Catégories
Inyigisho

“Uwiringiye Uhoraho ntakorwa n’ikimwaro”

INYIGISHO YO KU  WA GATANU KU YA 7 GASHYANTARE 2020
Amasomo: Sir 47,2-11
                    Zab 18 ( 17)
                    Mk 6, 14-19
« Uwiringiye Uhoraho ntakorwa n’ikimwaro »
Bavandimwe Kristu Yezu akuzwe ! Mu buhanga bw’abanyarwanda hari aho bavuga bati “akegereye ntigakiza”. Mu kuvuga ibi, baba bashaka kugaruka ku kaga gakomeye ka muntu, aho umuntu ashobora kuba akonje kandi afite uburyo yakwegera umuriro agashyuha ariko akabyanga abizi kandi abishaka. Baba bashaka kandi kugaruka kuburyo umuntu ashobora kugira inyota kandi abona isoko iruhande rwe ariko agafata iyambere mu kumirana. Nanone baba bashaka kwerekana uburyo umuntu ashobora kuba umupfu kugera aho umuntu yarwara akaremba kandi afite uburyo yakwivuza, ariko agahitamo ububabare abizi kandi abishaka.
Izi ngero ndetse n’izindi nyinshi umuntu yatekereza zigamije kutwumvisha ko uhisemo neza, agahitamo icy’ingenzi aticuza, ko ahubwo urumuri rw’Uhoraho rumurikira ubuzima bwe bwose, haba mu byiza ndetse n’ibibi, mbese ibyo umuntu yahura nabyo muri ubu buzima.
Amasomo matagatifu liturugiya y’ijambo ry’Imana yaduhitiyemo kuzirikana none, aradusubiza ku isoko y’ubukiristu bwacu, aho nk’abantu duhamagarirwa mbere ya byose kubaha Imana n’amategeko yayo kuruta ibindi byose, no kwita kandi tukanitondera indahiro zimwe na zimwe dukora. Iyo usomye neza amateka y’itorwa  ry’umwami Dawudi (1 Sam 16), uko Uhoraho yamuhaye intebe y’ubwami bwa Israheli, wakwanzura ushimangira ubudahangawa by’Uhoraho mu maso y’abamwiringira bose.
Ntawe umwiringira ngo akorwe n’ikimwaro, ntawe umukurikira ngo yikorere amaboko, nta n’umusanga ngo amusanganize ubusa ! Mu mibereho ye, umwami Dawudi ntiyari umugabo gito wawundi usaba uwo yimye, ntashimire uwamugiriye neza, cyangwa ngo yibagirwe gusaba imbabazi igihe yaguye mu cyaha. Natwe rero nk’abana b’Imana, duhamagariwe kworohera urukundo n’icyizere Imana yadushyemo igihe  duhawe impano isumbye izindi yo kubaho turi abana bayo. Icyo duhamagariwe ni ukunga ubumwe n’Umuremyi, kuba intaganzwa no kuririmba tubitewe n’urukundo dufitiye uwaturemyi wacu (Sir 47,8).
Igicubya kandi kigatesha agaciro umushyikirano tugirana n’Umuremyi, ni ukudaha isengesho umwanya w’ibanze mu buzima bwacu; n’ukwimika umwanzi Sekibi yitabaza ibishoboka byose ngo iduhoze ku ngoyi y’icyaha. Kwitaza Sekibi ntibyoroshye mu gihe itaboneka, ntinafatike, ariko birashoboka kandi hari ababishobye mu rugero rwa Yohani Batista. Kimwe mu biranga imbata ya Sekibi icyaha cy’ubusambanyi. Iki cyaha kimunga ubukristu bwacu. Twumvise mu nkuru nziza ntagatifu, ukuntu icyo cyaha cyatumye uwari intungane y’Imana ahatakariza ubuzima (Mk 6, 27). Ivanjili ya none iradusaba guhashya Sekibi twirinda ibi byaha: ishyari, urwango, ubugome, ubusambanyi, kudaha agaciro ikiremwa muntu no gutsimbarara ku mu migenzo ya Sekibi.
Abahanga mu bumenyi bwa muntu, bemeza ko hari uburyo bubiri umuntu akwiriye gufatamo icyemezo: igihe yishimye cyane no mu gihe ababaye cyane. Herodi nk’umwami wari ukunzwe kandi wubashywe na rubanda, kwisubiraho ku ndahiro kandi yakoze kubera ibyishimo by’akana k’agakobwa, byaramunaniye bigeza ndetse ku rupfu wa Yohani Batista. Kwanga icyaha, gukurikira Yezu Kristu, kumwamamaza, kutaryamira ukuri,..ni bimwe mu byaranze Yohani Batista kandi natwe nk’ababatijwe nicyo duhamagariwe.
Mu ndangakwemera ya Kiliziya Gatolika hari aho tugira tuti:  “ …nemera izuka ry’abapfuye n’ubugingo bwo mu gihe kizaza”.  Natwe rero mu mibereho yacu hano muri ubu buzima, hari byinshi biturushya:  ingorane, inabi igenda irushaho kuba nyinshi mu bantu, ibitotezo binaganisha ku rupfu, akarengane nk’akagiriwe Yohani,..ibyo byose ndetse n’ibindi tutarondoye ntabwo aribyo bifite ijambo rya nyuma ku buzima bw’umukristu. Ahubwo turangamire Yezu Kristu we Nzira, Ukuri n’Ubugingo ( Yh 14,6) wahuye n’ibikomeye biruta ibyo kandi akabitsindisha umusaraba we mutagatifu, akaba ari nawo natwe dukesha agakiza.
Ese niba umuntu ashobora kureba undi abyina akishima by’akanya gato akaba yagaba ibyo adunze harimo n’ibitari ibye, uharanira ibyishimo bizahoraho iteka akwiye kwitwara ate ?
Nyagasani Yezu n’abane namwe !
Padiri Prosper NIYONAGIRA
Puruwasi GITARAMA, Diyosezi KABGAYI
Catégories
Inyigisho

