Catégories
Inyigisho

Ni ngombwa ko umenya uko wifata mu nzu y’Imana

Inyigisho yo ku wa gatatu, icyumweru cya 24 gisanzwe, C, 2013

Ku ya 18 Nzeli 2013 – Mwayiteguriwe na Padiri Cyprien BIZIMANA

AMASOMO: 1º. 1Tim 3,14- 16; 2º. Lk 7, 31-35

Pawulo intumwa yagiriye inama nyinshi Timote. Iyo tuzisomye tuzirikana bihagije, natwe tuboneraho tukumva. Ni ko Imana yabishatse: mu ikubitiro rya Kiliziya yahaye abantu bamwe na bamwe ingabire zikomeye zo gucengera amabanga yayo no kuyasobanura. Biboneraga ukuntu ari abantu nk’abandi, bigatuma bahamya ko rwose amabanga y’Imana ari amayobera ahanitse adashyikirwa n’ubonetse wese wirangariye nka bariya bana YEZU yavuze biyicariye ku kibuga nta cyerekezo kindi bafite, bamwe bagakina bakikinagura abandi biyicariye, bamwe bakaririmba abandi bakagaragaza ko nta cyo bibabwiye. Gucengera ayo mayobera bituma umuntu yinjira mu busabaniramana bufite umucyo. Kudasobanukirwa n’ayo mabanga meza asumbye ubuhanga bwose bwa muntu, ni cyo gituma tutamenya uko twifata kuri iyi si, bikatuviramo guhora dusabayangwa kugeza ubwo serwakira ya Sekibi iza ikatugurukana itwerererana aho ishaka mu mwijima.

Ibisobanuro inshuti z’Imana zakomeje kutugezaho uko amasekuruza yagiye asimburana, ni byo byatumye haboneka abantu benshi bakataza mu mibereho ifite umurongo usobanutse w’ubuzima. Ibyo bisobanuro byose bikubiye muri Bibiliya Ntagatifu. Kuva ku Byanditswe bya kera mbere ya YEZU KRISTU kugera ku Ivanjili ye yanditswe na Kiliziya hagamijwe kuyobora abantu bo mu bihe byose inzira y’Umukiro, byose biduha kumenya uko twifata muri ubu buzima. Umuntu wese ukunda gusoma no kuzirikana Ijambo ry’Imana, riramuhugura akamenya uko yitwara. Amatwara agenderaho amukomeza ni ahuje na YEZU KRISTU wazutse mu bapfuye agasubira kwa Se mu ijuru aho yicaye kandi azaturuka aje gucira imanza abazaba bakiriho n’abazaba barapfuye.

Imungu ijya yigabiza imitima y’abantu, ni ukwiberaho mu magambo menshi atagira shinge kandi agamije gusebya ibyiza. Ni uko kwiyicarira ku kibuga nta murimo wundi, umuntu akareba abahisi n’abagenzi abanegura ku buryo budashingiye ku kuri. N’uhise yamamaza Umukiro agahindurwa nk’umusazi cyangwa injiji. Ni uko abantu bo mu gihe cya Yohani Batisita batashoboye kumva neza ubuzima bwe bwo kwiziga ategura amaza y’Umukiza YEZU KRISTU. Baramwitegerezaga mu matwara ye bakumva n’inyigisho ze maze bakamwita umwirasi. Ibyo nta cyo byatanze, yikomereje amatwara ye y’ukuri maze YEZU na we aje n’amatwara yo kwegera abasoresha, abapubulikani n’abandi banyabyaha bose agamije kubagezaho Ijambo ry’agakiza, rubanda bamuha akato n’urwamenyo, baranangira banga kumwumva. Ni ho yakurije kuvuga ko abantu bagoye rwose ari ba Ntamunoza nk’uko twabivuga mu Kinyarwanda.

Uzirikana wese Amasomo Matagatifu ya none akwiye kwibaza ati: “Amatwara yanjye ni ayahe mu nzu ya Nyagasani (mu Kiliziya nsenga no hanze mu buzima busanzwe)? Ese ahuje na YEZU KRISTU cyangwa ndiho nta cyo mariye Kiliziya Umubiri wa KRISTU nitwaramo uko nishakiye? Ese mu bavandimwe banjye ndangwa n’ukuri cyangwa n’ishyari rituma ibyiza bakora ntabyishimira? Ese ko ndi umuntu w’urubyiruko (umusore cyangwa inkumi), nitwaye nte imbere n’inyuma; ese mparanira kwisukura mu mutima cyangwa ndi Birihanze uhora yijandika mu byaha by’ubwomanzi; ese mu bishuko byose mpura na byo, mbasha kuzirikana Ijambo ry’Ukuri rya YEZU KRISTU?”. Buri wese mu rwego n’umwanya arimo yakwibaza byinshi ahereye ku Masomo ya none. Kubyibaza no kwivugurura, ni ikimenyetso kidashidikanywa cy’uko ayobowe n’Umwuka w’Imana Data Ushoborabyose. Ijambo ry’Imana n’Igitambo cy’Ukarisitiya cya buri munsi biduhe kurushaho kunga ubumwe na YEZU KRISTU ayobore imibereho yacu yose n’amateka yose y’ukubaho kwacu kugeza umunsi YEZU KRISTU azaduhamagarira kumurangamira ubuziraherezo.

YEZU KRISTU asingizwe. Umubyeyi Bikira Mariya aduhakirwe. Abatagatifu duhimbaza none, Yozefu wa Kupertino, Ariyana, Sofiya, Dominiko Traci, na Rikarida, badusabire.