Bikira Mariya yarushije abagore bose umugisha

BIKIRA MARIYA AJYANWA MU IJURU

15 KANAMA 2012

AMASOMO: Ibyahishuwe 11, 19a; 12, 1.3-6a.10ab; Zaburi 45 (44);

1Korinti 15, 20-26; Luka 1,39-56

Inyigisho yateguwe na Padiri Jérémie Habyarimana

BIKIRA MARIYA YARUSHIJE ABAGORE BOSE UMUGISHA

Hamwe na Kristu, ku bwa Kristu no muri Kristu twishimiye Asomusiyo

Uyu munsi Yezu aragenderera urugo rwa Zakariya, Elizabeti na Yohani Batista. Kandi Yezu arabasura ahetswe na Mama we mu nda. Ariko Umunsi mukuru bakorera Bikira Mariya n’uwo ahetse mu nda ni agatangaza rwose. Ibihabera byose biratangaje. Mbega ibyishimo bitagatifu bitaha muri urwo rugo! Mbega ingabire zihatangirwa! Uwa mbere Ivanjiri itubwira wahimbajwe n’urugendo rwa Bikira Mariya, si Zakariya cyangwa Elizabeti. Ahubwo ni Yohani Batista wari utaritwa iryo zina. Kuko yari ataravuka ngo avugwe ibigwi. Indamutso ya Bikira Mariya yabohoye Yohani Batitsa maze yakira ku buryo bw’amayobera uwo Mariya yari yarasamye. Maze Yohani Batista abohoka ku ngoyi y’umuvumo wa bene muntu. Bikira Mariya amuhesha uwo mugisha wo kwishimira kuberaho Umucunguzi no kubaho muri we. Kuko hamwe muho umuntu aboheye ku bw’inkomoko ye ni uko arangwa no kwishisha amategeko y’Uhoraho n’abamumuganishaho akabihisha cyangwa akabashiha. Ariko mu nzira y’ibyaha hakamunyura. Agatima ke kagahora kareha kahagana. Akaruhuka ari uko ahiroshye.

Yohani Batista rero arahimbaza ikuzwa rya Bikira Mariya ahamiririza mu nda ya nyina Elizabeti. Mbega igitangaza gikomeye Yezu akora yibereye mu nda ya Bikira Mariya! Ubwo kubohoka kwa Yohani Batitsa byabaye nk’irembo Roho Mutagatifu yinjiriyemo; maze yuzura muri Elizabeti. Dore ngo uwo mubyeyi arahanura ahunda ibisingizo Bikira Mariya! Ubwo yashyize ijwi hejuru asabagizwa n’ibyishimo bya Roho Mutagatifu, maze abwira Mariya ati ‹‹wahebuje abagore bose umugisha, n’Umwana utwite arasingizwa. Mbikesha iki kugira ngo nyina w’Umutegetsi wanjye angenderere…Urahirwa wowe wemeye ko ibyo watumweho na Nyagasani bizaba››. Amagambo y’ubuhanuzi bukomeye bwa Elizabeti, ni igisingizo cy’indashyikirwa cyatuwe Bikira Mariya. Nta wundi wigeze ahabwa akanya nk’aka mu Byanditswe Bitagatifu. Elizabeti arimo arahimbaza Asomusiyo ya Bikira Mariya, afatanyije n’umuhungu we n’umugabo we. Zakariya nta jambo yavuze icyo gihe kubera ko yari amaze igihe gito yatswe ubushobozi bwo kuvuga. Ariko se ubundi ku buhanuzi nka buriya yari nkongeraho iki usibye kuminukira muri Amina. Maze nk’Umuherezabitambo byose akabitura Uhoraho mu mutuzo w’Umutima we; ngo byose byuzuzwe ubuziraherezo.

