriye ko atazakandagiza ikirenge cye mu gihugu cy’Isezerano, ati: “Nta bwo uzambuka iyi Yorudani ureba”. Twumvise rero ko Musa yiyumvamo imbaraga zigenda zimushiramo maze agategurira umuryango wa Israheli kuyoboka Yozuwe uzamusimbura. Twumvise ahanura Yozuwe ati: “Komera kandi ube intwari, kuko ari wowe uzinjirana n’aba bantu mu gihugu Uhoraho yarahiriye abasokuruza babo akazakibaha; … Wigira ubwoba, ntucike intege”. Musa aduhaye urugero rukomeye rwo kwemera kurekura igihe wumva inshingano zawe utakizishoboye maze ugaha umwanya ugusimbura nawe agakomereza aho wari ugejeje. Koko rero nta gahora gahanze.

Mu ivanjili, Yezu arakangurira abigishwa be guhindura imyumvire bakicisha bugufi mbese bakamera nk’abana bato. Uwicisha bugufi niwe uzinjira mu ngoma y’Ijuru. Urugero rwa kabiri rwo kwicisha bugufi Yezu aduha ni urwo gushakashaka intama imwe yazimiye.

Bavandimwe,

Turi mu gihe cy’irushanwa mu gukora cyane tugategeka, tugakira, tukagera ku bukungu bwinshi, tukazamura icyizere cyo kubaho neza kandi tukaramba, mbese tugatunga tugatunganirwa. Urusha abandi ubuhangange arigaragaza abandi bakamuyoboka. Buri wese rero aba aharanira kwicara kuri izo ntebe z’ibyubahiro. Ku bw’ibyo rero, uyu ni umwanya wo gusubiza amaso inyuma tukareba niba koko tugikurikiza inyigisho y’umwimerere ya Nyagasani Yezu yo kwicisha bugufi. Aho ntiyaba yibereye mu mpapuro gusa maze umunsi tuyiguyeho tukayigisha abandi ndetse mu mvugo inoze ariko twebwe twaranze kuva ku izima?

Iyo urebye uburyo tubyiganira imyanya y’ibyubahiro kugeza n’aho bamwe bashobora kuvutsa abandi ubuzima, usanga tugifite mu mitwe yacu iki kibazo abigishwa babajije Yezu: “Mbese ubona ari inde uruta abandi mu Ngoma y’Ijuru?”. Nyagasani Yezu yaduhaye urugero rwo kwicisha bugufi. Imibereho ye ubwayo iratwigisha. Yemeye kuba umwe muri twe ndetse yigira uwa nyuma kugira ngo twese nta n’umwe usigaye inyuma adukize. None se twebwe tuvuga ko twamukurikiye dukurikiza urwo rugero yaduhaye?

Kwicisha bugufi by’ukuri ni ukumenya umwanya wawe. Imbere y’Imana buri wese ameze nk’umwana muto uhora ahanze amaso umubyeyi we kuko ari we atezeho amakiriro ye yose. Twese turi bagufi imbere y’Imana. Ugize amahirwe agahagarara imbere y’abandi agomba kuba umugaragu wabo kuko Databuja ari umwe; ni Imana Data Ushoborabyose. Ariko muri uko guca bugufi buri wese muri twe afite umwanya adasimburwaho mu muryango w’abana b’Imana. Kwicisha bugufi rero si ukwisuzugura, kwisuzuguza cyangwa kwishyiramo ko ntacyo umaze, ko ntacyo washobora, ahubwo ni ukumenya abo turi bo, kumenya uruhare rwacu mu kubaka umuryango w’Imana. Tugomba kumenya ko ntawe udasimburwa mu butumwa bwo guhagararira abandi tukamenya ko mu byo dukora tugenda twuzuzanya, kuko turi ingingo z’umubiri wa Kristu nk’uko Pawulo mutagatifu abitubwira.

Nimucyo rero dusabe Nyagasani aduhe imbaraga zo kumenya ko nta na kimwe twakwigezaho igihe tutari kumwe nawe ahubwo twihatire kumwiyambaza igihe cyose, tumere nk’abana bato imbere y’Imana.

Padri Léonidas NGARUKIYINTWARI

“Ingoma y’Ijuru imeze nk’urushundura”

Ku wa kane w’icya XVII Gisanzwe C, 1 Kanama 2019

Mutagatifu Alfonsi Mariya wa Ligori

Amasomo: Iyim 40, 16-21. 34-38; Zab 84 (83), 3.4.5-6.11; Mt 13, 47-53

Bavandimwe,

“Yezu arangije iyo migani, ava aho”. Uyu munsi twumvise Yezu asoza imigani y’Ingoma y’ijuru. Aratubwira ati: “Ingoma y’ijuru imeze nk’urushundura banaze mu nyanja, maze rugafata amafi y’amoko yose”. Iyo ngoma y’ijuru, kimwe n’urushundura, irimo ubwoko bwose bw’amafi nk’uko twabyumvise. Abigishwa ba Yezu bumvise uyu mugani bashishikaye kurusha indi migani kuko bari abarobyi bikavuga ko bari bafite ubumenyi buhagije mu byerekeye amafi n’inyanja. Gusa Yezu arahera kuri uwo mugani agatanga inyigisho. Nk’uko bari basanzwe babigenza, bamaraga kuroba, bakicara hamwe bakarobanura amafi afite akamaro bakayashyira mu bitebo adafite akamaro bakayajugunya. Yezu ati: “Ni ko bizamera mu iherezo ry’isi: abamalayika bazaza batandukanye intungane n’abagome”. Intungane rero zizabana n’abagome kugeza ku iherezo ry’isi.

