Catégories
Inyigisho

Ibishashagirana si ijuru

INYIGISHO Y’ICYUMWERU

CYA 33 GISANZWE C, 17/1172019

AMASOMO:

ISOMO RYA MBERE: Mal 3,19-20ª; ZABURI: 97, 5-6.7-9b.9c

ISOMO RYA KABIRI: 1 Tes 3,7-12                                                                                                         

IVANJILI: Lk: 21, 5-19

“MU BWIYUMANGANYE BWANYU

NI BWO MUZAROKORA UBUZIMA BWANYU”

Bavandimwe muri Kristu, mbifurije ineza n’amahoro bituruka ku Mana Data na Mwana na Roho Mutagatifu.

Turimo turasoza umwaka wa liturujiya, tugeze ku cyumweru cya mirongo itatu na bitatu mu byumweru bisanzwe by’umwaka C., icyumweru gitaha turahimbaza umunsi mukuru wa “Kristu Umwami” mbere yo kwinjira mu mwaka mushya n’igihe cya Adventi. Ijambo ry’Imana tuzirikana kuri uyu munsi riradufasha kuzirikana ku bihe bya nyuma bya muntu muri ubu buzima buhita.

Isomo rya mbere rigufi cyane twumvise ryo mu gitabo cya Malakiya riraduha igisubizo gitomoye ku kibazo gikomeye dukunze kwibaza, atari twe gusa ahubwo ari n’ibitabo bitagatifu by’ubuhanga: “Kuki umunyabyaha usanga ahirwa mu gihe intungane ihora yibasiwe n’amagorwa?”

Icya ngombwa si uko urugendo rukozwe, icya ngombwa ni uko urugendo rushojwe, abirasi n’abagome, babayeho bishongora banahemuka, babayeho bafite byinshi bishimishamo mu bwikunde n’ubwibone,… Abubaha izina ry’Uhoraho bo baranzwe no kwiyumanganya ubuzima bwari bubagoye iteka bahanze amaso ijuru.

Iherezo ry’abirasi n’abagome ku munsi w’Uhoraho ni ukugurumana bagahinduka umuyonga mu gihe abubaha izina ry’Uhoraho izuba ry’ubutabera rigiye kubarasiraho ribazanire agakiza. Mu yandi magambo, iherezo ry’umugira-nabi ni ibyago mu gihe iherezo ry’intungane ari ihirwe.

Ni muri urwo rwego mu Ivanjili ya none twumva Nyagasani Yezu adushishikariza kudashukwa n’ibishashagirana by’iyi si. Ni byo koko, ingoro y’i Yeruzalemu yari nziza cyane iteye amabengeza, yubatswe n’amabuye meza kandi y’igiciro ndetse igatakwa n’amaturo atagira uko asa, byari ishema rikomeye ku bayahudi ndetse ku buryo yashoboraga kuba imbarutso y’ubwirasi kuri bamwe.

Bavandimwe, ni kangahe dutangarira amazu yubatswe neza cyangwa amamodoka y’ibiciro? Ni kangahe twiratana amadiplome cyangwa akazi keza?Ni kangahe twishimira ko rubanda idutinya cyangwa itwubaha bitewe n’imyanya dufite?

Yezu ngo yitegereje ingoro maze arabwira ati: “nta buye rizasigara rigeretse ku rindi”. Bamubajije igihe n’ikizaba ikimenyetso abasubiza ko hazaza abamwiyitirira atari we akababuza kuzabakurikira, ababwira ko hazabaho intambara n’imidugararo ku isi ariko ko ritazaba ari ryo herezo ahubwo abateguza ko mbere y’ibyo byose bazafatwa bakajyanwa mu nkiko bahorwa izina rye.

Icyangombwa ntabwo ari ukumenya igihe amagingo y’Umwana w’umuntu azasohorerera kuko tuzi neza ko umunsi n’isaha bitazwi kandi bizatungurana kuri twese, icya ngombwa ni uguhora twiteguye. Ikibazo twakagombye kuba twibaza iteka ni ikigira kiti: amagingo y’Umwana w’umuntu abaye aka kanya umwanya wanjye waba uwuhe?

Yezu arateguza abe ko bazangwa na bose kugeza aho bazatangwa n’ababyeyi babo. Ni ibintu bikomeye cyane gusa arabahumuriza ko azaba ari kumwe na bo kugeza ubwo abasaba kutazirirwa bahangayikira kumenya uburyo baziregura. Avuga ko icyo gihe buzaba ari uburyo bwo kugira ngo “mumbere abagabo na ho ibyo muzireguza nzabyikorera kuko nzabaha kuvuga amagambo abanzi banyu batazashobora guhangara cyangwa kuvuguruza”.

Uwavuga ko igihe cyo kubera Kristu umuhamya cyashyitse ntabwo yaba yibeshye. Muri iyi si ya none biragoye kuvuga ko wabaho uri ikirumira-habiri. Uko ikibi kigenda kirushaho kwiyimika ni na ko abakristu bagomba kugaragaza aho bahagaze. Nta shiti ni mu ruhande rw’icyiza ari na ho bagomba gutangira ubuhamya bw’ukuri kwa Kristu.

Bavandimwe, uyu munsi kurusha ibindi bihe byose byabayeho, abemera Kristu dufite inshingano zo kuba abahamya b’ukuri kuko ikinyoma gisa n’icyototera abuzima bwose bw’abatuye isi, muri “sisiteme” zose kugera n’aho ubona cyototera na Kiliziya. Abafite amahirwe yo kugira icyo bageraho muri ubu buzima busanzwe si abemeye kugendera mu murongo w’isi bigaragara rwose ko ari umurongo w’umwijima w’ikinyoma.

Twe abemera twongere tuzirikane ku iherezo ry’ababi no ku iherezo ry’intungane maze duhe agaciro aya magambo ya Nyagasani adushishikariza kubaho mu bwizige no mu bwiyumanganye kugira ngo kuri wa munsi tuzashobore kunezerwa hamwe na Kristu twishimiye gusangira na we ikuzo ry’Imana.

Twirinde guhemuzwa muri ubu buzima n’ibishashagirana bihita kuko ni iby’igihe gito kandi nyuma yabyo hakaba hari urubanza, twiyumanganye ingorane mu gukora icyiza twishimira ko tutari twenyine mu rugamba turwana ahubwo dushyigikiwe na Nyagasani ubwe uturwanirira kandi udutsindira abanzi bacu.

Umubyeyi Bikira Mariya umwamikazi w’intumwa adusabire.

Padiri Oswald SIBOMANA.