Tomasi wa Akwino: “Umuhanga ni uzi Imana Data kandi akayikurikira”

Inyigisho yo ku wa kabiri w’icyumweru cya III gisanzwe A

Amasomo 2 Sam 6,12b-15.17-19; Zab 24(23); Mk 3,31-35

Mutagatifu Tomasi wa Akwino yavukiye mu Butaliyani, mu muryango ukize ahagana mu mwaka wa 1225. Nyuma yo kwiga amashuri avanza n’ayisumbuye hafi y’akarere k’iwabo ahitwa i Roccasecca, yakomereje muri kaminuza i Napule. Umuhamagaro we wigaragaraje cyane ari muri iyo kaminuza. Yigira inama yo kujya kwiha Imana anyuze mu muryango w’Abadominikani. Ibi byababaje cyane ababyeyi be kuko babonaga apfuye ubusa kandi agiye guca umuryango!

Ijwi ry’Imana ryakomeje kumuhamagara, nyuma y’igihe yari yarabiretse yarisubiriye muri gahunda z’ababyeyi be, Tomasi yafashe icyemezo kidakuka cyo kujya mu Badominikani. Aba bamwakiriye neza maze nyuma yo kumuhugura ku byo kwiha Imana no ku buzima bw’umuryango yinjiyemo, bamwohereza kwiga i Parisi mu Bufransa. Yizeyo iby’ukwemera. Yabaye umuhanga w’icyatwa, atangaza abarimu benshi kandi ari ko ahuza ubuhanga n’ubutungane. Nta cyiza nko kubona umuntu w’umuhanga kandi usenga, uca bugufi imbere y’Imana kandi akarangwa n’imigenzo n’imigenzereze mpamyavanjili.  Yaje kwigisha aho i Parisi, yandika ibitabo byinshi cyane ndetse n’aho asubiriye i Napule mu Butaliyani akomeza kwigisha ashize amanga Ivanjili ya Kristu ari nako ahugura abantu muri byinshi nk’umusaseridoti.