Twumvise mu isomo rya mbere, ubushyinguro butagatifu bw’isezerano Uhoraho yagiranye n’abantu bwagendanaga n’abayisiraheli bivuga ko Uhoraho yari rwagati mu muryango we.

Bavandimwe,

Iyo ngoma y’ijuru ni Kiliziya kandi ubwo bushyinguro bwo mu isezerano rya kera nabwo bushushanya Kiliziya. Kiliziya rero ni umuryango w’abana b’Imana. Iyo twamamaza ukwemera kwacu turavuga tuti: “Kiliziya ni imwe itunganye gatolika, ntagatifu”. Kiliziya ni ntagatifu, iratunganye. Nubwo ariko Kiliziya izira icyasha igizwe n’intungane hamwe n’abanyabyaha; ababi n’abeza, abaziranenge n’abagome. Kiliziya ni umuryango w’intungane n’abanyabyaha, kimwe n’urushundura rutwaye amafi meza hamwe n’adafite umumaro.

Ni kuki Nyagasani yemera ko intungane ibana n’umunyabyaha? Nyagasani yifuza ko twese turonka umukiro yatugeneye. Kwakira uwo mukiro cyangwa kutawakira biterwa n’icyo buri wese yihitiyemo. Kiliziya ifite ubutumwa bwo guhora ihamagarira abana bayo kwakira uwo mukiro w’Imana. Nyagasani aratwihanganira kugeza mu mpera z’ibihe kandi rero ntituzi umunsi n’isaha niyo mpamvu duhamagarirwa guhinduka none aha. Uyu ni umwanya ukwiye ni igihe cya ngombwa cyo guhinduka. Witegereza ejo hinduka ubu muri aka kanya kuko iby’ejo bibara abejo kandi ejo hahora hitwa ejo ariko hazaza umunsi utazagira ejo hazaza.

Niba uri intungane, komereza aho ariko kandi uritonde utagwa, igengesere utisekura hasi ugasandara kuko utwaye ubwo bukungu bw’akataraboneka mu tubindi tumeneka ubusa; niba uri umunyabyaha hinduka none aha, hindura icyerekezo maze ukurikize ingero z’abatagatifu n’abatagatifukazi bumvise ijwi ry’Imana maze bagahindura imibereho yabo bakagendera mu nzira z’ubutungane none bakaba baganje mu ijuru, ijabiro kwa Jambo.

Ese iyo wisuzumye utihenda, usanga ubarizwa mu ruhe ruhande? Urw’intungane cyangwa se urw’abagome? Akenshi twishyira aheza ndetse tukibwira ko abandi aribo bagome cyangwa abanyabyaha. Dutinda cyane mu kuvuga abandi, gucira abandi imanza. Kandi duca imanza duhereye ku mitekerereze no ku myumvire yacu mbese nk’aho ari twe cyitegererezo. Ni ngombwa kwamagana ikibi cyose iyo kiva kikagera ariko iyo dutangiye kuba abacamanza ba bagenzi bacu tuba twishyize mu mwanya utari uwacu. Hari igihe twitiranya icyaha n’umunyabyaha. Icyaha kiguma kuba icyaha ariko umunyabyaha ashobora guhinduka akaba intungane. Nyagasani Yezu niwe mucamanza w’ukuri. Azaza ku munsi wa nyuma gucira imanza abazima n’abapfuye, hagati aho ategereje ko twese duhinduka. Niba rero uri intungane, fasha umunyabyaha guhinduka kandi ubikore mu bwiyoroshye no mu rukundo. Bikore wera imbuto z’ubutungane, utanga urugero rwiza, utishyira hejuru kandi udaca urubanza. Garura iyo ntama yazimiye. Irinde kuba umufarizayi wibwira ko uri intungane ushyira abandi mu kato.

Ni iki kibura ngo tubarizwe mu mubare w’intungane? Nimucyo twese tubifatire umugambi kandi twese dufatane urunana muri uru rugamba rwo kurwana na Sekibi ugambiriye kudusesereza, akadusenya maze kuri wa munsi w’urubanza tuzatahukane umutsindo wa Yezu Kristu Umwana w’Imana nzima, We wadukunze akemera kutwitangira adupfira ku musaraba kugira ngo tugire ubugingo kandi tubugire busagambye. Amen.

Padri Léonidas NGARUKIYINTWARI.

Nyagasani Yezu tumukeshe ubuvandimwe nyabwo

Bavandimwe,

Icyumweru Gitagatifu twatangiye kirimo ipfundo ry’ukwemera kwacu kuko twibukamo ububabare, urupfu n’izuka bya Nyagasani.

