Inyigisho: Muri umunyu w’isi, muri urumuri rw’isi (Mt 5,13-16)

Inyigisho yo ku wa kabiri w’icyumweru cya 10 gisanzwe, A, Imbangikane.

Ku ya 10 Kamena 2014

 

Bavandimwe,

Nyuma yo guhimbaza ibirori bya Pasika mu minsi 50, ejo twatangiye igihe gisanzwe cy’umwaka wa Kiliziya. Penetkosti yatuvuguruyemo ingabire za Roho Mutagatifu twahawe muri batisimu no mu gukomezwa. Ni igihe rero cyo gukora ubutumwa bityo Inkuru nziza ya Yezu Kristu ikagera kuri benshi bakiri mu mwijima w’icyaha, ubujiji n’urupfu.

Uyu munsi Yezu aradusaba kuba umunyu n’urumuri rw’abandi. Ni ubutumwa aha buri wese muri twe, ni ubutumwa bwa buri mukristu, s’ubw’abapadiri n’abihayimana bonyine.

  1. Ikigereranyo cy’umunyu n’urumuri
  1. Umunyu
  • Uryoshya ibiryo.

Ibiryo bitarimo umunyu biba bimeze nk’ibitaka, nta buryohe byigiramo. Hari abagira ingorane bakarwara indwara y’umuvuduko w’amaraso (hypertension). Icyo gihe muganga abategaka kuva ku munyu. Usanga kurya byabananiye kuko bumva ibiryo nta cyanga bifite.

Natwe turasabwa gutanga uburyohe, ntitube ba kibihira, cyangwa se ba nyiramunukanabi. Aho tuba, aho dukora, aho tugenda, aho twiga tukumva ko Yezu adusaba kuhashyira uburyohe, amahoro, ibyishimo, abandi bakishimira kubana natwe, kwigana na twe, gukorana na twe.

  • Umunyu ubuza ibiryo kubora.

Kera babikaga amafi mu munyu ntabore. Agashobora kuribwa hashize igihe. Umunyu ubuza kubora. Ahari umunyu hahora ubuzima. Aho umukristu ari hagomba kuba ubuzima, umwuka mwiza, ubusabane n’ubwumvikane.

  • Umunyu ntugombera ubwinshi.

Umunyu w’igisoryo ubishya ibiryo, ndetse ukaba watera indwara. Nta kwigaya ubuke. Ngo umuntu umwe yakora iki? Yatanga uburyohe mu rwego rwe kandi burakenewe. Nutegereza ko bose bahinduka ngo ubone guhinduka, ntacyo uzageraho.

Yezu yatangiye ari umwe, nyuma atora ba cumi na babiri, akurikizaho 72. Kubera inyigisho zabo n’ubuhamya bwabo, Inkuru nziza yageze ku isi yose, ndetse natwe itugeraho.

Hari abavuga ngo ni uko Yezu ari Imana. Hari n’abantu batangije amavugurura muri Kiliziya. Twavuga nk’abatagatifu Fransisko wa Asizi, Inyasi wa Loyola, Dominiko, Benedigito, Tereza w’Avila wavuguruye umuryango w’Abakarume n’Abakarumelita n’abandi.

Hari ubwo dushaka urwitwazo rwo kudakora igikorwa cyiza nko gufasha umukene, kwita ku murwayi, kurihira umunyeshuri… Tukavuga ngo ntacyo bimaze, Yezu we ntiyavuze ko abakene tuzabahorana! Umuhire Mama Tereza w’i Kalikuta, hari abanu bashakaga kumuca intege, bakagereranya ibikorwa yakoraga byo kwita ku batishoboye, ku benda gupfa, nk’igitonyanga cy’amazi mu nyanja. Akabasubiza, ati “Icyo gitonyanga kibuze, hari icyaba kibuze mu nyanja. Ikindi kandi, ibitonyanga byinshi byishyize hamwe ni byo bibyara inyanja”. Roho Mutagatifu aduhe imbaraga zo kudacika intege no kwima amatwi abaduca intege igihe twiyemeje gukora icyiza.

  • Umunyu mu biryo ntugaragara.

Umuntu yibuka umunyu iyo yumvise ari muke mu biryo. Kugira ngo umenye ko ibiryo birimo umunyu, ntiwabibonesha amaso; bisaba kuryaho. Kuba umukristu si ukwigaragaza (mwambonye), si ugushaka amakuzo, amajwi n’amashyi. Ni ugutanga uburyohe, ni ugutanga ibyishimo, ni ugutanga ubuzima. Akenshi bisaba kwigomwa, kwiyibagirwa.

Ureste ikigereranyo cy’umunyu, Yezu akoresha ikigereranyo cy’urumuri ngo yumvikanishe neza ubutumwa bw’abigishwa bemuri iyi si.

  1. Muri urumuri rw’isi
  • Gutanga urumuri

Isitimu cyangwa itara bimurikira abantu ntibagwe mu cyobo. Yezu adusaba kumurikira abandi dukoresheje ibikorwa byacu byiza, amagambo yacu meza, uburyo bwacu bwo kubaho. Hari benshi batureberaho, batwigana. Yezu yihanagiriza abayobya abandi, ababagusha mu cyaha (Mt 18,6).

