Catégories
Inyigisho

Natwe, turiyimbire!

Inyigisho yo ku wa gatanu  w’icyumweru cya 26 gisanzwe, C, 2013

Ku ya 04 Ukwakira 2013 – Umunsi mukuru wa Mutagatifu Fransisko wa Asizi

Mwayiteguriwe na Padiri Balthazar NTIVUGURUZWA

Amasomo:Baruki 1, 15-22; Ivanjili : Luka 10, 13-16  

Bavandimwe,

Ineza n’amahoro bikomoka kuri Nyagasani Yezu Umukiza wazu bihorane namwe!

Nimugire umunsi mwiza wa Mutagatifu Fransisko wa Asizi. Nimucyo tuzirikane amasomo y’uyu munsi duhereye ku Ivanjili ntagatifu.

Mu Ivanjili y’uyu munsi uko yanditswe na Luka mutagatifu, Yezu Kristu ababajwe n’imigi ya Korazini, Betsayida na Kafarinawumu kuko itigeze imenya ko “Nyagasani yayigendereye” maze ngo yihane. Koko rero, muri iyo migi Yezu yakunze kuhigishiriza no kuhakorera ibitangaza. Iyo migi yabonye kenshi Yezu. Yamwumvishe kenshi yigisha Inkuru nziza y’Ingoma y’Imana. Yabonye ibitangaza byinshi yahakoreye. Ariko ibyo byose ntacyo byamariye abari bahatuye. Ntibigeze bafungura umutima wabo ngo bakire impuruza yo kwisubiraho. Amatwi yabo bayavuniyemo ibiti. Banangiye umutima. Bivukisha batyo “ubuntu bugeretse ku bundi” (Yh 1, 16). Ni cyo gituma Yezu yagize ati “Iyimbire Korazini! Iyimbire, Betsayida! Kuko ibitangaza byabakorewemo, iyo bikorerwa muri Tiri no muri Sidoni, kuva kera baba barisubiyeho, bakambara ibigunira bakisiga ivu. Nyamara ku munsi w’urubanza muzahanwa kurusha Tiri na Sidoni. Naho wowe, Kafarinawumu, ubona ko uzakuzwa kugera mu bicu? Uzarohwa ikuzimu!” (Lk 10, 13-15).

Bavandimwe,

Iyo migi ntitwihutire kuyicira urubanza, tuvuga tuti kuki ariko yanangiye umutima, ikivutsa ityo ingabire y’Imana, kandi Yezu ntacyo yamuburanye! Twisuzume ahubwo. Twebwe se ni iki Nyagasani atadukoreye kugira ngo atwimenyekanishe, tumugane, tumukunde, tumukorere, tumwakire mu buzima bwacu? Yaratwiyeretse. Yadukuye ahakomeye. Yadukoreye byinshi. Yadukoreye ibitaganza bitabarika. Twahawe byinshi. Twigishijwe byinshi mu Ijambo rye. Yaratwihaye kenshi mu Ukaristiya Ntagatifu kuva tumuhabwa bwa mbere kugenza magingo ya. Twumvise misa nyinshi. Dufite izina ryiza. Turi aba-Kristu. Twitwa abakristu. Natwe Yezu ntacyo twamuburanye; habe na kimwe. Mbese yaratudabagije. Twaratoneshejwe.

Ariko se duhagaze dute? Natwe, turiyimbire! None se mu myitwarire yacu, mu myumvire yacu, mu migenzereze yacu, mbese mu buzima bwacu, mu mfuruka zabwo zose, tugaragaza koko ko twamenye Yezu n’Inkuru nziza ye? Twakiriye dute impuruza ye yo kwisubiraho? Ese twarahindutse koko? Turusha iki abataramumenye, aba twita abapagani? Aho imitima yacu ntimeze nk’iyabaturage ba Korazini, Betsayida na Kafarinawumu? Turiyimbire! Gusa, iyaba uyu munsi, twakundaga kumva ijwi rye, ntitunangire umutima wacu… (Zab 95, 7-8).

Bavandimwe,

Isomo rya mbere ryo mu gitabo cy’Umuhanuzi Baruki ni ryo ryatweretse ko umutima ukwiye ari umutima uzi gusaba Imana imbabazi, mu bwiyoroshye no kwicisha bugufi. Koko rero, iri somo ryatugejejeho igice cya mbere cy’isengesho ry’Abayisraheli bari barajyanywe bunyago i Babiloni n’umwami Nebukadinetsari; isengesho rirerire kandi ryiza risaba imbabazi Nyagasani Imana (Bar 1,15-3,8). Abajyanywe bunyago bumvise ko ibyo byago barimo byari inkurikizi z’ibicumuro byabo, zo kwigomeka kuri Nyagasani, kutumva ijwi rye, kudakurikiza amabwiriza ye, gutera umugongo Imana nyakuri no kohoka inyuma y’izindi mana. Barasaba rero imbabazi, bemera icyaha cyabo, biyemeza kugarukira Imana kandi bizeye impuhwe zayo.

Bavandimwe,

Turiyimbire rero niba natwe twarigometse ku Mana! Turiyimbire niba ducumurira Imana, ariko tukanangira umutima, tukanga kwicuza ngo tuyigarukire! Kuko kure y’Imana nta tuze, nta mahoro, nta munezero, nta buzima! Tujye rero tumenya gusaba imbabazi z’ibicumuro byacu, n’iz’ubuhemu bwacu. Twicuze ibyaha byacu, tugana intebe ya Penentesiya. Nyagasani Imana umubyeyi wuje urukundo, impuhwe n’ubuntu aradutegereje kugira ngo aduhunde imbabazi ze, atuvane ibuzimu atujyane ibuzima. Koko rero, Imana ntiyishimira urupfu rw’umugome, ahubwo yishimira ko yahinduka akazibukira imyifatire ye mibi kugira ngo abone kubaho (reba Ezk 33, 11).

Izo mpuhwe n’ubuntu ni byo byatumye Mutagatifu Fransisko wa Asizi duhimbaza uyu munsi ahinduka. Nyuma yo kohoka ku maraha n’ubukungu by’iyi si, yaje guhura n’impuhwe z’Imana, arahinduka koko. Yahise asiga ibye byose, asiga iby’isi n’ubukungu bwayo. Yahisemo inzira y’ubukene; nuko ubukungu bwe, ibyishimo bye, n’ubuzima bwe bwose biba kuberaho Kristu wenyine n’Ivanjili ye gusa.

Mu gihe duhimbaza uyu mutagatifu, twibuke ko Umubyeyi wacu Papa yamutoyeho izina ry’ubupapa. Tumusabire kugira ngo asohoze neza ubutumwa Nyagasani yamutoreye bwo kuba umusimbura wa Petero Intumwa. Twakire impuruza ageza kuri Kiliziya kugira ngo nka Mutagatifu Fransisiko, igende mu nzira yo kwicisha bugufi n’ubukene, ngo ibone uburyo buboneye bwo kwamamaza Inkuru nziza muri ibi bihe turimo.

Nyagasani Yezu nabane namwe!