Catégories
Inyigisho

Ni jyewe utanga ubugingo

Inyigisho yo kuri uyu  wa kabiri 21 mata 2015 w´icyumweru cya 3 cya Pasika

Amasomo:1) Intu 7,51-60; Zab 31(30); Yh6, 35.

– Utanze ikihe kimenyetso ngo tukwemere? Bakristu bavandimwe, tumaze iminsi twumva uburyo rubanda bagerageza Yezu bamusaba gukora igitangaza ngo kugirango bamwemere. Uyu munsi, rero, Yezu nk´umuntu w´umuhanga n´umwigisha, arasubiza rubanda ahereye ku bikorwa by´Imana mu isezerano rya cyera, ko “manu”, umugati  waturutse mu ijuru, atari Musa wawubahaye, ahubwo ari Se, Data wa twese, wawubahaye. Bavandimwe rero, ikimenyetso cya manu kiratwereka ko ntacyo dufite cyangwa dutunze, mu biduha ubuzima, kidaturuka ku Mana, Se wa Yezu, Rugira twese dukesha ubugingo. Icyo turi cyo n´ibyo dutunze byose tubikesha Imana Rurema.

– Yezu niwe mugati utanga ubugingo. Yezu ni nk´aho yavuze ati”ni jyewe kimenyetso cy´ukwemera”. Umbona nta kindi kimenyetso akeneye. Kandi umbona aba abonye Data wantumye. Ati” unsanga wese ntazasonza bibaho, n´unyemera ntazagira inyota bibaho. Yezu  niwe mugati nyakuri wamanutse mu ijuru aje kuduhaza twese maze tugashira inzara, ntidusonze bundi bibaho. Akaba ari nawe  soko y´ ubugingo budashira. Tumusabe rero ajye ahora aduhaza maze ntidusonze bundi bibaho. Tumwemerere rero maze atubere urutare rukomeye, abe ariwe utwiyoborera.  Maze tuvuge tudashidikanya tuti: Ni wowe rutare rwanjye Mana yanjye, ni wowe niringiye, nzaguhanga amaso buri gihe, ngusabe imbaraga maze ntsinde icyago! Duharanire kubona Yezu mu buzima bwacu bwa buri munsi kandi aduturemo. Bikira Mariya Nyirimpuhwe twereke Umwana wawe Yezu kandi ntutwibagirwe twese abaguhungiraho. Mutagatifu Anselme  udusabire.

Padiri Emmanuel MISAGO