Catégories
Inyigisho

Ni nde uri hejuru y’Imana Umushoborabyose?

Ku wa 3 w’icya XXXIV, C, 27/11/2019

Amasomo: Dan 5, 1-6. 13-14. 16-17. 23-28; Zab Dan 3, 62-64. 65-67; Lk 21, 12-19.

Tumenyereye kubona benshi mu banyabubasha b’iyi si, abategetsi cyangwa abagize amahirwe yo gutunga byinshi, bumva ko bihagije ndetse bakibwira ko batagikeneye Imana mu buzima bwabo, bakaba barayirukanye mu mibereho yabo ya buri munsi ndetse bakima amatwi n’abayivuga, bakabasuzugura kugeza n’aho babatoteza no kubica bitabuze. Abo, kimwe n’abandi bose bagenza nka bo, baribeshya kuko ubwirasi n’ubwibone nta cyo buvuze imbere y’Imana.

Catégories
Inyigisho

Twese twahamagariwe kuba intungane nka Data uri mu Ijuru

TWESE TWAHAMAGARIWE KUBAHO MU BUTUNGANE

Amasomo: Ubuh 2,23-3,9; Zab 34(33); Lk 17,7-10.

Twese twaremwe mu ishusho no mu misusire y’Imana. Twaremewe kuzabana na Yo ubuziraherezo. Uwo ni umugambi wa kera na kare Imana yahoranye. Kubera ishyari rya Sekibi, icyaha kidobya cyaje mu bantu, maze ingaruka yacyo Rupfu yinjira mu isi. Nyamara ibyo ntibyagamburuje umugambi w’Imana wo gukiza muntu kuko ku ndunduro y’ibihe yohereje Umwana wayo ku isi ngo avugurure umubano wayo na muntu maze atwereka inzira nyayo igera ku mukiro w’iteka kuko ari We Nzira, Ukuri n’Ubugingo (Yoh 14,6).

Tumaze kumva, mu isomo rya mbere, ko roho z’intungane ziri mu biganza by’Imana. Burya rero ubutungane bushyigikira kamere yacu ku buryo umuntu agomba kubaho aharanira kurangamira Imana igihe cyose, agatuza ageze ku mubano ushyitse na Yo. Umuntu ahamagariwe guhora ashakashaka Imana akagira agatima karehareha agamije guhura na Yo. Ubundi ibyo nibyo byakagombye kuba ibisanzwe mu buzima bwacu bwa buri munsi kuko twaremwe mu ishusho no mu misusire y’Imana. Twakagombye rero guhora dukururwa n’iyo shusho y’Imana. Twibuke indirimbo ivuga ngo “Twaremewe kuzajya mu ijuru, ni ho twese tuzishima iteka”. Iwacu h’ukuri ni mu ijuru.

None se niko bimeze? Imana ifite uwuhe mwanya mu buzima bwawe? Aho ntiwaba uyibuka gusa ku cyumweru no ku minsi mikuru yategetswe maze ukibwira ko bihagije? Cyangwa uyibuka gusa igihe ugiye gusenga cyangwa uhuye n’ibyago cyangwa se uri mu bihe bidasanzwe kugira ngo gusa ugire icyo uyisabira! Imana igomba kugira umwanya w’ibanze mu buzima bwacu bwa buri munsi. Nta segonda na rimwe ryakagombye kuducika tudashyikiranye n’Imana. Nimucyo dukuze umubano wacu n’Imana. Uko niko guharanira ubutungane kuko tugomba kuba intungane nka Data uri mu ijuru.