Turahimbawe rero natwe none, twakira uwo Bikira Mariya aje ahetse mu nda. Kugira ngo hamwe na Yohani Batista tubohoke ku ngoyi zose zitubuza kwishimira Ivanjiri ya Kristu mu gihe ahubwo twishimira ibinyuranye na yo. Duhimbaze Asomusiyo twakira iyo ngabire yo guca ingoyi ituma tubihirwa n’icyiza maze ikibi kikatunezeza. Maze nituva muri ako kaga, natwe tubonereho gusingiza Umubyeyi Bikira Mariya. Kuko burya abamutuka bose, n’abatabona agaciro ke, baba batarahura na Roho Mutagatifu wamutwikiriye akamugira Umugeni we w’Igikundiro. Roho wa Kristu wenyine ni we ushobora kudutera kurata Bikira Mariya nk’uko byagendekeye Elizabeti. Yuzuye Roho Mutagatifu, maze atangira kurata Umubyeyi Bikira Mariya. Ku rundi ruhande rero abihanukira bagatuka Bikira Mariya, birumvikana ko atari Roho wa Yezu ubavugiramo. Kuko Roho Mutagatifu ntashobora kuvuma, gusuzugura cyangwa gusebya uwo yahaye Umugisha uruta uw’abagore bose. Abishimiye rero Ikuzwa rya Bikira Mariya dushimire Roho wa Yezu Kristu wapfuye akazuka kubera iyo ngabire yaduhaye.

Ushoborabyose yakoreye Bikira Mariya Ibitangaza

Kuri uyu Munsi Umubyeyi Bikira Mariya nk’Umushyitsi Mukuru w’Ibirori yakorewe afite Ijambo rikomeye atugezaho. Ararata birambuye Nyagasani Ushoborabyose wamukoreye ibitangaza. Reka natwe twibaze, tunamubaze ibyo bitangaza yakorewe ibyo ari byo. Ni umuyahudikazi, uvuka mu nzu ya Dawudi, mu rugo rwa Ana na Yowakimu. Yabyaye Yezu ari we Kristu wapfuye akazuka, Umutegetsi n’Umukiza rukumbi w’abantu. Yasamwe nta nenge y’icyaha. Aguma kuba Isugi mbere na nyuma yo kubyara Yezu Kristu. Ni Nyina w’Imana, yarushije abagore bose umugisha. Tuvuze tukarekeraho, haba habuzemo icy’ingenzi. Ari nacyo Yezu yigeze gusobanura henshi yerekana ko icy’ingenzi atari ukuba Mama we ku bw’umubiri. Ko ahubwo icy’ingenzi ari ukumva Ijambo ry’Imana Se ukarikurikiza (Luka 11,27-28; Mt 12, 48-50).

Ngiryo rero ipfundo ry’ihirwe ry’Umubyeyi Bikira Mariya, we washoboye kwemera Ijambo rya Data bakunga ubumwe, kugeza ubwo iryo Jambo ryigira umuntu mu nda ye. Akamutubyarira. Agatura atyo muri twe (Yh 1,14). Ibyo rero ni byo bimuhesha kwitwa Umuhire mu masekuruza yose. Guhirwa kwe rero guhoraho, cyangwa Ikuzwa rye mu Ijuru nk’Uwatsinze muri Yezu Kristu ni ryo songa ry’ibyiza byose mwenemuntu ashobora kugezwaho no kwakira ingabire za Roho Mutagatifu. Ibyiza byose Uhoraho yakoreye Bikira Mariya byari ukugira ngo ububengerane bwe mu Ikuzo ry’Ijuru burusheho agatangaza. Iryo kuzwa rye mu Ijuru ni ryo duhimbaza none. Kandi nk’uko Pasika ya Kristu ari wo munsi mukuru usumba indi yose ikorerwa Kristu n’abe, ni nk’uko Asomusiyo ari wo munsi Mukuru nyamukuru w’iminsi yose ya Bikira Mariya. Kuko iyo ataba yarakujijwe mu Ijuru, indi minsi yose mikuru twamukorera nta gaciro yaba ifite.

Uyu munsi rero na twe Bikira Mariya arashaka ko iriya ndirimbo y’ugutsinda kwe natwe ihinduka iyacu. Bityo ikuzo yinjiyemo, tukarirangamira uyu munsi nk’aho turimo kugana tubifashijwemo n’amasengesho ye. Kandi tumurikiwe n’ububengerane bwe.

Bikira Mariya ni Umuhire rwose.

Koko rero kubimwita si ukubimwomekaho cyangwa kubimutwerera. Ahubwo ni uguhumuka amaso agahungukamo ibyari byarayahumishije byakubuzaga kubona urumuri n’ukuri, maze ukibonera ububengerane buhoraho Kristu yatatse Uwamutubyariye. Ariko rero, kumwita umuhire si ukubivuga ku rurimi guha. Ahubwo ni uguhitamo natwe kwigana Mama wo mu Ijuru. Maze tugaharanira guhabwa iryo humure n’ayo mahoro ahoraho. Koko rero byaba rwose ari ukumubeshya, turamutse tuvuze ko yahiriwe, arikoriko inzira yamugize umunyahirwe twe tukanga kuyikurikira.