Mutagatifu Tomasi wa Akwini yakundishije abatari bake Isakramentu ry’Ukaristiya. Yaryitaga Isakramentu ry’Urukundo ndengakamere rw’Imana. Akundisha benshi Umusaraba wa Kristu, wo wamanitsweho agakiza k’isi. Tomasi yitabye Imana ubwo yari mu rugendo agana Lyon mu Bufransa; amaze guhabwa Ugusigwa kw’abarwayi n’Ukaristiya nk’impamba y’abagana ijuru maze yisangira uwo yakoreye amugororera ubutagatifu no kumushengerera imbona nkubone mu ijuru.

Twamwigiraho byinshi kandi inyigisho ze na n’ubu zibeshejeho Kiliziya ya none. Bimwe muri ibyo twamwigiraho harimo: kwitegereza ibyaremwe, ntitubihagararireho, ahubwo tukabikoresha neza biduhuza kandi bitunywanisha n’Umuremyi. Kumenya ko umuhanga nyawe ari uwamenye Kristu, akamukurikira, akamwigana kandi akamumenyesha abandi mu mvugo no mubireho ye. Tomasi aduhe kumenya ko umuryango w’Imana, umuryango wa Roho Mutagatifu twinjiyemo tubatizwa ari ko usumba imiryango yose y’isi, ndetse n’iyo tuvukamo.

Ni byo Yezu yatweretse mu Ivanjili ko mu kwinjira mu muryango w’abana b’Imana ari wo Kiliziya, byaduhaye kugirana isano ikomeye cyane na Yezu Kristu. Batisimu yatugize abo mu muryango wa Kristu. Yemeye ko tuba abavandimwe be, barumuna be, bashiki be tubikesha ijambo rye ryaturemye bundi bushya rikaduha kamere y’ab’ijuru.

Mudatagtifu Tomasi wa Akwino adusabire maze turusheho gukunda Kiliziya no kuyitangira. Twizere kandi twemere Imana maze ibyiza bihita tubamo bya buri munsi bitwigishe kwibanda ku by’ijuru bizahoraho iteka.

Padiri Théophile NIYONSENGA/ Espagne

Catégories
Inyigisho

Dore Ntama w’Imana, dore ukiza ibyaha by’abantu

Amasomo: Iz 49, 3. 5-6; Zab 39; 1 Kor 1, 1-3; Yh 1, 29-34

Kuri iki cyumweru cya kabiri mu byumweru bisanzwe by’umwaka wa Liturjiya, twese turahamagarirwa gutega amatwi ijwi ry’Imana riduhamagarira kwemera kuba abagaragu bayo yihitiyemo bakayamamaza, bakaba abagabo bo guhamya ibyiza byayo.

Mu isomo rya mbere, Izayi aratwibutsa ko Israheli yatorewe kuba umugaragu w’Uhoraho. Ni umuryango ugomba guhora uririmba ibisingizo bye. Nyamara uwo muryango ntugomba kwirara, uributswa guhora wivugurura buri munsi kugira ngo ube urumuri rw’amahanga. Pawulo mutagatifu, mu isomo rya kabiri, atubwiye ko yahamagariwe kuba Intumwa y’Imana mu bo yatumweho. Ni abatagatifujwe kandi na bo bagomba guharanira kunyura Imana bamamaza Yezu Kristu wapfuye akazuka.

Mu Ivanjili, Yohani Batisita arerekana Yezu. Ni byo koko, Yezu ni We Ntama w’Imana waje gukiza icyaha cy’isi. Yohani aratanga ubuhamya atwibutsa uko byagenze ku munsi wa Batisimu ya Nyagasani. Mu by’ukuri, Yohani yari asanzwe aziranye na Yezu ariko yamuhishuriwe neza ku munsi w’ibatizwa rye muri Yorudani. Twumvise ubuhamya bukomeye bumuvuye ku mutima kandi natwe twagombye kugira ubwacu: Njyewe ubwanjye naramwiboneye n’amaso yanjye kandi ndemeza ko ari Umwana w’Imana.

