Catégories
Inyigisho Igihe cya Adiventi

Namwe rero nimube maso

Inyigisho yo ku cyumweru cya 1 cya Adiventi A

[Ku ya 01 Ukuboza 2013 – Yateguwe na Padiri Charles HAKORIMANA]

 Bakristu bavandimwe , Kristu Yezu akuzwe,
Twinjiye mu gihe cya Adventi . Nta gushidikanya  benshi muri twe tumaze guhimbaza Adventi nyinshi. Tukamara ibyumweru  hafi bine mu gihe cyitwa Adventi. Adventi bikavuga gutegereza. Umubyeyi wacu Kiliziya iduteganyiriza icyo gihe mu mwaka wa Liturujiya ngo tuzirikane ko dutegereje. “Turi abategereje Umukiza“. Uyu munsi  Ivanjili iratubwiriza kuba maso.

Uyu munsi muri Kiliziya yo mu Karere k’Ibiyaga Bigari “ACEAC“ ni ukuvuga u Rwanda, u Burundi, na Repubulika iharanira Demokarasi ya Kongo turafatanya dusabe Amahoro, Ubutabera n’ubwiyunge nk’uko byasabwe n’inama y’abepiskopi bo muri ibyo bihugu mu nama yabo yo kuwa  13-18/05/2002

Turi, abategereje 

Dutegereje iki? Hari igihe twihenda tukibwira ko dutegereje Umunsi mukuru wa  Noheli bityo tukaba ntaho twaba dutaniye n’abandi bose yemwe batangiye mbere ya Adventi kwitegura Umunsi Mukuru wa Noheli ku buryo bwabo. 

Ivanjili y’uyu munsi (Mt 24,37-44) , iratubwira uburyo Umwana w’Umuntu azaza atunguranye, ikatugira n’inama y’uko tigomba kwitwara. 

Iki gihe cya adventi kikatwibutsa cyane cyane iby’ihindukira rya Nyagasani. Ni akanya ko kwibuka ko dutegereje cyangwa duteze. Nibyo ntawuzi umunsi n’isaha Nyagasani azagarukiraho twibuke ko hari imperuka rusange hakaba n’imperuka ya buri wese. Ntawuzi igihe azapfira.

Gutegereza.

 Iyo umuntu ategereje umushyitsi ukomeye, iyo umuntu ategereje inshuti afite uko yitwara afite uko yifata.  Inzu ye arayitunganya akisukura n’ibindi. Iyo umuntu ategereje inshuti ye ikomeye agakomye kose akitiranya n’intambwe z’uwo mukunzi uje . Buri mwanya amaso ayahanga amarembo n’ubwuzu bwinshi ngo amubone yinjira. Umutima ntutuza ntujya hamwe. Ndahamya ko ibyo buri wese byamubayeho inshuro irenze imwe cyangwa bizamubaho.

Ibyo nibyo Yezu adusaba gutegereza kuko tutazi umunsi n’isaha. “Mwitonde, mube maso“

Mwitonde:

Muti ubwitonzi bukavahe muri iyi si idutebekana ituzunguza, muri iyi si yiruka amasigamana. Ko twahindutse ba “Nzabuturukaha nzabutura hariya“ Twakwitonda dute kandi tugomba guhiga ifaranga hasi kubura hejuru. Twakwitonda dute n’ibishashagirana by’iyi si? Kandi tugomba  kwiryohereza kuko iterambere ryatuzaniye byinshi byiza. Muri make hari byinshi byadutwaye bitubuza kwitonda. No mu gihe cyaNowa niko byari bimeze.

Mube maso: 

Ntibyoroshye kuba maso waguye agacuho,kubera bya bindi byose bituma udatuza. Kuba maso si ibyo kudasinzira ni ikigereranyo cy’uko tugomba kwitwara kuri roho zacu. Ni ukwigiramo Yezu, ni ukuba hamwe na Yezu mu byo dukora byose. Iyaba twagiraga amahirwe yo kwibaza buri mwanya niba turi kumwe na Yezu. Mbere yo kuvuga ibyo ugiye kuvuga wabibwira Yezu, ibyo ukora uri kumwe na Yezu cyangwa ntushaka ko abimenya. Ibyo nibyo bidusinziza. Pawulo intumwa ati “ Aya magingo tutimo ni igihe cyo gushiguka mu bitotsi …” (Rom 13,11), hanyuma akadusaba kugenda ahabona nta bikorwa by’umwijima. Muri make ati “ Ntimukishinge umubiri ngo mukore ibyo wifuza (Rom 13,14). 

Iki gihe cya adventi ni umwanya buri wese ahawe wo kongera kwisuzuma ngo arebe uko ahagaze. Byagenda bite isi irangiye none? Witeguye gutaha none?Iyo umuntu akiri muto nkiga aba yumva kuba umutagatifu byoroshye kandi bishoboka cyane akumva nakura azagira imbaraga zidasanzwe agahita aba umutagatifu. Uko imyaka agenda yicuma akibwira ko abamuruta abari imbere ye mu myaka aribo bafite uburyo bwo kwitagatifuza bityo akagenda abyigizayo. Menya ibi ngibi: igihe cyawe ni iki ngiki, umunsi wawe ni uyu munsi. Icyo ubasha gukora none wigishyira ejo.

Iryo jwi rikubwira ngo ba witonze uzaba uhinduka uzaba ureka ingeso iyi n’iyi ni irya Sekibi, ni jwi rigusinziriza ridashaka ko wicura, ridashaka ko uba maso. Kanguka ufate ibyemezo ukore gahunda nshya uyu munsi dutangiye umwaka mushya wa Liturujiya ntuzakubere nk’indi yarangiye. Ngo bibe ibisanzwe . Duhinduke , abanyarwanda bagira bati “Niko bisanzwe yotsa umuserebanya”. Twishakemo  imbaraga nshya tubihawe na Yezu tujye ku irondo dutegereze Umukiza. Utegereje amaso ye ayahanga icyerekezo uwo ategereje aturukamo. Mu nteruro y’isengesho ry’ukaristiya iyo tubabwira ngo “imitima yanyu nihugukire iby’ijuru” (Sursum corda), nibyo baba batwibutsa. 

Iki gihe kitubere icyo kuvugurura ubukiristu bwacu tureka ibidatunganye mu mibereho yacu.

Padiri Charles HAKORIMANA