Hari rero inama uwo Mubyeyi atugira none, kugira ngo dukuzwe hamwe na we. Mbere na mbere ni uguhinduka Igisingizo kizima cya Data na Mwana na Roho Mutagatifu. Ku buryo icyo igihe atari ururimi rusingiza. Ahubwo hasingiza umutima maze mu guhimbarwa kwawo ugahereza ururimi. Akuzuye umutima kagasesekara ku munwa. Indi nama ikomeye atugira none, ni iyo kwiyoroshya. Amagambo Bikira Mariya atubwira none ateye ubwenge bwacu kugira icyo bwibaza. Maze kwirata no kwirarika tukabyararika. Tukihatira gukuza Uwaducunguye duciye bugufi. Uwo Mubyeyi aragira ati ‹‹Ushoborabyose yagaragaje ububasha bw’amaboko ye, atatanya abantu birata; yahanantuye abakomeye abakura ku ntebe zabo maze akuza ab’intamenyekana; abashonje yabagwirije ibintu, abakungu abasezerera amara masa.›› Ubu se koko umuntu yarenga ku magambo nk’aya, agakomeza akigira kagarara? Ese umuntu yarenga kuri ibi agakomeza agasuzugura abaciye bugufi ye? Ibyo ari byo byose rero, uwigize igihangange wese muri iyi si, aho kubaha Yezu n’abo yacunguye, ajye amenya ko ahanganye n’ububasha bw’Ijuru adashobora kuganza bibaho.

Umubyeyi Bikira Mariya adufashe guhimbaza Ikuzwa rye none turonka twese ingabire yo guharanira ikuzo ryacu rihoraho muri Yezu Kristu wapfuye akazuka.

Abakungu abasezerera amara masa

KU YA 31 GICURASI:

Bikira Mariya ajya gusuhuza Elizabeti

AMASOMO: 1º. Sof 3, 14-18ª cg. Rom 12, 9-16b

2º. Lk 1, 39-56

Abakungu abasezerera amara masa

Tumaze ukwezi kose twiyambaza, ku buryo bw’umwihariko, Umubyeyi wacu BIKIRA MARIYA. Kuva ahagana mu kinyejana cya 14, ukwezi kwa Gicurasi kwatangiye guharirwa gahoro gahoro uwo mubyeyi wacu. Hirya no hino mu bihugu by’Uburayi, bakunze kwishimira ukuntu uku kwezi guhuza n’igihe hamera indabo nyinshi kandi nziza. Bakunze kujya gutura BIKIRA MARIYA izo ndabo nziza bigeza ubwo mu mpera z’ikinyejana cya 18 ubuyoboke bwa BIKIRA MARIYA bukwijwe ku isi hose uhereye i Verona ho mu Butaliyani. Uwo muco mwiza wahawe umugisha bwa mbere na Papa Pio wa VII mu mwaka w’ 1815. Guhimbaza BIKIRA MARIYA muri Gicurasi byarushijeho kugira icyanga kuva ubwo BIKIRA MARIYA amanukiye i Cova de Iria maze akiyereka abana batatu aho i Fatima muri Portugal. Iryo bonekerwa rihebuje ryatangiye ku wa 13 GICURASI 1917.

Igihe cyose duhimbaza BIKIRA MARIYA, dushishikazwa n’ibyiza tumukesha. Ubudahemuka yagaragaje ijana ku ijana mu mibereho ye, ukwihangana n’igihe yari ahagaze mu nsi y’umusaraba, urukundo adufitiye atugaragariza mu gihe cyose ahawe umwanya wo kuza kudusura, ibyo byose ni ibyiza bihebuje tumukesha. Akomeza kudusabira. Afitiye impuhwe abatuye isi. Ahora adusabira kugira amahoro. Atubwira ko inzira y’amahoro ari ukwemera Umwana we YEZU KRISTU. Ahorana umutima wa kibyeyi agaragariza urubyiruko. Abasore n’inkumi bashobora kurangwa n’urukundo rwa BIKIRA MARIYA. N’ubwo isi ya none yuzuyemo ibishuko bitagira ingano sebyaha yihishamo agamije gucura inkumbi, Urukundo n’Ubuziranenge BIKIRA MARIYA yagaragaje, bishobora gushyirwa mu bikorwa na roho ziyoroshya. Akaga tugira, ni uko dushaka kwishyira hejuru no kubaho ku buryo bunyuranye n’ubwiyoroshye BIKIRA MARIYA yaduhayemo urugero.