Muri Zabuli twasubizaga twiyemeza ko twiteguye gukora ugushaka kw’Imana. Kuri uyu munsi, Nyagasani araduhamagara. Buri wese muri twe ku giti cye, ijwi ry’Imana rirakomanga ku rugi rw’umutima we. None se iryo jwi turaryumva? Hari icyo ritubwiye se? Twavuniye ibiti mu matwi se? cyangwa twararipfukiranye? Ese twaba twiteguye kwamamaza Yezu mu bandi? Twiteguye se kwakira no kwihanganira ibizatubaho byose tuzira Ivanjili twamamaza? Nimucyo tumutege amatwi, tumwumve, tumwumvire, twumve ijwi rye riduhamagara maze buri wese asubize ati: Dore ndaje njyewe wese Nyagasani kandi niteguye gukora ugushaka kwawe.

Ngo “Ijya gutera uburezi irabwibanza”. Nimucyo duhere hafi yacu, mu miryango yacu, mu bo duturanye, abo dukorana, abo dusangira ubuzima bwa buri munsi, incuti zacu, abatwegereye. Abo nibo duhamagariwe guheraho tubagezaho Inkuru nziza y’Umukiro wa Kristu. Nitubasangize ubuzima bwacu, tubatekerereze uko twahuye na Yezu.

Ni byo koko Yezu ni We Ntama w’Imana Ukiza ibyaha by’abantu. Aya magambo kubera kuyasubiramo inshuro nyinshi, usanga akenshi tuyavuga twihitira gusa tutayahaye agaciro akwiye. Yezu ni ya Ntama yagombaga guturwamo igitambo gihongerera ibyaha. Yezu we ni We Ntama y’igitambo, akaba Umutambyi ndetse na Altari. Icyo gitambo cy’agahebuzo yagituye Se rimwe rizima kuri Altari y’umusaraba ariko ahora agitura ku buryo buhoraho kandi budasesaamaraso kuri Altari ntagatifu mu Gitambo cy’Ukaristiya.

Uwo Ntama w’Imana kandi ni We ukiza ibyaha by’abantu. Isi yari yararohamye ndetse yarajandamye mu isayo y’icyaha ariko Yezu yaje kuyizikura. We Ntungane, Nyir’ubugingo buhoraho yemeye kwigabiza urupfu kugira ngo adusangize ubugingo bwe; twebwe twari twarabaye ba ruharwa, twarakatiwe urwo gupfa kubera ibyaha byacu. Kudukiza ibyaha byatugaruriye icyizere cyo kuzabana na We ubuziraherezo. Nyamara rero natwe tugomba kwemera gutega ibiganza kugira ngo twakire uwo mukiro yatugabiye.

Yezu yaduhaye umukiro we yigira umwe muri twe. Yahisemo gusangira natwe imibabaro n’ibyishimo. Yiyemeje gusangira natwe akabisi n’agahiye agira ngo atwigarurire. Yadukijije yigabiza urupfu, ararushyogashyoga, araruhashya, araruburabuza, araruburagiza, ararubungeza, ararubwerabweza, arubuza amajyo n’amahwemo, arutsindira ku musaraba, ararusesereza, araruserereza, araruzengereza, arusanga mu ndiri yarwo, arutsindisha urukundo maze yizura mu bapfuye. Kubera urukundo yadukunze, yatubuganijemo umukiro w’iteka.

Duhamagariwe rero kwamamaza iyo Inkuru nziza. Nitureke kuba abafarizayi. Abafarizayi b’ibi bihe turimo ni ba bandi bibwira ko baheraheje bagera ku gasongero k’ubutungane. Ni abo badamaraye bigatuma bibeshya ko bafashe Imana akaguru. Ni ba bandi batacyiyumva muri rubanda rwa giseseka bityo bagashyigikira akarengane gakorwa n’ibinyabubasha cyangwa bakirengagiza nkana kuvuganira abarenganywa. Ni abo bafunze umutima, amaso ndetse n’amatwi yabo ngo batabona cyangwa bakumva imiborogo y’abarengana kandi bafite ubushobozi bwo kubarenganura cyangwa kubavuganira ahubwo bakifatanya n’ababarenganya! Ni abo bagobwe ururimi rwabo ngo batavuganira indushyi n’abashonji.

