Catégories
Inyigisho

Igitaramo cya Pasika ni inyigisho ihabwa umukristu

Inyigisho y’uwa gatandatu Mutagatifu, 04 Mata 2015

Muri iyi nyigisho turasangamo urugero duhabwa n’Imana kugira ngo turukurikize.

Mbere na mbere: Imana ni Yo soko y’ubuzima.

Ibitabo bitagatifu, icy’Intangirio n’icy’Iyimukamisiri byabitwumvishije. Mu munsi itandatu Imana yaremye abantu, inyamaswa, ibimera, amazi, ibinyarumuri, isi, …hanyuma iraruhuka. Icyo igitabo gitagatifu kigamije kutubwira ko ibintu byose byaremwe n’Imana. Kandi twavuga ko yabyitondeye, kuko itabivuburiye rimwe. Yafashe igihe; buri bintu ku mwanya wabyo kugeza ku minsi itandatu. Ntacyo yaremye itabizi neza. Kandi icyaremwaga cyose yagihaga umugisha kugira ngo gikomeze kubaho. Byose byari byiza maze Imana ishaka ko bikomeza kuba byiza.

Turasangamo imyifatire isa n’iya muntu, aho tubwirwa ko Imana imaze kurema byose yaruhutse. Ntibyadutangaza, kuko ibyanditswe bitagatifu byandikiwe abantu, ni inyigisho duhabwa ku gukunda umurimo, ariko kandi bikajyana no gukora koko, tukagira igihe cyo kuruhuka bifite impamvu.

Umwanditsi mutagatifu aratwigisha ko gukora bikundwa n’Imana, ariko kandi igashaka ko n’ikiruhuko kiba ngombwa. Umuntu arakora kugira ngo umurimo umugirire akamaro, ariko ntawe ukora kugira ngo yicwe n’umurimo.

Tuvuge ku iremwa tubwirwa n’igitabo cy’Intangiriro:

Imana iti: “ Noneho duhange Muntu mu ishusho ryacu…Imana imurema mu ishusho ryayo…ibarema ari Umugabo n’Umugore. Imana ibaha umugisha irababwira iti: Nimwororoke, mugwire, mukwire isi yose, muyitegeke…”

Umuntu yavuga ko Imana yahaye iremwa ry’umuntu umugambi wihariye kandi imurema imwishushanyije. Tuvuge ko Imana yaremye Muntu imwitondeye, imuha isura yayo, kandi irema Umugabo n’Umugore nta busumbane.

Twavuga ko umuntu nawe yahawe ububasha bwo kororoka, nawe yajya abyitondera; akabyara yabanje kubitekereza neza: gutanga ubuzima si ubukiniro, si uguhubuka.

Gutanga ubuzima biteguranwa urukundo ruhuza abiyemeje gufatanya.

Gutanga ubuzima ni ukwiyemeza guha isura nziza uwo uzabyara. Ntasamirwe mu nduru, ku gahato.

Gutanga ubuzima si ukwishima ubukungu cyangwa kubirota ngo harerimana, habyarimana. Imana ishaka ababyara babanje gutegura uko bazarera.

Nk’uko kandi abantu baremwe mu ishusho y’Imana, nabo bagomba kubyarira mu mahoro no mu byishimo bikomoka ku Mana. Ibyo bibuze, kubyara byaba atari ngombwa.

Abiyemeza kubyara ari abakristu babyitegure, babitegurirwe igihe gihagije atari ukuvuga ngo ko imyaka nyifite habuze iki? Haba habuze inama z’imbonezamubano, haba habuze imigenzo y’imbonezamana; kandi umuntu ntabihabwa no kugira imyaka. Abihabwa mu burere bwiza, mu kubyiruka neza no gutegurwa neza.

Nk’uko Imana yaremye Muntu ikurikije umugambi wayo muri Yezu Kristu, Muntu nawe azagera ku buzima bwiza afashijwe na Yezu Kristu. Ubuzima bwa Yezu ni inzira ifitiye akamaro umuntu.

Nyagasani Yezu yanogeje umugambi w’Imana, kandi nk’uko abwira abe kunyura inzira zigoye, nawe yarazinyuze:

  • Yavukiye ahadakwiriye Umuremyi wa byose
  • Yatotejwe akiri uruhinja, ajya mu buhunzi
  • Yagize neza, yigisha inzira igana Imana, yiturwa gutotezwa no kwicwa.

Mbese nawe yageze mu ikuzo yerekanye icyo kwambuka inyanja mbere yo kugera mu gihugu cy’imigisha bivuga. Yanyuze ahakomeye kugira ngo agere mu ikuzo. N’umukristu nawe nk’uko tubishushanyirizwa no kubatizwa, azagera mu ikuzo akoze nka Kristu, yemeye urukundo, rushobora no kumubaza gutotezwa, ndetse no kuba yahara ubugingo bwe.

Igitaramo cya Pasika ni inyigisho ibwira umukristu ko niba ashaka kuzukana na Yezu Kristu agomba kubaho nka We.

AMINA.

+ TADEYO NTIHINYURWA

ARKIYEPISKOPI WA KIGALI