None se ni gute tugaragaza uwo mubano n’Imana mu buzima bwacu bwa buri munsi? Buri wese ahamagariwe gukora icyiza maze ikibi akakigendera kure. Ubwo nibwo buzima busazwe bwa buri muntu wese ariko by’umwihariko buri mukristu. Iyo dukoze neza nta kidasanzwe tuba dukoze kuko twese duhamagariwe kugira neza, “turi abagaragu nk’abandi” nk’uko twabyumvise mu Ivanjili. Nyagasani Yezu ni We utugira inama y’uko icyo ikiganza cy’iburyo gikoze icy’ibumoso kitagomba kukimenya. Ntitugakorere gushimwa rero nk’aho twakoze ibitangaza kandi “twakoze ibyo twari dushinzwe”.

Nyamara iyo dukoze ikibi, ishyano riba riguye kuko tuba dusenya umuhamagaro wacu wo guharanira ubutungane. Ikibi kiradusenya. None se ni kuki tubangukirwa gukora ibibabaza Imana? Ahubwo ni akumiro kumva abivuga imyato ku mugaragaro y’ibibi bakora. Iri ni ishyano! Akenshi na kenshi usanga ikibi ari cyo dufata nk’igisanzwe, umugiraneza turamutoteza, tukamwica urw’abagome kuko atagenza nka twe ahubwo umugiranabi tukamwerereza mu bicu. Turabicurika. Twebwe turasabwa guhinduka. Niduhindure imyumvire inzira zikigendwa. Niduharanire ubutungane kugira ngo natwe tuziturire mu biganza by’Imana tuzibanire n’Uwadukunze akaturema mu ishusho no mu misusire ye ndetse akohereza Umwana we w’ikinege ngo atwereke inzira nyakuri tugomba gucamo maze tuzabane na We ubuziraherezo, ubu n’iteka ryose. Amen.

Mutagatifu Yozafati, udusabire.

Padri Léonidas NGARUKIYINTWARI

Catégories
Inyigisho

Mwahambanywe na Kristu kandi muzukana na we

Amasomo: Kol 2, 6-15; Zab 145 (144), 1-2. 8-9. 10-11; Lk 6, 12-19

Bavandimwe,

Kuva kera na kare Imana yari ifite umugambi wo gukiza abantu. Uwo mugambi wujujwe rero bidasubirwaho mu Mwana wayo Yezu Kristu waje kubana natwe, agatura rwagati muri twe, akababara, agapfa azira ibyaha byacu, nyamara akazuka mu bapfuye. Pawulo aratwereka ko uwo mukiro twawuronkeye mu rupfu n’Izuka bya Kristu. Mu gusohoza uwo mugambi we wo kudukiza, Yezu aratora intumwa ngo zibane na We maze zizamubere abahamya nk’uko twabyumvise mu Ivanjili. Zabuli iraririmba ko Uhoraho ari umunyampuhwe n’umunyaneza; agirira bose ibambe, maze imbabazi ze zigasakara ku biremwa bye byose.

Catégories
Inyigisho

Uwicisha bugufi ni we uzinjira mu Ngoma y’Ijuru

Ku wa kabiri w’icya XIX Gisanzwe C, 13 Kanama 2019

Abatagatifu Ponsiyani na Hipoliti

Amasomo: Ivug 31,1-8; Zaburi (Ivug 32, 3-4b.7.8.9.12); Mt 18, 1-5. 10-14

Bavandimwe,

“Nimwemere ko Imana yacu ari indahangarwa. Ni urutare, ibyo akora biba bitunganye rwose, uburyo bwe bwose buraboneye.” Amasomo twateguriwe kuri uyu munsi araduhamagarira kongera kuzirikana ku mugenzo mwiza wo kwicisha bugufi imbere y’ubuhangange bw’Imana.

