Catégories
Inyigisho

Mushore imizi muri Kristu

Inyigisho yo ku wa kabiri, icyumweru cya 23 gisanzwe, C, 2013

Ku ya 10 Nzeri 2013 – Yateguwe na Padiri Théoneste NZAYISENGA

AMASOMO: 1º. Kol 2,6-15; 2º. Lk 6,12-19

  1. Mushore imizi muri Kristu kandi mube ari We mwishingikirizaho mubifashijwemo n’ukwemera babatoje

Bavandimwe, ejo kuwa mbere twazirikanaga ukuntu Yezu Kristu akomeje umugambi wo kwigisha no gukiza abantu. Uyu mukiro ariko adusaba kuwakira. Kwakira uyu mukiro na byo bigasaba gushora imizi muri Kristu. Uwashoye imizi muri Kristu ntaba akishingikiriza iby’iyi si bihita byaba abantu cyangwa ibintu. Ahubwo abifashijwemo n’ukwemera yatojwe ahora yishingikirije kuri Kristu maze akamubera inkingi yegamiye, urutare yikingamo n’ingabo imukingira. Bene uwo ni we ushimira Imana ubudahwema, ntashukishwe inyigisho z’ubuhendanyi n’ibitekerezo by’ubuyobe bw’abantu; kandi rero bavandimwe, inyigisho z’ubuyobe, z’ubuhendanyi zishingiye ku bitekerezo by’abantu ni nyinshi muri iki gihe, zireze n’abazigana bakazemera ni benshi.

  1. Mwagenywe muri Kristu

Pawulo Mutagatifu arifuza gukemura impaka za bamwe mu Bayahudi, batari barahindutse abakristu ku buryo bwuzuye. Bari bakivangavanga. Abo ni bo bumvishaga Abanyakolosi ko ari ngombwa kugenywa, naho Pawulo akababwira ko ibyo nta cyo bimaze. Nyamara si Pawulo Mutagatifu wenyine wamaganaga iyi mico, ibyo yavugaga rwose ntibyari bishya, n’abahanuzi benshi bari baravuze ko kugenywa by’ukuri ari ukugenywa ku mutima. Ni ukuvuga kugira umutima usukuye kandi ukamaganira kure ikibi(reba Yer 4,4;9,24;Ivug 10,16; 30,6). Mu gihe cya Pawulo n’Abanyakolosi kimwe no muri iki gihe turimo si ikibazo cyo kugenywa cyonyine ahubwo hari n’utundi tugenzo tudafite akamaro abantu bubakiraho Iyobokamana. Bamwe bati:” ntiturya ibi, ntitunywa ibi,twubahiriza isabato, tubatizwa mu mazi menshi cyangwa make, turasenga, turabonekerwa, turerekwa, ijuru ryatuvugishije, turigomwa, dutanga ituro,…”. Bene abo Pawulo yabahaye iri tegeko:”ntihakagire ubacira urubanza ku byerekeye ibiribwa cyangwa ibinyobwa, cyangwa se kubera iminsi mikuru, imboneko z’ukwezi n’amasabato. Ibyo byose ni amarenga y’ibyagombaga kuzaba ariko ukuri nyakuri ni Kristu. Ntihakagire kandi ababavutsa amahoro bitwaje utugenzo tudafite akamaro, bagasenga abamalayika, bakirata ko babonekerwa, bakurikije ibitekerezo byabo by’amanjwe. Bene abo bitandukanyije n’umutwe uhuza kandi ukagaburira umubiri wose( Kol 2,16-19), ari wo Kristu na Kiliziya ye.

  1. Yasibanganyije urwandiko rwadushinjaga

Mu buzima busanzwe, iyo umuntu afitiye mugenzi we umwenda bandika urwandiko buri wese akarusinyaho. Hanyuma bamara kwishyurana rwa rwandiko bakarushwanyura. Ni ko bimeze no muri Kristu. Urwandiko rwadushinjaga kubera umwenda twari dufitiye Imana ku bw’amategeko yayo tutakurikije, Yezu yarushwanyaguye igihe apfiriye ku musaraba. Pawulo Mutagatifu akoresha rero icyo kigereranyo ashaka kwerekana uburyo Kristu yacunguye abantu bose. Abo yacunguye rero bahamagarirwa kwibumbira muri We no kugaragarizanya ubwo bumwe bw’abana b’Imana.

  1. Byose bitangizwe, biherekezwe kandi bisozwe n’isengesho

Mu Ivanjili y’uyu munsi turumva Yezu atora intumwa ze. Ibyo yabikoze amaze gusenga, ndetse ijoro arikesha asenga Imana. Mu Ivanjili ya Luka umwanditsi atubwira rwose ibyerekeranye n’isengesho rya Yezu ubugira incuro 11: ku munsi yabatizwaga na Yohani Batista, igihe abantu benshi bamuhombotseho kugira ngo abumve kandi abakize, mbere y’uko atora intumwa ze, mbere y’uko asaba Petero guhamya ukwemera kwe, ku musozi igihe yihindura ukundi, igihe intumwa zari zigarutse zivuye mu butumwa, mbere gato yo kwigisha isengesho rya “Dawe uri mu ijuru”, igihe asabira Petero ngo ukwemera kwe kudahungabana, mu murima w’imizeti i Getsimani, ku musaraba igihe asabira abishi be n’igihe ashyira roho ye mu biganza by’Imana Se.

Bavandimwe, niba Yezu Kristu Imana rwose n’umuntu rwose asenga mbere, mu gihe na nyuma ya buri gikorwa, twebwe turi bande bo guha agaciro gake isengesho mu bikorwa byacu bya buri munsi? Ni ahangaha ubugambanyi butangirira. Ni ho umuyoboro waduhuzaga n’Imana wangirikira ndetse n’ipfundo ryari ridupfunditse ku Mana rigapfunduka maze ishami ryari ku muzabibu rigasigara rinagana iyo rigize amahirwe ntiryume ngo rihunguke.

  1. Icyo Nyagasani agusaba: irinde kuba umugambanyi

N’ubwo Yezu mbere yo gutora intumwa ze yaraye asenga, agatora akurikije ubushishozi n’ubuhanga bwe, kandi akabigirana urukundo n’impuhwe, n’ubwo yamaranye n’intumwa ze imyaka itatu yose zimwigiraho imvugo, ingiro n’ingendo, ntibyatumye hatavukamo umugambanyi. Tugomba rero kwitondera ubwigenge Imana yaduhaye kugira ngo bitatuviramo ubwigomeke bwo soko y’ubugambanyi, bugambanira Imana na mugenzi wacu, bugatesha agaciro icyizere Imana yatugiriye iturema kandi buri wese ikamugenera ubutumwa bumukwiye.

Bikira Mariya aduhakirwe, abatagatifu twizihiza none Nikola, Auberti na Pulkeriya badusabire.

Padiri Théoneste NZAYISENGA