Buji itanga urumuri ariko ikagabanyuka, igashira. Kuba umukristu ni ugutanga no kwitanga. Nk’uko Yohni Batista yavivuze, Yezu agomba gukura njye ngacishwa bugufi (Yh 3,30).

  • Igifite agaciro ni urumuri, si urutanga.

Kuba umukristu si ukwishyira imbere. Si twe bashaka ni urumuri dutanga.

  1. Twaba umunyu n’urumuri dute mu Rwanda rw’iki gihe ?
  1. U Rwanda rw’iki gihe ruteye rute ?

Muri iki gihe, Abanyarwanda benshi bameze nka wa muntu wavaga i Yeruzalemu ajya i Yeriko. Nuko agwa mu gico cy’abajura, baramuhondagura, bamusiga ari intere. (Lk10,29-37)

Abanyarwanda benshi barababaye, barahondaguwe, barakomeretse ku mutima no ku mubiri, batawe ku nzira; ni intere. Bategereje umugiraneza wabegera nk’uriya munyasamariya w’umunyampuhwe. Si ngombwa kubaha ingero namwe muri bakuru. Twakora iki? Hari ubuhamya bubiri mbona bukenewe mu Rwanda rw’iki gihe: Ubumwe n’urukundo. Abantu badutegerejeho kubabera urumuri turangwa n’ubumwe n’urukundo.

  1. Tube umunyu n’urumuri turangwa n’urukundo

Urukundo rurakenewe cyane muri iki gihe. Benshi bafite ibikomere byo kudakundwa. Urukundo rukenewe ni rwa rundi rwitanga kugera ku musaraba (Jn 13,34-35). Urukundo niyo ndangamukristu. Pawulo atubwira ibiruranga (1Kor 13).

  1. Tube umunyu n’urumuri duharanira ubumwe

Yezu yasabiye abigishwa be ubumwe (Yh 17,20-23). Ikiranga umukristu ni uguharanira ubumwe. Amacakubiri akomoka kuri Sekibi.

  1. Kuba umunyu n’urumuri bisaba iki ?
  1. Kwakira ubwo butumwa.

Kuba umunyu n’urumuri ntibisaba kwiga amashuri menshi. Ntibisaba imyiteguro ihambaye. Ntibisaba uburambe ku kazi bw’imyaka iyi n’iyi. Ntibisaba umwambaro wihariye. Si ngombwa kubisabira uruhushya. Ni umushinga udakenera kuguza banki amafaranga aya n’aya. Kuba twarabatijwe birahagije. Uwashaka kutubuza kuba umunyu n’urumuri ntibyamworohera. Kuba umunyu n’urumuri bisaba mbere na mbere kubyiyemeza nka ya ndirimbo abakristu bakunda : Mana yanjye, niyemeje gukora ibigushimisha, maze amategeko yawe azampore iruhande. Icyo cyemezo kirakenewe. Ntawadusimbura, ntawaba umunyu n’urumuri mu mwanya wacu, aho Nyagasani adutuma.

  1. Kuba umunyu n’urumuri bisaba kumurikirwa na Kristu,we Rumuri nyakuri rumurikira umuntu wese uje kuri iyi si.

Kugira ngo dukoreshe amashanyarazi, hari urusinga ruhuza itara n’uruganda ruyakora. Urwo rusinga urutemye nta rumuri twabona. Kunga ubumwe na Kristu nibyo biduha gutanga urumuri aduha, tugatanga ubushyuhe aduha, tugatanga uburyohe aduha, tugatanga ibyishimo aduha. Iyo wegereye umuriro uragushyushya, nawe uwo ukozeho akumva ubwo bushyuhe.

Niyo mpamvu umukristu wiyemeje kuba umunyu n’urumuri rw’abandi agomba guhora yunze ubumwe na Kristu mu isengesho, mu kuzirikana Ijambo ry’Imana, mu gushengerera isakramentu ritagatifu ry’ukaristiya, mu guhabwa penetensiya n’ukaristiya kenshi. Umugambi ni ukugera aho tuvuga nka Pawulo tuti “Si jye uriho ni Kristu uri muri jye” (Gal 2,20).

Umwanzuro

Bavandimwe, ibihe turimo birakomeye. Pawulo atugira inama ati “Ntumukigane ibi bihe turimo ahubwo mushishoze murebe ikinogeye Imana” Rm 12,2. Kuba umunyu n’urumuri birakenewe cyane kandi bigatangirira iwacu mu rugo, mu bo tubana. “Ijya kurisha ihera ku rugo”. Abandi babona uko tubanye neza, dukundana, twunze ubumwe, bagasingiza Imana. Ese birashoboka ? Yego rwose. Abakristu ba mbere bari barabigezeho. (Intu 2,42-47). Abapagani barababonaga bagatangara, bakiyemeza nabo kuba abakristu.

Dusabe Roho Mutagatifu avugure muri bakristu b’iki gihe ibitangaza yakoze Kiliziya igitangira.

Padiri Alexandre UWIZEYE

Publié le
Catégorisé comme Inyigisho