Catégories
Inyigisho

Abarwayi bakeneye Umuvuzi

Inyigisho yo ku wa gatandatu, Icyumweru cya 1 gisanzwe, A, 2014

Ku ya 18 Mutarama 2014 – Yateguwe na Padiri Cyprien BIZIMANA

AMASOMO: 1º. 1 Sam 9, 1-4.17-19; 10, 1a; 2º. Mk 2,13-17 

Mu isomo rya mbere dukomeje kunyurirwamo ibijyanye n’amateka y’Abayisiraheli. Tugeze aho ibihe byari bikomeye, ubwo bari bagirijwe n’ihanga ry’abanyamaboka bitwaga Abafikisiti, abantu b’ibihangange n’ibihanyaswa. Mu gihe Samweli Umucamanza n’Umhanuzi yari ageze mu zabukuru, rubanda barivumbagatanyije bashaka gutegekwa nk’andi mahanga. Ni byo inyigisho y’ejo yadusobanuriye. Igihe cyarageze Imana irabemerera ibaha umwami Sawuli wasizwe amavuta n’Umusaza Samweli. Ayo mateka atwumvisha ko igihe cyose Imana ihora ishaka icyagirira akamaro Umuryango wayo; ihora ishaka kuwukiza no kuwugeza ku mahoro nyakuri.

Abami bayoboye Isiraheli basigwaga amavuta mu Izina ry’Imana bakarahirira kuzayobora Umuryango wose mu mahoro kandi bakurikije mbere na mbere ugushaka kw’Imana Umutegetsi wa byose. N’ubwo tuzi ko habayeho abami babaye ababisha bakitwara nabi bakaba ba gashozantambara basuzugura Amategeko y’Imana banakurura ibigirwamana by’amahanga, habayeho n’abandi babaye indahemuka barubahwa cyane muri Isiraheli. Abo ni bo shusho y’ubwami Imana yateguriraga Umuryango wayo, ubwami nyakuri bushingiye ku Mwana wayo YEZU KRISTU. Imirimo yose yo kuyobora abantu muri Isiraheli yari igamije Umukiro nyawo wa bose. Abayobozi babayeho nk’abashishozi biswe abantu b’Imana koko. Duhereye ku Bacamanza nka Samweli tukanyura ku Bahanuzi n’Abami, icyitwa ubushishozi n’ubuhanga muri Isiraheli cyatumye n’andi mahanga atangarira Abayahudi. Ni benshi baje kuvoma ubuhanga muri Isiraheli dore ko hagaragaraga ububasha bw’Imana bukiza.

Umukiro w’Imana ugera ku bantu ushushanywa n’ingabire itanga zo kwinjira mu mabanga yayo no kuronka urumuri ruhanitse rusobanurira abantu ibyo bakeneye kugira ngo bamererwe neza. Sawuli yagenze igihe kirekire aza kugera kuri Samweli umuntu w’Imana kandi wubashywe n’ibyo avuze byose bikigaragaza. Ni yo nzira Imana yamunyujijemo n’ubwo yibwiraga ko ari indogobe za se zishishikaje, yageze aho ahabwa ububasha buzitambutse. Ubwenge n’ubushishozi nk’ubwo yasanganye Samweli, Nyagasani yakomeje kububuganiza mu bantu kugira ngo babeho. Ku buryo buhanitse, byose byujujwe muri YEZU KRISTU. Abo yatoye abahagurutsa mu byo bari bahugiyemo, abamwemereye yabahaye ububasha nk’ubwo bukiza. Uwitwa Levi yamuhagurukije kuri gasutamo aho yashimishwaga n’imisoro yakaga inamubehaho. Levi uwo ari we Matayo amaze gusobanukirwa n’ibanga rihanitse ry’Imana y’Ukuri, nta murimo wundi yongeye gukora usibye uwo gukurikira YEZU, kumva ijambo rye no kuberaho kuryandika ngo rizakize abantu bo mu bihe byose.

Twese duhamagariwe iki? Ni ngombwa kuzirikana ku buryo Imana yakomeje kwita ku Muryango wayo maze twumve ko ubuhanga n’ubushobozi yahaye abo mu bihe bya kera, n’uyu munsi ibutanga kugira ngo isi irusheho gukizwa. Isi irarwaye irimo abarwayi n’indembe nyinshi. YEZU KRISTU ashaka kudukiza twese. Ni cyo cyamuzanye. Nitwemere dutege amatwi dukunde Ijambo ry’Imana, turivuge igihe n’imbura gihe maze uburwayi bwigaragaza mu bugwari, uburangare, ubugome, uburyarya n’ibindi byinshi byigaruriye imitima bikire. YEZU KRISTU ashaka kwegera abarwayi bose bo muri iki gihe ngo bakire. Akeneye ko tumufasha. Duhore tumusaba gukira mu mutima wacu kandi twishimire ibyo yadukijije maze dutsinde ubwoba dutangaze Inkuri Nziza y’Umukiro atanga kuri bose nta bwoba ubwo ari bwo bwose.

YEZU KRISTU asingizwe mu mitima yacu. Umubyeyi Bikira Mariya aduhakirwe maze abatagatifu twiyambaza badusabire umunsi n’ijoro.

Padiri Cyprien BIZIMANA