Catégories
Inyigisho

Ariko se mugenzi wanjye ni nde?

Inyigisho yo ku wa mbere, Icyumweru cya 27 gisanzwe, C, 2013

Ku ya 07 Ukwakira 2013 – Umwamikazi wa Rozali

Mwayiteguriwe na Padiri Alexandre UWIZEYE

Bavandimwe, uyu munsi turahimbaza umunsi mukuru wa Bikira Mariya,Umwamikazi wa Rozali. Uyu munsi mukuru washyizweho na papa Gregori mu mwaka w’1573 ubwo ingabo z’abakristu zaneshaga iz’abayisilamu bo muri Turkiya bashakaga kwigarurira Uburayi tariki ya 7/10/1571 ahitwa Lepante. Uwo mutsindo w’intambara yo mu mazi, ntibawukesheje kugira amato menshi y’intambara, cyangwa se kugira abarwanyi bamenyereye urugamba. Bawukesheje kwiyambaza Bikira Mariya. Watangiye guhimbazwa muri Kiliziya yose guhera mu 1716.

Na n’ubu umubyeyi Bikira Mariya ntiyigera atererana abana be, mu ntambara turwana na Sekibi n’ibyo aduhendesha ubwenge byose. Umugenzo mwiza wo kuvuga ishapule dukwiye kuwukomeraho.

Tugaruke gato ku Ivanjili y’Umunyasamariya w’impuhwe. Mu mwaka wa 1994 habaye Sinodi kuri Afurika. Abepiskopi bavuze ko Afurika imeze nk’uyu muntu wavaga i Yeruzalemu ajya i Yeriko, akagwa mu gico cy’abambuzi, bakamwambura, bakamuhondagura, bakamusiga ari intere. Abanyafurika benshi barababaye, bararushye, bacujwe utwabo. Bakeneye umunyasamariya w’impuhwe.

Mu mwaka wa 2009, habaye Sinodi ya kabiri kuri Afurika. Papa Benedigito yagarutse kuri icyo kigereranyo, yekena ko umunyasamariya w’impuhwe ari Yezu, we atugiriye impuhwe akaza kudukiza, akatwomora ibikomere byose.

Tugerageze gusobanukirwa n’iyi vanjili irusheho kutubera ifunguro ritubeshaho.

  1. Ikiganiro Yezu yagiranye n’umwigishamategeko.

  • Mwigisha, ngomba gukora iki kugira ngo ndonke ubugingo bw’iteka?

  • Mu mategeko handitsemo iki? Usomamo iki ?

  • Uzakunde Nyagasani Imana yawe, n’umutima wawe wose, n’amagara yawe yose, n’imbaraga zawe sose, n’ubwenge bwawe bwose, kandi uzakunde mugenzi wawe nk’uko wikunda.

  • Ushubije neza ; ubigenze utyo, uzagira ubugingo.

  • Ariko se mugenzi wanjye ni nde ?

Iki kibazo Yezu aragisubiza neza yifashishije inkuru y’umunyasamariya waranzwe n’impuhwe. Aragira ngo umwigishamategeko abe ari we wibonera igisubizo cy’ikibazo abajije.

  1. Abo inkuru itubwira ni bande ?

  • Umuntu w’intere. Ivanjili ntitubwira izina rye. Ntitubwira niba yari umuyahudi cyangwa se niba yari umunyasamariya. Ni umugenzi uva i Yeruzalemu ajya i Yeriko. Hagati ya Yeruzalemu na Yeriko hari ubutayu bwa Yuda. Abajura bakundaga kuhihisha bakambura abagenzi. Nawe baramwambuye barangije baramuhondagura.

  • Abajura. Bambuye uriya mugenzi barangije baramuhondagura bamusiga ari intere barigendera.

  • Umuherezabitambo. Nawe ni umugenzi aza kumanuka muri iyo nzira. Abona wa muntu wahondaguwe n’abajura. Arihitira yikomereza urugendo.

  • Umulevi. Nawe yabonye umuntu wahondaguwe n’abagenzi, yikomereza urugendo, nk’aho ntacyo yabonye.

