YEZU AKUZWE

Inyigisho

Ni nde uri hejuru y’Imana Umushoborabyose?

Ku wa 3 w’icya XXXIV, C, 27/11/2019

Amasomo: Dan 5, 1-6. 13-14. 16-17. 23-28; Zab Dan 3, 62-64. 65-67; Lk 21, 12-19.

Tumenyereye kubona benshi mu banyabubasha b’iyi si, abategetsi cyangwa abagize amahirwe yo gutunga byinshi, bumva ko bihagije ndetse bakibwira ko batagikeneye Imana mu buzima bwabo, bakaba barayirukanye mu mibereho yabo ya buri munsi ndetse bakima amatwi n’abayivuga, bakabasuzugura kugeza n’aho babatoteza no kubica bitabuze. Abo, kimwe n’abandi bose bagenza nka bo, baribeshya kuko ubwirasi n’ubwibone nta cyo buvuze imbere y’Imana.

Amasomo twumvise uyu munsi aratwereka ko Imana ari Umushoborabyose n’Umusumbabyose. Nta n’umwe uri hejuru ya Yo, nta we uyirusha ubushobozi ndetse nta n’uwakwigereranya na Yo. Ntirushwa amaboko.

Mu isomo rya mbere twumvise ishyano rigwiriye umwami Balitazari. Yigerejeho yirata kuri Nyagasani Nyir’ijuru mu gihe yifashishaga ibikoresho bitagatifu byo mu Ngoro ya Yeruzalemu mu gusingiza ibigirwamana bye. Yirengagije ko Imana ibumbatiye ubugingo bwe mu biganza byayo ndetse ikagenga n’amayira ye yose. Ku bw’ibyo: “Imana yabaze imyaka umaze ku ngoma maze irayisoza”; “Wapimwe ku munzani maze uburemere bwawe bugaragaza ko udashyitse”; “igihugu cyawe cyagabanyijwemo kabiri, gihabwa Abamedi n’Abaperisi”. Ngiryo iherezo ribi ry’ingoma y’uwigometse ku Mana.

Muri iki gihe dufite ba “Balitazari” benshi cyane. Tubana n’abantu badamaraye mbese biberaho nk’abageze iyo bajya kuko birunzeho imitungo aka ya siha rusahuzi maze bakaba batekereza nka wa mukungu kiburabwenge. Ibyabo ni ukurya, kunywa no kudabagira kuko bibwira ko bashyitse iyo bajya. Bavuniye ibiti mu matwi ngo batumva imiborogo hirya no hino y’abashonji, abarara rwantambi kubera intambara n’imidugararo hirya no hino, abazira akarengane, abicwa n’indwara z’ibyorezo, … kandi ibyo byose babifitemo uruhare kuko ibyabo ari ukunyunyuza imitsi ya rubanda. Kubabwira iby’Imana kuri bo ni nk’igitutsi.

Dukeneye abantu b’intwari nk’uyu musore Daniyeli. Ntabwo ariye iminwa imbere ya Balitazari. Amubwije ukuri. Natwe abakristu tugomba guhaguruka tukamamaza Inkuru nziza ya Yezu Kristu. Yezu adutuma gutangariza abantu Inkuru nziza y’umukiro. Iyo Inkuru nziza duhamagarirwa kwamamaza si iyo kuryoshyaryoshya abantu ubabwira ibyo bashaka kumva ariko kandi si n’iterabwoba ahubwo ni uguhumuriza abantu tubabwira guhinduka ngo bakire ubugingo bw’iteka.

Yezu araduhamagarira kumubera abagabo. Tugomba guhamya Yezu Kristu aho rukomeye. Araduteguza. Ntabwo atubwiza akarimi karyohereye ahubwo aduhishurira urudutegereje: tuzatotezwa, ducibwe, dufungwe ndetse tuzicwa tuzira Izina rye. Nyamara ntabwo adutererana: “Muzirinde guhagarika umutima mwibaza uko muziregura, kuko ubwanjye nzabaha imvugo n’ubuhanga abanzi banyu batazashobora kurwanya cyangwa kuvuguruza”. Aratubwira ko ntacyo tuzaba kuko nta gasatsi na kamwe ko ku mutwe wacu kazagira icyo kaba.

Muri iki gihe twitegura gutangira umwaka wa Liturjiya, nidufate ingamba. Nimucyo tujye ku ruhande rw’abumvira Imana tureke kwirukanka inyuma y’iby’iyi si bishira ahubwo twibande ku by’ijuru bizira iherezo maze igihe azazira azasange twese dukereye kubana na We ubuziraherezo ubu n’iteka ryose. Amen

Padiri Léonidas NGARUKIYINTWARI

Back to top nunc commodo ut tempus dictum id