Catégories
Inyigisho

“Naremeye, bintera kwamamaza” (2 Kor 4, 13)

Inyigisho yo ku wa gatanu, 18 Ukwakira 2013

Umunsi Mukuru wa Mutagatifu Luka, Umwanditsi w’Ivanjiri

Isomo rya mbere: 2 Tim 4, 9-17; Ivanjiri: Lk 10, 1-9 

Bavandimwe,

Ineza, ibyishimo n’amahoro bikomoka kuri Nyagasani Yezu Kristu, Umukiza wacu, bihorane namwe. Mugire umunsi mwiza wa Mutagatifu Luka.

Nyuma yo kumva amasomo matagatifu, ndifuza ko muri iyi nyigisho twibanda kuri uwo mutagatifu Kiliziya iturarikira guhimbaza uyu munsi.

1. Mutagatifu Luka ni muntu ki?

Luka yari umugereki, ukomoka mu gihugu cya Siriya. Yari afite umurimo w’ubuganga. Ni umwe mu banyamahanga b’ikubitiro bemeye Inkuru Nziza ya Yezu Kristu (Intu 11, 20-21). Iyo Nkuru nziza, Mutagatifu Luka yayakiranye ibyishimo, maze amaze kuyisogongeraho yumva iraryoshye. Nuko ntiyashobora kuyihererana wenyine no kwikubira ibyiza byayo. Ni yo mpamvu yahise ajya kuyamamaza ; afatanya na Pawulo mutagatifu mu ngendo za gitumwa. Ariko ibyo ntibyamuhagije. Ahubwo yafashe n’umwanya wo kwicara, yandika ibyo yumvise byose kuri Yezu Kristu ; nuko aba umwanditsi w’Ivanjiri ya gatatu, nyuma ya Matayo na Mariko. Nk’umunyabwenge kandi, mbere yo kwandika iyo vanjiri, yabanje gukora ubushakashatsi buhagije kugira ngo atugezeho inkuru y’imvaho. Dore uko abyivugira mu ntangiriro y’Ivanjiri ye :

« Ubwo benshi batangiye kwandika barondora ibyabaye muri twe, mbese nk’uko twabigejejweho n’ababyiboneye kuva mu ntangiriro, ari na bo bari bashinzwe kwamamaza ijambo ry’Imana, nanjye maze kubaririza neza uko byagenze kuva bigitangira, niyemeje, nyakubahwa Tewofili, kukwandikira ayo mateka nyakurikiranyije, ngo umenye nyakuri ukuntu inyigisho washyikirijwe zihamye » (Lk 1, 1-4).

Bavandimwe,

Nimubona akanya uyu munsi, mwongere mwisomere kandi muzirikane Ivanjiri Mutagatifu Luka yatugejejeho. Muze kongera kureba uko itwereka Yezu, Umukiza w’abantu bose, n’uruhare rwa Bikira Mariya mu mateka y’ugucungurwa kwacu. Mwongere mwumve ukuntu Ivanjiri ye ivuga impuhwe z’Imana. Muze kumva inama itugira yo kutaba umucakara w’ibintu. Mwongere mwumve ukuntu itwigisha gusenga ubutitsa nk’uko Yezu yabigenzaga. Muze kurangamira Yezu Kristu, Mudahemuka w’Imana. Muze kwibuka umugenzo mwiza wo gukunda abakene no kubitaho. Muze gusabagizwa n’ibyishimo by’uko mukunzwe byahebuje na Nyagasani…

Kutugezaho Ivanjiri nabyo ntibyamuhagije. Mutagatifu Luka yarongeye aricara, maze arandika. Nuko atugezaho indi nyandiko nziza y’igitabo cy’Ibyakozwe n’Intumwa. Yatubwiye uko Kiliziya yatangiye mu mbaraga za Roho Mutagatifu n’ukuntu Inkuru Nziza yamamajwe kuva i Yeruzalemu kugera i Roma. Kandi ibyo avuga nabyo ni iby’umuhamya wo kwizerwa, kuko ari mu bateguye iyo nzira yose Inkuru Nziza ya Yezu Kristu yanyuzemo, kugera mu mugi wa Roma, wari nk’umutima w’isi y’icyo gihe.

Bavandimwe, dushime Nyagasani Yezu Kristu, We uzi kwitorera intumwa ze, akazohereza nk’uko twanabyumvise mu Ivanjiri y’uyu munsi, kugira ngo zamamaze hose Inkuru Nziza ye y’umukiro. Tumushimire cyane cyane uyu munsi kubera Mutagatifu Luka yaduhaye, kugira ngo abe umwe mu ba mbere batumenyesheje iyo Nkuru Nziza. Dushimire kandi na Mutagatifu Luka, we wakiranye ingoga ubutore, agasiga byose, akitangira Yezu Kristu n’iyamamazabutumwa.

2. Bimwe mu byo twakwigira kuri Mutagatifu Luka muri iki gihe

Bavandimwe,

Tuzirikane ibintu bitatu gusa. Icya mbere numva twamwigiraho ni ukutiharira ibyiza dukesha ukwemera Kristu n’Inkuru Nziza ye. Pawulo mutagatifu ni we ugira ati « Naremeye bintera kwamamaza » (2 Kor 4, 13). Akongera ati « Ndiyimbire rero niba ntamamaje Inkuru nziza ! » (1 Kor 9, 16). Luka nawe yaremeye, nuko aramamaza.

Icya kabiri ni ugukoresha uburyo bwose bushoboka kugira ngo Kristu amenyekane, ayobokwe kandi akundwe. Mutagatifu Luka yakoresheje ubwenge bwe n’ubuhanga yari afite. Yakoze ingendo nyinshi yamamaza Inkuru Nziza. Ariko cyane cyane yakoresheje inyandiko, adusigira atyo Ivanjiri n’igitabo cy’Ibyakozwe n’Intumwa. Natwe dukoreshe impano, ubuhanga n’ibyo dutunze Nyagasani yaduhunze, kugira ngo Kristu amenyekane hose. Dukoreshe n’ikoranabuhanga rigera ku bantu b’iki gihe.

Icya gatatu twakwigira kuri Mutagatifu Luka, ni umutima mwiza n’ubudahemuka byamuranze, cyane cyane kuri Pawulo basangiye akabisi n’agahiye mu nzira y’ubutumwa. Koko yabereye Pawulo inkoramutima n’incuti magara. Yamubaye hafi, cyane cyane igihe yari mu buroko bwe bwa mbere i Kayizariya, ku buryo Pawulo amuvuga nk’umuganga afitiye urukundo : « Arabatashya Luka, umuganga dukunda » (Kol 4, 14). Ndetse n’igihe Pawulo yari afungiwe i Roma, Luka ntiyigeze amutererana nk’uko twabyumvise mu isomo rya mbere. Pawulo ati : « Luka ni we wenyine tukiri kumwe » (2 Tim 4, 11). Koko rero abandi bari baramutaye. Inshuti nyayo uyimenyera koko mu byago!

Bavandimwe,

Uyu munsi buri wese yibaze: ni iki Nyagasani Yezu antezeho muri iki gihe? Ni iki nakora, ni iki natanga kugira ngo Inkuru Nziza ye imenyekane hose? Uruhare rwanjye ni uruhe mu iyamamazabutumwa? Ni iyihe nkunga abogezabutumwa b’iki gihe bantezeho?

Mutagatifu Luka, udusabire.

Iyi nyigisho yateguwe na Padiri Balthazar NTIVUGURUZWA