Kugira ngo tugere kuri ayo matwara asukuye ya BIKIRA MARIYA, tuzitoza kwiyumvisha ko ku isi, nta kintu cy’agaciro dushobora guharanira usibye IJURU. Kwemerana ubwiyoroshye inama za BIKIRA MARIYA tugakurikiza Ivanjili ya YEZU KRISTU, ni ko kwinjira mu ijuru tukiri hano ku isi. Umuntu wese wiyuzuye, wa wundi wumva nta cyo akeneye cyerekeye roho ye, wa wundi wiyumvamo ubukungu bundi ku buryo bunyuranye, uwo nta cyo yigiye kuri BIKIRA MARIYA. Ni we uzasezererwa amara masa mu gihe abakene bazagwirizwa ibyiza.

Kugira ngo twinjire mu byiza by’Umubyeyi wacu BIKIRA MARIYA, ni ngombwa kwitoza inzira z’urukundo. Dusabe dukomeje inema yo gukundana. Urukundo rwa BIKIRA MARIYA, ni rwa rundi ruzira uburyarya nk’uko Pawulo intumwa yabidusobanuriye. BIKIRA MARIYA, ntiyigeze arangwa n’uburyarya. Yagendereye mubyara we Elizabeti atagamije kwikuza cyangwa kwishyira imbere. Nta bwirasi, nta buryarya yigeze agaragaza. Yajyanywe gusa no kumufasha mu gihe yari akuriwe. Ni ngombwa uyu munsi kwisuzuma kugira ngo turebe uburyo twitangira abandi n’umutima wose. Hari indwara yateye igaragara cyane cyane i Burayi: “Ntagihemfite”. Iyo ndwara ni ko nayita: Ntagihemfite ntinyemerera kugira uwo ndamutsa, uwo nyobora yayobye, kumva unyitabaje, kwigomwa ku byo ntunze ngo nitangire abakene…Iyo ndwara nise “Ntagihemfite” igira ingaruka nyinshi mu mibereho y’abantu. Hari abasara kubera ko bihebye, nta bufasha bashobora kubona, hari abarwara ibibazo by’urudubi kuko babuze ubatega amatwi. Iyo ndwara igeza umuntu kure, ha handi atabona igihe cyo kwita kuri roho ye kubera ko yoramye mu by’isi. Iby’isi byamutwaye uruhu n’uruhande none agiye kugwa buguni ku gahinga atagira umutabara.

Dusabire ababatijwe bose bamenye kugaragaza ubuyoboke nyakuri imbere ya BIKIRA MARIYA ubahakirwa imbere y’Imana Data Ushoborabyose. Dusabire abana bose bavuka, babatizwe kandi batozwe ubuziranenge bwa BIKIRA MARIYA. Ni bwo bazashobora kugendera mu nzira z’Urukundo Nyakuri, rwa rundi rukuza Imana, rwa rundi rutuma umuntu yiyumvamo imbaraga za roho agataraka ati: Roho yanjye irasingiza Nyagasani. N’umutima wanjye uhimbajwe n’Imana, umukiza wanjye. Ibyo byishimo bitagereranywa, nibirange buri wese muri twe, yaba umwana, yaba ingimbi, yaba umwangavu, yaba umugabo yaba umugore, twese turebere ku Mubyeyi wacu BIKIRA MARIYA. Twifurije umunsi mwiza ababikira bitwa “Abavizitandini” (i Butare mu Rwanda) ndetse n’abandi bose bashingira ubuyoboke bwabo kuri BIKIRA MARIYA AJYA GUSUHUZA ELIZABETI MUTAGATIFU (Ab’i Mushishiro n’ahandi bafite ingo mu Rwanda).

BIKIRA MARIYA ADUHAKIRWE

YEZU KRISTU ASINGIZWE UBU N’ITEKA RYOSE MU MITIMA YACU.

