Catégories
Inyigisho

Inyigisho: Ishavu ryanyu rizabaviramo ibyishimo

Inyigisho yo ku wa gatanu w’icyumweru cya gatandatu cya pasika, A

Ku ya 30 Gicurasi 2014

 

Mbere y’uko Yezu ava kuri iyi si agasanga Se…

Bavandimwe,

Aya magambo niyo nteruro y’ivanjli mu gihe cya Pasika. Tuzirikana amagambo ya nyuma ya Yezu kuri iyi si. Ni amagambo akomeye ; mbese ni umurage yasigiye abakristu. Murabizi iyo umubyeyi yiyumvamo ko agiye kurangiza urugendo rwe hano ku isi, ahamagara abe akababwira iri muri kumutima, akabasigira umurange. Bakazajya bahora bibukiranya amagambo umubyeyi yasize ababwiye. « Ntiwibuke ibyo umubyeyi wacu yasize atubwiye … ». Ijambo ry’umubyeyi rirabakomeza, rikabubaka, rikabatera ubutwari mu buzima no mu bibazo bitabura muri iyi si.

Na Yezu niko yabigenje. Yari azi ko isaha yegereje ngo ngo arangize urugendo rwe hano ku isi. Ni uko atumira abigishwa be mu isangira rya nyuma. Yohani atubwira ko igihe bafunguraga, ariho Yezu yabasigiye umurage na n’ubu abakristu tukigenderaho, kandi tuzakomeza kuwugenderaho kugeza igihe Nyagasani azagaruikira.

Muti « Ese uwo murage ni uwuhe ? » Ubonye akanya wasoma mu ivanjili ya Yohani, umutwe wa 13 kugeza ku wa 17. Ariko ukomeje ugasoma n’igice gikurikiyeho kitubwira urupfu n’izuka bya Yezu nabyo byagufasha gukura m’ukwemera, ukwizera n’urukundo. Kuko niho Yezu yujuje bidasubirwaho ibyo yari amaze kubwira abigishwa be.

Muri make, umurage Yezu yadusigiye twawukubira mu ngingo eshatu z’ingenzi :

  • Kwiyoroshya no kwitangira abandi

Ibi Yezu yabigaragaje yoza ibirenge by’intumwa ze. « Ubwo mbogeje ibirenge, kandi ndi Nyagasani n’umwigisha, namwe murage mwozanya ibirenge. Ni urugero mbahaye ». Koza ibirenge by’abigishwa be birimo inyigisho eshatu z’ingenzi : kwiyoroshya, kwitangira abandi no gusukurwa na Yezu. Kuba umukristu si ukwishyira imbere, si ugushaka kugaragara. Kuba umukristu ni ukwitanga, ni ukwitangira abandi mu bwiyoroshye.

  • Itegeko ry’urukundo

Yezu yakomeje aha abigishwa be itegeko ry’urukundo. “Nimukundane nk’uko nabakunze” . Ikizagaragaza ko muri abigishwa banjye, si umudari cyangwa umusaraba muzambara, si Bibiliya mizitwaza , si umwambaro uyu ni uyu, si imvugo iyi n’iyi. Ikizagaragaza ko muri abanjye ni urukundo nk’uko nabakunze. Uru rukundo Pawulo aruvuga neza mu ibaruwa ya mbere yadikiye Abanyakorinti umutwe wa 13. Atubwira ko urukundo rwihangana, rwitangira abandi, rutagira ishyari, rutagira inzika, rutishimira akarengane ahubwo ruhimbazwa n’ukuri.

  • Ukaristiya

Yezu afata umugati, arashimira, arawumanyura, awuhereza abigishwa be ati “Nimwakire musangire. Iki ni umubiri wanjye”. Abigenza atyo no ku nkongoro ya divayi ati “Nimwakire musangire, iyi ni inkongoro y’amaraso ya jye, y’isezerano roshya kandi rizahoraho iteka.” Yezu yongeraho ati “Mujye mubikora munyibuka”.

Uwo murage twarawakiriye igihe duteye intambwe ya mbere tukabatizwa. Tuwukomereho niwo soko y’amahoro, ibyishimo n’umunezero kuri iyi si no mu buzima buzaza.

Yezu yakomeje ababwira ibigiya kuba. Uburyo umwe mu ntumwa ze z’inkoramutima azamutanga, uburyo Petero azamwihakana, uburyo azagirirwa nabi, agatukwa, agatotezwa, agakubitwa akazabambwa ku musaraba. Icyo gihe intumwa zari zijimye mu maso arasihumuriza azibwira ko umubabro uzakurikirwa n’ibyishimo.

Muzagira ishavu ariko ishavu ryanyu rizabaviramo ibyishimo (Yh 16,20-23a)

Abigishwa ba Yezu ntibarasobanukirwa neza ibigiye kuba. Ukugenda kwa Yezu kuri bo ni ikibazo gikomeye kuko basize byose bakamukurikira. Igisobanuro ntibagishyikira.

Ukugenda kwa Yezu kuzasiga inshuti ze mu kababaro gakomeye. Nyamara abishe Yezu bo bazasigara bishimye, ko batsinze. Icyakora ibyishimo by’abanzi ba Yezu ntibizamara igihe. Urupfu rwa Yezu ruzakurikirwa n’izuka abigishwa basagwe n’ibyishimo.

Yezu aragereranya uko inshuti ze zimeze mbere y’urupfu rwe ruzakurikirwa n’izuka n’umugore ugiye kubyara. Ubwoba n’ububabare bisimburwa bikomoka ku mwana wavutse ameze neza.

Mu bibazo n’ingorane z’ubuzima, ibyishimo byacu bishingiye ku mutsindo wa Kristu. Kuba Yezu awazutse ari muri twe, ari muzima, bitubere isoko y’ibyishimo bidakama. Kuba indahemuka kuri Nyagasani bitubere isoko y’ubuzima busendereye n’amahoro atagira ikiyahungabanya. Ibyishimo n’amahoro Yezu atanga ntawabitwambura kuko Yezu asumba byose na bose.

Nyagasani,

Ndi muntu w’umunyantege nke, hari byinshi bimpungabanya, hari byinshi binca intege. Uri muzima. Watsinze urupfu n’ikibi cyose. Ndagusaba amahoro n’ibyishimo bishinze imizi mu kwemera,ukwizera n’urukundo. Hirya y’ibibazo n’ibigereranyo bitabura kuri iyi si, mpa kubona ubuzima busendereye bugukomokaho. Amen

Padiri Alexandre UWIZEYE