Amasomo ya Misa [Baritolomayo Intumwa, 24 Kanama]

[wptab name=’Isomo: Ibyahishuwe 21′]

Isomo ryo mu gitabo cy’Ibyahishuwe 21,9b-14

Nuko haza umwe muri ba bamalayika barindwi bari bafite inkongoro ndwi, zuzuyemo ibyorezo birindwi by’imperuka, maze arambwira ati “Ngwino nkwereke umwari, umugeni wa Ntama.” Ubwo njyanwa buhoro ku musozi munini kandi muremure, maze anyereka Umurwa mutagatifu, Yeruzalemu, yururukaga iva mu ijuru ku Mana. Wararabagiranaga, wisesuyeho ikuzo ry’Imana ubwayo, ububengerane bwawo bwari bumeze nk’ibuye ry’agaciro gakomeye, mbese nk’ibuye rya yapisi ibonerana. Uwo murwa wari uzungurutswe n’inkike nini kandi ndende, ukagira n’amarembo cumi n’abiri, kandi kuri ayo marembo hakaba abamalayika cumi na babiri, n’amazina yanditseho: ayo mazina ni ay’imiryango cumi n’ibiri y’Abayisraheli. Mu burasirazuba hari amarembo atatu, mu majyaruguru amarembo atatu, mu majyepfo amarembo atatu, no mu burengerazuba amarembo atatu. Inkike zikikije uwo murwa zari zubatse ku mfatiro cumi n’ebyiri, zanditseho amazina y’intumwa cumi n’ebyiri za Ntama.[/wptab]

[wptab name=’Zaburi ya 144 (145)’]

Zaburi ya 144 (145),10-12, 12-13ab, 17-18

Uhoraho, ibiremwa byawe byose nibijye bigushima,

abayoboke bawe bagusingize!

Bazarate ikuzo ry’ingoma yawe,

batangaze ubushobozi bwawe,

bamenyeshe bene muntu ibigwi byawe,

n’ikuzo ritamanzuye ry’ingoma yawe.

bamenyeshe bene muntu ibigwi byawe,

n’ikuzo ritamanzuye ry’ingoma yawe.

Ingoma yawe ni ingoma ihoraho mu bihe byose,

ubutegetsi bwawe buzaramba,

Uhoraho ni umunyabutungane mu nzira ze zose,

akarangwa n’urukundo mu bikorwa bye byose.

Uhoraho aba hafi y’abamwiyambaza,

hafi y’abamwiyambaza babikuye ku mutima.

[/wptab]

[end_wptabset]

Ivanjili ya Yohani 1,45-51 [Baritolomayo Intumwa, 24 Kanama]

Filipo na we azaguhura na Natanayeli, aramubwira ati “Wa wundi wanditswe mu Mategeko ya Musa no mu Bahanuzi, twamubonye: ni Yezu w’i Nazareti, mwene Yozefu.” Nuko Natanayeli aramubwira ati “Hari ikintu cyiza cyaturuka i Nazareti?” Filipo nawe aramusubiza, ati “Ngwino wirebere.” Yezu abonye Natanayeli aje amugana, aravuga ati “Dore Umuyisraheli w’ukuri kandi utarangwaho uburyarya.” Natanayeli aramubwira ati “Unzi ute?” Yezu aramusubiza ati “Filipo ataraguhamagara, uri mu nsi y’igiti cy’umutini, nakubonaga.” Natanayeli aramusubiza ati “Rabbi, koko uri Umwana w’Imana, uri Umwami wa Israheli.” Yezu aramubwira ati “Wemejwe n’uko nkubwiye ngo nakubonye uri munsi y’umutini; uzabona ibitambutse ibyo ngibyo.” Arongera azamubwira ati “Ndakubwira ukuri koko: muzabona ijuru rikinguye n’abamalayika b’Imana bazamuka kandi bamanuka hejuru y’Umwana w’umuntu.”