Padiri Sipriyani BIZIMANA

Ni jye wabatoye

KU YA 14 GICURASI: MUTAGATIFU MATIYASI INTUMWA

AMASOMO: 1º. Intu 1, 15-17.20-26

2º. Yh 15, 9-17

NI JYE WABATOYE

Uyu munsi, aho Kiliziya ya KRISTU yogeye ku isi yose, twahimbaje Mutagatifu MATIYASI na we wabaye umwe mu Ntumwa za YEZU. Iby’itorwa rye, twabibwiwe n’isomo rya mbere. Na ho Ivanjili ya none ari na yo tumaze iminsi twumva, yatugejeje ku ngingo y’umwihariko tugiye kuzirikanaho.

Yezu abwira intumwa ze ati: “Simwe mwantoye, ahubwo ni jye wabatoye, maze mbashyiraho kugira ngo mugende, mwere imbuto, kandi imbuto yanyu igumeho” (Yh 15, 16). Ayo magambo ahumuriza bihagije intumwa. Umurimo wazo, ntukwiye kubahangayikisha kuko atari bo ubwabo bitoratoje. Gukurikira YEZU KRISTU no kumwamamaza muri rubanda, si umurimo bazakora bonyine. Uwabatoye azakorana na bo iteka ryose. Ni we nyir’ubwite. Yarabatoye kandi yabahisemo abazi. Azi neza ko bazamuhamya kugera ku ndunduro. Aha twakwibaza: Ese na Yuda Isikariyote wa wundi wamugambaniye, YEZU yari amuzi neza? Kuki yamutoye azi neza ko azamugambanira? Icyo ntitwagisubiza ijana ku ijana ariko tuzi ko mugutora intumwa ze, YEZU atabanza kubacira urubanza. Arabatora akabareresha inyigisho y’Ingoma y’Imana agenda abagezaho. Ntawe utazi ko ingaruka z’icyaha cy’inkomoko zikurikirana muntu aho ava akagera. Ububasha yifitemo n’ubwigenge yahawe bimubera akenshi nk’inkota y’amaugi abiri. Abikoresha neza akubaha Urukundo rw’Imana. Iyo abikoresheje nabi bimugeza ahabi. YEZU yatoye YUDA amuzi ariko yashatse kugaragaza urukundo yari amufitiye kugera ku ndunduro. Kubera ubugambanyi yakururiwe n’umururumba w’iby’isi, yiyahuye adasabye imbabazi. Ntitwamenya uko urubanza rwe rwaciwe cyangwa ruzacibwa. Icy’ingenzi uyu munsi kuri twebwe, ni ukwirinda gupfusha ubusa umwanya KRISTU yadushyizemo. Kuwuhagararamo twirinda kuba ba Yuda Isikariyote cyangwa ingwizamurongo. Ni icyo twakwigira kuri Matiyasi.

MATIYASI ni izina risobanura “impano y’Imana”. Yari umwe mu bari bagendanye na YEZU n’intumwa ze kuva kuri Batisimu ya Yohani kugeza igihe YEZU asubiriye mu ijuru. Matiyasi yari intungane kandi yari yarakunze inyigisho za YEZU. Ni ngombwa ko mu makoraniro yacu haboneka abantu koko buzuye Roho Mutagatifu kugira ngo imirimo inyuranye ya Kiliziya ibashe gutunganywa. Nta muntu n’umwe kamara muri Kiliziya. Ariko kandi abashinzwe ubutumwa bunyuranye, bakwiye gufashwa kubwitangira bunze ubumwe na KRISTU Nyir’ubwite. Ba Yuda ntibazabura kubera impamvu navuze mbere. Ibyo ntibyaduca intege kuko YEZU KRISTU afite ubushobozi bwo guhora atora abashaka kumukorera mu ntama ze. Kimwe mu bituma ubuhemu cyangwa uburangare bwinjiza bamwe mu murongo wa Yuda, ni uburangare bw’abakuru batita bihagije ku ikenurabushyo mu bo bakuriye. Hakenewe abayobozi bifitemo ubuzima bwa gikristu, abantu bunze ubumwe na YEZU KRISTU. Abantu bakunda YEZU KRISTU n’amabanga ye yose. MATIYASI yadusigiye urugero muri urwo rwego.