Yezu yazanywe no guhumuriza, kwakira ndetse no gukiza abanyabyaha, abakene, abapfukiranywe, abarwayi, indushyi, mbese abo bose baciye bugufi. Ntiyari ashishikajwe no kwita ku bikomerezwa gusa. Niba rero twebwe twariyemeje kumubera abahamya, nimucyo tumukurikire kandi tumukurikize. Nitureke kuba ibirumirahabiri. Twange urunuka ikibi cyose aho cyaba gituruka hose; icyiza tugishyigikire. Nidusigeho, twikwigiza nkana! Ikibi nitucyite ikibi, icyiza tucyite icyiza. Ntitugatezuke mu kwamamaza Inkuru nziza cyangwa se ngo dushake kwivugira gusa ibishimisha abantu duca ku ruhande Ivanjili y’ukuri.

Isi ya none ikeneye abahamya Yezu Kristu bashize amanga, ntikeneye abarega agatuza bishuka ko bakomeye. Ntikeneye “abigisha-mahame” n’abigishabinyoma nka ba bafarizayi n’abigishamategeko bo mu gihe cya Yezu. Ikeneye ahubwo abahuye na Yezu by’ukuri bagomba kumugeza ku bandi; ikeneye abigishwa b’ukuri ba Yezu batabusanya na We cyangwa ngo basobanye ubwabo kandi basobanyiriza abandi.

Twese rero duhamagariwe kwakira Yezu Kristu maze tukamugeza ku bandi. Ese wowe umubwira abandi waramwakiriye? Aho ntiwaba umeze nka cya cyapa cyereka abantu iyo bajya ariko cyo kitava aho kiri? Nitwakire Ntama w’Imana uje kudukiza ibyaha, atubemo natwe tumubemo, “tugumanemo” maze tubone kumubwira abandi. Imyitwarire n’imyitwarire yacu nijyane n’Ivanjili ya Yezu Kristu twamamaza. Umukiro dushyira abandi ubanze udusenderemo twebwe ubwacu, maze twese, nta n’umwe utubuzemo, umunsi umwe, tuyobowe na Roho mutagatifu, tuzahurire mu ihirwe ry’ijuru turirimbira Imana Data ibisingizo hamwe n’abamalayika n’abatagatifu bose, ku bwa Yezu Kristu Umwami wacu. Amen.

Padri Léonidas NGARUKIYINTWARI.

Catégories
Inyigisho

Batisimu ya Nyagasani Yezu imariye iki mwene muntu?

Amasomo matagatifu: Iz 42,1-4.6-7; Intumw 10,34-38; Mt 3,13-17

Batisimu ya Nyagasani Yezu imariye iki mwene muntu?

Ibyishimo bya Noheli bigera ku ndunduro iyo duhimbaje Batisimu ya Nyagasani Yezu. Ni mu gihe, muri Batisimu ye, Kristu wigize umuntu agasangira na twe kamere-muntu yiyemeza kunga ubumwe na twe abanyabyaha, yemera guterwa icyuhagiro cya Batisimu cyari kigenewe gusa abanyabyaha. Uwavutse kuri Noheli kandi ntareke kuba Imana, yemera kuhagizwa iriba rya Batisimu, akuhagirwa na muntu w’umunyabyaha ari we Yohani Batisita kandi we nk’Umwana w’Imana adashobora na rimwe gucumura. Koko, Yezu nta na kimwe atwitandukanyaho twebwe abantu kereka icyaha. Ni Umwana w’Imana wigize umuntu, abaho nka muntu kugira ngo atsembe icyaha arokore umunyabyaha maze by’agahebuzo amugororere kugira uruhare kuri kamere-Mana ye.

