Catégories
Inyigisho

Inyigisho: Roho twahawe kandi dukomeza guhabwa atume tuvuga hose ibyiza bya Nyagasani dushize amanga

Inyigisho yo ku wa mbere w’Icyumweru cya 7 cya Pasika, Umwaka A

Ku ya 02 Kamena 2014

AMASOMO: Int19, 1-8; Zab67,2-3,4-5,6-7ab.36b; Yh16,29-33

Bavandimwe, tugeze ku wa mbere w’icyumweru cya 7 cya Pasika. Ejo twahimbaje umunsi mukuru wa Asensiyo utwibutsa uko Umwami wacu Yezu Kristu yiyeretse abe bwa nyuma, azamuka ajya mu ijuru aho yagiye kwima ingoma ubuziraherezo. Twibuke ko mbere yo gusubira mu ijuru yari yarasezeranyije abe Roho Mutagatifu. Ku munsi mukuru wa Pentekosti twitegura ku cyumweru gitaha, ni ho tuzahimbaza ko Yezu, inzira ukuri n’ubugingo, yatwohoherereje uwo Roho, amanukiye ku Ntumwa ze 12 mu ndimi z’umuriro, zigatangira kuvuga mu ndimi. Mu by’ukuri rero, iki cyumweru cyose ni icyo gusaba ngo Roho Mutagatifu aze adusendere twese, natwe tuvuge ibisingizo bya Nyagasani kandi ndetse ngo ubuzima bwacu buhinduke igisingizo cya Nyagasani. Roho Mutagatifu akwiye kudusendera, uko umutima utera, uko duhumeka bikaba nk’indirimbo y’ igisingizo cya Nyagasani.

Mu isomo rya mbere turongera kubona Pawulo Mutagatifu nk’umuntu wuzuye Roho Mutagatifu, wahaze amagara ye kubera Inkuru Nziza y’uwamwigombye Yezu Kristu. Dore ishyaka amufitiye aho rimugejeje. Aturutse mu bihugu by’amajyaruguru ageze i Efezi. Yasanze Efezi hari abari baremeye ariko bazi gusa batisimu ya Yohani batarakira Roho Mutagatifu ndetse batanamuzi. Ku wamenye Yezu rero ntacyo batisimu ya Yohani yajyaga kuba ikimumariye kuko yateguriza Yezu mu kwisubiraho. Ni yo mpamvu Pawulo yahise ababatiza mu rupfu n’izuka bya Nyagasani Yezu kugira ngo bunge ubumwe na We, ubumwe bushyitse kandi basangire ibyishimo by’izuka. Ubwo Paulo yahise anabaramburiraho ibiganza maze basendera Roho mutagatifu batangira kuvuga mu ndimi kandi bahanura mbese nk’ibyabaye ku Ntumwa kuri Pentekosti. Ibyo bisobanura ko imitima yabo yasazwe n’ibinezaneza by’Imana bikabarenga maze bagataraka, bagaterura bakaririmba ibisingizo by’Uhoraho, bagaterura bakavuga ibigwi bya Nyagasani. Iriya ni imvugo Roho Mutagatifu agabira abakunda Imana, bakareka ubuzima bwabo bukorohera, bukerekeza aho Imana ishaka, ku bubasha nyine bwa Roho Mutagatifu. Si ukuba utari uzi wenda nk’Igifaransa cyangwa Icyongereza ngo noneho wumve wabimenye,cyangwa se ngo n’Abafaransa, Abongereza se, nibagutega amatwi bumve icyo uri kuvuga. Ni imvugo y’ibyishimo bya Roho.

