Catégories
Inyigisho

Inyigisho : Yego cyangwa Oya

Inyigisho yo ku wa gatandatu w’icyumweru cya 10, A

Ku ya 14 Kamena 2014

AMASOMO: 1º. 1 Bami 19,19-21; 2º Mt 5, 33-37

Ivanjili ya none iradusaba kuba abantu bavugisha ukuri kandi badafite ubutiriganya mu mutima. Umukristu w’ukuri yirinda umutima uhotaguye. Ahora yihatira kugira umutima wuzuye imigenzo myiza akurikije Umutima Mutagatifu wa YEZU n’Umutima Utagira inenge wa Bikira Mariya.

Iyo ni intambwe y’abantu bemeye kugendera mu nzira y’ijuru. Kuba ku isi no mu b’isi, hari igihe bituma tutumva neza iby’inzira y’ijuru n’umutima ugomba kuturanga mu migirire ya buri munsi. Kimwe mu biranga inshuti ya YEZU KIRISITU, ni ukubaho mu kuri no kwiyumvisha ko nta kintu na kimwe dushobora kwishingikiriza ngo kituvuganire cyangwa kidukingire tugeze mu mahina. Ni na cyo YEZU KIRISITU ashaka kuvuga atubuza kurahiza ijuru n’isi n’ibindi bindi bituri hafi. Nta kintu na kimwe dushobora gutangaho umugabo niba umutima wacu wuzuye ubutiriganya n’ibinyoma. Ni ngombwa kubanza kuwuvanamo ibyo bigoronzoye kugira ngo uturwemo na YEZU KIRISITU aduhe Roho Mutagatifu abe ari we utuburanira igihe tuyobewe.

Hari igihe umuntu abeshya maze agacurikiranya indahiro zitagize aho zihuriye n’ukuri. Bishobora guterwa n’indwara y’ubuhumyi bushobora kubundikira umutima wacu cyangwa bigaterwa n’ubwoba bw’abadushukamirije…Uko biri kose, ni ngombwa guhora dusaba ingabire y’ubutwari no gutuza igihe bibaye ngombwa aho gucurikiranya indahiro tubeshya. Iyo indahiro zacu tuzerekeje ku Mana ubwayo, ku Izina rya YEZU KIRISITU, kuri Bikira Mariya, ibyo bitubyarira Sakirirego ituma duhindanya izina ry’Imana itureba mu kuri kose ikaturengera tureganiwe.

Twisuzume maze dusabe imbaraga zo kutajijinganya hagati y’ukuri n’ikinyoma: Yego yacu ibe yego na oya yacu ibe oya: kwitiranya ukuri n’ibinyoma ntibikaturangwemo; guca imanza z’amahugu kandi zigoramye no gutanga ubuhamya tubeshya bicike muri twe. Iyi ngabire izatuma tuba abo tugomba kubabo, dukomere mu nzira twahisemo yo kuba aba-kirisitu: abalayiki, abasaseridoti ba gihereza n’abandi bihayimana, dukurikire iyo nzira tutarangajwe n’iby’isi, mbese nk’uko Elisha yumviye Eliya akareka ibyo yari arimo akamukurikira ngo amutoze ubutumwa bw’Imana.

YEZU KIRISITU ASINGIZWE. Umubyeyi Bikira Mariya twiyambaza by’umwihariko buri wa gatandatu, aduhakirwe, Abatagatifu badusabire.

Padiri Cyprien BIZIMANA