Catégories
Inyigisho

“Bafite Musa n’Abahanuzi, nibabumve!”

Inyigisho yo ku ya 05 Werurwe 2015, kuwa kane w’icyumweru cya 2 cy’Igisibo, Umwaka B.

AMASOMO : Yer 17,5-10; Lk 16,19-31

Bavandimwe, uyu munsi Kiliziya umubyeyi wacu yaduteguriye amasomo matagatifu adufasha kuzirikana neza ku iherezo ry’ubuzima bwacu n’uko nyuma y’ubu buzima buzima bizagenda.

Nyagasani Yezu mu nyigisho ye igihe yari mu mpinga y’umusozi avuga ingingo nterahirwe, iya mbere aheraho ni ingororano y’umukene agira ati: “Hahirwa abakene ku mutima, kuko Ingoma y’ijuru ari iyabo”(Mt 5,3). Aka kanya afashe ngo abwire abigishwa be uyu mugani w’umukungu na Lazaro w’umukene, arashaka kutwumvisha neza ko mu gihe turi mu isi tugomba kumenya ko tutabaho mu byiza gusa kandi dushaka Ubugingo bw’iteka. Iyi nyigisho nziza ya Nyagasani Yezu ije mu gihe cy’Igisibo, iraturarikira gufasha abakene baje badusanga, aho kuba nk’uyu mukungu, we aho gufasha Lazaro w’umukene amuha ibyo kurya, yamutegezaga imbwa ze ngo zirigate ibisebe bye. Mbega ibyago! Koko ngo ‘Nyir’ibyago imbwa ziramwonera!’ Nawe ibaze, muri iki gihe hari abantu benshi bameze nk’uyu mukungu, batita ku kababaro k’abandi kandi ntibabura urwitwazo; icyakora ikibabaje ni uko usanga ari na babandi bavuga ngo ‘Umugabo ngo ni urya utwe, akarya n’utw’abandi’ hanyuma uje kwishyuza nk’udufaranga duke yakoreye ku mubyizi we akamutegeza imbwa ze ngo zimwirukane. Uje kumusaba iby’ubuntu we zimwirukana ataranasuhuza. Mbega! Ubwose twavuga ko ibyo Nyagasani Yezu avuga ari ibya kera cyangwa noneho biri ubu?

Mu nyigisho ya Nyagasani Yezu, yishimira aba baciye bugufi bishimira ubuzima babayemo kandi bakanyurwa n’uko bameze. Mu bukungu bwacu ni byiza kwiyumvisha neza ko ibyo dutunze bigomba kuduhuza n’Imana na bagenzi bacu, aho kutubera intandaro y’ubwirasi bwa buri gihe. Mu by’ukuri gutunga ibintu si bibi, ahubwo ni uko ibintu bishobora kutubera intandaro yo korama igihe cyose tubikoresheje uko bidakwiye: Iyo bituzibye umutima tukagera aho twirengagiza Imana n’impuhwe zayo n’igihe bitubuza gusabana na bagenzi bacu! Hari indirimbo tujya turirimba dusaba Nyagasani ngo aduhe kwita ku bakene:

Fungura ibiganza byanjye Nyagasani

Byibumbiyeho ibintu byose

Nyamara umukene asonzeye imbere y’umuryango wanjye

Nyigisha gusangira!

Bavandimwe, abakene ku mutima bahirwa kandi Ingoma y’ijuru ikaba iyabo ni nk’uyu mukene Lazaro kuko uko ariho ntibimubuza guhura n’Imana. Nyamara dore umukire widamarariye, ntiyite ku kababaro k’umukene mugenzi we ahubwo akamuteza imbwa ngo zirigate ibisebe bye. None dore ngo kubera ibyago by’ubuzima bubi nyuma y’ubu bwo ku isi biratuma agarukira wa mukene Lazaro yari yaratereranye. Ariko ntacyo bimumarira kuko yahawe akanya ko kwiteganyiriza ntiyagakoresha! Kuri twese, igihe ni iki ngo twereke Nyagasani Imana ko tumukunda kandi ko dukurikiza amategeko ye. Muri iki gihe cy’Igisibo arifuza ko twamugarukira, tukaba abanyampuhwe nk’uko Data ari Umunyampuhwe, tugasiba, tukicuza kandi tugasenga. Turasabwa gushishikarira kubahiriza itegeko ry’Imana no gushyira mu bikorwa inyigisho duhabwa. Nibwo tuba twumviye Musa n’Abahanuzi.

Imana ikunda abayiringira, bayizera kandi banayikunda. Abantu nk’aba nibo bameze nka cya giti giteye iruhande rw’umugezi kandi n’iyo icyokere cyije ntacyo kiba. Abantu nk’aba babona neza uburyo Nyagasani ari urutare rwabo, kuko baba bamwiringiye bakamuhanga amaso buri gihe kandi bagasaba imbaraga ngo batsinde icyago. Nta muntu ukwiye gushyira amizero ye mu bandi cyangwa se ngo yiringire ingano y’ibintu afite. Umuhanuzi Yeremiya aratubwira ko umuntu nk’uyu, wiringira abantu cyangwa ibintu, ameze nk’agati kari mu butayu, ahantu habi h’urusekabuye hadashobora guturwa. Uyu muntu ni wawundi ufite umutima uhorana inyota, umubiri we ugahorana urukumbuzi kandi akaba ameze nk’ubutaka bw’agasi bwabuze amazi bukumirana. Uyu muntu ni uwo gusabirwa!

Nimucyo dukanguke tube maso mu bwiyoroshye bw’imitima yacu, maze twiyereke Nyagasani ucengera imitima y’abamwiyambaza bose. Ni We uzaduhembera imyifatire yacu, akurikije imbuto z’ibikorwa byacu. Dusabirane kandi kugira ngo hatagira utakara kuri uru rugamba turiho turwana na shitani!

Nyagasani Yezu nabane namwe!

Padiri Thaddée NKURUNZIZA