Catégories
Inyigisho

Kwakira imisaraba ijyanye n’ubutumwa

Inyigisho yo ku wa gatanu w’Icyumweru cya 14 gisanzwe A

Ku ya 11 Nyakanga 2014

Bavandimwe,

Dukomeje kuzirikana inama Nyagasani Yezu Kristu yagiriye ba Cumi na babiri igihe abatoye maze akabohereza mu butumwa

1. Yezu Kristu nta cyo akinga abo yohereza mu butumwa

Ejo, Yezu yabwiraga ba Cumi na babiri icyo bagomba kuvuga, gukora no gutanga; icyo batagomba kwitwaza n’uko bagomba kwitwara ari igihe abantu babakiriye ari n’igihe banze kumva amagambo yabo.

Uyu munsi, Nyagasani Yezu nta cyo abakinze kijyanye n’imisaraba bazahurira nayo mu nzira y’ubwo butumwa: bazatotezwa, bazajyanywa imbere y’inkiko, bazakubitwa, bazangwa na bose, bazahigwe bukware. Ndetse bazicishwa n’abo basangiye isano y’amaraso. Ibyo byose bizababaho kubera kuzira izina rya Yezu bazaba bamamaza. Ariko Yezu arabasaba kudakuka umutima no kuba intwari, kuko muri iyo misaraba yose, atazabatererana. Azabagoborera Roho Mutagatifu uzabakomeza, akanabaha ijambo bagomba kuvuga icyo gihe.

Bavandimwe,

Kwegukira Imana, gukorera Imana, kubera Nyagasani Yezu Kristu umuhamya, kwamamaza Inkuru nziza ye, ntibyoroshye muri iyi si yacu. Uwakiriye iyi nzira, agomba kwemera kugira icyo yigomwa; kwemera kwakira imisaraba ijyanye n’ubwo butumwa; kwemera kurwanywa n’isi n’abatware bayo; kwemera kurwanywa na shitani n’abambari bayo badashaka ko ingoma yayo isenyuka kubera iyamamazwa ry’Inkuru nziza y’Ingoma y’Imana.

Tuzi ko ibyo Yezu yahanuriye intumwa ze byabaye impamo. Ba Cumi na babiri bahuye n’imisaraba itabarika. Koko isi yarabarwanyije: baratotejwe, barafunzwe, baratatanyijwe, barakubiswe … kugeza n’aho bose bishwe bazize izina rya Yezu.

2. Uwa Kristu ntatana n’imisaraba

Igihe Bikira Mariya aje kudusura i Kibeho, yatwibukije ko umwana wa Mariya adatana n’imisaraba. Umwana wa Mariya ni murumuna wa Yezu Kristu. Ni inshuti n’umuhamya wa Kristu. Ni uwa Kristu; ni umukristu.

Imisaraba y’ubutumwa ntireba ba Cumi na babiri gusa cyangwa se ababasimbuye. Kuba umukristu byonyine no kubera Kristu umuhamya ntibyoroshye kuva mu ntangiriro kugera ku ndunduro y’ibihe. Na n’ubu ni uko bimeze. Isi y’iki gihe ntiyigeze na rimwe ikura mu ruge mu ntambara irimo yo kurwanya no gutoteza abakristu. Hirya no hino ku isi abakristu barajujubijwe, barasekwa, barannyegwa, barameneshwa; baracuzwa utwabo, barirukanwa mu masambu yabo n’ibihugu byabo; barajyanwa mu nkiko, barafungwa, baricwa urubozo.

3. Muvandimwe utotezwa ubu uzira izina rya Yezu, komera!

Komera. N’ubwo uri mu kaga no mu ngorane nyinshi kubera Uwo wemeye n’Uwo ubereye umuhamya, komera. Komera muri uko kwemera no mu buhamya bwawe. Nyagasani Yezu ntiyagutereranye. Yasezeranyije intumwa ze gutabarwa no gukomezwa na Roho wa Data. Roho Mutagatifu ari kumwe nawe. Komera rero; wicika intege. Komeza kuba intwari kuko uzakomera kugera ku ndunduro, Nyagasani Yezu yamusezeranyije kuzasangira na we umutsindo. Uhore uzirikana iri ijambo Yezu Kristu azatubwira ejo mu Ivanjili ye: “Umwigishwa ntasumba umwigisha we, n’umugaragu ntasumba shebuja … Niba nyir’urugo baramwise Belizebuli, bazavuga iki ku bo mu rugo rwe?” (Mt 10, 24-25).

Komera, turi kumwe. Abakristu twese tugutwaye mu ngobyi y’isengesho. Natwe kandi turisabira kugira ngo duhora twiteguye guha igisubizo umuntu wese uzagira icyo atubaza ku byerekeye ukwizera kwacu (1Pet 3, 15). Kabone n’iyo byadukururira imisaraba y’amoko yose.

Bikira Mariya, Umwamikazi w’Intumwa, atube hafi mu rugendo rwacu rw’ubuhamya n’ubutumwa. Mutagatifu Benedigito duhimbaza uyu munsi adusabire.

Yateguwe na Padiri Balthazar NTIVUGURUZWA