Abantu bafite ibiziriko byinshi by’isi bibahambiriye cyangwa se bihambiriye ku by’isi cyane birabakomereye kugira amahirwe yo kuyigira kimwe n’uko bibataboroheye kumva iyo mvugo. Cyakora ibi binasaba ubwitonzi n’ubushishozi buhagije, kuko amateka yagaragaje kenshi ko hariho ababyihangishaho, abandi bakabyiyitirira kugira ngo bemerwe, maze bigarurire benshi mu bigishwa ba Nyagasani. Abo Kiliziya ntiyahwemye kubabwira ngo basigeho kuyobya ubushyo bw’Imana yironkeye ku bw’igitambo cy’Umwana wayo Yezu Kristu. Kandi rero nta ngabire itagambiriye kubaka Umuryango w’Imana, kimwe n’uko nta ngabire itakiranywe ubwiyoroshye no kwicisha bugufi. Ingabire ya Roho Mutagatifu iyo yakiriwe neza, itera ibyishimo uyihawe kandi ikanagirira akamaro Kiliziya yose ntagatifu. Ni byo koko Kiliziya ikomeza kujya mbere mu kwemera no mu rukundo ibikesha ingabire za Roho Mutagatifu we uyiyoboreye. Izo ngabire harimo abazirengagiza ntibaziteho, abandi bakazipfukirana. Ibyo byombi si byiza. Ariko tujye tumenya ko ingabire isumba byose twahawe ari Yezu Kristu maze tumwakirane ibyishimo n’ishema ryinshi, dutarake tumusingiza, tumwamamaze hose dushize amanga nka Pawulo Intumwa. Erega ni na We twabikesha nkuko Zaburi yagiraga iti: “Imana ya Israheli ni yo iha abantu bayo imbaraga n’ubushobozi. Intungane nizihore mu byishimo, zitete imbere y’Imana, zihamirize ubudahwema zinezerewe.”

Yezu, ni We mu Ivanjiri twumvise abwira abigishwa be, ati: “…Isi narayitsinze, nimuhore munkesha amahoro…” Arababurira ko isi izabanga ikabatatanya kubera We. Bazagirirwa amabi menshi bahorwa izina rye, ariko ihumure abasezeranya ni ryo riruta byose na bose. Ni byo koko ngo abashaka bose kubaho muri Kristu barangwa n’ubuyoboke ntibazabura gutotezwa. Mu kugira ati: “ Nimuhumure isi narayitsinze”, ni ukuvuga ko Sekibi n’abambari be batadufiteho ijambo rya nyuma. Kristu yatsinze urupfu, atsinda ibyaha, atsinda ibyago, abamwemera na bo n’aho bababazwa by’akanya gato gute, nta kabuza bazatsinda. Ngicyo igituma bagomba guhorana amahoro kuko uwo bayakesha ari Umutsinzi, Umwana w’Imana. Twibuke ko na Bikira Mariya i Kibeho yigaragaje nk’umunyamibabaro akanatubwira ko “…ntawe uzagera mu ijuru atababaye…” Twumve neza ariko ko imibabaro atari wo murage w’abemera. Yezu yaturaze ibyishimo bye. Iriya mibabaro ikomoka ku makuba agirirwa abemera nyamara akaba nta bubasha yifitemo bwo kubavutsa ibyishimo by’umutsindo wa Kristu.

Abakiriye Roho Mutagatifu igikwiye si ukwinubira iyo mibabaro kuko ishobora kuba ari yo nzira Imana yashatse kubanyuzamo kugira ngo bayigereho. Ndetse ahubwo n’iyo mibabaro ni ngombwa ko abantu bajya bashishoza bakamenya ikiyitera kugira ngo bamenye niba bayobowe na Roho w’Imana. Petero Mutagatifu mu ibaruwa ye ya mbere ni we ugira ati: “Koko rero, icyaruta ni ukubabazwa mukora neza, niba ariko Imana ibishaka, aho kubabazwa mukora nabi.” (1 Petero 3, 17).

Uyu munsi dusabe kandi dusabirane kugira ngo Roho Mutagatifu adutere imbaraga zo kwizirika kuri Yezu Kristu, ntitugahungabanywe n’ibigeragezo by’isi kandi yarayitsinze. Ahubwo uwo Roho twahawe kandi dukomeza guhabwa atume tuvuga hose ibyiza bya Nyagasani dushize amanga.

Bikira Mariya adusabire.

Padiri Léandre NSHIMYIYAREMYE