Batisimu ya Nyagasani yahaye agaciro k’ikirenga ikiremwa muntu

Batisimu ya Nyagasani yahaye agaciro gakomeye ikiremwa muntu iyo kiva kikagera. Amaboko atareshya yarahoberanye: Imana Nyirubutagatifu yashatse kureshya n’abantu bose b’abanyabyaha bakeneye kugarukira Imana. Ku bw’urukundo ruhebuje idukunda twebwe abantu kandi b’abanyabyaha, Imana-muntu yishyize mu murongo umwe w’abashakisha ubutagatifu n’ubugingo bw’iteka. Yezu nk’Imana rwose n’umuntu rwose yarabyoroheje maze mu kubatizwa hakoreshejwe amazi, iba igennye ityo ko aho waba hose n’uko waba uteye kose, amazi n’uko yaba angana kose azakoreshwa nk’ikimenyetso cy’ukuvuka bundi bushya. Muri Batisimu ye, Yezu yemeye byeruye ko abatizwa mu mazi na Roho Mutagatifu kandi ari Imana rwose, bityo aba ahamije ku buryo budakuka kandi budasubirwaho ko uzabatizwa mu rupfu n’izuka bye ku bw’ikimenyetso cy’amazi na Roho Mutagatifu bizamuha kuba murumuna wa Yezu Kristu ndetse akazasangira umurage w’ikuzo ry’ijuru hamwe na we. Ku bwa Batisimu ya Nyagasani Yezu twagabanye umurage tutakwamburwa n’umuntu n’umwe kereka uwaha urwaho Shitani.

Batisimu si umugenzo w’inyuma. Ni ivuka rishya mu buzima bushya

Batisimu si umugenzo w’inyuma cyangwa kurangiza umuhango. Mu by’ukuri, kuba Yezu yaremeye guhabwa Batisimu yo kwisubiraho kandi adashobora na rimwe gucumura, ni ku neza yacu twe abantu. Mu by’ukuri, We ntakeneye kwisubiraho kuko ari Imana rwose n’umuntu rwose. Mu kubatizwa, yemeye kwihwanya na muntu iyo ava akagera, yigerekaho amateka mabi n’ameza ya muntu, kugera n’ubwo mu kwemera kubatizwa yigeretseho byeruye urupfu ruhora rwugarije cyangwa rutegereje muntu. Batisimu ya Nyagasani Yezu ni yo yabaye urubuga rwa mbere We ubwe yemereyemo hakiri kare ko yemeye kuba mu mateka ya muntu yose, ndetse ko yemeye mu bwigenge bwe bwuzuye kuzagubwaho no kuzirengera inkurikizi z’icyaha cya Adamu ari zo ububabere n’urupfu. Yezu yemeye kwigerekaho no kwakira ibyo byose bishikamira muntu agamije kubyambura ububasha no gutangariza mwene muntu ubugingo bushya buzira kongera kononwa n’icyaha n’urupfu.

Muri Batisimu, Yezu udashobora na rimwe kurangwaho icyaha, yemeye amabi n’ingusho bya muntu byose agira ngo abyambure ububasha, kugera n’aho yambuye Rupfu rwa rubori rwatsembeshaga abantu. Mutagatifu Pawulo arahamya neza ko ku bwa Batisimu yacu, uyu mubiri wacu ugenewe gupfa, wagabiwe ukutazapfa. Bityo rero, urupfu rwaburijwemo n’umutsindo wa Yezu Kristu. Urubori rw’urupfu rwambuwe ubumara n’ububasha (1 Kor 15,54-55). Na mutagatifu Yohani ahamya yeruye ko Yezu yaduhaye ibintu bitatu by’ingenzi kandi by’ibanze turongeramo ubugingo bw’iteka. Uko ari bitatu byose bifatiye kuri Batisimu. Ibyo ni: Roho, amazi n’amaraso (1Yoh 5,8). Ni byo koko, uwabatijwe wese ku izina rya Data na Mwana na Roho Mutagatifu (Mt 28,20) yagororewe kubeshwaho na Roho wa Kristu wazutse, maze ku bw’amazi na Roho Mutagatifu apfana na Kristu kandi azukana na We; by’agahebuzo agirwa umutumirwa ku Meza Matagatifu y’Ukaristiya ari yo tubonamo cya kimenetso cy’amaraso matagatifu ya Kristu yatumenewe ubwo yemeye kutubera Igitambo, Ifunguro n’Inshuti tubana iteka ryose.

Amazi yaratwuhagiye, adukuraho ubusembwa bw’icyaha n’urupfu ku bwa Roho Mutagatifu maze amaraso ya Kristu aradutunga twe abasukuwe na Batisimu yacu ishingiye ku ya Nyagasani.