Twumvise mu isomo rya mbere urugero rwa Musa. Uhoraho ubwe yari yaramwibwiriye ko atazakandagiza ikirenge cye mu gihugu cy’Isezerano, ati: “Nta bwo uzambuka iyi Yorudani ureba”. Twumvise rero ko Musa yiyumvamo imbaraga zigenda zimushiramo maze agategurira umuryango wa Israheli kuyoboka Yozuwe uzamusimbura. Twumvise ahanura Yozuwe ati: “Komera kandi ube intwari, kuko ari wowe uzinjirana n’aba bantu mu gihugu Uhoraho yarahiriye abasokuruza babo akazakibaha; … Wigira ubwoba, ntucike intege”. Musa aduhaye urugero rukomeye rwo kwemera kurekura igihe wumva inshingano zawe utakizishoboye maze ugaha umwanya ugusimbura nawe agakomereza aho wari ugejeje. Koko rero nta gahora gahanze.

Mu ivanjili, Yezu arakangurira abigishwa be guhindura imyumvire bakicisha bugufi mbese bakamera nk’abana bato. Uwicisha bugufi niwe uzinjira mu ngoma y’Ijuru. Urugero rwa kabiri rwo kwicisha bugufi Yezu aduha ni urwo gushakashaka intama imwe yazimiye.

Bavandimwe,

Turi mu gihe cy’irushanwa mu gukora cyane tugategeka, tugakira, tukagera ku bukungu bwinshi, tukazamura icyizere cyo kubaho neza kandi tukaramba, mbese tugatunga tugatunganirwa. Urusha abandi ubuhangange arigaragaza abandi bakamuyoboka. Buri wese rero aba aharanira kwicara kuri izo ntebe z’ibyubahiro. Ku bw’ibyo rero, uyu ni umwanya wo gusubiza amaso inyuma tukareba niba koko tugikurikiza inyigisho y’umwimerere ya Nyagasani Yezu yo kwicisha bugufi. Aho ntiyaba yibereye mu mpapuro gusa maze umunsi tuyiguyeho tukayigisha abandi ndetse mu mvugo inoze ariko twebwe twaranze kuva ku izima?

Iyo urebye uburyo tubyiganira imyanya y’ibyubahiro kugeza n’aho bamwe bashobora kuvutsa abandi ubuzima, usanga tugifite mu mitwe yacu iki kibazo abigishwa babajije Yezu: “Mbese ubona ari inde uruta abandi mu Ngoma y’Ijuru?”. Nyagasani Yezu yaduhaye urugero rwo kwicisha bugufi. Imibereho ye ubwayo iratwigisha. Yemeye kuba umwe muri twe ndetse yigira uwa nyuma kugira ngo twese nta n’umwe usigaye inyuma adukize. None se twebwe tuvuga ko twamukurikiye dukurikiza urwo rugero yaduhaye?

Kwicisha bugufi by’ukuri ni ukumenya umwanya wawe. Imbere y’Imana buri wese ameze nk’umwana muto uhora ahanze amaso umubyeyi we kuko ari we atezeho amakiriro ye yose. Twese turi bagufi imbere y’Imana. Ugize amahirwe agahagarara imbere y’abandi agomba kuba umugaragu wabo kuko Databuja ari umwe; ni Imana Data Ushoborabyose. Ariko muri uko guca bugufi buri wese muri twe afite umwanya adasimburwaho mu muryango w’abana b’Imana. Kwicisha bugufi rero si ukwisuzugura, kwisuzuguza cyangwa kwishyiramo ko ntacyo umaze, ko ntacyo washobora, ahubwo ni ukumenya abo turi bo, kumenya uruhare rwacu mu kubaka umuryango w’Imana. Tugomba kumenya ko ntawe udasimburwa mu butumwa bwo guhagararira abandi tukamenya ko mu byo dukora tugenda twuzuzanya, kuko turi ingingo z’umubiri wa Kristu nk’uko Pawulo mutagatifu abitubwira.

Nimucyo rero dusabe Nyagasani aduhe imbaraga zo kumenya ko nta na kimwe twakwigezaho igihe tutari kumwe nawe ahubwo twihatire kumwiyambaza igihe cyose, tumere nk’abana bato imbere y’Imana.

Padri Léonidas NGARUKIYINTWARI