  • Umunyasamariya. Ari mu rugendo. Ageze kuri wa muntu wahondaguwe n’abagenzi aramubona, amugirira impuhwe. Aramwegera, abonye agihumeka, yomora ibikomere bye akoresheje amavuta na divayi arangije arabipfuka. Hanyuma amwuriza indogobe ye, amujyana ku icumbi, urugendo ararusubika, amwitaho. Bukeye abonye atangiye kugarura akajisho, yishyura nyiricumbi arangije amusaba gukomeza kumwitaho akazamwishyura agarutse.

  • Nyiricumbi. We acumbikira abantu, akabitaho bakamuhemba.

  1. Ese inyigisho twakuramo ni iyihe ?

  • Ntibihagije kwibaza ngo mugenzi wanjye ni nde? Icy’ingenzi ni ukuba mugenzi w’umuntu wese dukurikije urugero rw’umunyasamariya w’umunyampuhwe. Uyu munyasamariya birumvikana ko atari umuyahudi. Ageze kuri uriya muntu wahondaguwe n’abajura, impuhwe zaramurenze. Yashoboraga kwibaza ibibazo byinshi: Yambuwe na nde? Ese nibambona muri iruhande ntibakeka ko ari njye wamwambuye? Ese aba bajura bagarutse nanjye bakanyambura barangiza bakampondagura? Hano hantu ko ari habi sinari nkwiye kuhava nihuta ubutarora inyuma? Ntiyibajije uwo muntu bahondaguye uwo ari we, ubwoko bwe, idini asengamo, aho yajyaga, n’ibindi. Yamugiriye impuhwe aramutabara.

  • Icya kabiri yaramutabaye we ubwe. Hari ubwo nagiye mu nama y’umuryangoremezo. Haza umuntu w’umukene gusaba ko bamufasha. Umukuru w’umuryango ati « Nta kibazo. Nzagushyira kuri listi y’abafashwa na caritas. Nibongera gutanga imfashanyo tuzaguheraho ». Umunyasamariya we si ko yabigenje. Ntiyagiye kumutabariza abashinzwe umutekano n’abashinzwe gutabara imbabare. Yamwitayeho we ubwe akoresheje uburyo yari afite : amaboko ye, amavuta, divayi, indogobe, amafaranga, igihe cye.

  • Icya gatatu ni uko atihambiriye kuri uriya muntu yatabaye. Yamugiriye neza nta nyungu cyangwa ikindi gihembo ategeje. N’ikimenyimenyi nagaruka, azaba aje kwishyura nyiricumbi ntavuga ko azaba aje kureba uwo yagiriye neza.

Mugenzi wanjye ni nde ? Iki kibazo Yezu aragihindura ati « Muri abo uko ari batatu, uwo ukeka ko ari mugenzi w’uwaguye mu gico cy’abajura ni uwuhe ? » Mugenzi w’umuntu ni ugira impuhwe ntabwo ari uzigiriwe. Mugenzi w’umuntu si ugirirwa neza, ahubwo ni ugira neza nta nyungu abifitemo. Yezu arasaba umwigishamategeko gushaka uburyo yakora ibikorwa byiza nk’iby’uriya munyasamariya.

  1. Urugero rwiza rwa papa Fransisko

Ku wa kane mutagatifu, papa Fransisko yasuye gereza ya Rebibia hafi ya Roma. Icyo gihe yogeje ibirenge abagororwa harimo abagore babiri. Umwe muri abo bagore ni umuyisilamukazi. Papa yabaye mugenzi wa bariya bagororwa.

Bavandimwe,

Umunyasamariya w’Impuhwe ni Yezu Kristu ubwe. Niwe wagiriye impuhwe muntu wakomerekejwe n’icyaha. Dusabirane kugira ngo twemerere Yezu atwomore ibikomere byose dufite, ari iby’inyuma cyangwa se imbere, ari ibyo tuzi cyangwa tutazi. Bityo natwe turangwe n’urukundo n’impuhwe mu buzima bwacu bwa buri munsi. Umwamikazi wa Rozari abidufashemo.