Amasomo yo ku cyumweru cya 2 gisanzwe – A

Isomo rya 1: Igitabo cy’Umuhanuzi Izayi 49,3.5-6

Yarambwiye ati «Uri umugaragu wanjye, (Israheli,)

ni wowe nzagaragarizamo ikuzo ryanjye.»
None ngaha, Uhoraho yabyivugiye,

we wandemeye kumubera umugaragu, kuva nkiri mu nda ya mama,
kugira ngo mugarurire Yakobo, mukorakoranyirize Israheli;
guhera ubu rero, mfite ubutoni kuri Uhoraho,
ububasha bwanjye bukaba ari Imana yanjye.
Yarambwiye ati «Gusubiranya imiryango ya Yakobo,
no kugarura abarokotse ba Israheli,
ibyo ntibihagije ku mugaragu wanjye;
ahubwo nakugeneye kuba urumuri rw’amahanga,
kugira ngo umukiro wanjye usakare kugera mu mpera z’isi.»
Zaburi ya 39(40), 2abc.4ab, 7-8a, 8b-9, 10cd.11cd
Niringiye Uhoraho, mwiringira ntatezuka;

nuko anyitaho maze yumva amaganya yanjye.
Yampaye guhanika indirimbo nshya,

ndirimbira Imana yacu ibisingizo biyikwiye.
Ntiwifuje ibitambo cyangwa amaturo,

ahubwo wanzibuye amatwi ngo numve;
ntiwigombye igitambo gitwikwa cyangwa icy’impongano,
ni yo mpamvu navuze nti «Ngaha ndaje!
Mu muzingo w’igitabo handitswemo icyo unshakaho.
Mana yanjye, niyemeje gukora ibigushimisha,
maze amategeko yawe ajye ampora ku mutima!»
Uhoraho, sinigeze mbumba umunwa ngo nceceke,

sinahishahisha ineza n’ukuri byawe imbere y’ikoraniro rigari.
Isomo rya 2: Ibaruwa ya 1 Pawulo intumwa yandikiye Abanyakorinti 1,1-3
Jyewe Pawulo, watorewe kuba intumwa ya Yezu Kristu, uko Imana yabishatse, hamwe n’umuvandimwe wacu Sositeni, kuri Kiliziya y’Imana iri i Korinti, ari yo mwebwe abatagatifurijwe muri Yezu Kristu, mugahamagarirwa kuba intungane hamwe n’abandi bose biyambaza, aho bari hose, izina rya Nyagasani Yezu Kristu, Umwami wabo n’uwacu: tubifurije ineza n’amahoro biva ku Mana, Umubyeyi wacu, no kuri Nyagasani Yezu Kristu.