Nibibabere uko mubyemera

INYIGISHO YO KUWA 6 UKUBOZA 2019: KU WA GATANU W’ICYUMWERU CYA MBERE CYA ADIVENTI

“MWEMERA KO NSHOBORA GUKORA IBYO NGIBYO? NIBIBABERE UKO MUBYEMERA”.

AMASOMO: ISOMO RYA MBERE: Iz 29,17-24

                       ZABURI: 27(26) ,1-4abcd, 13-14

                       IVANJILI: Mt 9, 27-31

Bavandimwe muri Kristu, nimugire ineza n’amahoro bituruka ku Mana Data na Mwana na Roho Mutagatifu!

Uyu munsi ni uwa gatanu w’icyumweru cya mbere cya Adiventi, turi mu ntangiriro z’igihe kidutegurira kwakira umukiza wacu. Muri iki gihe cy’ibyumweru bine turitegura guhimbaza umunsi mukuru wa noheli tuzirikana ko Imana yigize umwe muri twe kugira ngo itugezeho umukiro wayo.

Amasomo matagatifu tuzirikana muri iki gihe cyose, ni amasomo y’ibyishimo n’amizero ko umukiro wacu uri bugufi, ni amasomo y’ihumure ko ibyago n’amakuba biri mu nzira yo kuzimira hakima umunezero kuko umucunguzi wacu ari bugufi.

Ni muri icyo cyerekezo tuzirikanamo amasomo y’uyu munsi aho umuhanuzi Izayi atangariza ibafite ubumuga bwo kutabona n’abafite ubumuga bwo kutumva ko igihe cyabo cyo gutabarwa kigiye kugera, ko hasigaye igihe gito bakabona bakanumva.

Umuhanuzi arahamya ko icyo gihe abaciye bugufi bazarushaho kwishimira Nyirubutagatifu wa Isiraheli ngo kuko uwo munsi uzaba iherezo ry’abategetsi b’abagome, abashungerezi bagakozwa isoni n’abashaka gukora nabi bose bakarimburwa. Umuhanuzi arakora urutonde rw’abagizi ba nabi batazongera guhabwa umwanya mu bihe bishya.

Bavandimwe, ntawahakana ko ibi bihe umuhanuzi avuga byifuzwa na buri wese. Nyagasani aturema yateye mu mitima yacu inyota y’ihirwe. N’ubwo abantu bashobora kumva iryo hirwe ku buryo butandukanye, buri wese yifitemo iyo nyota. Umunyarwanda iyo avuze guhirwa abyumva mu kubaho no kuramba, kubyara no guheka no mu gutunga no gutunganirwa.

Iruhande rw’iryo hirwe n’inyota yaryo birababaje ko ari ho usanga sekibi yategeye kugira ngo muntu ajye kure y’Imana kuko hari abashakisha umunezero wabo mu guhonyora uburenganzira bwa bagenzi babo, abandi bagashakisha ibyishimo byabo batitaye ku gushaka kw’Imana.

Ababura iryo hirwe bifuza muri ubu buzima turimo ntibabibuzwa na bagenzi babo gusa kuko hari n’abawubuzwa n’ibiza; aha twavuga nk’abagwiriwe n’umunara wa Silowe (Lk13,4), hari n’abavuka bafite ingorane z’umubiri ku buryo uwo munezero bawubuzwa. Abo ni nk’abavukana ubumuga bwo kutavuga, kutumva, kutabona cyangwa n’ubundi.

Kuri abo bose ubutumwa ni bumwe: Nyagasani aje kubakiza ikibi cyababuzaga ibyishimo, Nyagasani abazaniye umukiro. Mu Ivanjili twumvise uburyo Yezu akiza impumyi zimutakambira abishingiye ku kwemera kwazo.

Bavandimwe, dufite byinshi bitugoye kandi twifuza ko Nyagasani adukiza ari ku bijyanye n’ibya roho no ku by’umubiri, dufite ibintu biduteye ubwoba kandi twe ubwacu twumva tudashobora kubonera ibisubizo, ni kenshi dutakamba mu masengesho yacu tubwira Nyagasani ngo adutabare ariko se ukwemera kwacu ko Nyagasani yashobora kutubera igisubizo kungana iki?

Nyagasani aratubaza ati: “MWEMERA KO NSHOBORA GUKORA IBYO NGIBYO?” nitumusubiza ko tubyemera akatubwira ati: “NIBIBABERE UKO MUBYEMERA” aho koko ibibazo byacu bizabonerwa ibisubizo?

Nk’uko tubibona henshi mu ijambo ry’Imana, abo Nyagasani yagiye akiza yarababwiraga ati: “genda amahoro ukwemera kwawe kuragukijije”. Natwe tuzakizwa n’ukwemera kwacu. Nitwemere ko twemera ariko kandi dusabe Nyagasani ko yatwongerera ukwemera kwacu kudashyitse.

Umubyeyi Bikira Mariya adusabire kugira ngo muri iki gihe twitegura kwakira umwana we Yezu Kristu, duharanira gusukura imitima yacu kugira ngo tumwakire koko nk’inshuti n’umugenga.

Padiri Oswald SIBOMANA

accumsan dictum libero Nullam Lorem at Curabitur