Abanyabwenge baza kuramya Yezu

Umunsi w’Ukwigaragaza kwa Nyagasani

Ku cyumweru, 4 Mutarama 2015

AMASOMO: Iz 60, 1-6; Ef 3, 2-3ª.5-6; Mt 2, 1-12

1. Kuri iki cyumweru cy’Ukwigaragaza kwa Nyagasani, nimucyo tuzirikane by’umwihariko igikorwa gihanitse cy’abo Ivanjili yita Abanyabwenge baje kuramya Yezu. Tubonereho no gusabira abanyabwenge b’iki gihe gupfukamira Umwami w’Amahoro.

2. Nta kwibaza byinshi kuri abo Banyabwenge: ibisobanuro dusanga muri Bibiliya Nyagatifu biraduhagije. Ngo bari abamaji ari bo abaherezabitambo bo mu bihugu bya kure ya Isiraheli (Arabiya n’Ubuperisi) bakaba n’impuguke mu bumenyi bw’inyenyeri. Ese babwiwe n’iki iby’ivuka rya Yezu? Ni urumuri rudasanzwe rw’Imana y’ukuri rwabavanye iyo gihera babimburira abandi mu kwakira, kwishimira no kuramya Umwami w’Amahoro. Ni incamarenga y’iyuzuzwa ry’ubuhanuzi bwavugaga ko Yeruzalemu izaganwa n’amahanga yose atangarira ikuzo ryayo. Yego ibyavuzwe mu isomo rya mbere byaganishaga cyane ku ihumure Yeruzalemu yari itegereje isonzeye kongera guhurizamo abana bayo bose bari baratatanyirijwe ishyanga kubera gutsindwa n’amahanga akomeye yabajyanye bunyago hirya no hino. Igihe kizagera bagaruke kandi bayikwize ubukire bazatahukana. Amahanga batatanyirijwemo yamenye izina ry’Imana y’Ukuri kugeza ubwo ab’ingenzi mu banyabwenge bazanakora urugendo rurerure baza kuramya Umwami w’abami wavutse.

3. Ubuzima bw’Abanyabwenge amateka yita Balitazari, Gasipari na Melikiyoro ntibuzwi neza. Cyakora tugendeye ku bisobanuro by’ayo mazina, dushobora kugira icyo twumvamo. Izina Balitazari risobanura Imana irengera umwami. Igisobanuro cyaryo kigaragara mu gitabo cy’umuhanuzi Daniyeli. Yaje yikoreye ituro ry’agaciro rigizwe n’umubavu witwa manimani. Kuva mu Gihe cyo hagati (Moyen-Age), Kiliziya yigishije ko Balitazari uwo yaturukaga muri Afurika byumvikanisha ko nta gice na kimwe cy’isi cyasigaye mu kohereza umunyabwenge kuramya Umwami w’Amahoro. Balitazari agaragazwa ari umwirabura mu minsi mikuru y’abamaji yabaye gakondo mu Burayi. Umunyabwenge Melikiyoro (izina risobanura umwami w’urumuri) we yaserukanye zahabu akaba ashushanya amahanga y’Uburarayi. Uwitwa Gasipari (mu rurimi rw’igiperisi kansbar risobanura umunyabintu, umunyakigega) ahagarariye umugabane wa Aziya. Yaje atura ububani.

4. Imana yahaye urumuri rw’Umwana wayo abo bantu b’ibikomerezwa bafite ubwenge buhanitse n’imitungo igaragara, itwereka ityo ko ntawe uhejwe mu kumuramya. Ntawamenya impamvu abahanga n’abanyabwenge batari bake uko ibisekuru bisimburana bagiye bahakana iby’Imana ndetse bakabirwanya bavuga ko nta kuri kwabyo. Abagiye batekereza batyo nta kintu kigaragara batugejejeho kuko bashakiraga ukuri aho kutari. N’abahanga n’abanyabwenge ba none, cyane cyane ko turi mu bihe biruhije bamwe bibwira ko ari ibyo kwizibukira ubufasha Kiliziya ihabwa na Nyirayo YEZU KIRISITU, ubushakashatsi bwabo n’imitejerereze yabo bibagusha ruhabo iyo basuzuguye ibyo Imana yagennye. Umuntu wize amashuri menshi, umuntu ufite ubushobozi bw’ubutunzi, ubutegetsi n’amafaranga, ashobora kumva ko kuramya YEZU KIRISITU ari ukwisuzuguza. Ibyo biba kubera ko ibyo atunze n’ubwenge yishima byatumye ikibunda kibudika maze ntabone neza icyerekezo cy’ubuzima bwe. Biba agahomamunwa iyo yigizemo amatwara nk’aya Herodi yuje uburyarya bwo kurwanya izina rya YEZU cyangwa gutoteza abaryizigiye baryamamaza. Ese Herodi yashakaga kumuramya koko? Oya. Ubujiji bwari bumurimo bwamwerekeje ku buryarya bubyara ubugome bwatumye anahitana abana batagira ingano b’i Betelehemu!

5.Ibanga rya YEZU KRISTU nk’Umwami w’amahoro uko Pawulo intumwa yarishimagije by’ukuri mu isomo rya kabiri, ni ryo rifungura nyabyo ubwenge bwacu. Twishimire abantu b’impuguke bitabira iyogezabutumwa. Dukomeze ubutumwa mu mashuri abanza, ayisumbuye na kaminuza kugira ngo ubumenyi bw’iby’isi akenshi butwarwa intambike batagira uwo buvutsa umukiro Zubarirashe yatuzaniye. Ubwenge buvomwa mu bitabo n’ibitekerezo nibufatanye n’ubwenge buvomwa ku ISOKO NYASOKO YEZU KIRISITU maze abantu twese dutahirize umugozi umwe tugire icyizere cy’Ubuzima bw’iteka.

YEZU KIRISITU asingizwe. Umubyeyi Bikira Mariya Umwamikazi w’amahoro aduhakirwe. Abatagatifu badusabire iteka ryose.

Padiri Cyprien BIZIMANA

Publié le
Catégorisé comme Inyigisho