Inyigisho: Kwimenya, gushishoza no kwigengesera

Inyigisho yo ku wa kabiri w’icyumweru cya 7 cya Pasika, Umwaka A

Ku ya 04 Kamena 2014

Intu 20, 28-38; Z 67, 29-30, 33.34b.35a, 36;Yh 17, 11b-19.

Kwimenya, gushishoza no kwigengesera

Ubumwe bw’abemera Kristu ni ngombwa kugira ngo babashe kumubera abahamya. Yezu mu isengesho rya gisaseridoti arasabira abigishwa n’abazamwemera bose kuba umwe. Kiliziya y’i Efezi Pawulo agira inama isa na kiliziya nyinshi, zo kuri iki gihe cyacu. Kugira amakenga no kwigengesera bituma dutahura imitego y’abigishabinyoma.

Murimenye”

Pawulo mbere yo kuva Efezi arasezeye. Ababwiye amagambo y’umurage,abakomeza kandi abahanura. “ Murimenye, mumenye n’abo mwaragijwe”. Ni inshingano ahaye abashinzwe abandi. Pawulo yabonaga ingorane zikomeye Kiliziya ya Efezi izagura nazo. Ibirura by’ibihubuzi avuze ni abagendera mu guhinduka kwa benshi bakabacengezamo inyigisho z’ubuyobe zitandukanye n’Ivanjili ya Yezu Kristu. Ni ibirura by’ibihubuzi kuko mu by’ukuri icyo baba bagamije ari inyungu zabo n’ubwo bitwaza Ivanjili. Ishusho y’ikirura cyigira intama cyangwa intasi y’impyisi yabira maka irabisobanura neza.

Ibyo Pawulo ahanuriye Kiliziya ya Efezi, nibyo Kiliziya y’Imana igenda ihura na byo mu bihe byose. Ingorane Kiliziya ihura nazo umuntu yazigabamo kabiri.

Hari izituruka ku bayirwanya batayizi. Aba baba hanze yayo ntibazi Inkuru Nziza ya Yezu, ntibazi n’ubutumwa bwa Kiliziya icyo bwubakiyeho. Hari impamvu nyinshi zabibatera, ariko akenshi biba ari ukurengera itsinda barimo cyangwa idini barimo. “Batera baturutse hanze”.

Icyiciro cya kabiri ni abo Pawulo avugaho agira ati “ Ndetse no muri mwe hazaduka abantu bavuga amagambo y’ibinyoma, azatuma bigarurira abigishwa”. Iki cyiciro kigizwe n’abari muri Kiliziya bayizi, bazi umuzi n’umuhamuro by’ubutumwa bwayo.

Muri ibi byiciro byombi byababangamira Kiliziya y’Imana icya kabiri nicyo kibi kurusha icya mbere. Abasenya Kiliziya bayirimo kandi bayizi neza.

Gusa nta guhagarika umutima kuko Kiliziya ikomezwa na Nyagasani ayikomeresheje Ijambo rye. Ni byo koko Ijambo rye niryo riturinda ibinyoma, rikaduha kugendera mu kuri.

Abakristu turasabwa kugira amakenga, tukigengesera. Ijambo ry’Imana ni ryo rizadufasha kuvumbura imitego y’abanyabinyoma. Ntagukurikira buhumyi kandi twarahawe Roho uduha kumenya igiturutse ku Mana. Ubukristu bwacu ntibukabe kugenda mu nzira y’igihogere gusa.

Kugira ngo babe umwe nka twe”.

Nta handi twavana ubushobozi uretse kunga ubumwe na Kristu. Ubumwe bw’abemera Kristu babukomora ku bumwe bw’ubutatu butagatifu. Iyo Yezu asabira abamwera kuba ubumwe; kugira ubumwe azi icyo asaba.

Bavandimwe, ntawe uyobewe ingaruka n’ububi bw’amacakubiri mu bemera Kristu. Iyo habuze ubumwe amasengesho aba amagambo, cyangwa ibiganiro bisanzwe. Gusenga bikaba kwiganirira. Ibyo dukora bikaba ikinamico. Iyo nta bumwe ibyo twakora byose biba kurangiza umuhango, bikaba umurimbo wo kwerekana. Iyo nta bumwe imbuto tugomba kwera zirabura. Imana twemera itugira umwe cyane cyane ikaduhuriza muri Yezu Kristu. Umuryango w’Imana wifitemo amacakubiri ni igisebo. Wahera ku murya ngo tuvukamo, waba umuryango-remezo, santarari cyangwa paruwasi byifitemo amacakubiri ni igikomere kuri Kiliziya. Iyo kidakize kiba inenge.

Ndahamya ko niba hari abumva neza iri sengesho rya gisaseridoti rya Yezu, asabira abe, ni abakristu b’abanyarwanda. Mu mateka yacu muri iyi myaka twumva neza cyangwa tubona ingaruka z’amacakubiri mu bemera Kristu. Iyo numva aya magambo ya Yezu nibwirako aritwe abwira by’umwihariko. Akabwira buri wese ati “ ubumwe buri he? ”. Ntabwo ubwo bumwe bureba abayobora abandi gusa ni inshingano ya buri wese kubusigasira. Ntacyo byaba bimaze gushyigikira umwiryane ngo hanyuma dutunge intoki hejuru dushinje abayobora abandi ko aribo bagomba gusegasira ubwo bumwe. Buri wese yihereho.

Hanyuma nibwo tuzabasha gutwara ubutumwa Yezu aduha. Ni byo koko ubutumwa aduha ntitwabushobora nta bumwe. Ntitwabushobora kuko adutuma ku isi; ntacyo twayibwira ahubwo yaduha urwamenyo. Twayigeramo tugatangira kubyina umudiho umwe n’ab’isi. N’uko ibisa bigasabirana.

Nyagasani Yezu we watwitangiye ngo tugire ubumwe akomeze atwiyoborere kugira ngo Kiliziya ye yigiremo ubumwe bwuzuye bwubakiye ku kuri ku ijambo rye.

Padiri Charles HAKORIMANA

Publié le
Catégorisé comme Inyigisho