Yezu ashenguwe umutima no gutekereza ko babiri mu nkoramutima ze bagiye kumuhemukira. Yuda azamugambanira, Petero we azamwihakana aka ya mvugo ngo iyo amagara aterewe hejuru buri wese asama aye. Yezu rero ababajwe nuko yakunze abantu akaza abasanga aje kubakiza ariko bo bakanga kumwakira (Yh 1,11) bakamugambanira bakamwica urw’agashinyaguro.

Iyo twumvise izina Yuda Isikariyoti duhita dutekereza umugambanyi. Burya ibijya gushya birashyuha. Ejo twumvaga yohani amushinja kwikundira amafranga ndetse ko burya abakene ntacyo bari bamubwiye; kuri we, bari urwitwazo (Yh 12,6). Uyu munsi twumvise Yezu amuburira mu marenga ariko kubera umutima we wanangiye ntashaka kumva. Sekibi yarangije kumwinjiramo ndetse ni nawe asigaye yumvira. Amaherezo ye rero ni ukwimanika (Mt 27, 5).

Simoni Petero ni wa wundi Yezu yabwiye ati “uri urutare kandi kuri urwo rutare nzubakaho Kiliziya yanjye” (Mt 16, 18). Dukunda kumwumva asubiza Yezu mu magambo yihuse. Twumvise ko nyuma y’uko Yuda yitwikira ijoro agasohoka, Petero uwo asigaye ahamya ko nta na kimwe cyamubuza gukurikira Yezu ndetse ko binabaye ngombwa yamupfira. Ibyo avuga nibyo ariko ntazi urumutegereje kuko mu gihe cy’amage azamwihakana gatatu. Gusa tubona Petero ababazwa n’uko yatatiye igihango yihakana Umwigisha maze agasuka amarira (Lk 22, 62) ndetse nyuma tumubona ahamya ashize amanga abwira abishe Yezu ko ari muzima kuko yazutse mu bapfuye (Int 2, 23-24).

Bavandimwe,

Yuda Isikariyoti na Petero bombi bahemukiye bikomeye Umwigisha wabo. Ikibatandukanya gusa ni uburyo buri wese yitwaye amaze kumenya uburemere bw’icyaha yakoze. Yuda yumvise ko icyaha yakoze gikomeye cyane ku buryo n’Imana ubwayo idashobora kumubabarira ndetse yibwira ko no kuguma kuri iyi si ntacyo bikimumariye maze ariyahura ibye biba birangiriye aho. Byatumye icyasha cy’ubugambanyi kimugumaho ndetse abagambanyi tubaha akabyiniriro ka Yuda.

Ku ruhande rwe, Petero yabonye amaze kwihakana Shebuja yumva ko yakoze ishyano maze asuka amarira. Ayo marira atwereka ububabare yatewe n’icyaha cye maze acyicuza ahereye mu mutima we aka Zabuli ya 50. Ku bw’ibyo, Yezu yaramubabariye ndetse amuha ubutumwa bwo gukomeza abavandimwe (Lk 22, 32) no kuragira intama ze (Yh 21, 15-19).

Yuda kimwe na Petero bagaragaje intege nke ariko Yuda, mu gikorwa cyo kwimanika, yahakanye impuhwe z’Imana ndetse yivutsa ubuzima atihaye. Petero we yisunze impuhwe za Nyagasani maze ahamya atyo ko nta cyaha na kimwe atababarira.

Bavandimwe,

Iyo twisuzumye tutihenze dusanga turi abanyabyaha. Kenshi na kenshi dusanga turimo abagambanyi. Ubugambanyi buragenda bwiyongera cyane. Turashaka amaronko cyangwa turakoreshwa n’ishyari maze tugatanga abavandimwe. Ba Yuda babaye benshi ku buryo kwizerana bigenda bikendera. Ba Yuda rero nimusigeho! Abihakana abandi mu gihe bageze iyo umwana arira nyina ntiyumve nabo barahari. Kubona incuti nyancuti iguherekeza kugeza ku ndunduro bisigaye bigoye.

Iki cyumweru Gitagatifu rero kitubere umwanya wo kwisuzuma neza. Tuzirikane ku rukundo Imana yadukunze kugeza ubwo itanga Umwana wayo ngo ajye mu kigwi cyacu akemera gupfa urwo twari twarakatiwe kubera ko twari abanyabyaha. Imana niyo yadukunze mbere natwe tuyegurire ubuzima bwacu bwose ntacyo dusize inyuma.

Twirinde kwihakana no kugambanira abandi ahubwo dufatane urunana, dutabarane aho rukomeye. N’igihe twagize intege nke tukagwa, twihutire gusaba Imana imbabazi mu isakramentu rya penetensiya ndetse twiyunge n’abavandimwe bacu. Maze koko kuri Pasika tuzagire ibyishimo bisendereye byo kuzukana na Kristu.

Padri Léonidas NGARUKIYINTWARI

id eget porta. non felis consectetur mattis mi, suscipit