Imwe mu myitwarire igomba kuranga uwabatijwe

Isomo rya mbere ryo kwa Izayi (Iz 42,1-4) ritubwiye ko Uhoraho azitorera umugaragu we akamushyiramo umwuka We. Uwo Imana izitorera, na we akayikundira, azaharanira ubutabera kandi ahamye ukuri. Uwabatijwe ni intore y’Imana Data. Agomba guca ukubiri n’ikinyoma n’ubucabiranya iyo buva bukagera; agaharanira ubutabera kuri we no ku bandi. Ni wa muntu kandi wihatira kurengera no kurenganura bose cyane cyane abanyantege nke. Ntavuna urubingo rwarabiranye, ntazimya ifumba igicumbeka. Ibi bivuze ngo ntasonga abadandabiranye, ntazimya cyangwa ngo ace intege ushaka gukoresha neza ingabire yifitemo; umukristu yirinda kuba rucantege cyangwa ruzimya-ngabire.

Uwabaye uwa Kristu ahora yivugurura mu bukristu bwe ari nako asaba kandi akakira ku Mana ingabire y’ubudacogora. Izayi ati: “Umugaragu w’Imana, we ntazigera acogora, cyangwa ngo acike intege” (Iz 42,4).

Batisimu yacu ni urugamba rweruye rwatangajwe ku mugaragaro

Uwabatijwe burya nta mikino yagombye kumuhuza na Shitani. Yabona agwa, akeguka ariko atagiranye na Sekibi imitereto. Ni gute wakwerurira umuntu uti “unyitege tuzahangana”, warangiza ukidegembya mu kibuga cye? Muri Batisimu twatangaje intambara yeruye dutangiye yo kurwanya shitani n’ibyayo byose n’ibyo idushukisha byose. Twatangaje kandi ko twemeye kurwanya Sekibi dufashijwe kandi dufatanyije n’Imana Data na Mwana na Roho Mutagatifu. Twatangaje ku mugaragaro ko tuzakurikira Yezu Kristu, tukamukurikiza (tukamwigana) kandi akaba ari We wenyine twamamaza.

Ubuzima bw’uwabatijwe bwagombye gushingira ku bintu bibiri: kwamagana Sekibi n’ibye byose no kwamamaza Imana Rukundo (1Jn 4,16). Iryo ni ryo sezerano twagiranye n’Imana igihe tubatijwe.

Uhoraho ni we udutora, akatugira abana be ku bwa Roho Mutagatifu muri Yezu Kristu. Abo yatoye, abafata ikiganza, akabimika maze akabatuma kubohora abari mu mwijima (Iz 42,6-7). Batisimu yatugize intumwa z’Inkuru nziza y’umukiro duhabwa na Yezu Kristu. Byongeye, Imana kuko ari Urukundo nta we iheza kuri ubu butore. Petero ati: “Noneho numvise mu by’ukuri ko Imana itarobanura, ahubwo inyurwa n’umuntu wa buri hanga iryo ryose uyitinya kandi agaharanira ubutungane” (Intumw 10,34-35). Umukiro Yezu yazanye ugenewe bose. Kereka uwakwigira umwana nyagucibwa naho ubundi uwakwakira Yezu Kristu wese, agasigwa amavuta ya Krisma y’ubutore ku bwa Roho Mutagatifu yabaho neza mu mugambi w’Imana kandi akazabaho mu ihirwe ridashira (Intumw 10,38).

Ubwo rero Batisimu yadukinguriye Ijuru kandi tukaba muri yo Roho w’Imana yaratumanukiyeho bityo Imana itwizihiye nk’abana bayo (Mt 3,16), nimureke na twe twizihize Imana kandi tuyihimbaze mu mvugo n’ingiro no mu bavandimwe bacu. Dusabe Imana kugira ngo twe ababatijwe, ibyo tuvuga, dukora, dutekereza n’ibyo tugamije byose, abe ari Yo yonyine tubikomoraho, bituganishe kuri Yo kandi natwe bitwubakire ubuvandimwe nyabwo.

Yezu abatirizwa muri Yorudani, dusabe inema yo gukomera ku masezerano ya Batisimu ari yo: kwanga icyaha, gukurikira Yezu Kristu no kuwamamaza.

Padiri Théophile NIYONSENGA/Espagne