Kilimenti wa Alexandiriya atubwira ko MATIYASI yitangiye ubutumwa muri Etiyopiya. Yigishize ashize amanga. Yahinduye abakristu abantu batagira ingano. Yarangije ubuzima bwe ahowe YEZU KRISTU ahabwa ikamba ry’ubumaritiri. Kuva muri ibyo bihe Kiliziya yakomeje kugira abantu b’intwari bitangira ubutumwa. N’uyu munsi bariho kuko YEZU KRISTU Nyir’ubwite ariwe ubwe ubitorera. Gusa rero, bamwe bashobora kumubera ba Yuda. Nta we bikwiye guca intege kuko, uko byagenda kose. Icy’ingenzi ni ugupfukama tugahora dusabira Kiliziya kugira ngo abayikuriye bahore bumvira Roho Mutagatifu mbere ya byose, bazashobore kujya bahangana n’ibihe bikomeye, bashaka ikintu cyose cyatuma abemeye KRISTU badacika intege kandi bakarindwa ibitekerezo bibayobya.

MATIYASI INTUMWA, UDUSABIRE

BIKIRA AMARIYA ADUHAKIRWE

YEZU KRISTU ASINGIZWE UBU N’ITEKA RYOSE.

Padiri Cyprien BIZIMANA

Unyemera azakora imirimo nkora

KU YA 3 GICURASI:

ABATAGATIFU FILIPO NA YAKOBO INTUMWA

AMASOMO:

1º. 1 Kor 15, 1-8

2º. Yh 14, 6-14

UNYEMERA AZAKORA IMIRIMO NKORA

Kuri iyi tariki, Kiliziya ikora umunsi mukuru wo gusingiza intumwa za YEZU, FILIPO na YAKOBO. Bemeye YEZU baramukurikira maze bahabwa ububasha bwo gukora ibyo yakoze ari byo: kutwereka Imana Data Ushoborabyose, gutsinda icyaha n’ubushukanyi bwa secyaha n’urupfu, kwemera umusaraba. Twe twiyizi mu ntege nke zacu, ibyo intumwa zashoboye gukora kandi ziri mu mubiri nkatwe, twemeza ko ibyo byose ari ibitangaza. Ni ibitangaza byinjiza mu ijuru. Imbaraga zo kubikora zituruka mu kwemera YEZU KRISTU utwibukije ko umwemera azakora imirimo akora. Ni ukuvuga ko turamutse tumwemera koko, ibyo natwe twabikora. Igipimo cy’ukwemera kwacu, ni urugero tugezeho mu gukora ibyo YEZU yakoze byakozwe kandi n’intumwa ze. Nta wakwirata ngo afite ukwemera mu gihe atihatira kugendera mu nzira y’umusaraba wa YEZU. Impamvu ibyo YEZU n’intumwa ze bakoze bitunanira, ni uko twikundira inzira z’ibitworoheye dore ko tunanyuzamo tukemera ubushukanyi bwa secyaha ari we sekibi ushukana ku buryo bwinshi byabuze urugero.

Twiyambaze ku buryo bw’umwihariko intumwa FILIPO na YAKOBO baduhakirwe ku Mukunzi wabo YEZU KRISTU. FILIPO yavukiye i Betsayida mu ntara ya Galileya (Yh 1, 44). Yahoze ari umwigishwa wa Yohani Batisita. Muri ya minsi Yohani Batisita yerekanye YEZU avuga ati: “Dore Ntama w’Imana” (Yh 1, 36), ni ho FILIPO yahuye na YEZU wamubwiye at: “Nkurikira” (Yh 1, 44). Tuzi ko FILIPO yemeye gukurikira YEZU ndetse agahita akora ubutumwa kuri Natanayeli witwa Barutolomayo (Yh 1, 45). Mu gihe intumwa zakwiraga hirya no hino zihimbajwe no kwamamaza urupfu n’izuka bya YEZU, FILIPO yerekeje ahitwa Hierapolis ho muri Turukiya y’ubu. Aho ni ho yapfiriye abambwe ku musaraba ageze mu za bukuru ahagana mu mwaka wa 80 nyuma ya YEZU KRISTU.

