Catégories
Inyigisho

Muranshakira ko mwariye imigati mugahaga

Inyigisho yo ku wa mbere w’icyumweru cya 3 cya Pasika, Ku wa 20  Mata 2015

Bavandimwe igihe cya pasika gikomeze kibabere cyiza ! Mu ivanjiri y’uyu munsi Yezu aratangira inyigisho ndende asobanura ko we ubwe ari umugati utanga ubugingo. Iki cyumweru cyose tuzumva iyi nyigisho. Musabwe rero kubangura amatwi yanyu kugirango hatazagira ikibacika.

1. Yezu ati : « Ndababwiza ukuri koko : ntimunshakira ko mwabonye ibimenyetso, ahubwo muranshakira ko mwariye imigati mugahaga » (Yh 6, 26). Kugirango twiyumvishe uburemere bw’iyi nyigisho, twakwibukiranya uko Yezu yatangiye umurimo we wo gucungura bene muntu. Aho amariye kuba umugabo agatangira ubutumwa bwe bwo gukiza isi hari ibikorwa bitatu by’indatana yagombye guhangana nabyo. Ibyo bikorwa ni ibi : gushakira rubanda ibyo kurya, kubashyiriraho ubutegetsi buhamye no kubahesha agaciro. Guharanira izi nshingano bijyana akenshi n’ibishuko. Ibishuko by’ingenzi by’umuntu ushaka gucungura rubanda nabyo ni bitatu. Igishuko cya mbere ni icy’ubukungu. Ashuka Yezu ngo areke umugambi we wo gucungura bene muntu, Sekibi yaramubwiye ngo : « Niba uri umwana w’Imana, tegeka iri buye rihinduke umugati » (Lk 4,3). Mu kumusubiza Yezu yifashishije ijambo ry’Imana aramubwira ati : « Haranditswe ngo ‘Umuntu ntatungwa n’umugati gusa’ » (Lk 4, 4). Sekibi ntiyashizwe, yamushukishije ubutegetsi kugirango areke ubutumwa bwe bwo gukiza isi. Niko kumubwira ati : « Nzaguha gutegeka biriya bihugu byose, nguhe n’ubukire bwabyo, kuko nabihawe kandi nkabigabira uwo nshatse. Wowe rero nundamya byose biraba ibyawe » (Lk 4, 6-7). Nanone mukumusubiza Yezu yifashishije ijambo ry’Imana amubwira aya magambo : « Haranditswe ngo ‘Uzaramye Nyagasani Imana yawe, abe ari we uzasenga wenyine » (Lk 4, 8). Yezu atsinze igishuko cy’inda n’ubutegetsi, Sekibi yazamuye icy’agaciro. Burya umuntu ugira agaciro ni ugira aho avuka kandi akagira n’ubumenyi. Sekibi rero amujyana ku gasongero k’ingoro y’Imana ati « Niba uri umwana w’Imana, ngaho simbuka. Kuko handitswe ngo Izategeka abamalayika bayo bakurinde. Kandi ngo ‘Bazagusama kugirango udasitara ku ibuye’ » ( Lk 4, 9-11). Burya Sekibi afite ubumenyi bwinshi burimo n’Ijambo ry’Imana, ariko arabugoreka ku nyungu ze bwite zo gusenya ibyo Imana yubatse. Mu kumusubiza nanone Yezu yifashishije ijambo ry’Imana agira ati : « Byaravuzwe ngo ‘Ntuzagerageze Nyagasani Imana yawe » (Lk 4, 12). Ibi bishuko byose Yezu yarabitsinze maze bene muntu abaha umugati utanga ubugingo, ababera umutegetsi utegeka isi n’ijuru, abaha n’agaciro ko kwitwa abana b’Imana. Ariko ibi byose yabihaye uwemeye gupfa ku bw’ibyaha bye maze akazukana nawe mu bapfuye. Barahirwa rero abasonzeye gukiza rubanda bagendeye ku ijambo ry’Imana.

2. Muti ese padiri ibi bihuriye he n’ivanjiri y’uyu munsi ? Aho bihuriye ni uko ivanjiri y’uyu munsi igaruka mu buryo butatuye ku gishuko cya mbere kirebana n’ubukungu. Umuntu ushaka gucungura bene muntu abizeza kubageza ku bukungu, nyamara akabikora yirengagiza Imana, aho kubageza ku mukiro urambye abashora mu nyenga y’umuriro. Iki gishuko Bikira Mariya yakigarutseho mu nyigisho yahaye isi abinyujije ku bana yabonekeye i Kibeho. Koko rero, igihe umubyeyi Bikira Mariya yazaga i Kibeho agamije kwigisha isi y’iki gihe abinyujije ku Rwanda, yabwiye Nataliya Mukamazimpaka ati : « Umwete mugira mufungurira inda zanyu, mujye muwugira mufungurira roho zanyu. Ibiryo ntibikaganze amasengesho n’amasakaramentu ». Hari kuwa 7 ukwakira 1983.

