Catégories
Inyigisho

“Gufata icyerekezo kimwe hamwe na Kristu”.

Inyigisho yo ku wa gatanu w’icyumweru cya 4 cy’Igisibo, ku wa 20 Werurwe 2015.

Amasomo: Buhanga 2,1a.12-22; Zab 34; Yh 7,2.10.14.25-30.

Uragasingizwa Nyagasani! Abagome bati twibasire intungane kuko itubangamiye… Uhoraho aba hafi y´abafite umutima washengutse(Zab).- sinaje ku bwanjye..(Iv).

-Igitambo kubera ubugome: Isomo rya mbere ry´ubuhanga riratwereka uburyo abagome bibasira intungane maze bakayivutsa ubuzima kubera urwango. Iyi ntungane igitabo cy´ubuhanga kitubwira irazira kuvugisha ukuri irwanya ibikorwa bibi bya muntu. Nk´uko tubizi rero, Isezerano rya kera ryuzuzanya n´Irishya. Niyo mpamvu iyi Ntungane yo mu kiragano cya cyera ishushanya Yezu wo mu Isezerano Rishya.

-Gufata icyerecyezo kimwe hamwe na Kristu: Yezu ati “sinaje ku bwanjye…akongeraho ati nzi uwantumye. Igihe cyose Yezu yifuzaga ko buri wese yamenya Imana, Se. Uwo Se kandi akaba ariwe wamutumye bityo akaba ariwe umuvugiram. Bityo ibyo akora bikaba ari bimwe n´ibyo Se ashaka. Kubyumva rero byaragoranye, kandi na n´ubu ni uko. Yezu ntiyigeze agira ubwoba bwo gutumikira uwamutumye kuko atashidikanyaga na rimwe ko ahorana na We. Iryo niryo banga ry´ukwemera kwacu:Kumenya gufata icyerecyezo kimwe na Kristu. Ingabire duhabwa mu masakaramentu nizo zidufasha gukomeza icyo cyerekezo nta ubwoba bityo tukarangamira ubuziraherezo Kristu watwihaye kandi akatumenyesha Se.

-Ubu buzima no hirya yabwo: Bakristu bavandimwe, icyo aya mosomo yombi adukangurira, ni ukugira ukwizera guhamye muri Kristu. Akenshi ubugome bwo mu Isi buduca intege tukagirango ubuzima burangirira hano ku Isi, nk´uko abanzi ba Yezu bari bazi ko i Yeruzalemu ariho ubuzima bwe buzarangiorira. Inzira y´umusaraba Yezu yatangiye agana i Yeruzalemu niyo izaviramo benshi agakiza. I Yeruzalemu aho bica urw´agashinyaguro abahanuzi bayo ni naho Umwana w´Umuntu azerekanira Ubwami n´Ikuzo bye maze atsinde Sekibi kuko ari kumwe n´Uhoraho. Ibi rero nibyo byayobeye abiyitaga abanyabwenge. Ntibigeze bumva ko hirya y´ubu buzima bwo muri iyi si hari Ubuzima bundi buhoraho. Ubwo buzima rero nibwo tugomba gushaka kandi tukaburonka ku bw´Ingabire y´Umwami wacu Yezu Kristu waje kandi akabana natwe. Bityo Yezu akaba ariwe Nzira y´Ukuri n´Ubugingo. Yezu niwe uramira abafite umutima wihebye cyangwa washenguwe n´intimba zitugeraho kenshi ku buryo bunyuranye mu buzima bwa buri munsi. Yezu niwe buzima bwacu kandi niwe mahoro yacu. Ayo mahoro niyo atuma turenga inzangano n´inzika; niyo atuma duha ikiremwa muntu agaciro kandi buri wese akibonamo ishusho y´undi nk´umuvandimwe; niyo atuma dusohoka mu mwijima w´icyaha maze tukabona urumuli; niyo atuma tuticara ngo duterere agati ryinyo twiturize kandi tureba abababaye ku mutima, roho n´umubiri. Ayo mahoro niyo atuma turwanya Sekibi kuko tuzi ko ari se w´ikinyoma. Ayo mahoro ni Kristu utubamo akaduturamo maze natwe kukabimwemerera kubana nawe.

Muri iki gihe cy´Igisibo, dusabe kugirango Ingabire twahawe tubatizwa mu izina ry´Ubutatu Butagatifu kandi tukanakomerezwa muri Roho mutagatifu, ikomeze iturinde, maze kuri Pasika Nshya y´Iteka Rishya tuzazukane na Kristu mu Ikuzo ry´abana b´Imana tuvuga tuti: “Uragasingizwa Nyagasani“, ndiho ku bwawe! Nyina wa Jambo watwiyeretse atube hafi. Amén!

Padiri Emmanuel MISAGO