Jambo w’Imana naduhinduremo ituro rinyura Data

Ku Cyumweru tariki ya 02/02/2020

Umunsi Mukuru wa Yezu aturwa Imana mu Ngoro

Amasomo : Ml 3, 1-4 ; Za 24 (23) ; He 2, 14-18 ; Lc 2, 22-40

Yezu amaze iminsi 40 avutse, ababyeyi be bagiye kumutura Imana mu Ngoro yayo, nk’uko itegeko rya Musa ryabitegekaga ku mwana wese w’imfura. Ngo « umuhungu wese w’imfura azaba intore y’umwihariko wa Nyagasani ». Nyuma y’iminsi 40 umwana avutse habaga kandi n’imihango itegetswe y’isukurwa ry’umubyeyi. Ni imihango ifite imvano mu mateka ya kera cyane y’ibohorwa mu bucakara rya Israheli mu Misiri. Kugira ngo Farawo arekure abayisraheli habaye icyago gikomeye ku banyamisiri : icyavutse cyose ari uburiza, baba abantu cyangwa amatungo cyarapfuye, ni byo byatumye Farawo ava kw’izima, arabarekura baragenda. Israheli imaze kubohorwa mu bucakara, mu mategeko Musa yashyizeho, hari uko umuhungu wese w’imfura agomba guturwa Uhoraho Nyirubuzima warokoye Israheli ubucakara mu Misiri, ababyeyi ndetse bagatura igitambo gishimira Imana. Yozefu na Mariya nabo bubahirije iryo tegeko, bazana umwana Yezu kumutura Imana Se, banatura igitambo kijyanye n’ubushobozi bwabo cy’intungura cyangwa inuma ebyiri.

Abashaka agakiza babonye Umukiza

Ivanjili y’uyu munsi itubwira ko mu ngoro hari abantu babiri bageze mu za bukuru ababyeyi basanzemo : umusaza w’intungane witwa Simewoni n’umuhanuzikazi Ana nawe wari ugejeje ku myaka mirongo inani n’ine. Amagambo yabo ni amagambo y’ibyishimo. Ni amagambo agaragaza ko Israeli yari itegereje agakiza kakaba kazanywe n’urwo ruhinja bafite mu biganza byabo. Umukambwe Simeoni yari yarahishuriwe ko atazapfa atabonye Kristu wa Nyagasani. Amaze kumubona aravuga ati noneho nshatse nakwipfira ! Ana na Simewoni bari abantu b’intungane bategereje agakiza ka Israeli. Roho mutagatifu niwe wabamurikiye bashobora kukabona mu mwana w’uruhinja. Ibindi uwo mwana azakora, twe ab’iki gihe tuzi mu ivanjili, bariya bakambwe bashobora kuba batarabibonye, ariko ntibyabababujije gushimira Imana. Inyigisho tubona ikomeye twakura muri ibi byishimo byabo ni uko ari iby’agaciro gakomeye kuba Imana yarigize umuntu. Mbere yo kumva ibyo avuga no kureba ibyo akora, gushengerera Jambo wigize umuntu mu ruhunja rwabyawe na Bikira Mariya bitume dutangarira urukundo n’ubuntu bihebuje by’Imana. Natwe uwo mwana waduhawe kuri Noheli tumubonemo igisubizo cy’ibibazo isi irimo muri iki gihe. Kenshi turibaza tuti bizagenda bite. Ibibazo isi ifite ubu bitandukanye n’iby’icyo gihe, ariko twe abemera tumenye neza ko ibisubizo biri muri Kristu ku buryo bumwe kandi tubibere abahamya mu kudacibwa intege nabyo. Dusabe ukwemera kutwumvisha ko Kristu Rumuri ariwe gisubizo nyacyo cyigizayo ibitubuza gutekana no kwishima n’ubwo kenshi atagaragara nk’umunyabubasha ufite ijambo n’ibikangisho, mbese nk’uruhinja ruri mu biganza by’abantu.

Jambo ntatana n’inkota yahuranya umutima

Jambo ntatana n’inkota yahuranya umutima. N’Utasamanywicyaha uko kuri yarakubwiwe ! Amagambo ya Simewoni ni ay’ibyishimo ariko arimo n’ubuhanuzi butera kwibaza, cyane cyane iyo abwirwa by’umwihariko Umubyeyi Bikira Mariya. Jambo w’Imana yakiriye afite aho ahuriye n’Umumalayika w’isezerano twumvise mu isomo rya mbere. Ni nde uzihanganira umunsi azazaho ? Yaziye kubera benshi muri Israheli impamvu yo korama cyangwa gukira n’ikimenyetso bagiraho impaka. Bikira Mariya nawe uko kwihangana yaragusabwe kandi yaragushoboye. Inkota yamwahuranyije umutima. Nta kundi bigenda iyo wemeye ingabire y’Imana ikaguhuza na Jambo wayo Nyirukuri. Inkota y’ijambo ikwahuranya umutima maze ibiwurimo bikagaragara, igihu cy’ububi ubwo ari bwo bwose buturuka kuri kamere yashegeshwe na Nyakibi kiratazuka, ya ngirwabwenge ya muntu ireba Imana ikayibonamo intambamyi y’ibyishimo bye ikimukira Rumuri, Buzima, Byishimo by’Imana, bya bindi muntu yaremewe.

Inkota y’ijambo ishobora gutera ubwoba. Ariko kuyihunga no gufunga amatwi ni ukuba barihenda. Ni nko kwanga kujya kwa muganga ngo atabona uburwayi bwawe kandi buhari, rimwe na rimwe ubwiyumvamo. Ijambo ry’Imana, k’ushoboye kuryumva, rigera koko mu nkebe z’umutima, rigatamanzura ibigoramye, ibitagenda bigatera ishozi nyirubwite, akabyanga, akanukirwa nabyo. Maze akoroshya, akorohera Imana kandi akayigarukira. Ng’iyo inkota yagombye kwahuranya imitima yacu mu mushyikirano muhire na Jambo ushaka guhura natwe. Ng’uko kuyungururwa n’umuriro w’umucuzi cyangwa kwezwa n’isabune y’umumeshi. Abwirwa benshi akumva bene yo !

Dushimire Imana yaduhaye Bikira Mariya, wahagaze gitwari kugeza munsi y’umusaraba. Tuyishimire kandi dusabire abihayimana. Biramenyerewe ko kuri uyu munsi barangamira Yezu watuwe Imana bigatuma bagira umunsi Mukuru, bakongera kwitura Imana ho ituro bo ubwabo. Tubasabire iryo turo rihore riyinogeye. Dusabire n’urubyiruko rwacu kugira ngo muri rwo habonekemo intore ziyemeza kuba abahamya b’urukundo rw’Imana bemera gusiga byose kubera Yo.

Padiri Jean Colbert NZEYIMANA, Padiri Mukuru wa Paruwasi Muramba/Nyundo

at venenatis suscipit Donec eleifend et,