Catégories
Inyigisho

Imana umubyeyi wacu yaduhaye urugero rwo gukora

Inyigisho yo ku munsi wa  Mutagatifu Yozefu, Urugero rw’abakozi. Ku ya 01 Gicurasi 2015

Bavandimwe tukiri mu byishimo bya Pasika ,nimucyo duhimbaze Yozefu Urugero rw’abakozi. Ku itariki ya 1 gicurasi buri mwaka kiliziya umubyeyi wacu iduha kongera guhimbaza Yozefu Mutagatifu wa mugabo w’intungane Imana yemeyeko aba umutware w’urugo rw’i Nazareti rwagize amahirwe adasanzwe kuko rwareze kandi rugakuza umucunguzi w’isi Yezu Kristu Umwami wacu. Urwo rugo Yozefu yararwitangiye,araruruhira maze mu murimo we ashimisha Imana bityo natwe aduha urugero rwo gushimisha Imana mu byo dukora.

1.Imana umubyeyi wacu yaduhaye urugero rwo gukora

Ku munsi nk’uyu twongere dushimishwe nuko abakora umurimo wabo kandi bawushyizeho umutima baba bigana Imana yacu yakoze byose neza ,ikagaragariza muntu urukundo n’icyizere bitangaje imusaba gukomeza gutunganya isi kandi ikamwegurira byose ngo bimufashe kumererwa neza maze nawe akomeze kuyirangamira.

Bamwe bitiranya imirimo yabo n’igihano cy’Imana nyamara ibyo ni ukwibeshya kuko imvune zikomoka ku murimo zaje nyuma y’aho muntu acumuriye naho ubundi Imana ni yo yakoze mbere kandi natwe iduha urugero n’itegeko byo gukora. Ariko na none dukwiye kumenyako umurimo wose ukozwe neza ugira imvune zawo ariko kandi ukazanira ibyishimo nyirawo.

2.Umurimo uranga abo turi bo muri société no muri kiliziya

Igihe Yezu Kristu yari asubiye iwabo i Nazareti maze akigishiriza mu isengero nk’umuntu ufite ubuhanga n’ububasha ntibyoroheye abantu b’iwabo guhuza ubuhanga bumvaga n’uwabubagezagaho dore ko bari bamuzi nk’umwana w’umubaji. Imyumvire bari bamufiteho yari itandukanye cyane n’ibyo bamwumvanaga .

Nkuko umuntu wese wiyubaha aharanira gutunganya neza ibyo ashinzwe agira ati :’’ abantu batazabona ko ntacyo namaze, ko ndi imburamukoro, ko ndi umunebwe,ko ntakwiye kugirirwa icyizere cyo gushingwa ibyisumbuyeho’’,…ni nako umukristu byose akwiye kubikora azirikana ko ibikorwa byiza biduha isura nziza muri kiliziya no mu bandi kandi bikanaduherekeza iyo dushoje urugendo rwacu hano ku isi. Imirimo abantu bakoze ikunze kugarukwaho igihe cyo kubaherekeza bitabye Imana ari nako dusaba Nyagasani ngo abahembere ibyiza bakoze.

3.Yozefu Mutagatifu urugero rw’abakozi

Uyu mugabo w’intungane kandi witonda atwereka mbere na mbere ko tugomba gukora byose tubikorera Imana,tukabikora mu gushaka kwayo bityo imirimo yacu ikadufasha gusingiza Imana.

Yozefu kandi anatwibutsako nta murimo numwe ukwiye kwitwako usuzuguritse kuko umurimo yakoze watumye umwana w’Imana abona ikimutunga agakura neza,watumye umugore we Mariya yishimira mu rugo rw’i Nazareti ndetse na we abasha kurangiza neza inshingano z’ababyeyi.

Kuba kiliziya kuri uyu munsi idusaba gusingiza Yozefu Mutagatifu urugero rw’abakozi ni n’ubundi buryo natwe bwo kudushishikariza kwibaza ku buryo twitagatifuriza mu mirimo yacu mbese tukayikora nk’abagaragu beza bazabihemberwa n’Imana ubwayo. Ntihakwiye kubaho abakozi b’abakristu bakorera ijisho cyangwa baharanira inyugu zidaciye mu mucyo,ibyo Yozefu urugero rw’abakozi ntiyabidutoje.

4. ‘ ‘Senga maze ukore’’

Aya ni amagambo meza y’umurage n’umurongo Mutagatifu Benedigito yasigiye abamonaki kandi natwe abakristu tukaba dukwiye kuyagira ayacu. Ntitwaba twibeshye tuvuzeko Yozefu Mutagatifu Urugero rw’abakozi umurimo we w’ububaji yawukoraga neza kuko yari yarakomeje kubaha Imana yumva cyane icyo imubwira. Natwe igihe tugiye kwinjira mu mirimo yacu ni byiza kwiragiza Imana, kuyiragiza imirimo yacu ngo ikorwe mu buryo buyihesha ikuzo maze bwa buriganya n’ubucabiranya,indonke mu kazi,ruswa, amatiku,inzangano n’ibindi nk’ibyo byoye kurangwa mu mirimo ikorwa n’abamenye Imana.

Ntidukwiye gukora tudatuye Imana imirimo yacu. Isengesho n’umurimo ku mukristu ni ibintu bibiri by’indatana kandi n’umurimo ukozwe tuzirikana ko dukorera Imana uhinduka isengesho.

Kuri uyu munsi dusabe Nyagasani ngo ahe umugisha ibikorwa byacu, adutagatifurize mu byo yadushinze,tubikore ari we dukorera twizeye kuzahembwa nawe. Dusabire abashomeri n’anbandi bose bakora imirimo batishimiye bitewe no kubura uko bagira. Dusabire n’abakora imirimo y’urukozasoni ijyana mu rupfu ariko bo bakaba bibeshyako ari yo yonyine bakesha kubaho.

Yozefu Mutagatifu adusabire.

Padiri Fraterne NAHIMANA.