3. « Mwigisha mwageze hano ryari ? » Aka ni kamwe mu tugambo tw’uturingushyo, karimo uburyarya n’ukwibonekeza, Yezu adakunda. Iyo ubwiye Yezu utugambo nk’utu ukeka ko uri inyaryenge kumurusha, aragutamaza. Aya magambo yavuzwe n’imbaga y’abantu bari bakurikiye Yezu bakamusanga hakurya y’inyanja nyuma y’aho atuburiye imigati bakarya bagasigaza. Aho kumubwira bati ongera utubure imigati twirire, bo babanje kubisasira babaza utubazo tudafashije : « mwigisha, wageze hano ryari ? » Yezu yahise abatamaza abereka ko asoma mu mitima yabo, niko kubabwira ko mu byukuri batamushakira ukwemera batewe n’igitangaza cyo gutubura imigati, ko ahubwo ikibaraje ishinga ari uko bariye imigati bagahaga. Ndetse bakaba bagenzwa no kureba uko bamwimika ngo ababere umwami, bityo bajye birira bitabagoye. Mu mibanire yacu n’Imana n’abandi bantu tujye twirinda utugambo duca inkereramucyano, twuje uburyarya, tugamije gusa ubukire bushira. Tujye tuvuga ijambo ry’ukuri. Kuko ukuri niko kuzaduha kwigenga.

4. Nimuharanire ibiribwa bihoraho mu bugingo bw’iteka, ibyo umwana w’umuntu azabaha. Ivanjiri itubwira ukuntu byagendekeye umukungu kiburabwenge wejeje imyaka myinshi, aho yayifashishije abakene, agafata gahunda zo kubaka ibigega, kugirango ahunikemo iyo myaka, maze we wenyine aruhuke, arye, anywe, adabagire. We wenyine. Nyamara ngo Imana yaramubwiye iti: “Wa kiburabwenge we, muri iri joro uri bunyagwe ubuzima bwawe. Ubwo se ibyo wahunitse bizaba ibya nde?” (reba Lk 12, 16-20) Ivanjiri isoza igira iti : “Nguko uko bigendekera umuntu wikungahaza ubwe, aho guharanira ubukungu buva ku mana” (Lk 12, 21). Amateka yo muri ibi bihe, yatweretse ibihanganye byari bitunze nk’ibya Mirenge ku Ntenyo, ariko kuko ubwo bukungu bwaheezaga Imana, bwagize butya bubaca mu myanya y’intoki burayoyoka. Bugenda nka nyomberi basigara amara masa. Bantu murimo mwigwizaho imitungo mutitaye ku Mana no kuri rubanda, ubu nimwe muburirwa.

5. Igikorwa Imana ishima ni uko mwakwemera uwo yatumye. Dukunze guca umugani tuvuga ngo “Kora ndebe iruta vuga numve”. Nyamara ivanjiri irasa nitubwira ko icy’ingenzi ari ukumva ijambo ry’Imana. Dukunze kandi no guhanganisha ukwemera n’ibikorwa. Ese umuntu unogeye Imana ni uwemera cyangwa ni ugaragaza ibikorwa by’urukundo ? Mu gisubizo cye, Yezu atwereka ko tudakwiye kugonganisha ukwemera n’ibikorwa kuko ukwemera nako ari igikorwa. Ndetse kubwa Yezu, mu bikorwa Imana iha agaciro, ukwemera niko kuza imbere.

6. Muri iki gihe cya pasika duhamagarirwa kwemera ku buryo bw’umwihariko. Mu masomo ya liturgiya tumaze iminsi twumva tweretswe ukuntu ukwemera kuvuka. Akenshi tureba ibiriho tukamenya icyo bihishe kitagaragarira amaso y’umubiri ariko kikagararira amaso ya Roho. Urugero ni nk’ubwo Mutagatifu Yohani yinjiraga mu mva ya Yezu noneho agasanga ikinguye n’imyenda irambitse. Ngo yaritegereje maze aremera (Yh 20, 8). Icyo Yohani yemeye ni uko Yezu ari muzima, ko yazutse mu bapfuye. Ikindi kidufasha kugirango twakire ukwemera ni ukugendana na Yezu, tukamutega amatwi, tukamugezaho akababaro kacu, tugasangira nawe. Abigishwa b’i Emmaüs ni iyi nzira banyuze kugirango bagarure ukwemera bari bamaze guta nyuma y’aho Yezu yiciwe atanzwe n’abategetsi bakuru, akabambwa ku musaraba. Inzira y’i Emmaüs ni inzira tunyuramo iyo twagiye mu misa : kuko twakira tukagendana na Yezu uje atugana, kukumva ijambo rye, hanyuma kugasangira nawe. Tukaza gusohoka mu misa dufite ubutumwa tugomba kugeza ku bandi. Nyuma y’aho abigishwa b’i Emmaüs bamenyeye mu kwemera ko Yezu yazutse mubapfuye akaba akiriho, bahise bajya i Yeruzalemu kwamamaza iyi nkuru. Kwemera rero bijyana no kuba abahamya n’abogezabutumwa.

7. Bavandimwe, nimucyo dushikame dusabe Imana ngo itwongerere ukwemera, dukore ugushaka kwayo, maze dukire. Mukomeze mugire Pasika nziza.

Padiri Bernardin TWAGIRAMUNGU