Ngwino nkwereke umwari, umugeni wa Ntama

Inyigisho yo ku wa 24 Kanama 2013: Mutagatifu Baritolomayo Intumwa

Mwayiteguriwe na Padiri Cyprien BIZIMANA

AMASOMO: 1º. Hish 21, 9b-14, 2º.Yh 1,45-51

1.Ubuzima bwa Baritolomayo Intumwa

None twishimiye guhimbaza umunsi mukuru wa Mutagatifu BARITOLOMAYO wabaye umwe mu ntumwa cumi n’ebyiri za YEZU KRISTU. Iryo zina rituruka ku kigereki na cyo gituruka ku ki-aramewo(bar-Tôlmay) risobanura mwene Tôlmay cyangwa mwene Ptolomeo. Abanditsi b’Ivanjili Matayo, Mariko na Luka, bose bakurikiranya Filipo na Baritolomayo. Yohani ni we wenyine ukurikiranya Filipo na Natanayeli. Ni yo mpamvu rero abahanga mu bya Bibiliya badusobanuriye ko Baritolomayo ari we Natanayeli rwose.

Ngo yavukiye i Kana maze aho amariye gukura agira amahirwe mucuti we Filipo amumenyesha YEZU KRISTU umwana w’Imana. Yabanje gushidikanya kuko atiyumvishaga ukuntu Umukiza wari waravuzwe n’abahanuzi yakwigaragaza mu bihe byabo. Aho ahuriye na YEZU ubwe yaremeye yishimira kumukurikira hose amubera intumwa idahemuka. Yabigaragaje ubwo ageze iyo gihera yamamaza Inkuru Nziza y’Umukiro. Yagiye mu Buhinde ngo asigayo Ivanjili yanditswe na Matayo mu rurimi rw’icya-Aramewo. We na Yuda Tadeyo bagiye kwigisha YEZU KRISTU muri Arumeniya. Ni yo mpamvu bombi ubu ari abarinzi ba Kilizya ya Arumeniya.

Baritolomayo yishwe n’umwami Asitiyaje wa Arumeniya amuziza kwigisha Inkuru Nziza ya YEZU KRISTU. Yahoraga amuhekenyera amenyo ngo kuko yari yarahinduye umukristu Polimiyo murumuna we. Ikindi kandi, abakuru b’ingoro z’ibigirwamana byo muri Arumeniya bari bamaze iminsi binubira uburyo iyogezabutumwa Baritolomayo yakoraga ryari rimaze kubamaraho abayoboke. Bagiye kwigaragambya imbere y’umwami Asitiyaje maze n’umutwe ufunze wanze Ivanjili ategeka ko bamuzanira Baritolomayo. Amugeze imbere, uwo mupagane yamutegetse kuramya ibigirwamana maze baritolomayo yikomereza kurangamirana ubwuzu ikuzo rya YEZU KRISTU. Umwami ategeka ko bamwica urubozo bamubabaza gahoro gahoro ngo abe yakwisubiraho. Byabaye iby’ubusa, Intumwa idahemuka yarinze ishiramo umwuka igisingiza izina rya YEZU KRISTU.

Poursuivre la lecture

Twamubonye, ni Yezu w’i Nazareti

Ku ya 24 Kanama 2012: BARUTOLOMAYO ( NATANAYELI) MUTAGATIFU INTUMWA

AMASOMO: Ibyahishuwe 21, 9b-14; Zaburi 145 (144); Yohani 1, 45-51

Inyigisho yateguwe na Padiri Jérémie Habyarimana

‹‹TWAMUBONYE, NI YEZU W’I NAZARETI››

Uyu munsi Mukuru wa Mutagatifu Barutolomayo Intumwa, Yezu Kristu wapfuye akazuka aradusanga adutoramo abo yigaragariza ku buryo bwihariya, akabereka ububasha bwe. Maze na bo bakemera kumubona. Nuko bagasohoka babwira bose bati ‹‹wa wundi wanditswe mu Mategeko ya Musa no mu Bahanuzi, twamubonye: ni Yezu w’i Nazareti, mwene Yozefu.››

