Catégories
Inyigisho

Inkuru nziza yacu ni Yezu Kristu

Inyigisho yo ku wa mbere w’Icyumweru cya 27 gisanzwe A

Amasomo: Gal 1,6-12; Z111 (110); Lk 10,25-37

Bavandimwe, Yezu Kristu akuzwe. Mu isomo rya mbere (Gal 1,6-12), Pawulo ababajwe n’ukuntu mu Banyagalati harimo abagihuzagurika mu kwemera, bakohoka ku nyigisho zibonetse zose zihabanye n’ibyo Pawulo ubwe yigishije. Arigisha Inkuru Nziza y’Izuka rya Yezu Kristu ari yo rudasumbwa, yahava hakaza abandi bigisha ibindi, byongeye batera ubwoba. Hadutse abigishabinyoma batera ubwoba bagira bati: urarimbutse niba utiyambaje roho izi n’izi, niba udakoze imigenzo runaka bikurangiriyeho, niba utaziririje ibi n’ibi uragatoye..! Pawulo yabibukije kenshi ko ahari iterabwoba n’ubwoba hatarangwa Roho Mutagatifu. Uwemera aho guhaburwa n’iby’iyi si cyangwa n’abakwirakwiza ubuyobe we yizirika ku gitinyiro cya Nyagasani no gukomera ku Wo yemeye.

Pawulo ati: arakaba ikivume ubigisha ibindi yakwita inkuru nziza nyamara bihabanye n’Inkuru Nziza imwe ishingiye kuri Yezu Kristu. Koko Yezu Kristu ni Mana Nzima na Muntu rwose. Ni we wenyine utunganye kandi ni we wenyine usumba byose hamwe na Data na Roho Mutagatifu. Nta yindi nkuru nziza yasumba Yezu Kristu: Imana mu bantu. Kandi icyo muntu yafata nk’inkuru nziza nyamara kitinjira mu murongo wa Yezu Kristu, icyo cyaba ari inkuru mbi kuri muntu kuko cyaba kigamije kumurimbura.

Dusabe Imana Data idukomeze mu kwemera, ukwizera no mu rukundo kugira ngo twunge ubumwe na Kristu we Nzira ya muntu, akaba Ukuri kw’Imana na muntu byongeye akaba Ubugingo buhoraho kandi bwuzuye bwa muntu.

Padiri Théophile NIYONSENGA

Catégories
Inyigisho

Ari ingaragu, ari uwubatse, ari umupfakazi ni nde uzaritaha?

Inyigisho ku masomo matagatifu yo ku wa gatatu w’icyumweru cya 23 Gisanzwe, imbangikane

Amasomo: 1 Kor 7,25-31; Z 45 (44); Lk 6,20-26

Mu isomo rya mbere, Pawulo mutagatifu aragerageza guhosha imyumvire y’ubuhezanguni yari yaradutse mu muryango w’Imana wari i Korinti. Ubwo buhezanguni bwarebanaga n’ubuzima n’imibereho ndangabitsina n’imyororokere. Hari bamwe mu buhezanguni bwabo bavugaga ko ingaragu (abatarashatse) ari bo Imana ishima bityo bagafata abubatse nk’abadashobora kubonera umwanya Imana, byongeye nk’abahisemo ibikorwa by’umubiri! Hari na bamwe mu bubatse, bumvaga ko ari bo bahisemo neza, ko bo bafasha Imana kurema no kororoka k’umuryango, bityo ko ingaragu zapfuye ubusa, ko ari ibirumbo. Hari n’abafataga abapfakazi nk’abahanwe n’Imana, nk’abituriye mu muruho ndetse ko nta wababaza byinshi byerekeye Imana n’Ingoma yayo.

Pawulo arerekana ko byose bihira abakunda Imana. Ari ukuba ingaragu, ari ukubaka urugo, ari ukwibona mu bupfakazi, igikuru ni ukwimika Imana mu buzima bwawe, kwizitura ku by’isi no kwizirika ku gushaka kw’Imana. Muri make, kuri Pawulo, kandi koko ni ukuri, ubuzima bwose (ingaragu, gushaka, ubupfakazi) bugeza ku butagatifu iyo ububayemo wunze ubumwe n’Imana Data kandi uvuga rumwe na Yo, unihatira gukora ugushaka kwayo.

Yego uwihebeye Imana, agahitamo kudashaka akorera wese Nyagasani nta kimuziga ariko kandi ntarusha ubutagatifu wa wundi wubatse akabana n’uwe akaramata kandi mu rukundo akora ugushaka kw’Imana. Ibi ni byo bituma mu Banyefezi 5, 21-33 Pawulo Mutagatifu yongera gusingiza urugo akerekana n’uburyo abashakanye bashushanya umubano wa Kristu na Kiliziya ye.

Nk’uko Ivanjili ntagatifu yabitweretse, koko hahirwa abahaho buri gihe bakeneye Imana, bayisonzeye kandi bayishakashaka. Ari ingaragu, ari abubatse, ari abapfakazi, buri wese azagera mu ihirwe ry’Ijuru igihe azaba aharanira ubutungane, agerageza kwigana Kristu no kumukurikira. Buri wese mu muhamagaro we, nasonzere Imana kandi ayishakashake; nababazwe n’ikibi cyangwa icyaha, akirinde kandi akirinde abandi; nakomere kuri Nyagasani Yezu Kristu kabone n’aho yatotezwa azira ko yamuyobotse. Nimwishime munezerwe mwebwe mwese muharanira kwitagatifuriza mu buzima bwose murimo, mukagerageza kunogera Imana Data na bagenzi banyu. Ingororano yanyu izaba nyinshi mu Ijuru.