YAKOBO we, ni we witwa Mwene Alufeyi (Kiliyofasi). Mu Ivanjili bamwita YAKOBO MUTO (Mk 15, 40) cyangwa murumuna wa YEZU, kugira ngo atitiranywa na Yakobo, umuvandimwe wa Yohani, Mwene Zebedeyi. YAKOBO duhimbaza none, ni umuvandimwe wa Yuda Tadeyo. Bakeka ko uwo Yuda Tadeyo ari we mwanditsi w’ ibaruwa tuzi imwitirirwa kuko ihamya ubwo buvandimwe: “Jyewe Yuda, umugaragu wa YEZU KRISTU n’umuvandimwe wa Yakobo…” (Yuda 1,1). Kera bakekaga ko YAKOBO duhimbaza none ari we wanditse ibaruwa imwitirirwa. Ubu ikivugwa cyane ni uko iyo baruwa yaba yaranditswe n’umwe mu bigishwa we washatse gukomeza inyigisho ze nyuma y’aho apfiriye ahowe KRISTU mu mwaka wa 62 nyuma ya YEZU. Ikizwi neza ni uko yagize uruhare rukomeye mu Ikoraniro ry’i Yeruzalemu. Yafatanije na Pawulo gukemura ibibazo byo guhuza umuco wa kiyahudi n’Ivanjili yagendaga ikundwa n’abanyamahanga batagenywe. Pawulo Intumwa atubwira ko YEZU WAZUTSE yabonekeye YAKOBO (ni uwo duhimbaza none).

Pawulo anavuga ko YEZU yabonekeye n’abavandimwe Magana atanu icya rimwe. Nimwibuke abantu bajya bajya impaka bashaka kutuyobya bihandagaza bakemeza ko ngo YEZU yagize abandi bavandimwe. Bityo bemeza ko Bikira Mariya yaba yabyaye abandi bana. Ni ngombwa gusobanukirwa ko ijambo ry’ikigereki adelfos rivuga umuvandimwe, umuvandimwe mu muryango nko kwa so wanyu cyangwa inshuti ikomeye yakubereye umuvandimwe rwose. Nta kwitiranya ibintu rero: none se isomo rya mbere ryaba ryatubwiye ko hari umuntu wabyaye abana Magana atanu?

Ubuzima bw’intumwa n’abandi batagatifu Kiliziya ikorera ibirori buri mwaka budutera ishyaka ryiza mu gutsinda isi. Bo ntibigeze biganda mu kwamamaza YEZU KRISTU WATSINZE ICYAHA N’URUPFU. Bakomeje kwibutsa ko Iyo Nkuru Nziza ari yo izadukiza niba tuyihambiriyeho. Ukwemera kwacu, amasengesho n’ibyo dukora byose bifitanye isano n’ubukristu byazatubera impfabusa igihe cyose turangwa n’uburyarya twikurikiraniye iby’isi gusa. Izo ntwari zabyirukiye gutsinda zagiye zumvira Roho Mutagatifu maze zigakemurana ubushishozi ibibazo byabaga byugarije Ikoraniro rihire.

Arahirwa umuntu wamenye YEZU KRISTU abikomoye ku Ntumwa ze. Zaramukunze. Yarazigaragarije aho amariye kuzuka mu bapfuye. Yazisigiye ububasha bwose bwo gukiza mu Izina rye. Zamukomoyeho kumenya neza Data Ushobora byose. Iyo tuvuga ko twemera Kiliziya imwe, ntagatifu, gatolika tunashimangira ko ikomoka ku Ntumwa. Ni ukuvuga ko yogeye ku isi hose ishingiye ku Ntumwa. Ihuriza mu bumwe abatagatifujwe bose barangamiye nyirayo, Nyirubutagatifu rwose. Ibyiza turonkera muri Kiliziya tunabikesha Intumwa zakomeye kuri YEZU maze mu ruhererekane rwazo zitugezaho umwikamire nyawo w’ukwemera kuzatugeza mu ijuru. Ubuyobe n’amatiku byagiye byaduka mu mateka y’isi na Kiliziya, ntibishobora kuduca intege. Dukomeze urugedo twisunze abo bakuru bacu badusabira. Twitoze gusaba nka bo ingabire zose zizatuma dutsinda amakuba yo mu isi.

FILIPO NA YAKOBO INTUMWA, MUDUSABIRE

BIKIRA MARIYA, UDUHAKIRWE

YEZU ASINGIZWE.

Padiri Sipriyani BIZIMANA