Catégories
Inyigisho

Isi ntizigera igira amahoro igihe izarota kwiyubaka iheza Imana n’umugambi wayo

Inyigisho yo ku wa gatanu, icyumweru cya 1 gisanzwe, A, 2014

Ku ya 17 Mutarama 2014 – Yateguwe na Padiri Théophile NIYONSENGA

(Reba hano indi nyigisho ya Padiri Balthazar Ntivuguruzwa, ijyanye n’amasomo ya none)

Bavandimwe tuzirikane ku masomo yo kuri uyu wa gatanu ku wa 17.01.2014: 1Samweli8, 4-7.10-22ª; Zaburi88 na Mariko 2,1-12.

Bageze mu gihugu cy’Isezerano (Kanahani) Abayisraheli , bavuye mu bucakara bwa Farawo mu Misiri, bayobowe n’Abacamanza. Aba bari mu mwanya w’Imana. Mu by’ukuri, ni Imana yiyoboreraga ibanyuzeho. Bitwaga “lieutenants” =tenir lieu de quelqu’un: uri mu mwanya w’undi, umuvugizi we, umutwarajambo we. Ntibagombaga kuvuga ibyabo, bagombaga kugeza ku baturage ibyo Imana ibifuzaho cyangwa yabageneye. Bagombaga kandi kujyana ibyifuzo by’abaturage bakabibwira Imana ikaba ari yo yisubiriza. Muri bo twavuga Samweli. Ni we twumvise mu isomo rya mbere. Kuri iyi ngoma y’Uhoraho ubwe, abayisraheli baratuye, baratunganirwa, batsinda umwanzi bigera aho badamarara. Bareze ijosi basinda amahoro y’Imana .Ni bwo bavuze bati: ubwo ingoma y’Imana tuyizi, ese uwayoborwa n’undi utari Imana; uwamera nk’andi mahanga atayoborwa n’Imana, byagenda bite?Bashatse gusogongera kuri twose. Ni bwo basabye Samweri ngo abimikire umwami. Ubwo mbese iby’abacamanza bashyizweho n’Imana barabihiritse. Samweli agira amakenga ati ndabivuga nte, ndabwira Imana nte ko badashaka ingoma yayo? Imana iba yabitahuye kare. Yaturemanye ubwenge n’ubwigenge, ariko hari ubwo twigira ibyigenge n’ ibyigomeke, ntidutinde kubona ingaruka mbi!

Yewe byageze n’aho Uhoraho ababwira amakuba azababaho nibatemera kuyoborwa nawe. Umwami bisabira ubwabo ni we uzabarimbura! Ngo akamasa kazaca inka kazivukamo. Inkubisi y’umwanda irawitarukiriza! Uwo baziyimikira azigarurira abahungu babo abagire abacakara, bazagwe ku gasi bamwiruka inyuma bamukorera ku gahato; abakobwa babo azabigarurira ku ngufu, imitungo yabo ayinyage, iyindi ayibahuguze (soma 1 Sam8,11-17). Bazakora uburetwa barinde barunduka, bapfe badakize, ahubwo bakijije umwami biyimikiye, urugo rwe n’abagaragu be (umurongo wa 15). Icyo gihe ngo bazashikamirwa bigere aho batabaza Uhoraho, maze abihorere (Umurongo wa 18). Amatwi arimo urupfu ntiyumva koko. Ni ko byagenze. Baranangiye bimika uwo bashaka: sawuli. Ibyo yaje kubakorera, byabara bo!

Bavandimwe iri somo riratubwira ko:

-tudakwiye guhaga ibyiza by’Imana. Iyo wumva washyikiriye Imana niko wanagombye kurushaho kuyisonzera. Ntitugahage Imana. Aho urupfu ruzingiye: guheza Imana mu byacu.

-imigabo, imigambi, imihigo itarimo Imana, ubusabaniramana n’urukundo rwayo n’urw’abayo niyo ikururira muntu ibizazane n’urupfu rukaba rwaziramo

-iyi si ni iy’Imana. Yarayiduhaye ngo tuyicunge neza tuyigire nziza nk’uko Imana yayiremye. Nituyitegeza Sekibi-Shitani n’abambari bayo ni twe tuzigorerwa ntitukarenganye Imana. Ntiyigeze irema ikibi. Yaremye byose, ibyitegereje isanga ari byiza. Ugukoresha nabi ubwigenge bwacu (liberté) ni byo bidukururira amakuba n’urupfu rwa burundu.

Abantu twagombye guhinduka tukemera Yezu Kristu, tukamukurikira, tukamukurikiza, tukamwamamaza. Uroye imbaraga ab’isi bakoresha ngo bimike ikibi, cyangwa uburyarya n’ubufindo bamwe bakoresha ngo babone amaramuko, babihinduraga bakabikoresha mu kwimika ukuri n’urundo rw’Imana, iyi si yagira amahoro. Twabyumvise mu Ivanjili ko abari babajwe n’uwabo waremaye, bakoresheje uburyo bwose bushoboka, harimo guheka, kunyuza mu gisenge ngo bamugeze kwa Yezu umukiza. Natwe dusabe Roho w’Imana atumurikire maze tubone uburyo bwinshi bwiza bwo kurandura ikibi muri twe no kwimika urumuri rwa Kristu. Dusabe kandi haboneke benshi bemera kujya mu mujishi baheke abandi- gusabira no kwitangira abandi- kugira ngo bagire uruhare ku mukiro w’iyi si.Nyagasani ineza yawe iduhoreho nk’uko amizero yacu agushingiyeho. Umubyeyi Bikira Mariya aduheke, aduhakirwe.

Padiri Théophile NIYONSENGA