Abatagatifu duhimbaza: Petero Klaveri, Alani, Omeri na Gorgoni badusabire maze ntiducogore ku rugamba n’urugendo by’ubutagatifu.

Padiri Théophile NIYONSENGA

Catégories
Inyigisho

Twigane Mt. Marita twakira Yezu Kristu iwacu no mu byacu

Ku wa gatatu w’icyumweru cya 17 gisanzwe A, 29/07/20 20

Amasomo: Rom 12,9-13; Zab 34 (33); Yh 11,19-27

Mutagatifu Marita, uwakiriye Nyagasani

Bavandimwe, turahimbaza umunsi wa Mutagatifu Marita. Ni wa muvandimwe wa Mariya na Lazaro, we wahihibikanaga yakira Yezu Kristu mu rugo rwabo. Marita yaranzwe no guhangayikishwa n’uko Yezu yagubwa neza iwabo. Twatorewe na twe kwakira Imana mu buzima bwacu bwa buri munsi.

Ivanjili ntagatifu itwereka ukwemera guhambaye kwa Marita n’urukundo rutagereranywa afitiye Yezu, Umucunguzi. Marita yagaragaje mu buzima bwe ko ari umuja ubereyeho guhereza Umucunguzi. Ni umukene witoza kwakira Imana ikunguhaye kuri byose;  ni ikiremwa gikereye kwakira Uwakiremye, uwo gikesha ubuzima. Mutagatifu Marita ahagarariye abafasha abandi bose nyamara nabo hari byinshi bakennye, bazirikana ko Yezu Kristu ari we wihayeho abantu Ikiribwa koko n’Ikinyobwa koko maze isi igahembuka: Ukaristiya Ntagatifu. Marita yahembuje amafunguro yo mu isi kandi ahita, wa wundi uzahembuza isi Ubumana bwe n’Izuka rye.

Mutagatifu Marita afite ukwemera guhambaye mu izuka. Ati: “Nyagasani, iyo uba hano, musaza wacu Lazaro, ntaba yapfuye”. Azi neza ko Yezu Kristu ari we utanga ubuzima budapfa. Kumwakira iwabo ni ukugabana ubudapfa ukiri kuri iyi si. Muri iyi si, uzakira Yezu Kristu n’umutima we wose kandi akarangwa n’urukundo, uwo rwose azazuka kandi azabana na We iteka ryose.

Mutagatifu Marita ni urugero rw’ukwemera gushinze imizi mu Izuka rya Yezu Kristu. Ni urugero rw’abakunda umurimo unoze, witanga kandi wuje ukwemera n’urukundo. Mutagatifu Marita ni urugero rw’ubuzima bwiza mu muryango aho buri wese asizanira gukora icyo ashinzwe ngo buri wese agubwe neza. Adusabire.

Padiri Théophile NIYONSENGA

Catégories
Inyigisho

Imana ikomeje kutwihanganira, twipfusha ubusa ayo mahirwe

Inyigisho yo ku Cyumweru cya 16 Gisanzwe, A,
Ku wa 19 Nyakanga 2020.

Amasomo: Buh 12, 13.16-19; Zab 86 (85), 5-6, 9ab.10, 15-16ab; Rom 8, 26-27; Mt 13, 24-43.

Muri byinshi bibera kuri iyi si ya Rurema, ni bake batinda ku byiza ngo babe babitangarira ndetse bakurizeho kubishimira Imana. Ahubwo ikibi kibaye ni cyo gituma abatari bake bacika ururondogoro. Biba bibi cyane iyo icyo kibi kigeze aho gisa n’ikiharira urubuga, kigatwara ubuzima bw’abantu, cyigatsikamira abandi ndetse bikagera aho wagira ngo na cyo kitorera abambari n’abagaragu bakiyegurira. Ibi bituma abatari bake bibaza niba koko Imana ibaho; bati niba se koko ibaho kandi ikaba ishobora-byose kuki itigaragaza ngo ikore akantu itsembe ikibi ku mugaragaro, yerekane ko ari Imana, bose babireba! Hari n’abategereza ko igaragaraza ububasha bw’amaboko yayo itsemba burundu ababi n’abanyarugomo, bagategereza ko ibikora bagaheba, ahubwo uko bukeye n’uko bwije ikibi n’abambari ba nyakibi bigakomeza gusagamba. Hari n’ubwo umuntu yagera aho yifuza ati: “uwantiza ubwo bushoborabyose bw’Imana nibura nk’iminota ibiri ngo urebe ngo isi ndayisukura, nkayikuburamo ikibi n’abambari bacyo, maze isi nkayirema bushyashya, hagasigaramo abeza gusa! Nyamara umunyabuhanga ati: muntu aramutse abaye Imana atari mu bumwe na Yo, ubwe yakwirimbura ku isi, kuko yakwigira  nk’ikirura kihiga”.