Amajyo y’abarushye n’abaremerewe

Inyigisho yo ku wa kane w’icyumweru cya 15 gisanzwe C, 14/07/2022

Iz 26, 7-9.12.16-19; Zab 101; Mt 11, 28-30

“Nimungane mwese abarushye n’abaremerewe, jye nzabaruhura”

 Bavandimwe ijambo ry’Imana tuzirikana none, riratwereka ko Yezu ari we gisubizo nyacyo cy’ibibazo byacu. Ibirushya n’ibiremerera abantu ni byinshi kuri iyi si bityo tuba dusabwa kugira icyerekezo cy’ubuzima kuko uko byagenda kose duhamagariwe kubaho. Ntidukwiye gucika intege mu bibazo n’ingorane duhura na zo ahubwo dukwiye kwigana Yezu. Ni we rugero rwuzuye rw’imibereho ikwiye bene muntu. Ni we utanga amahoro yuzuye.

Nk’uko nyagasani Yezu yabigarutseho mu ivanjili tumaze kuzirikana, nitumureberaho tuzamererwa neza mu mitima yacu. Imisaraba yacu tuyishobora iyo dukurikiye Yezu wahetse umusaraba kugeza ku ikuzo ry’izuka. Mu isomo rya mbere umuhanuzi Izayi aratwereka ko ibyiza byose tugeraho tubikesha Uhoraho. Imana ni yo idufasha tukagira imbaraga mu rugendo rwacu rwa hano ku isi. Bigaragara ko ibyo twageraho byose tudafite ukwizera mu Mana bitarama.

Ubuhanga n’imbaraga bya muntu hari aho bitagera mu gutanga amahoro n’ubuzima bwuzuye. Ukwemera Imana iri hafi yacu ndetse no mu bihe by’ibyorezo, intambara n’ihungabana by’ubukungu bituma tudatakaza icyizere cyo kubaho n’ubuzima bw’iteka dutegurira kuri iyi si. Umukiro nyawo uri muri Kristu wapfuye akazuka, we utubera ikitegerezo mu buzima bwacu.

Muri ibi bihe turusheho gufatanya kubiba amahoro aturuka ku Mana, twoye kurangazwa no gucibwa intege n’iby’isi bihindagurika.

Bikira Mariya, mwamikazi w’amahoro udusabire.

Padiri Sindayigaya Emmanuel.

Publié le
Catégorisé comme Inyigisho