Catégories
Inyigisho

Akagabo gahimba akandi kataraza (Luka 11,14-23)

Inyigisho ku wa kane w’icyumweru cya gatatu cy’igisibo, ku wa 12 Weruwe 2015

Bavandimwe,

Turakomeza igisibo turwana na Sekibi n’ibyo aduhendesha ubwenge byose. Twagitangiye ku wa gatatu w’ivu, Padiri atubwira ati « Isubireho. Garukira Imana maze wemere Ivanjili ». Ubundi akatubwira ati « Muntu, reka kwirata no kwishyira hejuru ; ibuka ko uri igitaka, kandi ko uzasubira mu gitaka ». Ubwo rero twagiye mu butayu bw’iminsi 40 nka ya yindi Yezu yamaze mu butayu yitegura gutangira ubutumwa bwe ku mugaragaro. Mwibuke ko icyo gihe yarwanye na Sekibi akayitsinda ku mugaragaro.

  1. Yezu yaratsinze

Sekibi ari we Sekinyoma ntako atagize ngo arangaze Yezu, amubuze gukora ubutumwa bwa muzanye ku isi bwo gukiza abantu. Yamushukishije ibintu by’iyi si, ubukungu, ikuzo, ububasha n’ibyubahiro… Yezu yayitsindishije gukora ugushaka kw’Imana. Ubwo rero natwe kugira ngo dutsinde, dukomere kuri Yezu urusha imbaraga abanyabubasha n’ibinyabubasha aho biva bikagera. Yaratsinze kandi igihe turi kumwe nawe, nta kabuza natwe tuzatsinda. Icyakora ibyo ntibidukuriraho urugamba ndetse rimwe na rimwe tukaba twakomereka. Amahirwe tugira ni uko yadusigiye Isakramentu rya Penetensiya aho tumusanga akatwomora kandi akaduha imbaraga ngo dukomeze urugamba.

Yezu ntiyatsinze Sekibi mu butayu gusa na n’ubu aracyayitsinda. Urugamba rurakomeza kugeza igihe azatsindwa burundu ku munsi w’imperuka. Nibyo Ivanjili y’uyu munsi itwigisha. « Yezu yariho yirukana roho mbi yari yagize umuntu ikiragi. Roho mbi imaze kumuvamo, ikiragi kiravuga, abantu bose baratangara ». Inyigisho dusanga muri yi vanjili si ukutemera ko Yezu afite ububasha bwo kwirukana roho mbi. Birigaragaza. Ikibazo ni aho yakuye ubwo bubasha.

  1. Ububasha bwa Yezu kuri Sekibi buturuka he ?

Mu gihe hari abavuzi, abapfumu n’abanyabubasha n’abatekamutwe batabarika, umwanditsi w’Ivanjili arerekana ko Yezu atari umupfumu, mbese ko ntaho bahuriye. Hari abakristu bajya baza kundeba basaba isengesho rifite ububasha, rizabafasha kubona akazi keza, kubona umugabo, urubyaro, gutsinda ikizamini, gukira indwara iyi n’iyi cyangwa ingeso iyi n’iyi… Ntabwo nkunda kumvikana nabo kuko mbanza kubasobanurira ko mu Kiliziya tudakora nk’abapfumu. Mbereka urugendo rwo gukurikira Yezu no kwemera gukizwa nawe, urugendo rurerure kandi rutaburana n’umusaraba. Nkabashishikariza kujya mu Misa kenshi gashoboka, gusenga mu rugo hamwe n’abandi, cyangwa se bari bonyine, gusoma no kuzirikana Ijambo ry’Imana, guhabwa Isakramentu rya penetensiya… Bumva ari ibintu bisanzwe kandi imbuto ntizihite ziboneka. Baba bashaka ibintu by’akataraboneka, bihita bitanga umusaruro. Mbereka ko ubukristu ari ubuzima bugomba kwitabwaho nk’uko twita ku buzima bw’umubiri.

Yezu si umupfumu ukoresha ububasha bw’umwijima. Ububasha bwe abukomora ku Mana.

  1. Yezu na Belizebuli (Luka 11,14-20)

Yezu amaze kwirukana roho mbi, rubanda baratangara. Ariko bamwe barashidikanya ndetse bakemeza ko Yezu akorera Belizebuli, umutware wa roho mbi. Ibyo rero ni ukuvuga ko Yezu akoresha ububasha bw’ikuzimu.

Abandi bo barasaba ikimenyesto giturutse mu ijuru bamwinja. Mu kubasubiza, Yezu arakoresha imvugo yo mu migani nk’uko abimenyereye.Ingoma yose yibyayemo amahari irarimbuka, n’amazu yayo yose akagwirirana. Mu gihugu, iyo ubumwe bubuze, abaturage bagasubiranamo bakicana, igihugu kirasenyuka. Niba Shitani itangiye kwirwanya, biyicikiyeho. Mu yandi magambo Yezu ntakorera Shitani kandi yayirukanye. Yazu arasoza ababwira ko ari ububasha bw’Imana yirukanisha roho mbi. Ariko niba ari urutoki rw’Imana nirukanisha roho mbi, ni uko Ingoma y’Imana yabagezemo. Kwirukana roho mbi ni kimenyetso gikomeye cyerekana ko Ingoma y’Imana iri muri twe.

  1. Umunyamaboko n’umurusha amaboko (Luka11,21-23)

Kugira ngo basobanukirwe biruseho, Yezu arabacira undi mugani urerekana ububasha bwe. Hari abantu bahora ku nkeke ya Sekibi kandi ari abakristu. Bagahorana ubwoba, ndetse rimwe na rimwe bukabakoresha amahano bihakanye igihe babatijwe. Mbese bakamera nka wa muntu uhiriye mu nzu ukubita imitwe hose. Uko kuvanga kubakururira ibibazo aho kubikemura. Yezu araduhumuriza. Aratwereka abantu babiri. Umuntu w’umunyamaboko (l’homme fort) n’umuntu umurusha amaboko (le plus fort).

Umunyamaboko yumva akomeye, ameze neza nta mpungenge. Yizeye intwaro afite zirinze urugo rwe, mbese ibye biri mu amahoro. Icyakora koko burya ngo akagabo gahimba akandi kataraza. Ibintu birahinduka iyo haje « umurusha maboko » akamutsinda, akamwambura intwaro yari yiringiye, akamunyaga ibye byose akabiha abo yishakiye. Umunyamaboko Yezu avuga ni Shitani. Ihoza ku nkeke abantu yigaruriye. « Umurusha amaboko » ni Yezu ubwe. Atsinda Shitani akabohora abantu bose yari yarigaruriye. Hari umupadiri ukunda kuvuga ati « Shitani ni ikibwa, ihimba aho Yezu ataragera ». Ni byo koko. Niyo mpamvu Yezu adushishikariza kumuyoboka by’ukuri no kuyobora abandi kuri we kuko ari we munyamaboko nyakuri. (Il est le plus fort). Niwe nzira, ukuri n’ubugingo (Yh 14,6). Niwe mahoro yacu. (Ef 2, 14). Uko Yezu arushaho kumenyekana, kwakirwa no kuyobokwa, niko Sekibi igenda ishwiragira. Mbese ni kwa kundi aho urumuri rugeze, nta mwijima uharangwa.

Padiri Alexandre UWIZEYE