Catégories
Inyigisho

Ibyo nsoma « nabyumva nte se, ntabonye unsobanurira ? » (Intu 8,31)

Inyigisho yo kuwa kane w’icyumweru cya 3 cya Pasika. Kuwa 23 Mata 2015
Amasomo : Intu 8,26-40 ; Zab 66(65) ; Yh 6,44-51

Bavandimwe Kristu Yezu akuzwe!

Nyuma ya Pasika, turabona abigishwa basohoka bagatangira kwamamaza ibitangaza by’izuka rya Yezu ahantu hose bayobowe na Roho mutagatifu. Kugeza n’ubu, abantu turacyigishwa na Kiliziya. Ariko se izo nyigisho tuzakira gute? Ese turazumva zikaduhindura?

Mu Ivanjili ya none, Yezu asubiyemo ibyanditswe n’abahanuzi ngo ‘bose baziyigishirizwa n’Imana’(Yh 6,45) ; naho mu gitabo cy’Ibyakozwe n’Intumwa, umunyamahanga wasomaga ibyanditswe bitagatifu ati : ‘‘nabyumva nte, ntafite ubinsobanurira ?’’( Intu 8,31).

Kwigishwa n’Imana kugira ngo tumenye intego y’ubuzima nta ko bisa!

Yezu yari azwiho kuba umwigisha w’Ijambo ry’Imana. Nubwo abenshi mu bo yigishaga bari basanzwe bazi ibikubiye muri Bibiliya, bari bakeneye uwabafasha kuyisobanukirwa. Kugira ngo Yezu abafashe, yababwiraga imirongo yo muri Bibiliya, yarangiza akabasobanurira neza Ibyanditswe. Ibi ni nabyo abo yasigiye ububasha bwo gukomeza umurimo we bakora mu butumwa bwo kwigisha imbaga y’imana.

Hari intera zigera muri enye umukristu yacamo kugira ngo yumve icyo Imana imubwirira mu byanditswe bitagatifu :

KUVUGANA n’Imana binyuze muri Bibiliya, nk’uko uriya munyetiyopiya yabyisomeraga.
GUSOBANUKIRWA: Gusobanukirwa icyo Imana ivuga, tubifashijwemo n’abatorewe uwo murimo wo kwigisha nk’uko intumwa Filipo yabigenje.

KWIRINGIRA: Kwiringira icyo Imana ivuga; ari nabyo bituzanira ukwemera nk’uko uriya munyamahanga yabihamije agira ati:  ‟ndemera ko Yezu ari umwana w’Imana”(Intu8,34).
GUHINDUKA: Guhindurwa n’ibyo Imana ivuga, nk’uko uriya twumvise yemeye kubatizwa, avuka bwa kabiri aba ikiremwa gishya maze ataha yishimye.

Bavandimwe, kwigisha Ijambo ry’Imana, mbona byagira akamaro igihe uwigishwa, ibyo ari kumva abigize ibye ; kandi akabishyira mu bikorwa. Ntabe nkawa mugore wagiye gushimira Padiri, agira ati : ‟mu Misa wigishije neza”! Ati :  ‟gusa icyambabaje ni uko umugabo wanjye atari ahari kandi numvise ari we wavugagaho gusa”! Ati :  « niyo mpamvu ndaza kumushishikaza akazaza ku cyumweru gitaha ; ariko nawe uzambabarire umusubiriremo ibyo wavuze uyu munsi, wenda yasubira kuba umuntu muzima »! Nuko Padiri mukumusubiza aramubwira ati :  ‟ibyo navuze ntibyari bijyenewe umugabo wawe, ahubwo ni wowe wari uhari nabwiraga kugira ngo uhinduke ube umugore mwiza”. 

Ijambory’Imana turyakire kandi riduhindure ; Ukaristiya duhabwa idukomeze turusheho kumva ko inyigisho ari twe zireba mbere na mbere. Mu muco wacu, iyo hari umuntu wapfuye, mbere yo kumushyingura dukunda gukoresha indirimbo n’amasengesho byerekana ko umuntu uwo ari we wese azapfa, ndetse ibyo bikaduhamagarira guhinduka beza igihe tugihumeka. Ariko ikibabaje ni uko bamwe mubaje gushyingura, bakeka ko uwo baherekeje ari we ugomba kwisubiraho! Ni nacyo kibazo duhura nacyo igihe twumva ko inyigisho twahawe ireba « mubyara wanjye », « masenge », « marume », « mabukwe », n’abandi batari njye.

Dusabirane kugira ngo tubashe gutega amatwi Imana, twemere kwigishwa nayo maze bituviremo guhinduka bashya mu mibereho yacu ya buri munsi. Dutungwe n’umubiri wa Kristu maze twizihire Imana.

Nyagasani Yezu abane namwe!
Padiri JMV NTACOGORA