Indirimbo ya Noheli

Inyigisho yo kuwa 26 Ukuboza 2019, umunsi wa Mutagatifu Stefano

Amasomo: Intu 6, 8-10;7, 54-60; Zab 30; Mt 10,17-22

Bavandimwe Kristu Yezu akuzwe,

Ejo bundi turi mu gitaramo cya Noheli, umusaserdoti yahagurukije umwana muto ngo aduterere indirimo ya Noheli tubyine, ahita atera idirimbo ifite amagambo akurikira: “Umusaraba wa Yezu nzawegamira aho nzaba ndi hose nzawegamira”.

Birumvikana ko abakristu bose bari bategereje kubyina Noheli batunguwe ndetse bagaturika bagaseka. Umusaserdoti abajije impamvu basetse, bavuga ko umwana yibeshye ateye indirimbo itari yo. We atangira ahubwo kumusabira amashyi avuga ko umwana ateye indirimbo nyayo.

Ni byo koko ntushobora kwizihiza Ivuka rya Kristu utabanje guterera ijisho ku musaraba we, dore ko Noheli mu gukomera kwayo igwa mu ntege iminsi yo guhimbaza iyobera rya Pasika ya Kristu, kandi Pasika ntiyaba hatabayeho uwa gatanu mutagatifu aho Yezu yadupfiriye ku musaraba maze nk’uko tubihamya mu Ndangakwemera ya Kiliziya ko icyatumye amanuka mu ijuru ari twebwe abantu no kugirango dukire; ibyo bikuzuzwa.

Bityo rero ntibinatangaje nk’uko bamwe babyibaza, ko muri iyi minsi umunani (Octave de Noël) duhimbazamo umunsi w’Ivuka rya Nyagasani Yezu, tunahimbazamo umunsi wa Mutagatifu Stefano, uwahowimana wa mbere muri Kiliziya. Ibi bihita bitwereka ubukuru bw’iyobera rya Pasika kandi bikatwibutsa ubutumwa bw’uwo Mwana watuvukiye: ni umukiza uzadukiriza mu bubabare bwe, urupfu n’izuka rye.

Mu isomo rya mbere ryo mu gitabo cy’Ibyakozwe n’intumwa, mutagatifu Luka aratubwira urugendo rwa Stefano rugana ku guhorwa Imana. Twibuke ko yari yatowe muri ba bagabo barindwi bari buzuye ubwitonzi na Roho mutagatifu ngo babe abunganizi b’intumwa mu murimo wo gufasha abakene n’ubundi butumwa. Stefano rero yabaye uwa mbere wujurijweho ibyo twumvise Yezu Kristu abwira abari bamuteze amatwi, atangaza ko umukristu nyawe adatana n’umusaraba. Uwemeye kumukurikira, uwemeye kuramya Umwana uryamye mu kavure, kugira ngo agere ku ikuzo ry’Imana asabwa kutihunza umusaraba we.

Natwe muri iki gihe turi kuramya Umwana watuvukiye, tumusabe kumubera abahamya duheka neza imisaraba yacu, twirinda kuba abanzi b’umusararaba.

Mugire Noheli nziza!

Padiri Emmanuel Nsabanzima

massa Aliquam sem, sed elit. id felis tempus ut dictum