YEZU AKUZWE

Inyigisho

Bizamera bite mu gihe cy’ukuza k’Umwana w’umuntu?

ICYA MBERE CYA ADIVENTI, A. 1/12/2019

AMASOMO: 1º. Iz 2, 1-5;Zab 122 (121), 1-9; . Rm 13, 11-14; 3º. Mt 24, 37-44.

1.Adiventi Nziza

Adiventi irongeye iraje. Noheli turayitegereje. Amasomo y’iki cyumweru cya mbere cya Adiventi Umwaka A, aradufasha gutekereza cyane ku kugaruka k’Umukiza Yezu Kirisitu. Burya ntidukwiye no kurangazwa cyane n’iminsi mikuru isimburana dususurutsa ibirori byayo. Mu isi yose Noheli iyo yegereje abantu benshi bihatira kwitegura umunsi mukuru, bagura ibintu bishya, ibyo bazambara n’ibyo bazafungura, impano bazatanga n’ibindi. Natwe abakirisitu twihatira gutegura neza Umunsi Mukuru wa Noheli. Gusukura za kiliziya, gutegura liturujiya, guhimbaza ivuka rya Yezu tuvuga tuti: “Umukiza yatuvukiye”. Nyamara se ko igikorwa cyabaye kera cyane, twibuka ko icyo dukwiye gushyiraho umutima ari ukwitegura igaruka rye? Mu byo dukora byose n’ibyo duhimbaza byose, ni ngombwa ko tuganisha umutima ku bihe bizaza. Ni bya bihe buri wese ku munsi we wa nyuma hano ku isi azabona Umwana w’Imana amwakira mu ijuru. Nguwo umunsi ugomba kuzirikanwaho tudatwawe n’ibirori byo ku isi turonkeramo amafunguro no guseruka neza.

2.Twitegure dute?

Ivanjili y’uyu mwaka wa Liturujiya mushya, iraboneye mu kutwumvisha icyo dukwiye gukora. Yezu aratwibutsa ibyago byagwiririye isi mu gihe cya wa mwuzure Nowe yarokotse. Muri ibyo bihe byabanjirije umwuzure, abantu bari bandagaye ku isi nta bitekerezo bihamye bafite. Icyabo cyari ukurya no kunywa, kurongora no kurongorwa. Iby’Imana bari barabyimye amatwi. Imigenzereze yabo yari akumiro. Umwuzure wabahitanye badasobanukiwe. Nyamara Nowe we ngo yari yaritoje kumvira Imana akarangwa n’amatwara aboneye yubaha Iyamuremye. Ni we warokotse icyo cyago cy’umwuzure. Ibyo biratwumvisha ko dukwiye kuba kuri iyi si twihatira gutunganira Imana, twirinda ikibi cyse ariko cyane cyane dukomera ku kwemera Imana Data Ushoborabyose tuganira na yo nta buryarya.

  1. Nta busambo, nta businzi, nta busambanyi

Pawulo intumwa na we yatubwiye ibintu bifatika tugomba kwihatira mu gihe dutegereje kwinjira muri Noheli ari byo nyine guhura n’Imana yaturemye tukabana na yo ubuziraherezo kuko twayemeye mu kwakira Inkuru Nziza yayo Yezu Kirisitu yatuzaniye. Ni ukuba maso tukirinda guhondobera kuri iyi si. Yagize ati iki gihe ni: “ …icyo gushiduka mu bitotsi…Nitwiyake ibikorwa by’umwijima twambare intwaro z’urumuri”. Ni byo. Igihe cyo kwitegura guhura na Yezu Kirisitu, ni igihe cy’urugamba rukomeye. Yaje kuturokora apfira ku musaraba kugira ngo natwe tubambe imibiri yacu roho ziyambure ibicocero. Nyamara burya nta mbaraga dufite. Uyu mubiri twambaye unyuzamo ugahumekerwamo na Semushukanyi wuririra ku byifuzo bibi bidushegesha. Yemwe twari kuzazimangatana igihe Imana izacira imanza, none amizero yuzuye atuganisha ku gukizwa n’impuhwe z’Imana idusenderezaho iyo twarwanye tukananirwa. Iyo imyambi ya nyakibi yadufsahe ikadukomeretsa, ni Yezu wenyine duhungiraho dufite umutima ushengutse maze akongera akadusanasana. Amizero tumufiteho, ni uko ashoboye byose. Azaduha kugera ku munsi wo kuva muri uyu mubiri twaricujije ibyaha byose twakoze. Ibyaha bihora bitwugarije: udatwawe n’ubusambo atwarwa n’ubusinzi no gusindisha abandi. Utari muri ibyo hari ubwo umubiri umunanira akagwa mu busambanyi. Ashobora kudasambana akibera mu bindi biterasoni dore ko byarabije impande zose. Pawulo atwibutsa rwose kureka n’intonganya n’amashyari. Ibyo byose bibi nta mahoro biduha.

4.Dusenge cyane

Tuzumva ryari ko Yezu adutegereje mu ijuru? Tuzumva ryari ko ashaka ko tumugana mu mahoro? Amahanga amaranira ibyisi akishora mu ntambara. abayagenga bumva ko ibyo Imana ivuga bitabareba? Dukore iki? Dusenge dukomeje kugira ngo ku isi habe amahoro. Dusenge, abagerageza ibisasu bya kirimbuzi badaturitsa iyi si tugaturagara igihe kitageze tugatungurwa nta kwitegura guhura na Yezu hirya y’iyi si. Dusenge cyane inkota zabo bazicuremo amasuka. Ese bazi ko amacumu yabo bayacuzemo ibihabuzo ari byo byagira akamaro? Twumve ibyo Uhoraho avuze, ibyo twumvise mu isomo rya mbere ngo: “Ihanga ntirizongera gutera irindi inkota, ntibazongera ukundi kwiga kurwana. Nzu ya Yakobo, nimuze, tugendere mu rumuri rw’Uhoraho”. Tugomba kubisengera twivugurura mu mitima, dukomeza kwemera no gukunda Yezu Kirisitu Umukiza wacu.

Umubyeyi we Bikira Mariya aduhakirwe. Abatagatifu bose badusabire kuri Data Ushoborabyose.

Padiri Cyprien Bizimana            

Back to top libero. Praesent risus. dictum mattis amet, venenatis, consectetur Lorem