Catégories
Inyigisho

Bashyira divayi nshya mu masaho mashya

Inyigisho yo ku wa gatandatu w’icyumweru cya 13, A

Ku ya 05 Nyakanga 2014

AMASOMO: 1º. Am 9,11-15; 2º Mt 9, 14-17

Igitambo cy’Ukarisitiya kiraturyohera cyane. Mbere yo guhabwa YEZU mu Ukarisitiya, dutega amatwi Ijambo rye maze Kiliziya ihagarariwe n’umusaseridoti wa gihereza ikaridusobanurira, tukamenya icyo ritubwira mu buzima turimo none. Kuva kuri Musa n’Abahanuzi tukagera kuri YEZU KIRISITU, ni uko ibintu biteye. Bose badusobanurira icyo Uhoraho ashaka kutubwira ubu. Iyo uwo mutima w’inyigisho ubuze, tugwa mu iyobokamana ry’amarangamutima gusa.

Icyo Kiliziya ya YEZU KIRISITU igamije, ni ukugira ngo inyigisho ye yakirwe kandi igire akamaro. Igereranywa na Divayi Nshya igomba gushyirwa mu masaho mashya. Iyo nta masaho mashya abantu bafite kandi bashaka gutereka divayi yabo, ashaje barayata bakagura amashya. Mu myumvire y’Ivanjiri, twavuga ko amasaho ari imitima yacu igomba kwakira Ijambo ry’Imana rikayibikwamo, rikayituramo rikayivugurura. Imitima yacu, si amasaho ashaje yo kujugunywa ahubwo Kiliziya idufasha kuyisukura kugira ngo ibe mishya. Iyo imitima yacu yandavuye igacuyuka rwose, ntijugunywa kuko Uhoraho agira impuhwe nyinshi. Ijambo ry’Imana ubwaryo iyo rigezemo kandi ryasobanuwe koko muri Roho Mutagatifu, nta kabuza amakakama n’imbyiro birimo birarangira. Ikimenyetso kidashidikanywa cy’umuntu mushya, ni ukuryoherwa n’Ijambo ry’Imana n’ibisobanuro biriducengezamo. Iyo ibisobanuro bitamurikiwe na Roho Mutagatifu, na bwo turabimenya tugakaza isengesho ryo kurangamira YEZU KIRISITU maze Roho we Mutagatifu akadukomereza uburyohe.

Abahanuzi batubereye urugero dukwiye guhora tuzirikana. Byaba byiza gusoma ibisobanuro ku muhanuzi Amosi muri Bibiliya Ntagatifu. Mu gihe cye, icyari kiraje ishinga Nyagasani ni urukundo n’ubutabera bitubahirizwaga ku bakene n’abatishoboye. Batubwira ko muri ibyo bihe, “Ab’abakire biberaga mu birori, bakirirwa bagaramye mu ntebe nziza no mu mariri anepa, bacurangirwa ibyuma biririmba…Nta wari witaye ku butindahare bwa rubanda rugufi baterwaga n’ubwikanyize bw’abakire”. Ahantu hose ibintu byifashe bityo, baba baratatiye Amategeko y’Uwabahanze. Amasengesho ntacyo aba akimaze iyo batihatiye kuvugurura ibintu.

Umuhanuzi Amosi arangiza igitabo cye agaragaza amizero y’uko Nyagasani ubwe azegura inzu ya Dawudi yari igiye kugwa azayisubize uko yahoze kera. Turebe imbere mu mitima yacu tureke kwiheba kabone n’aho twaba twaratannye, turangamire YEZU KIRISITU twumvane Urukundo rwe Ijambo rye Kiliziya idusobanurira, tuzivugurura tuzabane na We ubuziraherezo mu ijuru.

YEZU KIRISITU asingizwe. Umubyeyi Bikira Mariya aduhakirwe, Abatagatifu bose badusabire.

Padiri Cyprien BIZIMANA