Koko rero kuva mu ntangiriro y’ubutumwa bwe, Yezu yahisemo abo yigaragariza ku buryo bwihariye. Aribo yiyeretse akabuzuza ububasha bwe Roho Mutagatifu. Maze akabohereza ku isi yose kwamamaza Inkuru Nziza y’URUPFU N’IZUKA bye. Kugira ngo abakiriye iyo Nkuru Nziza ibakize. Kandi abanze kuyakira bibacire urubanza ruhoraho rwo kuba ibicibwe mu Ngoma y’Ijuru. (Mt 28,16-28; Mk 16, 9-20. Barutolomayo rero ari muri izo ntwari z’ikubitiro, zamamaje Yezu Kristu wapfuye akazuka. Maze ubutumwa bwabo bugakwira ku isi yose. Turahimbaza none rero umwe mu nkingi cumi n’ebyiri z’ukwemera kwa Kiliziya.

Kuko bari abantu , abatumwe na Kristu bwa mbere barangije ubuzima bwabo bwo ku isi. Ndetse hafi ya bose barangiza bamennye amaraso yabo. Kugira ngo bahamirize isi ko Kristu Yezu ari muzima rwose, akwiye gukundwa no kwamamazwa. Byanaba ngombwa amaraso yabo akaba ikashe y’iteka iterwa kuri urwo rukundo. Nubwo rero Intumwa zapfuye, ubuhamya bwabo buracyavuga. Buracyavugira mu masengesho yabo. Buracyavugira mu maraso bamennye. Buracyavugira mu bo baramburiyeho ibiganza bakabasigira ububasha na bo bwo guhora biteguye guhamya Kristu Yezu byanaba ngombwa bakamena amaraso yabo. Abo mbere na mbere ni abepiskopi. Nyuma hagataho abapadiri babunganira muri ubwo butumwa bwabo. Kubera iyo mpamvu rero, uyu munsi Kristu Yezu wapfuye akazuka aratambagira muri Kiliziya ye atora intumwa ze zo muri urwo rwego. Dusenge cyane none kugira ngo Kiliziya ya Kristu ikomeze ibone abemera bataryarya, maze bakaramburirwaho ibiganza. Nuko bagahabwa ububasha bwo guhagarara mu mwanya w’intumwa za Yezu Kristu wapfuye akazuka. Bagahamya ko bamubonye koko. Kuko Yezu Kristu aba mu buzima bwabo. Na bo bakaba mu buzima bwe ( Yh 15, 1-17).

Koko rero nk’uko Pawulo abyigisha ubwo butumwa bw’izo ntore ni bwo bwa mbere muri Kiliziya. Kuko nta muntu n’umwe ushobora kumenya Yezu Kristu atamumenyeshejwe. Kandi abashinzwe ba mbere kutumenyesha Yezu Kristu ni Abepiskopi bafashijwe n’abapadiri. Iyo ngabire ibuze muri Kiliziya n’ubundi buzima bwose bwahagarara (Ef 4,9-16; Rom 10, 9-21).

Bikira Mariya Umwamikazi w’intumwa narinde abashumba bose ba Kiliziya Gatolika. Kandi Roho Mutagatifu abambike imbaraga zibamara ubwoba. Bareke gutinya Umwanzi n’ubugome bwe bwose. Kandi boye kurarikira inyungu ze bibaho. Bamamaze Kristu Yezu wapfuye akazuka banezerewe kandi buzuye urukundo. Bityo ubuhamya bwabo buhindure abantu benshi. Izina rya Yezu rimenywe kandi rikundwe na bose.

Singizwa Yezu Kristu wapfuye ukazuka, wowe Byishimo byacu ubu n’iteka ryose.